¡WIÑAY JAKASIÑAJJ WALI SUMÄNIWA! Diosajja, ‘wiñayatakiw aka oraqen jakasipjjäta’ sasaw arsuwayi, ukajj walja jaqenakatakejj janiw creyiñjamäkiti. ‘Taqeniw jiwañar purtʼasiñäni’ sasaw amuyapjje. Yaqhepasti, ‘jiwjjasin alajjpachar sarasakiw wiñayatak jakassna’ sasaw sapjjaraki. ¿Jumajj kamsarakismasa?

Uka jisktʼar janïr qhanañchkasajja, Bibliajj kunjamsa aka jisktʼanakar qhanañchi uk nayraqat amuytʼam: Jaqejj kunjam luratäktantï ukarjamajja, ¿qhawqha tiempos jakañasäspa? ¿Kuna amtampis Diosajj oraqsa jaqenaksa lurawayi? ¿Kunatsa jiwañajj utji?

Animalanakajj kunjam luratäpjjesa uk uñjasajja, jaqenakajj jan kikpani luratätaswa amuytanjja. ¿Kunatsa ukham sistanjja? Jaqekiw Diosar uñtasit luratätanjja sasaw Bibliajj yatichi (Génesis 1:26, 27). ¿Ukajj kamsañsa muni? Diosajj jupjam chuymani, mä arunjja munasiri, cheqaparjam uñjiri ukham lurawayistu.

Yamas amuytʼirwa Diosajj lurawayistu, kunatï walïki jan walïki uk amuytʼiri, Jupar uñtʼañ muniri, amigopäñ muniri ukham lurarakistu. Ukham suma luratätasatwa alajjpachajj kunja jachʼasa, aka oraqejj kunja suma luratasa uk amuysna, suma pintat cuadronakasa yaqha ukham suma luratanakasa, musicas kunja sumasa uk amuyaraksna. Ukanakat sipansa Diosar adorañ muniri luratätanwa, ukatwa animalanakampejj janipun igualäktanti.

Amuytʼañäni: Diosatï 70 jan ukajj 80 maranak jakañatakik lurchistojja, ¿kunatsa jaqejj suma luratätanjja? ¿Kunatsa wiñayatak yateqeri luratarakïtanjja? Diosajj wiñayatak aka oraqen kusisit jakassna ukwa muni, ukatwa ukham lurawayistu.

Diosajj janiw aka oraqen wiñay jakañatak lurkistuti sasaw yaqhep jaqenakajj sapjje. Khitinakas alajjpachan Diosamp wiñayatak jakasipjjaspa, uk yatiñatakikiw jaqenakajj aka oraqen mä qhawqha tiempo jakapjje sasaw amuyapjjaraki. Ukatï cheqäspajja, ¿janit Diosas tʼaqesiñanakat juchanïkaspa ukham amuyaskaspa? Diosajj janipuniw jan walinak lurkaspati, ukatwa Bibliajj Jupat akham qhanañchi: “Cheqapa Diosawa, janiw jupanjja kunatejj jan cheqapäki ukajj utjkiti” sasa (Deuteronomio 32:4).

 Diosajj kuna amtampis aka oraq lurawayi uk akham sasaw Bibliajj qhanañchi: “Alajjpachajj Tatitunkiwa, jaqerusti oraq katuyi” sasa (Salmo 115:16). Jïsa, jaqenakan wiñayatak jakasipjjañapatakiw Diosajj aka oraq lurawayi, kunanakatï sum jakasiñatak wakiski ukanaksa utjayaraki (Génesis 2:8, 9).

“Alajjpachajj Tatitunkiwa, jaqerusti oraq katuyi” (Salmo 115:16).

Kuna amtampis Diosajj jaqenakar luräna uk Bibliajj qhanañcharakiwa. Akham sasaw Diosajj nayrïr awk taykasar säna: “Aka oraqerusti phoqhantapjjarakim, apnaqapjjarakim; taqe [...] animalanakarusa” sasa (Génesis 1:28). ¡Aka oraq cuidañasa, mä paraisor tukuyañas wali sumapunïspänwa! Adanampi Evampejj janiw alajjpachan jakañatak luratäpkänti, jan ukasti wiñayatakiw wawanakapampejj aka oraqen jakasipjjañapäna.

Bibliarjamajja, Diosajj lurkäna uka angelanakat mayniw Diosan amtanakap jan phoqasiñapatakejj Jupa contra saytʼäna, uka angelaw qhepat Supaya sasin uñtʼatäjjäna. ¿Kunsa Supayajj lurpachäna?

Dios contra saytʼasipjjañapatakiw Adanampiru Evampir amtayäna. Kunatï walïki jan walïkaraki uk ajlliñatwa Diosajj jarkʼasipktamjja sasaw Supayajj säna. Ukatwa jupanakajj Dios contra saytʼasisajj Supay toqet saytʼasipjjäna. ¿Kunarus ukajj Adanampiru Evampir purtʼasiyäna? Kunjamtï Diosajj siskänjja, tiempompejj jiwjjapjjänwa, wiñayatak Paraíso oraqen jakasiñsa aptʼasipjjänwa (Génesis 2:17; 3:1-6; 5:5).

Adanampi Evampi Dios contra saytʼasipjjatapajja, kunayman jan walinakanwa nayratpach uñjasiyistu. Bibliajj akham siwa: “Mä sapa jaqen [Adanan] juchapatwa juchajj akapachar mantani, jiwañajj uka juchan utjatapatwa mantaniraki, ukhamatwa jiwañajj taqe jaqenakar katunti, taqenin juchachasipjjatap layku” sasa (Romanos 5:12). Ukhamasti, nayra awk taykasat juchampi jiwañampi katoqatas laykuw jiwtanjja, janiw Diosan jan wali amtanïtapat jiwktanti.

Edén jardinan kunatï paskäna ukajja, Diosajj kuntï aka oraqetakisa jaqenakatakisa amtkäna uk janiw mayjtʼaykänti. Jupajj wali munasiri, taqe kunsa cheqapar uñjiri ukhamawa, ukatwa juchampita jiwañampita jaqenakar salvañatakejj kunatï wakiski uk luräna. Apóstol Pablojj akham sänwa: “Kuntï juchajj pagot churki ukajj jiwañawa, kuntï Diosajj Cristo Jesús Tatitus taypi ukhamak churki ukajja wiñay jakañawa” sasa (Romanos 6:23). Jaqenakar wal munasitap laykuw Diosajj “mä sapa Yoqap churäna, ukhamat taqe khitinakatï jupar confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” (Juan 3:16). Jesusan jaqenak layku jiwatapaw kunanaktï Adanajj aptʼawayki ukanak kutsuyawayi. a

Diosajj niyaw arsutaparjamajj aka oraq mä paraisor tukuyani. Ukan kusisit jakasiñatakejja, Jesusan aka ewjjaparjamaw lurañama: “Kʼullkʼu punknam mantapjjam, jiwañar apir punkojj wali jachʼawa, thakipas anchorakiwa, waljanirakiw uknam mantasipki. Ukampis jakañar apir punkojj wali kʼullkʼuwa, thakipas kʼullkʼurakiwa, jukʼanikiw uka thaki jikjjatapjje” (Mateo 7:13, 14). Ukhamajj jutïrin kunjam jakasiñsa munta uk jumaw ajlliñama. ¿Kun lurañsa amtäta?