Oraqpachanjja walja jaqenakaw ‘costumbrenakarjamajj Navidadanwa Jesucriston cumpleañop amtasi’ sasin sapjje. Ukampis nayrïr patak maranakan jakir cristianonakasa Jesusan arkirinakapasa ¿navidad uru amtapjjerïpachänti? ¿Kunsa Bibliajj cumpleaño amtañat yatichi? Uka pä jisktʼanakar qhanañchañaw cristianonakarojj Navidad uru amtapjjañapati janicha, uk amuytʼañatak yanaptʼistani.

Nayraqatajja, Biblianjja janiw Jesusana ni yaqha cristianonakan cumpleañop amtapjjerïnwa sasin yatichkiti. Biblianjja pä jaqen cumpleañopatakwa parli, ukampis jupanakajj janiw Diosar servipkänti. Ukhamarus uka cumpleañonakan jan walinakaw pasäna (Génesis 40:20; Marcos 6:21). Encyclopædia Britannica, qellqatanjja akham siwa: “ Nayrïr maranakan jakir cristianonakajj janiw cumpleañonak amtañ munapkänti” sasa.

Biblianjja janirakiw kuna urus Jesusajj nasïna uk qhanañchkiti. Diccionario de historia de la Iglesia qellqatanjja akham siwa: “Cristojj kuna urusa, kuna phajjsinsa nasïna uka toqet parlir qellqatajj janiw utjkiti” sasa. Jesusatï arkirinakapajj cumpleañop amtapjjañap munaspäna ukhajja, kuna fechansa nasïna uk jan armapjjañapatakejj qhanañchaspänwa.

Payïr toqetjja, Jesusasa discipulonakapasa Navidad amtapjjänwa sasajj janiw kawkhansa Biblian qhanañchkiti. New Catholic Encyclopedia qellqatarjamajja, Navidad urutjja “Cronógrafo de Filócalo sat romano calendarionwa nayrïr kuti parlasi. Ukajja 336 maratwa parlaskäna”. Uka pachanjja, Jesusan aka oraqenkatapat walja maranakaw pasjjäna, Bibliasa walja maranak nayraw qellqañ tukuyatäjjarakïna. Ukatwa mä qellqatan akham qhanañchi: ‘Navidad amtañajj janiw Diosan yatichäwiparjamäkiti, janirakiw Nuevo Testamentonkki uka yatichäwirjamäkisa’ * sasa (Cyclopedia de McClintock y Strong).

Jachʼa Yatichiri Jesusajj kunsa discipulonakapajj lurapjjañapäna uk qhana arunakampiw yatichäna, ukajj Biblian qellqatawa. Jesusajj Navidad amtapjjañamawa sasajj janipuniw discipulonakapar yatichkänti. Mä yatichirejj kuntï yatichki ukarjam yateqerinakapajj lurapjjaspa ukwa muni, ukhamarakiw Jesusajj ‘kunatï Biblian qellqatäki ukarjam’ discipulonakapajj lurapjjaspa uk muni (1 Corintios 4:6).

Maysa toqetjja, nayrïr cristianonakatakejj Jesusan jiwäwip amtañaw wali wakiskirïnjja. Jesusaw discipulonakapar jiwäwip amtapjjañapatak arsuwayäna. Kunapachasa kunjamsa amtapjjañapa uk sumwa qhanañchäna, kuna urus jiwäna ukajj Biblian qellqatawa (Lucas 22:19; 1 Corintios 11:25).

Ukhamajja, mä cumpleaño amtañatakiw Navidad uru uñstayapjje. Ukampis nayrïr cristianonakajj janiw uka costumbrenak lurapjjerïkänti. Biblianjja janirakiw Jesusasa yaqha jaqenakasa Navidad amtapjjerïnwa sasajj qhanañchkiti. Ukatwa waranq waranqa Diosar servir cristianonakajj Navidad uru janipun amtapkiti.