Wiñay jakañatak luratätanwa
TAQENIW kusisita walja tiempo jakañ muntanjja. Wiñayatak jan usuntasa, kusisita jakassna ukajj wali kusiskañäspawa. Walja tiempow munat familiaranakasamp jakassna, walja markanakaruw viajiraksna, walja lurañanakwa yateqsna, wali yatiñaniruw tukuraksna, kun lurañatï gustkistu uk jukʼamp sumwa yatjjataraksna.
¿Kunatsa jaqenakajj wiñay jakañ muntanjja? Jehová * Diosaw wiñay jakañ munañ chuymasar uchi sasaw Bibliajj qhanañchi (Eclesiastés 3:11). Ukatjja, “Diosajj munasiñawa” sasaw saraki (1 Juan 4:8). Uk amuytʼasajj akhamwa jisktʼassna: ‘¿Wiñay jakañ munatas jan phoqañ puedksna ukhajja Diosajj uk chuymasar uchaspänti?’ sasa.
Janiw khitis jiwañ munktanti. Cheqas jiwañajj jan wali ‘enemigowa’ sasaw Bibliajj qhanañchi (1 Corintios 15:26). Yaqhep jaqenakajj wayn tawaqökasaw jiwjjapjje, yaqhepasti chuymanëjjapjje ukhaw jiwjjapjjaraki, cheqas taqeniw jiwañar puriñäni. Waljanejja, jiwañarojj ajjsarapjjewa, janirakiw uka toqet lupʼiñ munapkiti. ¿Jiwañarojj kunapachas atipjpachäñäniti?
WIÑAY JAKAÑ SUYTʼÄWEJJ PHOQASIPUNINIWA
Diosajj jaqenakan jiwapjjañap janiw munkänti, ¿uk yatiyätati? Jaqenakajj wiñayatak aka oraqen jakasipjjaspa ukwa Diosajj munäna, Bibliankiri Génesis librow uk qhan amuytʼayistu. Nayraqatjja, jaqenakan jakasipjjañapatakejj wali sumwa Diosajj aka oraq luräna. Ukjjarusti Adán chacharuw luräna, mä suma paraisoruw ucharakïna, uka paraisojj Edén cheqankänwa. Ukatjja, Diosajj “taqe kuntejj lurkän ukanakan sumätapwa uñjäna” (Génesis 1:26, 31).
Adán chachajj Diosar uñtasitänwa, perfecto luratänwa (Deuteronomio 32:4). Eva esposapajj cuerponsa amuyunsa perfectorakïnwa. Jehová Diosajj akhamwa jupanakar säna: “Jichhajj wali mirantapjjam, aka oraqerusti phoqhantapjjarakim, apnaqapjjarakim; taqe chawllanakarusa, jamachʼinakarusa apnaqapjjam, ukhamaraki oraqenjam qatatnaqtir animalanakarusa” sasa (Génesis 1:28).
Adanampi Evampejj walja tiemponwa aka oraqer wawanakapamp phoqantapjjaspäna. Diosan amtap phoqañatakejja, Eva warmejj wawanakanïñapänwa, wawanakapas wawanakanïpjjañaparakïnwa, ukhamatwa aka oraqerojj phoqantapjjañapäna (Isaías 45:18). Adanampi Evampitï, wawanakaparu allchhinakapar uñjañkamaki jakapjjaspäna ukhajja, kuntï Diosajj jupanakar siskäna ukajj inamayakïspänwa.
Animalanakaru cuidapjjañapäkäna uka toqet amuytʼarakiñäni. Adanajj taqe animalanakaruw suti uchañapäna, ukatakejj walja tiempow munasïna (Génesis 2:19, 20). Ukampis animalanakar sum cuidañatakejj sapa mayniruw sum uñtʼañapäna, ukatakejj walja tiempow munasirakïna.
Ukhamajja, aka oraqer phoqantapjjam, animalanakarus apnaqapjjarakim siskäna uka mandatojja, jaqenakajj walja tiempo jakapjjañapatak luratäpjjatapwa uñachtʼayi. Cheqas Adanajj walja tiempow jakäna.
MÄ SUMA PARAISON WIÑAY JAKASIPJJAÑAPATAKIW DIOSAJJ JAQENAKAR LURÄNA
WALJA TIEMPOW JAKAPJJÄNA
Adán (930 maranakaw jakäna)
Matusalén (969 maranakaw jakäna)
Noé (950 maranakaw jakäna)
Jichhürunakana (70-80 maranakakwa jaktanjja)
Janïr Uma Juiciojj aka oraqer purkäna uka nayrajja, jaqenakajj jichha tiempot sipansa walja maranakaw jakapjjerïna. Génesis 5:5 textojj akham siwa: “[Adanajj] llätunk pataka kimsatunkani maranakarakiw jakäna” sasa. Ukjjarusti sojjta chachanakatwa parlaraki, jupanakajj Set, Enós, Cainán, Jared, Matusalén ukat Noé chachanakäpjjänwa, 900 maranakats jilaw jakapjjäna. Uma Juiciojj janïr qalltkäna ukhajja, Noé chachajj 600 maranïnwa (Génesis 5:6-27; 7:6; 9:29). ¿Kunatsa walja maranak jakapjjäna?
Jupanakajja, Adanampi Evampejj jan perfectöjjapjjäna uka jakʼanakaw nasipjjäna. Inas ukat walja tiempo jakapjjchïna. Ukampis ¿kunjamsa perfectöñajj walja tiempo jakañatak yanaptʼi? ¿Kunjamsa jiwañarojj atipjasini? Uka jisktʼanakar qhanañchañatakejja, kunatsa chuymankipsttan, jiwaraktan ukwa nayraqat yatiñasa.
^ Párrafo 3 Diosan sutipajj Jehová satawa sasaw Bibliajj yatichi.