Tatajajja 1949 maranwa, Alemania markat Australia markar sarjjäna. Ukanjja, minana ukat luz utjañapatakiw irnaqäna. Jupajj Victoria sat cheqaruw jakir purïna, ukanwa mamajamp uñtʼasisajj casarasjjäna. Nayasti 1953 maranwa nasta.

Mä qawqha maranakatjja, mamajajj Jehová Diosan Testigonakapampiw Bibliat yateqañ qalltäna. Ukhamasti kuntï yateqkäna ukanak wawatpachwa yatichitäna. Ukampis tatajajja, janiw religionanakat kunsa yatiñ munkänti, ukatwa wali qhorujjäna, mamajajj walpun jupar ajjsaräna. Mamajajj jamasatwa Bibliat yatjjataskakïna ukat kuntï yateqkäna ukajj chuymaparuw purtʼäna. Tatajajj jan utankkäna ukhaw kullakajampiru nayampir kuntï yateqkäna uk yatichapjjerïtu. ‘Aka Oraqejj mä suma Paraisor tukuyatäniwa, jumanakatï Biblian ewjjtʼaparjam sarnaqapjjäta ukhajja, kusisitaw jakasipjjäta’ sasaw yatichapjjetäna (Salmo 37:10, 29; Isaías 48:17).

Tatajan wali qhorutap laykuw 18 maranïkayäta ukhajj utat sarjjta. Mamajajj kuntï Bibliat yatichkitäna ukar creyiyätwa, ukampis kunjamsa yanaptʼitaspa uk janiw amuykayätti, ukatwa jan ukarjam sarnaqkayätti. Carbón qalanak thaqhapki uka minanwa electricistjam irnaqañ qalltayäta ukat 20 maraniruw casarasjjta. Nayrïr wawajajja, kimsa mara qhepat nasjjäna, ukhaw kunas jakäwijan jukʼamp wakiskiri uka toqet jisktʼasta. Familiajarojj Bibliaw yanaptʼaspa sasaw amuyayäta, ukatwa Jehová Diosan Testigonakapampi Bibliat yatjjatañ qalltta. Ukampis warmijajj Testigonakar wal uñisïna. Mä tantachäwir sarkayäta ukhajja, jupajj akham sitänwa: ‘Bibliat yatjjatañ jan jaytañ munkstajja, utat sarjjam’ sasa. Warmijar istʼasajja, janiw Bibliat yatjjatjjayätti. Qhepatakwa ukham luratajat wal amtasiyäta.

Mä urojja, irnaqer masinakajaw nayrïr kuti pornografía qʼañu luräwinak uñtayapjjetäna. Ukajj nayatak walikjamakïnwa, ukampis wali ajjtaskañänwa ukat uñtirïkta uka qhepat wal chuym pisayasirïta. Kuntï wawäkasajj Bibliat yateqkayäta uk amtasajja, Diosajj castigitaniwa sasaw amuyayäta. Ukampis sapa kuti pornografía uñchʼukisajja, uka qʼañu luräwinak uñchʼukiñajj walikïkaspas ukham amuyjjayäta, ukatwa pornografía uñchʼukiñar yatintawayta.

Pä tunka maranakaw uka jan walinak lurjjayäta, janirakiw kunanaktï mamajajj yatichkitäna ukarjam sarnaqjjäyätti. Kuna jan walinakatï pʼeqejan utjkäna, ukarjamaw kuns lurirïta. Parlatajasa, chansasitajasa  janipuniw walïkänti. Chacha warmjam ikiñatsa jan wal amuyjjayätta, esposajampis jakchiyätjja, yaqha warminakampiw ikintasirïta. Mä urojj espejot uñkatasisajja, nä pachpaw ajjtasiyäta.

Esposajampejj jaljtjjayätwa, janiw kusisitasa ni sumas jakasjjayätti. Ukatwa, Jehová Diosar maytʼasta. Pä tunka maranakas pasjjchïnjja, mayampiw Bibliat yatjjatañ qalltayäta. Uka tiempotakejja, tatajajj jiwjjänwa ukat mamajajj Jehová Diosan Testigopjamaw bautisasjjäna.

Janis Bibliarjam jakchiyätjja, Diosajj sumankañap churapjjätam sasin Bibliajj qhanañchki uk jikjjatañatakiw chʼamachasiyäta. Ukatwa jan walinak parlañsa ukhamarak jan walinak jaytañsa amtayäta. Qʼañu luräwinaksa, qollqet anatañsa, machjasiñsa ukat irnaqäwijan lunthatasiñsa apanukjjayätwa.

Irnaqer masinakajajja, kunatsa nayra jakäwejj jaytañ munayäta uk janiw amuyapkänti. Ukatwa kimsa maranaka, wasitat uka jan walinak uñtañajjatak wiytapjjetäna. Wasitampi jan walinak lurirïkta, toqesirïkta, ukat mä jan wali aru arsurïkta ukhajja, wali kusisitaw akham sapjjeri: “¡Ajá, Joe amigosajj kuttʼanjjewa!” sasa. Uka arunak istʼañajj ¡walpun chuym ustʼayirïtu! Janis kunatakis walikirista ukhamwa amuyasirïta.

Irnaqäwijanjja, pornografía qʼañu luräwinak wal uñchʼukipjjäna. Irnaqer masinakajajja, sapüruw jan wali fotonak pasayasipjjeri, jan ukajj computador toqew pasayasipjjeri, kunjamtï nayrajj lurkayäta ukhama. Pornografía jaytañatakiw chʼamachasiskayäta, ukampis jupanakajj ukanak lurañajjwa munapjjäna. Bibliat yatichkitäna uka jilataruw yanaptʼa mayiyäta, jupajj wali pacienciampiw istʼitäna. Ukat Biblian jiskʼa tʼaqanakap liytʼarapitäna, kunjamsa uka ewjjtʼanakajj qʼañu luräwinak jaytañataki yanaptʼitaspa ukwa qhanañchtʼitäna. Ukat Jehová Diosar sapa kuti yanapa mayisiñatakiw chʼamañchtʼarakitäna (Salmo 119:37).

Mä urojja, irnaqer masinakajaruw tantachtʼta ukat taqenïjjapjjäna ukhajja, ‘uka pä chachar cerveza churapjjam’ sasaw sista, uka pä chachanakajj umañ jaytañatakiw wal chʼamachasisipkäna. Ukatsti taqeniw akham sapjjetäna: “¡Jan ukham parlamti! ¡Jupanakajj alcohol jaytañatakiw chʼamachasisipki!” sasa. Ukat akham sistwa: “Nayajj ukhamarakiw chʼamachasiskta” sasa. Uka qhepatjja, janiw mayampsa pornografía qʼañu luräwinak uñchʼukiñatak chʼamañchjjapjjetänti.

Jehová Diosan yanaptʼapampejja, tiempompejj janiw qʼañu luräwinak uñchʼukjjayätti. Ukatjja 1999 maranwa Jehová Diosan Testigopjam bautisasjjayäta. Jehová Diosar walpun nayat khuyaptʼayasitapat yuspärta, jichhajj janiw jan walinak lurjjtti ukat kusisitaw jakasjjarakta.

Jichhaw kunatsa Diosajj jan wali lurañanak uñisi uk amuyta. Jupajj wali munasir mä awkjamaw pornografía qʼañu luräwinakat jarkʼaqañ munistu. Proverbios 3:5, 6 qellqatajj akham siwa: “Tatitur taqe chuymamampi katuyasim; juman chʼikhi kankañamarukejj jan alkatasimti. Taqe luräwinakamanjja Tatitutjja amtasipunim, ukatsti jupajj cheqa thakinjamwa irpaskätam” sasa. Biblian ewjjtʼanakapajja, janiw jan walinakat jarkʼaqasiñatakik yanaptʼawaykituti, jan ukasti qʼañu luräwinak jaytañatakis yanaptʼawayarakituwa (Salmo 1:1-3).

Nayrajj nä pachpat wal ajjtasiyäta, ukampis janiw ukhamäjjeti, sumakiw chuymajansa jikjjatasjjarakta. Jichhajj janiw jan walinak lurjjtti ukat juchanakaj Jehová Diosan perdonatapsa amuyaraktwa, Jupajj yanaptʼapunituwa. 2000 maranjja, Diosar yupaychir Karolin sat kullakampiw casarasta. Jupajj nayjamarakiw Jehová Diosar wal munasi. Wali sumaw jakasipjjta, nanakatakejj Jehová Diosan qʼoma sarnaqeri, wali munasiri markapankañajj mä suma bendicionawa.