¡Mä suma paraíso! Suma lugaranakar viajiñatakejj walja yatiyäwinakaw utji, jaqenakajj samartʼañatakisa llakinakap armañatakisa ukaruw sarapjje. Ukampis utar kuttʼanisajja llakinakapajj janiw chhaqtkiti.

Taqeniw mä paraison jakasiñ muntanjja. Ukatwa akham jisktʼastänjja: “¿Cheqapunit paraisojj utjaski, jan ukajj cuentokïcha? ¿Kunatsa paraison jakasiñ muntanjja? ¿Cheqapunit paraisojj utjpachäni?” sasa.

Nayratpachwa jaqenakajj mä paraison jakasiñ munapjjäna. Bibliajj “Edenat inti jalsu toqerojj” mä jardinan utjatapatwa parli, waljaniw uka toqet yatiñ munapjjäna. ¿Kunanakas uka jardinan utjäna? Bibliajj akham siwa: “Diosajj taqe casta suma frutanak achuri qoqanak jilayarakïna, ukanakasti manqʼañatakïnwa”. Uka cheqajj wali suma lugaränwa, uka taypinjja ‘jakañ qoqaw’ utjarakïna (Génesis 2:8, 9).

Génesis libronjja, uka jardinan pusi jawiranakaw utjäna sasaw qhanañcharaki. Ukanakat pä jawiranakajj Tigris (jan ukajj Hiddekel) ukatjja Éufrates sutimpi uñtʼatäpjjewa (Génesis 2:10-14). Uka jawiranakajj Irak marka pasasajj golfo Pérsico sat lamar qotaruw puripjje. Irak markajja, nayrajj Persia marka taypinkänwa.

Ukatwa persanakajj paraison utjatap creyipjjäna. Amuytʼañataki, 1.500 maranakana Persia markan lurat mä alfombrajj Arte de Filadelfia (Pensilvania, Estados Unidos) museonwa jikjjatasi, uka alfombranjja, arbolanakani panqaranakani mä jardinaw pʼitat uñsti. Ukajja Bibliajj parlki uka Edén jardinawa. Cheqasa paraíso arojja nayra persa arutwa juti, ukajj “muyuntat jardín” sañ muni.

Taqe markanakan jakasir jaqenakaw paraison utjatap creyipjje. Qalltanjja paraisojj kunjamasa uk sum yatipjjäna, ukampis tiempompejj jukʼat jukʼatwa sapa markan costumbreparjam jaqenakajj mayjtʼayjjapjjäna. Jichhürunakanjja niya taqe jaqenakaw paraíso aru apnaqapjje, mä suma jardinarojj paraisotwa uñtʼapjjaraki.

Taqe cheqanak uñjir saririnakajja, nayra tiempon utjkän uka paraíso jikjjatapjjtwa sasaw yaqhepajj sapjje. Amuytʼañataki, Charles Gordon sutini británico chachajj Seychelles islanakar 1881 maran sarkäna ukhajja, Mai sat valle uñtʼäna. Jupajj uka cheqa uñjasajj wal musparäna, jardín de Edén sasaw suticharakïna. Jichhürun patrimonio de la humanidad ukham uttʼayatäjjewa. 1492 maranjja Cristóbal Colón chachajj La Española islaruw purïna. Edén jardín jikjjatta sasaw amuyäna, uka cheqajj República Dominicana ukhamarak Haití markanakanwa jikjjatasi.

Jichha tiempon qellqat mä libronjja (Mapping Paradise), 190 nayra mapanakaw uñsti, ukanjja Adanampi Evampiw Edén jardinankasipki. Uka mapanakat maynejja 1.250 maranwa qellqasïna, ukajj Beato de Liébana nayra qellqatat copiatänwa. Uka mapanjja alay toqen mä jiskʼa rectangulow uñsti, ukanjja mä jardinaw utjaraki. Uka jardinatjja pusi cheqanakaruw pusi jawiranakajj mistüna, uka jawiranakajj “Tigris”, “Éufrates”, “Pisón”, “Guihón” satäpjjewa. Uka jawiranakan pusi cheqanakar mistutapajja, akapachan jaqenakajj cristianor tukupjjatapampi sasiwa. Janis Edén jardinajj kawkhankänsa ukajj yatiskchejja, jaqenakajj paraison utjatap creyisipkakiwa uk amuytanjja.

Khä 1670 maranakan jakiri John Milton sutini chachajja, El Paraíso perdido sutini mä poema  qellqatapat wali uñtʼatawa. Jupajj Adanan juchachasitapata ukhamarak kunjamsa Edén jardinat jaqsutäna uka toqetwa Génesis librorjam qellqäna. Uka libropan akham sasaw qellqäna: “Oraqpachaw mä Paraisor tukuyatäni” sasa. Ukham sasinjja jaqenakajj wiñayatakiw aka oraqen jakasipjjaspa, sañwa munaskäna. Qhepatjja El Paraíso recobrado sutini poema qellqarakïna.

Jaqenakajja mä paraison utjatap taqeniw yattanjja. Ukampis ¿kunatsa jaqenakajj paraisot jan jukʼamp yatjjatjjapjje? Kunjamtï mä libron (Mapping Paradise) siskejja, “teologonakajja [...] paraisojj kawkjankisa uka toqet kʼarinak yatichañ qalltapjjäna”.

Religionanakajja aka oraqen mä paraison jakasiñäni sasin yatichañat sipansa, alajjpacharuw sarjjañäni sasaw yatichapjje. Ukampis Salmo 37:29 qellqatan akham siwa: “Aski jaqenakajj oraq katoqapjjani, wiñayatakiw ukan jakapjjarakini” sasa. Akapachajj jan walipuniwa, janiw mä paraisor tukkaspati sañjamawa. Ukhamajj ¿Salmo 37:29 qellqatajj phoqasispati?

Qalltanjja Jehová Diosaw Paraíso luräna, ukhamasti mayampiw aka oraqe mä paraisor tukuyani. ¿Kunjamsa uk lurpachäni? Jesusajj akham sasaw oración lurañ yatichistu: “Reinomajj jutpan. Munañamajj luratäpan, kunjamatï alajjpachan luraski ukhamarak aka oraqens luraspan” sasa (Mateo 6:10). Uka Reinojj mä gobiernowa, Jesucristow reyejja, ukatjja taqe aka oraqenkir gobiernonak lantiw apnaqani (Daniel 2:44). Ukatjja Diosan munañaparjamaw aka oraqe mä Paraisor tukuyani.

Isaías profetajja, Diosan amuytʼayatäsajj Paraison jakasiñajj kunjamänisa ukwa qellqäna. Ukanjja taqe kunanakatï jichhürunakan tʼaqesiykistu ukanakajj janiw utj-jjaniti (Isaías 11:6-9; 35:5-7; 65:21-23). Bibliat uka textonak liytʼañamatakiw chʼamañchtʼapjjsma, janiw jaya tiempotäkikiti. Khitinakatï Diosan leyinakaparjam sarnaqapki ukanakajj kunsa katoqapjjani uk yatiñajj wal yanaptʼätam. Diosar istʼirinakajja, paraisonwa jakasipjjani, Diosampis sumwa apasipjjarakini, Adanajj ukanak aptʼasïnwa (Apocalipsis 21:3).

Aka oraqejj mä suma paraisor tukuyatäniwa sasajja, ¿kunatsa sissna? Bibliajj akham siwa: “Alajjpachajj [Jehová] Tatitunkiwa, jaqerusti oraq katuyi” sasa. Diosaw ukham lurañ arsuwayi, Jupajj ‘jan kʼarisir Diosawa’ (Salmo 115:16; Tito 1:2). Biblianjja jutïrin kusisitaw jakasiñäni sasaw sistu, ¡ukajj wali sumawa! Paraison wiñayatakiw jakasiñäni.