Nayrïr yatichäwin parlaniwayktan uka Diana warmirojja, llakinakapaw sapa kuti alcohol umañar apaskäna. Bibliajja mä jukʼa alcohol umañ janiw jarkʼkiti, ukampis akham siwa: “Machir jaqenakampejj jan mayachasimti” sasa (Proverbios 23:20). Machantañkam alcohol umañajja, usuntañaru, chacha warmjam jaljtañaru ukat jiwañaruw maynir puriyaspa. Jaqenakatï Biblian ewjjanakaparjam sarnaqapjjaspa ukhajja, janiw uka jan walinakan uñjasipkaspati.

Diana warmejja, Bibliarjamaw sarnaqañ qalltäna, jupajj akham siwa: “Alcohol umañajja, janiw llakinakaj chhaqtaykänti. Kuntï Filipenses 4:6, 7 qellqatan siski ukarjam sarnaqañatakiw chʼamachasta, ukan akham siwa: ‘Jan jumanakajj kunatsa llakisipjjamti, jan ukasti taqe llakinakamjja Diosaru oracionan yatiyapjjam’ sasa. Sapa arumaw Jehová Diosar mayisirïta. Llakinakajat amtasirïta ukhajja, Diosaruw kunja chuyma ustʼatäyätsa, llakitäyätsa taqe ukanak yatiyirïta, ukatjja jan añcha llakisiñatakiw yanaptʼa mayisirïta. Qhepürusti, llakinak armtʼañatakiw chʼamachasirïta. Kunatï jan utjkitäna ukanakat lupʼiñat sipansa, utjkitäna ukanakat lupʼiñatakiw Diosar mayisiñajj yanaptʼitu. Alcohol umañ jaytañwa amtayäta, Diosampejj sum apasjjayäta, janiw uk aptʼasiñ munkayätti” sasa.

Qʼañu jucha lurañajja, maynirojj wal chuyma ustʼayaspa. Biblian yatichäwinakapaw ukar jan purtʼasiñatakejj yanaptʼistaspa. Kunanakatsa amuyasiñajj wakisi ukanakwa qhanañchi. Sañäni, jan casarasiñ amtampi maynir uñchʼukiñasa, pornografía uñchʼukiñasa, kunatsa jan walïki ukanakwa qhanañchi. Samuel sat mä waynajj akham siwa: “Jan casarasiñ amtampi maynir uñchʼukiñajj facilakiwa. Nayajj maynir gustataj amuyasta ukhajja, jupar uñchʼukiñajj walikïkaspas ukhamwa amuyayitu” sasa. Qhepatjja, jan casarasiñ amtampi yaqhanakar uñchʼukiritwa, uka waynarojj uñtʼapjjäna. Ukatwa Samuel waynajj uk jukʼamp lurañ amtäna, ukhamarus janiw concienciapan sum jikjjataskänti. Jupajj akham siwa: “Jan casarasiñ amtampi maynir uñchʼukisajja, jumatakik taqe kuns munirïtam uñachtʼaytajja, chuymsa maynir ustʼayasmawa” sasa.

Samuelojj Internetan jw.org cheqan waynanakataki mä yatichäwejj utjkäna ukwa liytʼäna. Proverbios 20:11 qellqatatwa lupʼirakïna, ukan akham siwa: “Mä waynan cheqa sarnaqatapajja, luratanakapatwa uñtʼasi” sasa. ¿Kunjamsa uka ewjjajj yanaptʼäna? Samuelojj jan casarasiñ amtampi maynir uñchʼukiñajj jan walïtapwa amuyäna. Jupajj siwa: “Jan casarasiñ amtampi maynir uñchʼukirejja, janiw casarasisin esposapampejj sum jakkaspati. Casarasirista ukhajja, kunjamakis esposajajj uñjitaspa ukwa lupʼiyäta. Ukajj janipuniw walïkaspati. Maynir uñchʼukiñajj faciläkchisa, janiw walïkiti” sasa. Ukham amuyañaw qʼañu juchar jan purtʼasiñatakejj Samuelor yanaptʼäna.

Antonio sat chachajja, jukʼamp jan walinwa uñjasïna. Jupajj pornografía uñchʼukiñar yatintatänwa. Esposaparojj walsa munaskchïnjja, uka jan walinak janiw jaytirjamäkänti. 1 Pedro 5:8 qellqataw jupar yanaptʼäna, ukan akham siwa: “Wali amuyumpipun sarnaqapjjam, amuyasipjjarakim. Jumanakar uñisir Diablojja, mä leonar uñtataw warartʼasis muyuski, maynir manqʼantañwa thaqaskaraki” sasa. Antoniojj siwa: “Taqe cheqanwa pornografiajj utji, uka jan walinak armañajj chʼamawa. 1 Pedro 5:8 qellqatajja, khitisa uka jan wali qʼañu juchanakar purtʼasiñas muni ukwa amuytʼayitäna. Khititsa jutäna uk yatisajja, uka amuyunak jankʼak apanukuñ amtayäta. Jehová Diosakiw amuyojj jarkʼaqañatakisa, chuymajj jarkʼaqañatakisa, esposajampi sum jakasiñatakis yanaptʼitaspa” sasa. Diosan yanaptʼapampejja, Antoniojj janiw pornografía uñchʼukjjänti. Ukaw jan walir jan purtʼasiñatakejj yanaptʼäna.

Biblianjja suma yatichäwinakaw utji, ukaw jan walinakar jan purtʼasiñatakejj yanaptʼistaspa. Ukhamarus jan walinakajj jan askichañjamäki ukhajja, ¿kunsa lursna? Bibliajj kunjamsa yanaptʼistaspa uk jichhajj uñjañäni.