Rosa sat warmejja akham siwa: “Awk taykajatwa mä usu katoqawayta, uka usojj wal tʼaqesiyitu. Janiw nayrjamäjjti, aynachtʼataw uñjasta” sasa. Rosa warmejja, janiw Bibliatsa, ni Bibliat apstʼat qellqatanakatsa yatjjatañ puedjjänti. Juparojja Mateo 19:26 qellqataw yanaptʼäna, ukanjja Jesusajj akham sänwa: “Diosatakejj taqe kunas lurasikispawa” sasa. Rosa warmejj kunjamsa Bibliat yatjjataspa ukwa amuytʼäna. Awisajja usupajj wal aynachtʼayäna, ukhamajj janiw liytʼirjamäkänti, ukatwa Bibliasa Bibliat apstʼat qellqatanakasa istʼañatakejj utjki uka grabacionanak istʼäna. * Jupajj saskakiwa: “Janitï grabacionanakajj utjkaspäna ukhajja, Diosar serviñan aynachtʼataw uñjasiriskayäta” sasa.

Rosa warmejja, usutätap laykojj janiw nayrjam kunsa lurirjamäkiti. Ukaw juparojj llakisiyi, ukampis 2 Corintios 8:12 qellqatankki uka arunak amtañaw chuymachtʼi, ukan akham siwa: “Taqe chuyma churktan ukaw Diosarojj wal kusisiyi. Diosajj janiw kuntï maynejj jan churirjamäki uk suykiti, jan ukasti qhawqhatï maynin utjki ukarjam churañapwa jupajj suyi” sasa. Uka arunakajja, Rosa warmirojj lurirjamäki uk luratapat Diosajj kusisitätap amtayi.

Diana warmejja, akham siwa: “18 marani phuchajan jiwatapajja, qʼalpun aynachtʼayitäna, janiw jakañsa munjjayätti, janiw kunas nayrjamäjjaniti sasaw amuyayäta” sasa. Juparojj Salmo 94:19 qellqataw wal chuymachtʼäna. Salmo qellqerejja, Diosarojj akham sänwa: “Llakinakajjajj walipun yapjjataskän ukapachaw chuymachäwimampejj kusisiyista” sasa. Dianajj saskakiwa: “Jan llakisiñatakejja, kun lurañas yanaptʼitaspa sasaw Jehová Diosar mayisiyäta” sasa.

Dianajja mayninakar yanaptʼañatakiw chʼamachasïna ukaw jan aynachtʼañatakejj jupar yanaptʼäna. Tiempompejja, qellqañatak mä tizäkaspas ukham amuyasïna, tizanakajj pʼakitäpkchisa qellqañatakejj walikïsipkiwa. Dianajj mä pʼakit tizäkaspas ukhamwa amuyasïna, ukampis mayninakarojj yanaptʼaskakispänwa. Jupajj sänwa: “Bibliat yateqerinakajjaru chuymachtʼañatak Bibliat mä texto liytʼarapiyäta ukhajja, Jehová Diosas nayar chuymachtʼkitaspa ukham amuyasiyäta” sasa. Diosan servirinakapat waljaniw Biblian qellqata, jupanakatwa Dianajj mä lista lurasïna. ¿Kunsa yateqäna? Dianajj saskakiwa:“Diosan servirinakapajja, jan walin uñjasisajj Diosar oración lurapjjapunirïnwa, ukhamajj Diosampi yanaptʼayasiñatakejja, maynejj Bibliat yatjjatañapawa” sasa.

Janiw ukakïkänti, Dianarojj nayra tiempot amtañat sipansa, kunanakas jutïr urunakan pasani uk amtañatakiw Bibliajj yanaptʼawayi. Kuntï Hechos 24:15 qellqatan qhanañchki uk amtañaw wal chuymachtʼi, ukan akham siwa: “Cheqapar sarnaqer jaqenakasa jan cheqapar sarnaqer jaqenakas jaktanipjjaniwa” sasa. ¿Dianajj Jehová Diosaw phuchajar jaktayani sasin confiypachati? Jupajj akham siwa: “Phuchajajj jaktaniniwa, ukat janiw pächaskti. Alajjpachankir Diosajja, kunapachas phuchajar jaktayani ukajj libropan qellqatäjjewa. Niyas phuchajampejj jardinajan jikisipkirista ukham amuyasta, kunjamtï naskäna uka urojj munasiñamp uñjkayäta ukhama” sasa.