JUMARUTÏ jan ukajj familiaramarutï “jan qollkañ usunïtawa” sasin yatiyapstam ukhajja, kunja llakkañasa uk amuypachätawa. Mä usutarojj janiw usupak jan waltʼaykiti, jan ukasti usutätap laykojj jukʼampiw jupajj llakisiraki. Doctoran ukar sapa kuti sarasasa, qollanak alañasa, jikjjatañasa, qollanak umasin cuerpon yaqha cheqanakar jan waltʼayatapasa jukʼampiw usutarojj ajjsarayi ukat llakisiyaraki. Jan qollkañ usunïñajj maynitak jan aguantañjamäspawa, qʼalwa aynachtʼayarakispa.

¿Kunas ukhaman uñjasirinakarojj yanaptʼaspa? Waljanirojj orasiña, chʼamañchtʼkir textonak Bibliat liytʼañaw chuymachtʼi. Maysa toqetjja familiaranakana  jan ukajj amigonakan munasiñampi uñjatapa, yanaptʼatapaw chuymachtʼaraki.

Robert sat chachajj 58 maraniwa, jupajj usutanakar akham siwa: “Usumampi jan aynachtʼañatakejja, Diosaruw confiyañama, Jupaw nayrar sartañamatak yanaptʼätam. Kunjamäsktasa uk Diosar yatiyam, espíritu santop mayisirakim. Familiam layku usumamp jan aynachtʼañatakisa, aguantaskakiñatakis mayisirakim” sasa.

Robert chachajj saskakiwa: “Familiamajj jumamp chikäni, yanaptʼarakïtam ukajj wali wakiskirïniwa. Familiaranakajat yaqhepajj kunjamäsktsa uk yatiñatakejj jawsanipjjapunituwa. Yaqha cheqan jakasiri amigonakajas chʼamañchtʼapjjarakituwa. Ukaw jan llakisiñatakisa aguantaskakiñatakis yanaptʼitu” sasa.

Usut mä amigomar visitañ amtasksta ukhajja, Linda sat warmin arunakapat amtasim. Jupajj akham siwa: “Usutanakajja, janis usutäpkaspa ukham jakasiñwa munapjje. Ukhamajj janiw usupat parlañasäkiti jan ukasti, yaqha toqenakatwa parlañasa” sasa.

Jan wali usunïkasasa Diosan yanaptʼapampi, Biblian chuymachtʼkir arunakapampi, familiaranakamana ukat amigonakaman yanaptʼapampejja, jakañajj kunja wakiskirisa ukwa amuyäta.