Tellancourt sat jiskʼa markanwa jakapjjayäta, ukajj Francia markat inti jalsut alay toqen jikjjatasi. Awkijajj Francia markatänwa, taykajasti Italia markataraki. Kimsaqallqo maranïkayäta ukhaw Roma markar sarjjapjjta, ukajj Italia markan jikjjatasi, ukanjja pisinak jakasipjjäna. Utan jakasiñajj wali chʼamänwa, awk taykajajj qollqetak chʼajjwasipkiri.

Kunapachatï 15 maranëjjayät ukhajja, mamajajj amigonak jikjjatañatakiw chʼamañchitäna. Ukhamatwa jan wali jaqenakampi chikachasiñ qalltjjayäta. Mä urojja, mä jaqew jikjjatitu, jupajj suma jaqjjamänwa, ukampirus droganak churitäna, nayajj jilïr jaqëñ munasaw uk katoqasiyäta. Ukhamatwa droganakampi qolljasjjayäta, qʼañu lurañanakan sarnaqjjayäta. Walja kutiw jan walinak munkir jan munkir lurapjjetäna. Nayajj janiw jakañ munjjayätti. Wali sapakiw jikjjatasiyäta. 16 maranëjjayäta ukhajja, jiwayasiñ munjjayäta, mä kutejj whisky sat machjayir uma umantasinwa mä qotar liwirantta. Ukhamïpansti, kimsa urunakaw jan amuyuni uñjasiyäta, niyapuniw jiwta.

Jakäwirojj wali askit uñj-jjayäta, ukampis wali qhoru, jaqenakat apaqeri ukhamäjjayätwa. Qollqe laykuw jaqenakampi ikintasiñ mayiyäta, utanakapar purisajja, droganakampi qolljasinwa yänakap lunthatsuwayirïta. Wali munañan droga aljirinakaw Italia markan droganaka aljayapjjetäna. Policiampi wali thaqatayätwa. Janis sum jakaskchiyätjja, jakäwejj mä suma amtampi luratapachaw sasaw amuyayäta. Ukatwa mä kutejj Diosar akham sasin mayista: “Mä maraksay kusisita, sum jakasiyita” sasa.

Kunapachatï 24 maranëjjayäta ukhajja, droga apnaqerinakaw jiwañ munitäna, ukatwa Inglaterra markar sarjjañ amtjjayäta. Janïr sarkasajja, mamitajar visittʼiriw sarawayta, ukanjja Annunziato Lugarà sat chacharuw Bibliat parlaskir uñjta, ukaw wal muspharayitäna. * Jupajj lunthat jaqënwa uk sum yatiyäta, jupar uñjasajj  walpun sustjasta, kunsa akan lurta sasaw jisktʼayäta. Jupasti kunjamsa nayra jakäwip jaytatayna, ukhamat Jehová Diosan Testigopäjjañataki ukwa cuenttʼitäna, ukatjja Inglaterra markar purisajj Testigonakar thaqapunïtawa sasaw sitäna. Ukampis janiw uk lurkayätti, nayrjam jan walinak luraskakiyätwa.

Mä urojja, Jehová Diosan Testigonakaparuw Yatiyañataki ukat ¡Despertad! sat revistanakampi Londres markan yatiyir uñjta, ukhajj kuntï Annunziato sat chachajj siskitäna ukwa amtta, ukatwa Bibliat yateqañ munta sasin sista.

Kuntï yateqkayäta ukajj wal muspharayitäna. Amuytʼañataki, 1 Juan 1:9 qellqatan kuntï Diosat siski ukajj chuymaruw purtʼitäna, ukan akham siwa: “Jiwasatejj juchanakas arsusiñänejja, jupajj cheqawa, askirakiwa juchanakas perdonañataki, ukhamarak taqe jan walinakata qʼomachañatakisa” sasa. Uka arunakaw nayra jakäwij jaytañatak yanaptʼawayitu, kuntï lurkayäta ukanakajj ajjtaskayätapwa amuyayitäna. Ukatjja jankʼakiw kawkhantï Jehová Diosan Testigonakapajj tantachasipki ukar sarayäta, ukanjja wali munasiñampiw katoqtʼapjjetäna. Jupanakajj wali sum apasipjjäna, maynit maynikamajj munasiñampiw katoqtʼasipjjäna, uk uñjasajj jupanak taypinkañwa nayajj munayäta.

Droganaka jaytañasa, qʼañu luräwinak jaytañas janiw chʼamäkänti, ukampis qhoru jaqëñ apanukuñaw nayatak wali chʼamäna. Mayninakar respetompi ukat munasiñampi uñjañatakiw chʼamachasiñajäna. Cheqas jichhakamas suma jaqëñatak chʼamachasiskaktwa. Ukampis Jehová Diosan yanaptʼapampiw nayrar sartaskta. Sojjta phajjsi Bibliat yateqasajja, 1997 maranwa Jehová Diosan Testigopjam bautisasjjta.

Bautisasjjta uka qhepatjja, Barbara kullakampiw jaqechasta, jupajj ukhanakakirakiw Jehová Diosan Testigopjam bautisasitayna. Mä nayra amigojajja, kunjamsa nayra jakäwij jaytawayta uk uñjasajj Bibliat yateqañ qalltawayi. Jichhajj kullakapampachaw Jehová Diosan Testigopjam loqtasipki. Awichajan kullakapas uka pachparak lurawayi, jupajj 80 mara jilaniw Bibliat yateqañ qalltawayi, tiempompejj bautisasiwayjjewa.

Jichhasti irpir chuymanjamaw mä taman irnaqtʼaskta, warmijampejj precursorjamaw Londres markan italiano aru parlir jaqenakar yatiyasipkta. Nayra jakäwij amtasajj wali aynachtʼataw awisajj jikjjatasta, ukampis warmijaw jan ukham jikjjatasiñatak wal yanaptʼitu. Mä suma familianïña, mä munasir Awkinïña wal thaqkäyäta uk jichhakuchaw jikjjatta. Diosarojj ‘mä maraksay kusisita, sum jakasiyita’ sasaw mayisiyäta, ukampis Jupajj jukʼampi bendicionanakwa churawayitu.