¿Yatiyätati?
¿Kunjamsa Jesusajj lepra usuninakar uñjirïna?
Judionakajja, Biblia qellqaskäna uka tiempon lepra usurojj wal ajjsarapjjerïna. Uka jan wali usojj jaqenakan ankunakaparuw jan waltʼayi ukat jan waliruw jañchip tukuyaraki. Niyakejjay uka usutakejj jan qollajj utjkchïntejja, uka usuninakajj janiw jaqenakar jakʼachasipjjañapäkänti yaqha cheqan jakapjjañapäna, ukat lepranïtapsa yatiyapjjañaparakïnwa (Levítico 13:45, 46).
Judionakan religionap pʼeqtʼirinakajja, yaqha leyinakwa uka toqet apsupjjäna ukajj janiw Qollan Qellqatanakarjamäkänti, uka leyinakajj lepra usuninakarojj jukʼampiw jan waltʼayäna. Amuytʼañataki, judionakan yatichirinakapan leyiparjamajja, maynejj lepra usuninakatjja, 2 metronak jayaruw jitheqtañapäna. Thaya phustʼanki ukhasti, 45 metronak jayarurakiw jitheqtañapäna. Talmud yatichäwit yatjjatirinakat yaqhepanakajja, “campamentot anqäjjana” jakañapa siski uka Leyjja, janiw marka taypin jakañapäkiti siskaspas ukham amuyapjjäna. Ukatwa judionakan mä yatichiripajja, marka taypin lepra usuni jaqer uñjasajj qalamp jaqjjäna ukat “kawkhankañamäkiti ukar saram jan mayninakar qʼañuchamti” sasin arnaqjjäna.
Ukampis Jesusajj janiw jupanakjamäkänti. Lepra usuninakar jaqonukuñat sipansa, amparapampiw loqjjatirïna ukatsti qollarakirïnwa (Mateo 8:3).
Judionakan religionap pʼeqtʼirinakajja, ¿kamsasas jaljtañ toqet yatichapjjäna?
Jaljtañatak mä qellqata ukajj 71 ukat 72 maranakatawa.
Nayrïr patak maranakanjja, judionakan religionap pʼeqtʼirinakajj jaljtañ toqet wal chʼajjwapjjerïna. Mä kutejja, fariseonakajj Jesusar yantʼañ laykojj akham jisktʼapjjäna: “¿Walikiti mä jaqejj warmipampi jaljtañapajj kunïpansa?” sasa (Mateo 19:3).
Moisesajj katoqkäna uka Leyirjamajja, mä chachatï warmipan ‘qʼañu sarnaqatapa jikjjataspäna’ ukhakiw jaljtaspäna (Deuteronomio 24:1). Jesusajj jakkäna uka tiemponjja, rabinonakan pä yateqañ utapaw utjäna, ukanjja mayj maywa uka leyit amuyapjjäna. Samay sat yateqañ utanjja, kunapachatï maynejj yaqhamp sarnaqjje mä arunjja, wachoq juch lurjje ukhakiw jaljtaspa sasaw amuyapjjäna. Hilel sat yateqañ utanjja, mä chachajj warmipampi kunat jan waltʼayasisas jaljtaspawa sasaw amuyapjjarakïna. Ukhamajj mä chachajja, warmipan manqʼa nakhantayatapatsa jan ukajj jukʼamp suma warmi jikjjatatapatsa jaljtaspänwa.
Fariseonakan jisktʼaparojj ¿kamsäns Jesusajja? Akham sänwa: “Khititejj warmiparu jan wachoqa juch lurkipana apanukojja, ukat yaqhampi casarasirakejja, uka jaqejj wachoqa juchwa luri” sasa (Mateo 19:6, 9).
