Nayajj 1960 maranwa nasta, mamajasti 17 maranikïskänwa, ukharakiw tatajajj jaytawayjjäna. Mamajampejj Burg sat jiskʼa markanwa achachilanakajampi jakasipjjayäta, ukajja República Democrática Alemana (jan ukajj Alemania oriental) markankiwa. Uka cheqan jakir jaqenakasa ukat familiajasa janiw Diosan utjatap creyipkänti.

Achachilajajj wal munasitäna, ukhamajj kʼuchikiw jakasiyäta. Jupampejj taqe kun anatapjjerïta, qoqanakar makatasin ramanak khuchuñsa yaticharakitänwa. Ukanak lurañajj wal gustitäna. Wawäkasajj kʼuchiki ukat kusisitaw jakasiyäta.

Mä urojja kunapachatï 7 maranëjjayäta ukhajja, escuelat kuttʼanisajj mä jachʼa torreruw makatayäta, ukat mä jan waliruw purtʼasiyäta. Uka jachʼa torrejja, niya 8 metronak altünwa, ukhamajj corrientempiw katjayasiyäta. Hospitalan sartasajja, paypach amparajajj janiw utjänti. Kunatejj wali nakhantatänwa, ukhamajj wilaruw jan waltʼayaspäna. Mamajampi achachilanakajampejj wali llakitäpjjänwa. Ukampis niyakejjay wawaskchiyätjja, janiw kunjamsa jakäwijan ukajj aynachtʼayitani uk amuykayätti.

Hospitalat mistusajj escuelar kutʼjjayätwa, ukampis escuelankir masinakajajj wal jiskʼachapjjetäna, nuktʼapjjetäna ukhamarak larusipjjetäna. Jiskʼachir arunakapajja, wal chuym ustʼayitäna. Ukampis uka qhepatjja, Birkenwerder sat cheqan discapacitado wawanakatak utjki uka escuelaruw uchjjapjjetäna. Uka escuelajj utajat jayankänwa, ukhamajj mamajasa ukat achachilanakajasa janiw visitir jutirjamäpkänti. Jupanakampejj vacacionanakwa jikisiyäta, tunka maranakaw wali jayan jakasirakiyäta.

Kayunakajampejj kunaymaninak lurañwa yateqawayta. Sañäni, kunjamsa mä cuchara jan ukajj mä tenedor kayunakampi katusma uk amuytʼma. Cheqas ukajj wali chʼamawa, ukampis ukanak lurañwa yateqawayta. Laka chʼakhanak cepillompi jarisiñsa ukhamarak peinasiñsa yateqawayaraktwa. Kayunakajampi ademananak lurañsa yateqaraktwa, ukhamajj kayunakajajj amparar uñtasitaw taqe kuna lurjjäna.

 Qʼajjo waynitöjasajja, jutïrin amparanëjjawa uka amparanakajajj taqe kun lurani sasaw wal kusisirïta. 14 maranëjjayäta ukhajja, cigarro fumañ qalltayäta. Fumañajj jan sinti llakisiñatakis yanaptʼkitaspa ukat mayni jaqenakjamas taqe kun lurañ yatkirista ukham amuyayäta. Ukatwa akham sirïta: “Jilïr jaqenakakiw cigarro fumapjje, nayajj fumarakiristwa. Janis amparanïkstjja, janiw ukajj aynachtʼaykitaniti” sasa.

Jakaskayäta uka cheqanjja, jan tiemponiw sarnaqayäta. Mä organizacionar kunaw qellqayasiyäta, ukajj Juventud Libre Alemana sat sutinïnwa. Uka organizacionajj gobiernon yanapatänwa, ukanwa nayajj secretariot trabajiyäta. Poesía ukat cantañ yateqañatakisa qellqayasirakiyätwa, discapacitado jaqenakatak utjki uka anatañanakansa anatarakiyätwa. Yateqañ tukuyjjasajja, mä empresan trabaj jikjjatayäta. Jilïrejjasajja prótesis sasin uñtʼat ampar uchasjjayäta, nayajj mayninakjam jakasiñwa munarakiyäta.

Mä urojja trabajojjar sarañatakejj mä tren suyaskayäta, ukatjja mä chachaw jakʼachasisin akham sitäna: ‘Diosajj wasitatwa amparanakam churiristam’ sasa. Uk istʼasajj wal mayjtʼasiyäta, nayajj wasitat paypach amparanïña munayätwa, ukampis uka chachajj loqhëkaspasa jan ukajj kuntï siskäna ukajj janis walïkaspa ukhamwa amuyayäta. Diosajj janiw nayatak utjkänti. Ukatwa uka chachampejj mayamp jan parlañ munjjayätti.

Qhepatjja, mä trabajir masijaw familiapar visitir sarañatak invittʼitäna. Café umaskasajja trabajir masijan awk taykapajj Diosat parlañ qalltapjjäna. Jehová sasaw uka Diosar sapjjäna, ukhapuniw nayrïr kuti Diosajj sutinïtap istʼayäta (Salmo 83:18, NM). Ukampis akham sasaw nayajj amuyayäta: “Diosajj janiw utjkaspati, inamayaw uka suti apnaqasipki. Nayaw jupanakar pantjasipjjatap sum qhanañchirista” sasa. Diosajja janiw nayatakejj utjkänti, ukhamajj Bibliat jupanakamp parlañwa qalltayäta. Ukampis janiw kunapachas Diosajj jan utjatap qhanañchkayätti.

Profecianak yatjjatasajja, kuntï amuykayäta ukajj mayjtʼjjänwa. Biblian qellqatäki uka profecianakajj phoqasipunïnwa, yaqhepajj walja maranak nayras qellqaskchïnjja phoqasirakïnwa. Mä kutejja kunjamäskis aka pachajj uk amuytʼañatakejja, Mateo 24 jaljata ukat Lucas 21 jaljampita ukhamarak 2 Timoteo 3 jaljampitwa yatjjatapjjta. Mä jaqejj kuna usunisa uk yatiñatakejja, doctorajj kunas uka jaqer usu ukwa yatjjatañ yati, Biblian profecianakapajja ukhamarakiw “qhepa urunakan” jakaskatas amuytʼañataki yanaptʼistu. * Ukanak yatjjatasajja, walpun muspharayäta. Uka profecianakajj cheqapuniw phoqasiskäna.

Kunanaktï Biblian yateqkayäta ukajj cheqäskapunïnwa. Ukatwa Diosar oracionan mayisjjayäta, walja maranakas cigarro fumkchiyätjja, jaytjjäyätwa.  Mä mara Bibliat yatjjatasajja, 1986 maran 27 abril phajjsinwa mä bañeran jamasata bautisasiyäta. Uka maranakanjja Alemania oriental cheqan Jehová Diosan Testigonakapajj jarkʼatäpjjänwa.

Niyakejjay Testigonakajj uka cheqan jarkʼatächïnjja, mä utan jukʼanikiw tantachasipjjerïta, janiw walja jilat kullakanakarus uñtʼkayätti. Qhepatjja, jilïr autoridadanakaruw Alemania occidental cheqar viajiñatak permiso mayiyäta, uksanjja janiw Testigonakajj jarkʼatäpkänti, jupanakajja viajiñatak permis churapjjetänwa. Ukhapuniw nayrïr kuti mä jachʼa tantachäwir sarayäta, walja jilat kullakanakar uñjañasa wali kusiskañänwa.

Muro de Berlín satäki uka jachʼa perqanakajj jaqonukutäkäna uka qhepatjja, janiw Testigonakajj jarkʼata uñjasjjapjjänti. Ukhat aksarojj jan khitin jarkʼataw Diosar servjjapjjayäta. Ukatwa nayajj jukʼampi horanak yatiyañ amtayäta, ukampis jan uñtʼat jaqenakamp parlañ wal ajjsarayäta ukat janis kunatakis askïkirista ukhamwa amuyayäta. Ukhamarus 1992 maranjja, sapa phajjsi 60 horanak yatiyañ amtayäta, wali kusisitäyätwa. Ukhamasti sapa phajjsi 60 horanak yatiyañ amtjjayäta, ukat kimsa maraw ukham yatiyawayta.

Aka arunakajj wal yanaptʼitu: ‘Maynitejj aynachtʼatächi ukhajja, nayajj wal llakista’ sasa (2 Corintios 11:29). Nayajja amuytʼasiñsa, parlañsa puedisktwa, ukhamajj mayninakar yanaptʼañatakiw wal chʼamachasta. Niyakejjay jan paypach aparanïkstejja, khitinakatï ukham uñjasipki ukanakajj kunjamas jikjjatasipjje uk sumwa yatta. Kunapachatï maynejj kun lurañsa wal muni ukat jan lurirjamäkiti uk sumwa yatirakta. Ukatwa mayninakar yanaptʼañataki wal chʼamachasta, ukham lurasajj kʼuchikiw jikjjatasirakta.

Awisajja mä jukʼanak llakisiraktwa, mayninakjam paypach amparanïña munta. Taqe kun lurañatakiw wal chʼamachasta, ukampis tiempompi ukat chʼamampiw munasi. Aka arunakaw yanaptʼitu: “Criston chʼamapampejj taqe kunaruw saykatirista” (Filipenses 4:13). Jehová Diosaw sapür chʼam churitu. Jupajj janiw kunapachas jaytkituti, ukatwa nayajj Jupar jan jaytañ munkarakti.

Diosajj mä suma familiampiw bendesiwayitu, waynäkasajj ukham familianïñ wal munayäta. Esposajajj Elke satawa, jupajj wali munasiri khuyaptʼayasir warmiwa. Oraqpachanjja walja jilat kullakanakaw utjarakitu, jupanakaw jilanakajasa kullakanakajasa ukhamarak familiajasa.

Diosajj akham siwa: “Uñjam, nayajj taqe kunwa machaqat lurta” sasa. Ukhamajj paypach amparajajj wasitampiw utjjetani, uk yatiñajj wal chuymachtʼitu (Apocalipsis 21:5). Jesusajj kunanaktï aka oraqenkkasajj lurkäna ukanak yatiñaw yanaptʼitu. Jupajja usutanakaruw qolläna ukat jiñchu khuchoqapkäna uka chacharus qollarakïnwa (Mateo 12:13; Lucas 22:50, 51). Jehová Diosajj arsuwayki uka profecianakasa ukhamarak Jesusajj lurkäna uka milagronakasa, jutïrin paypach amparajaw utjjetani sasin amuyañatakiw yanaptʼitu.

Ukampis jukʼamp jachʼa bendicionajj akawa, Jehová Diosar uñtʼaña. Jupaw Awkejasa, amigojasa, chuymachirijasa ukat yanapirijasa. Nayajj David reyjamarakiw akham sirista: ‘Jehová Tatituw chʼamajäjja, jupasti yanaptʼituwa. Chuymajjajj kusisitawa’ sasa (Salmo 28:7). Diosan cheqa yatichäwinakap taqe chʼamajampiw qhomjjarta, janiw kunapachas jaytkäti. Janis paypach amparanïkstjja, taqe chʼamajampiw qhomjjarta.