SAPA marajja, sojjta waranq jila jaqenakaw Shima cheqar sarapjje, ukasti Japón markan jikjjatasi. Ukar saririnakajja, Santuario de Ise ukaruw sarapjje, ukansti Sintoísmo religionankirinakajj Amaterasu Omikami diosaruw yupaychapjje, mä arunjja, Intiru. Jaqenakajj amparanakapa lakap jarisipjje, ukatsti haiden (oratorio) sat cheqanwa amparanak tʼajjllisipjje, mayisipjje ukhamarak yupaychapjje. * Sintoísmo religionar saririnakajj yaqha religionar sarañ janiw jarkʼkiti. Budismo religionankirinakasa, cristianöpjjtwa sirinakasa ukhamarak yaqha religionankirinakasa ukanakar sarañajj walikïskiwa sasaw sapjje.

Wali uñtʼat religionanakan santuarionakapasa, * jan ukajj templonakapas niya taqe cheqanwa utji. Waljanirakiw ukanakar visittʼir sarapjje. Yaqhep markanakanjja, walja iglesianaka ukat templonak lurawayapjje, ukanakat yaqhepanakajja, Jesusaru, Mariaru ukhamarak yaqha santonakar yupaychañatak luratawa. Yaqhep templonakajja, kawkhantï kunas paskäna, “milagronakas” luraskäna, jan ukajj kawkhantï wali valorani pachachanakajj imaski uka cheqanakaruw lurasiwayi. Waljaniw santuarionakaru sarapjje, oracionanakapajj ukar sarasakis istʼatäkaspa ukham amuyapjje. Yaqhepasti, walja kilometronak kayukiw sarapjje, ukhamat kunarutï creyipki ukar taqe chuyma yupaychapjjatap uñachtʼayañataki.

Diosarutï mä santuarion mayissna ukhajja, ¿Jupajj istʼaspati? Santuarionakar kayuk sarapjjatapjja, ¿Diosajj askit uñjpacha? Ukampis mä wakiskir jisktʼaw utjistu, ¿Diosarojj mä santuarionti cristianonakajj yupaychapjjañapa? Uka jisktʼanak yatiñajj wali wakiskiriwa, ukhamatwa templonakan Diosar yupaychañajj walikïskiti, janicha uk yatsna, jan ukajj kunjamsa Diosajj Jupar yupaychañas muni uksa yatiraksna.

Jesusajj Samaria markankir mä warmimp parlkäna ukhajja, Diosar ‘santuarionakan’ yupaychañajj walikïskiti, janicha ukwa qhanañchäna. Jesusajj Samaria marknam viajkasajj mä phuchʼu jakʼanwa Sicar cheqan samartʼaskäna. Ukhanwa, mä warmimpi parlañ qallti, uka warmisti judionakampi samaritanonakampejj Diosar jan pachpa yupaychapjjatapatwa parläna. Jupasti sänwa: ‘Nayra samaritano awkinakajjajj akana, aka qollunwa Diosar yupaychapjjerïna, ukampis jumanak judionakajj sapjjtawa “Jerusalén markawa yupaychañ cheqajj”’ sasa (Juan 4:5-9, 20).

Uka warmejj Guerizim qollutwa parlaskäna, ukasti Jerusalén markat 50 kilometronak alay  toqer sarañankiwa. Ukanwa, samaritanonakajj Pascua fiesta mä templon amtapjjerïna. Ukampis uka toqet chʼajjwañat sipansa Jesusajj akham sänwa: “Warmi, ak sisksma ukajj cheqawa, jan aka qollur ni Jerusalenar sarasin Diosar yupaychaña horasajj niyaw purinini” sasa (Juan 4:21). Niyakejjay Jesusajj judiöchïnjja, uka arunakajj wali ¡muspharkañapunïnwa! ¿Kunatsa Jerusalén templon Diosar jan yupaychasjjañapäna?

Jesusajj saskakïnwa: “Horasajj puriniwa, anchhichhawa, Awkiru cheqpach yupaychirinakajj ajayun, ukhamarak cheqa kankañampin yupaychapjjani. Awkejj ukhamwa yupaychayasiñ muni” sasa (Juan 4:23). Walja waranqa maranakaw judionakajj Jerusalén templon Diosar yupaychapjjäna. Ukarojj wali jayanakatwa maran kimsa kuti sarapjjäna, ukhamat Diosar sacrificionak loqtañataki (Éxodo 23:14-17). Ukampis janiw uka cheqan yupaychasjjaniti, jan ukasti “cheqpach yupaychirinakajj ajayun, ukhamarak cheqa kankañampin yupaychapjjani” sasaw Jesusajj qhanañchäna.

Judionakajja, jaqenakan lurat mä templonwa, jan ukajj Jerusalenan Diosar yupaychapjjerïna. Ukampis ajayumpi ukat cheqa kankañampejja, janiw uñjaskaspati ni mä cheqansa jikjjataskaspati. Ukhamajja, Jesusajj janiw Diosarojj mä templonsa ni yaqha ukham cheqansa yupaychasjjaniti sañwa munäna, kunjamtï Jerusalén templona nayrajj Diosar yupaychasirïkäna ukhama.

Samaritana warmimpi parlkäna ukhajja, Jesusajj “horasajj puriniwa” sasaw säna, cheqas Diosar ukham yupaychasiñapajj puriniñampïskänwa. ¿Kunapachas ukajj pasañapäna? Uka horajja, Jesusajj jakäwipa jaqenak layku aptʼaskäna, ukhaw purinïna. Jesusan jiwatapaw judionakan Diosar yupaychapjjatap mayjtʼayäna, judionakasti Moisesan Leyiparjamaw Diosar yupaychapjjäna (Romanos 10:4). Ukhampachasa, Jesusajj akham sänwa: “Horasajj purininiwa, anchhichhawa” sasa. ¿Kunatsa ukham sispachäna? Jesusajj jutaniw sat Mesiasänwa, waljanirakiw arkiripar tukusipkäna, jupanakarusti akham sasaw yatichäna: “Diosajj ajayuwa, khitinakatejj jupar yupaychapki ukanakajja ajayuna, ukhamarak cheqa kankañampina yupaychapjjañapawa” sasa (Juan 4:24). Ukhamajj Diosar ajayumpi ukat cheqa kankañampi yupaychañajj ¿kamsañsa muni?

Jesusajj Diosar ajayumpi yupaychañat parlkäna ukhajja, Diosan qollan ajayupampi yanaptʼatäñatwa parlaskäna, cheqas ukaw Biblian yatichäwinakap amuytʼañatak yanaptʼistu (1 Corintios 2:9-12). Ukjjarojja, Jesusajj Diosar cheqa kankañampi yupaychañat parlarakïna. Uka cheqa kankañasti, Biblian cheqa yatichäwinakapat kunatï cheqäki ukanak yatiñampi sasirakiwa. Ukhamasti, Diosar templonakana yupaychañat sipansa, Diosajj kunjamtï yupaychayasiñ munki ukhamarjamaw yupaychañasa, mä arunjja, Bibliajj kunjamtï  yatichki ukarjama. Ukatakejj Diosan qollan ajayupaw yanaptʼistani.

Templonakan Diosar yupaychasitap ¿kunjamsa cristianonakajj uñjapjjañapa? Wali jayanak kayuk templonakaru sarañajj ¿walikïskiti? Cheqa cristianonakajja, janiw santuarionakansa, ni templonakansa Diosar yupaychapkiti, jan ukasti kunjamtï Jesusajj siskänjja, ajayuna ukat cheqa kankañampiwa Diosar yupaychapjje. Bibliajj idolonakar yupaychasitapar kunjamsa Diosajj uñji uka toqet parlarakiwa, ukansti akham siwa: “Jitheqtapjjam yaqha diosanakar yupaychañatjja” ukhamarak “amuyasipjjam kʼari diosanakatjja” sasa (1 Corintios 10:14; 1 Juan 5:21). Ukhamajj cheqpach cristianonakajj janiw mä santuarionsa, jan ukajj templonsa Diosar yupaychapjjañapäkiti, ukanakar yupaychañajj idolonakar yupaychañampi sasiwa.

Ukampis Bibliajj janiw Diosar mä utan yupaychaña jarkʼkiti, ukhamasti cristianonakajj Diosan Arup yatjjatañatakisa, lupʼiñatakisa ukat mayisiñatakisa mä utan tantachtʼasisipkaspawa. Mä utatï wali suma lurtʼatächi ukhajja, Bibliat yatjjatañataki, Diosar uñtʼañatakiw yanaptʼaspa. Ukatjja, mä munat familiarasan nicho patapar sutip qellqañajj (lápida) walikïskiwa. Ukajj janiw jiwatanakar yupaychañampi saskiti, jan ukasti jiwatar amtañatakikiw ukajj lurasi. Ukampis uka cheqarutï wali qollanat uñjapjjaspa, jan ukajj uka cheqantï pachachanakaru ukat idolonakaru yupaychapjjchi ukhajj janiw walïkaspati, Jesusajj siskäna uka conträspawa.

Ukhamasti mayisitanakas Diosajj istʼañapatakejja, janiw santuarionakarusa ni templonakarus sarañajj wakiskiti, janirakiw bendicionap kayuk saririnakar Diosajj churkiti. Bibliajj akham siwa: “[Jehová Diosajj] janiw jaqen lurat templonakan jakkiti” sasa. Ukampis janiw ukajj Diosajj jaqenakat wali jayankkaspasa ukham sañ munkiti. Diosajj “janiw jayankkiti sapaqat jiwasanakatjja” sasaw Bibliajj yatichi, ukhamasti Diosar oración mayisiñajj walikïskiwa, Jupajj istʼistaniwa (Hechos 17:24-27).