1-3. 1) ¿Kunatsa Evodiampi Sintiquempejj jan waltʼayasipjjpachäna? 2) ¿Kunas ukhamanakar jan puriñatakejj yanaptʼistaspa? (Aka janankir dibujo uñjjattʼam).

BIBLIAJJ Diosan Arupawa, ukatwa wali askit uñjtanjja. Bibliajj jan waltʼäwinakat amuyasiñatakiw yanaptʼistu, pantjasktan ukhas cheqañcharakistuwa. Ukham cheqañchäwi katoqasajja, ¿kunsa lurtanjja? Nayrïr patak maranakan ajllit pä kullakat parltʼañäni, jupanakajj Evodia ukhamarak Síntique satäpjjänwa. Bibliajja, jupanakajj janiw waltʼayasipkänti sasaw qhanañchi. Ukampis kunatänsa uk janiw siskiti. Kunas paspachäna uk jichhajj amuytʼañäni.

² Evodia kullakajja, inas mayni jilat kullakanakarojj manqtʼasiñatak utapar invittʼchïna. Ukampis janiw Síntique kullakar invitkänti. Qhepatjja, Sintiquejj mayninakar uka manqʼäwit sum parlir istʼasajj wal colertʼasïna. Inas akham amuychïna: ‘¿Kunatsa Evodiajj jan invitkpachïtu? Suma amigäpjjtwa sasaw amuyayäta’ sasa. Sintiquejj janis Evodiamp sarnaqañ munkaspa ukhamwa amuyäna. Qhepatjja, ¡kawkïr jilat kullakanakarutï  Evodiajj utapar invitkäna ukanakaruw Sintiquejj invittʼarakïna! Ukampis janiw Evodiar invitkänti. Ukanak uñjasajja, tamankirinakajj mayjtʼasipjjpachänwa. Ukampis Pablow uka pä kullakanakar cheqañchäna, perdonasipjjañapatakis chʼamañcharakïna. Jupanakajja, Pablon ewjjtʼapar istʼasajj kusisitaw Jehová Diosar servipjjpachäna (Fili. 4:2, 3).

³ Jichhürunakanjja, tamasankir jilat kullakanakasampejj ukhamarakiw jan waltʼayasiñajj utjaspa. Ukampis jiwasatï Biblian ewjjtʼanakapar istʼañäni ukhajja, uka jan waltʼäwinak askichsnawa, jan waltʼäwinak jan utjañapatakis chʼamachasiraksnawa. Biblian ewjjanakapar istʼasajja, Diosan Arupar wali askitwa uñjasktanjja (Sal. 27:11).

4, 5. Colerampi jan atipayasiñatakejja, ¿kamsasas Bibliajj ewjjtʼistu?

⁴ Markasata, costumbresata, jañchisata, uñnaqasat jan walinak sapjjestu ukhajja, llakita jan ukajj colerataw jikjjatastanjja. Yamas jilat kullakanakasat maynejj jan wal uñjistaspa ukhajja, chuym wal usuyassna. Ukhamanakanjja, ¿Biblian kawkïr ewjjtʼapas yanaptʼistaspa?

⁵ Colerampi atipayasisajj kuna jan walinakansa uñjassna uk Jehová Diosajj sum yati. Chuyma ustʼatasa, coleratasa, inas jan walinak parlsna jan ukajj jan walinak lursna, ukhamïpanjja qhepatakwa amtassna. Jehová Diosajja, Biblia toqejj akham ewjjtʼistu: “Jan colerasiñampi atipayasimti” sasa. Uka ewjjtʼar istʼañajja, jan waltʼäwinakar jan puriñatakiw yanaptʼistu (Proverbios 16:32; Eclesiastés 7:9 liytʼañataki). Maysa toqetjja, Bibliajj maynit maynikam perdonasipjjam sasaw sistu. Jesusajj akham sarakïnwa: “Masinakamar jan perdonapkäta ukasti, jumanakan Awkimasti janirakiw kuna juchanakamatsa perdonapkarakïtamti” sasa (Mat. 6:14, 15). Ukhamajj paciencianïñatakisa, mayninakar perdonañatakis chʼamachasipjjañäni.

6. Colerampi apayassna ukhajja, ¿kunas qhepat pasaspa?

⁶ Jiwasatï maynitak colerat sarnaqsna ukhajja, jupar uñisiñaw chuymasan utjaspa. Uk uñjasasti, tamankir mä jilatasa jan ukajj kullakas jiwasjamäñwa munjjarakispa. Coleratätas imtʼañsa munkchiñänejja, qhepat jilat kullakanakajj uk amuyapjjaspawa. Ukatsti janiw jiwasamp chikachasiñ munjjapjjaspati (Pro. 26:24-26). Jilïri irpirinakaw jan colerasiñatakisa, mayninakar jan uñisiñatakisa, perdonañatakisa Bibliampi ewjjtʼapjjestani (Lev. 19:17, 18; Rom. 3:11-18). Ukham ewjjtʼatajja, ¿Jehová Diosan Arupar istʼañäniti?

7, 8. 1) ¿Kunjamsa Diosajj markaparu yanaptʼi? 2) ¿Kunanak lurañatakis Bibliajj chʼamañchistu, ukat kunatsa ukanak lurañasa?

⁷ Jehová Diosajja, aka Oraqenkiri markaparuw jichhürunakan yanaptʼaski ukhamarak yatichaski. ¿Kunjamsa uk luri? Diosajj Jesucristoruw ‘tamar pʼeqtʼañapatak’ uttʼayi, Jesusasti ‘amuyasiri cheqapa uywataruw’ Diosan markaparu yatichañapataki ukhamarak pʼeqtʼañapatak uttʼayi (Efe. 5:23; Mat. 24:45-47, MT). Nayrïr patak maranakanjja, Diosan markaparu pʼeqtʼirinakajj wali askitwa Diosan Arupar uñjapjjäna, jichhürunakanjja, ukhamarakiw Amuyasiri Cheqapa Uywatajj Diosan Arupar uñjapjje (1 Tesalonicenses 2:13 liytʼañataki). ¿Kunanak lurañatakis Bibliajj chʼamañchistu?

⁸ Bibliajja, akanak lurañatakiw chʼamañchistu: tantachäwinakaru jan faltasis sarañataki (Heb. 10:24, 25). Biblian yatichäwinakap mä kikpak amuyañataki (1 Cor. 1:10).  ‘Diosan Reinop nayraqat’ thaqañataki (Mat. 6:33). Utat uta yatiyir sarañataki, kawkhantï jaqenakajj wal sarnaqapki uka cheqanakan yatiyañataki (Mat. 28:19, 20; Hech. 5:42; 17:17; 20:20). Ukhamarusa, taman qʼomäñapatakejja, jilïr irpirinakajj Biblian ewjjtʼanakaparjamaw kuns lurapjje (1 Cor. 5:1-5, 12, 13; 1 Tim. 5:19-21). Janiw ukakïkiti, jañchisan qʼomäñasatakisa, jan wali amuyunakampi jan apayasiñatakisa, kunatï jan walïki uk jan lurañatakis Bibliajj ewjjtʼarakistuwa (2 Cor. 7:1).

9. Jesusajj Bibliat sum amuyañaswa muni, ¿khiti toqes ukatakejj yanaptʼaskistu?

⁹ Yaqhepajja ‘Bibliat sum amuyañatakejja, janiw khitis nayar yanaptʼañapäkiti’ sasin inas amuychi. Ukampis 1919 marat aksarojja, Jesusajj Amuyasiri Cheqapa Uywata toqew Bibliat sum amuyañatakisa ukarjam sarnaqañatakis yanaptʼistu. Jiwasatï Biblian yatichäwinakap istʼañänejja, taman sumankañaw utjani, qʼoma, mayachtʼata ukhamaw Diosar serviñäni. Akham jisktʼasiñäni: “¿Janipunit Jesusat jitheqtkäjja? ¿Amuyasiri Cheqapa Uywatarojj taqe chuymat istʼäjja?” sasa.

10. Ezequiel qellqatarjamajja, ¿kunjamas alajjpachankir Diosan markapajja?

¹⁰ Diosan servirinakapajja, alajjpachan suma organistʼataw Jupar servipjje, ukwa Biblia liytʼasajj yateqtanjja. Amuytʼañataki, Ezequiel profetajja, Jehová Diosaruw mä carron saraskir uñjäna, uka carrojj kawksarutï Diosajj sarañ munkäna uksaruw jankʼaki jan saytʼasa saräna (Eze. 1:4-28). Uka carrojja, alajjpachankir Jehová Diosan markapampi sasiwa. Jupanakajj jankʼakiw Diosan ewjjtʼanakap katoqasipjje. Ukjjarusti aka Oraqenkir Diosan markapajj jankʼakiw istʼapjjaraki. Amuytʼañataki, aka tunka qhepa maranakanjja, Diosan markapanjja kunayman cambionakaw utjawayi. Jehová Diosaw ukhamäñap muni. Niyaw Jesusampi angelanakapampejj jan wali jaqenakar tukjapjjani. ¡Janipuniw khitis Jehová Diosarusa, sutiparusa, apnaqäwiparus jiskʼachjjaniti!

11, 12. Aka qhepa urunakanjja, ¿kunsa Diosan markapajj lurawayi?

¹¹ Aka qhepa urunakanjja, ¿kunanakas Diosan markapan lurasiwayi? Diosar serviñatak Utanaka. Aka oraqpachan Jehová Diosan Testigonakaparu pʼeqtʼaski uka jachʼa utajja, Warwick (Nueva York) markanwa lurasi, uk lurasiñapatakejj walja jilat kullakanakaw yanaptʼawayapjje. Waljanirakiw Tantachasiñ Utanak lurañana, sucursalanak lurañana yanaptʼapjjaraki. Uka jilat kullakanakajja, Departamento de Diseño y Construcción Mundial siskis ukan pʼeqtʼataw trabajtʼasipki. ¡Ukham yanaptʼapjjatapajj wali kusiskañawa! Niyakejjay uka utanak lurasiñapatakejj qollqejj  munaschejja, waljaniw qollqempi yanaptʼapjjaraki. Jehová Diosajja, altʼat chuymampi, Jupat jan jitheqtasa serviri markaparojj wal bendici (Luc. 21:1-4).

¹² Escuelanak toqew Diosajj markapar yanaptʼi. Jehová Diosajj markapar wal yanaptʼañ muni (Isa. 2:2, 3). Ukatwa walja escuelanakajj utji. Sañäni, Precursoranakatak Escuela, Diosan Reinopat Yatiyirinakataki Escuela, Galaad Escuela, Machaq Betelitanakatak Escuela, Tamanak Tumptʼirinakataki ukat Warminakapampitak Escuela, Jilïr Irpirinakatak Escuela, Diosan Arunakap Yatiyañatak Escuela, Sucursal Sarayirinakataki ukat Warminakapampitak Escuela. Maysa toqetjja, Internetan jw.org cheqanjja, Biblia ukhamarak Bibliat apstʼat qellqatanakaw walja arunakat utji. Wawanakatakisa, familianakatakis walja yanaptʼanakaw utji, yatiyäwinakas utjarakiwa. ¿Internetan jw.org sat cheqajj utjki ukampejj yatiyasktati? ¿Familiana Bibliat yatjjatapkta ukhas yanaptʼapjjtamti?

13. ¿Kunsa Diosan markapankirinakajj lurapjjañapa?

¹³ Jehová Diosan markapankasin kuntï Jupajj lurañas munki uk yatisajja, ¡wal kusistanjja! Kun lurasas Jehová Diosar kusisiysna uk yatisajja, taqe kunan Diosan munañap lurañatakiw chʼamachasiñasa, ukatsti kunatï askïki ukwa lurañasaraki. Akapachankir jaqenakajja, kunatï jan walïki ukanakwa lurapjje, ukampis Jehová Diosajj taqe ukanak uñisiwa, jiwasajj ukhamarakiw uñisiñasa (Sal. 97:10). Akapachankir jaqenakajja, ‘jan walïki ukarojj “walikiwa” sapjjewa, walïki ukarusti “janiw walïkiti” sapjjarakiwa’, jiwasajj janipuniw jupanakjam amuyañasäkiti (Isa. 5:20). Cheqansa, taqe kunansa Jehová Diosatakjam sarnaqañwa muntanjja (1 Cor. 6:9-11). Kuntï Jehová Diosajj Arup toqe yatichkistu ukajja, jiwasan askisatakiwa. Juparojj wal munastanjja, janirakiw Jupat jitheqtañ munktanti. Ukatwa utansa, tamansa, trabajonsa, escuelansa, yaqha cheqanakansa Jehová Diosan Arupar istʼas sarnaqtanjja (Pro. 15:3). Kunanak lurasas Jehová Diosat jan jitheqtatas uñachtʼaysna uk jichhajj uñjañäni.

14. ¿Kunjamsa awk taykanakajj Jehová Diosatakjam sarnaqapjjaspa?

¹⁴ Wawanakar sum yatichapjjañäni. Kunjamsa wawanakar yatichapjjañapa ukjja, Jehová Diosajj Biblia toqew awk taykanakar ewjjtʼi. Cristiano awk taykanakajja, janiw akapachankir jaqenakjam amuyapjjañapäkiti (Efe. 2:2). Amuytʼañataki, yaqhep cheqanakan inas mä awkejj akham amuychispa: ‘Warminakaw wawanakar yatichapjjañapa’ sasa. Ukampis Bibliajja, awk taykaw wawanakar Diosat yatichapjjañapa sasaw ewjjtʼi (Efe. 6:4). Khä nayra tiemponjja, Samuel waynitojj wali sumaw Jehová Diosampi apasïna. Jehová Diosaru serviri awk taykanakajja, wawanakapajj Samueljam Jehová Diosampi sum apasipjjaspa ukwa munapjjaraki (1 Sam. 3:19).

15. Janïr mä amtar purkasajja, ¿kunjamatsa Jehová Diosat jan jitheqtatas uñachtʼaysna?

¹⁵ Suma amtar puripjjañäni. Janïr mä amtar purkasajja, kunsa Diosajj uka toqet amuyi ukwa nayraqat amuytʼañasa. Ukatakejj Biblia ukhamarak Diosan markapaw yanaptʼistaspa. Amuytʼañataki, jichhürunakanjja, yaqhep chacha warminakajj yaqha markaruw trabajir sarjjapjje. Wawanïsajja, markaparuw asu wawap aptʼayapjje, ukhamat familiarapat maynin uywañapataki. Ukham  lurasajja, awk taykajj qollqenïñatak trabajisipkakiwa. Cheqas sapa mayniw kunsa lurapjjani uk amtapjjañapa, ukampis awk taykanakajj akhamwa jisktʼasipjjañapa: ‘Kuntï lurañ amtkta ukatjja, ¿kunsa Jehová Diosajj amuypacha?’ sasa (Romanos 14:12 liytʼañataki). Ukhamajja, familiasata, trabajosata janïr kun amtkasajja, Bibliajj kamsisa ukwa nayraqat amuytʼañasa. Ukatsti taqe kunas sumar sarañapatakejj Jehová Diosampiw yanaptʼayasiñasa (Jer. 10:23).

16. 1) Wawapajj nasïna ukhajja, ¿kunsa mä warmejj luräna? 2) ¿Kunas suma amtar puriñatakejj yanaptʼäna?

¹⁶ Mä chacha warmejj yaqha markaruw sarjjapjjäna, uka qhepatsti wawapaw nasïna. Ukhamïpanjja, awk taykajj markaparuw wawap aptʼayañ amtapjjäna, ukhamat abuelonakamp uywatäñapataki. Ukampis uka tiemponjja, warmiw mä kullakampi Bibliat yatjjatañ qalltäna. Kullakajja, awk taykanakaw wawanakarojj Diosat yatichapjjañapa sasaw jupar säna (Sal. 127:3; Pro. 22:6). Uk yatisasti, jupajj Biblian ewjjanakaparjam lurañatakiw Jehová Diosar yanaptʼa mayïna (Sal. 62:7, 8). Ukatsti, Bibliat yatichkäna uka kullakarusa, tamankir mayni jilat kullakanakarus llakip yatiyarakïnwa. Familiaranakapasa, amigonakapasa, ‘wawarojj abuelitonakapaw uywañapa’ sasinsa sapkchïnjja, janiw jupanakar istʼkänti. Qhepatjja, kunjamsa jilat kullakanakajj esposaparusa, wawaparusa yanaptʼapjjäna ukwa chachapajj amuyäna. Uk uñjasajj wal muspharäna, Bibliat yatjjatañsa, familiapamp tantachäwinakar sarañsa qalltjjarakïnwa. Jehová Diosajj kunjamsa yanaptʼäna uk uñjasajja, ¡Bibliat yateqkäna uka warmejj wal kusisïna!

17. Bibliat maynir yatichtan ukhajja, ¿kuna ewjjtʼarjamas lurañasa?

¹⁷ Ewjjtʼanak istʼapjjañäni. Diosatakjam sarnaqañäni ukhajja, markap toqe katoqktan uka ewjjanakar istʼañäniwa. ¿Kunsa Bibliax chiqpachapuni yatichi? librompi maynir yatichañ qalltasinjja, kunsa lurañasa uk jichhajj amuytʼañäni. Sapa kuti sarasin librot yatjjatañ tuktʼayasajja, mä qawqha minutonakanwa Diosan markap uñtʼayañasa. Ukatakejja, ¿Kunjamsa tantachäwinakajj apasi? sat video uñtayañasa, ¿Khitinakas Jehová Diosan munañap lurasipki? folletotsa yatjjatañasarakiwa. Kunsa yatichi libro yatjjatañ tukuyasajja, “Diosan munasiñapan jakasipxañäni” librotwa yatjjatañasaraki. Ukaw Bibliat yateqerirojj Diosar taqe chuyma confiyañ yanaptʼani. Bautisatäjjchi ukhasa uka librot yatjjataskakiñasawa (Col. 2:7). ¿Kuntï Diosan markapajj siskistu ukar istʼasktanti?

18, 19. ¿Kunanakatsa Jehová Diosar yuspärañasa?

¹⁸ Jehová Diosarojj taqe kunatwa yuspärañasa. Jupïpanwa “jakapjjtanjja, sarnaqapjjaraktanjja, utjapjjaraktansa” (Hech. 17:27, 28). Diosajj Bibliaruw arup qellqayawayi. Uk yatisajja Tesalónica markankir cristianonakajja, wali askitwa Diosan Arup uñjapjjäna, jiwasajj ukhamarakwa uñjtanjja (1 Tes. 2:13).

¹⁹ Bibliaw Diosar jukʼamp jakʼachasiñatakejj yanaptʼistu, Diosasti jiwasarus jakʼachasirakistuwa (Sant. 4:8). Diosajj markapamp chika serviñatakiw invittʼistu, ukatwa Jupar wal yuspärtanjja. Salmonak qellqerjamaw jikjjatastanjja, jupajj sänwa: “Tatitur yuspagarapjjam, munasirïtap layku, khuyapayasiñapajj wiñayawa” sasa (Sal. 136:1). Salmo qellqerejja, uka qellqatan niya sapa tʼaqanwa aka arunak ayti: “Khuyapayasiñapajj wiñayawa” sasa. Jiwasatï Jehová Diosat jan jitheqtkañäni, ewjjanakaparjam sarnaqarakiñäni ukhajja, ¡Diosajj wiñay jakañwa churistani, jiwasatsa janirakiw jitheqtkaniti!