Sajonia markanwa nasta, ukajja República Democrática Alemana sasin nayrajj uñtʼatäkäna uksa toqenkiwa. Tatajasa mamajasa wal munasipjjetäna, sum sarnaqañatakiw yatichapjjetäna. República Democrática Alemana markajja, comunista markänwa (comunista arojja, taqenis mä kikpak uñjatäña sañwa muni). Ukatwa Sajonia markan jaqenakajj religionat jan yatiñ munapkänti. Nayajj Diosan utjatap janiw creykayätti. 18 marankamajj comunismompi, Diosajj janiw utjkiti sasin creyipkäna uka amuyunakampiw apayasiyäta.

Taqenis mä kikpak uñjatäpjjaspa ukwa munayäta. Ukatakejj qollqeninakasa pobrenakasa taqe cosasanak mä igualak jaljasipjjañapa sasaw amuyayäta. Ukatwa comunismonkir waynanakampi chikachasiyäta. 14 maranïsajja, papelanak apthapisajj walja tiempo trabajiyäta. Ukham luratajatjja, Aue markankir autoridadanakajj walik ukham lurtajj sasaw yuspärapjjetäna, mä premio churapjjarakitäna. Waynakïskayätwa, ukhampachasa markan utjkäna uka wali uñtʼat politiconakaruw uñtʼayäta. Jutïrin suma trabajonïyawa sum jakasiraki sasaw amuyayäta.

Ukhamaruw aynachtʼawayta. 1989 maranjja Berlín markan perqanakap tinkuyapjjäna. Europa del Este cheqan utjkäna uka comunista gobiernonakas janiw utjjänti. Jan walinak utjatap ukhaw amuyasiyäta, ukanakaw aynachtʼayitäna. Comunismor jan apoyapkäna ukanakarojja, janiw comunistanakajj respetomp uñjapjjerïkätaynati. ¿Kunatsa ukham uñjapjjerïna? ¿Taqenis mä kikpak uñjatäñasawa sasin janit yatichapkäna? ¿Comunismonkirinakajj aynachtʼapjjänti? Ukham jisktʼasisajj wal aynachtʼayäta.

Uka qhepatjja, música tocañampi dibujonak pintañampiw nayatakejj nayrankjjäna. Universidadar mantañ wal munayäta ukatwa música tocañ yatichapkäna uka colegior sarayäta. Janiw kuntï awk taykajajj yatichapkitäna ukarjam sarnaqjjayätti. Kusistʼañ munasajja, walja tawaqonakampiw sarnaqayäta. Ukampis janiw musicasa ni dibujonak pintañsa ni munañajar sarnaqañasa llakinakaj apaqkitänti, dibujonakajansa ukajj uñjasirakïnwa. ¿Kunas  jutïrin pasani? ¿Jakañajj akakïpachati? sasaw jisktʼasiyäta.

Uka jisktʼanakan respuestanakap yatiyäta ukhajja, wal musparayäta. Música tocañ yateqkayäta uka colegionkkasinjja, mä jaypʼojj mä qhawqha yateqerinakajj tantachasitäpkäna ukaruw jakʼachasiyäta, ukanjja jutïr urunakatwa parlasipkäna. Mandy * tawaqow ukankarakïna, jupasti Jehová Diosan Testigopänwa, jupajj sitänwa: “Andreas, jumatï jutïr urunakatsa jakäwitsa yatjjatañ munstajja, Bibliatwa yatjjatañama” sasa.

Pächasiyätwa ukampis wal yatjjatañ munayäta. Mandy tawaqojj Daniel librot 2 capitulop uñachtʼayitäna, uk liytʼasajj wal musparayäta. Ukanjja taqe markanakjjar chʼamani markanakatwa parläna, mä arunjja munañani gobiernonakan apnaqäwipatwa parläna. Ukatjja jutïr urunakat parlir profecianakatwa parlarakitäna. Ukhamatwa jisktʼanakajar qhanañchäna. ¿Khitis uka profecianak qellqäna? ¿Khitis kuntï jutïr urunakan pasani uk yatispäna? Taqe ukanak yatiñajja, ¿Diosajj utjaskapuniwa sasat uñachtʼayitäna?

Mandy tawaqojj Horst jilatampiru Angelika warmipampiruw uñtʼayitäna, jupanakajj Jehová Diosan Testigonakapäpjjänwa, Biblia sum amuytʼañatakiw yanaptʼapjjarakitu. Jupanakakiw Diosan Jehová sutip uñtʼapjje, jaqenakarus uka suti yatiyapjje ukwa amuyayäta (Salmo 83:18, NM; Mateo 6:9). Jehová Diosajja, jaqenakajj paraisoptayat aka oraqen wiñayatak jakasipjjaspa ukwa muni, uksa yateqayätwa. Salmo 37:9 qellqatan akham siwa: “Tatitur suytʼirinakasti oraqen jakasipjjani” sasa. Biblian yatichäwiparjam sarnaqañatak chʼamachasipki ukanakajja, wiñayatakiw jakasipjjaspa uk yatiñajj wal chuymachtʼitäna.

Biblian yatichäwinakaparjam sarnaqañajj chʼamakïnwa. Música toctʼasina dibujonak pintasinsa wali uñtʼatäjjayätwa, jachʼa jachʼa tukjjarakiyäta. Ukatwa humilde chuymanïñatak chʼamachasiñajäna. Jan walinak lurañ jaytañasa chʼamakirakïnwa. Biblian yatichäwiparjam sarnaqañatak chʼamachasipki ukanakarojja, Jehová Diosajj pacienciampi, munasiñampiw uñji, ukat wal yuspärta.

Diosajj janiw utjkiti sasajj 18 marankamaw amuyayäta, ukhakamarakiw comunista jaqenakampejj chikachasiyäta. Ukampis kuntï Bibliat yateqkayäta ukaw jakäwejj mayjtʼayäna. Jutïritsa janiw llakisjjayätti, kusisitaw jakasjjayäta. 1993 maranwa Jehová Diosan Testigopjam bautisasta, 2000 maransti Diosar servir Tabitha kullakampiw casarasta. Jaqenakar Bibliat yatichañatakejj wal chʼamachasipjjta. Waljaniw jiskʼatpach nayjam amuyas jilsuwayapjje. Jaqenakar Jehová Diosar uñtʼapjjañapatak yanaptʼasajj wal kusista.

Awk taykajajj janiw Testigonakapampi chikachasiñaj munapkänti. Qhepatjja kunjamsa ukajj jakäwijan yanaptʼaskitäna ukwa uñjapjjäna. Jichhajja jupanakajj Bibliat yateqasipkiwa, tantachäwinakarus sarapjjarakiwa ukajj wal kusisiyitu.

Tabitha warmijampejj casadonakatak Biblian ewjjtʼanakajj utjki ukarjam sarnaqañatakiw chʼamachasipjjta, ukaw kusisit jakasiñatak yanaptʼapjjetu. Amuytʼañataki, Biblianjja jan yaqhamp sarnaqañatakiw ewjjtʼasi, ukar istʼañaw munasiñamp uñjasiñatak yanaptʼapjjetu (Hebreos 13:4).

Janiw jutïr urunakatsa ni kunjamsa jakasi ukat llakisjjti. Wali munasiri sumankañan jakasir Jehová Diosan Testigonakap taypinktwa. Testigonakajja taqenis mä kikpak uñjatäpjjewa, nayajj ukham jakasiñwa munayäta.