1, 2. 1) Diosajj mä organizacionanïtap yatisajja, ¿yaqhepanakajj kamsapjjesa? 2) ¿Kuna toqetsa aka yatichäwin yatjjataskañäni?

¿DIOSAJJ mä organizacionanïpachati? Yaqhepajj akham sapjje: “Jiwasar sarayañapatakejja, janiw mä organizacionajj munaskiti. Mayni pachpaw Diosampejj sum apasispa” sasa. ¿Ukajj cheqäpachati? ¿Kunas jichhakamajj uñjasiwayi?

² Aka yatichäwinjja, kunjamsa Diosajj luratanakapsa, markapsa organisi uka toqetwa yatjjatañäni. Maysa toqetjja, Diosan markapar sarayirinakajj ewjjtʼanak churkistu ukhajja, kunjamsa katoqasiñasa uksa yatjjatarakiñäniwa (1 Cor. 14:33, 40, NM). Khä nayrïr patak maranakanjja, Diosan servirinakapajj qollan arunakaru istʼasaw sarnaqapjjäna. Ukhamatwa suma yatiyäwinak taqe cheqan yatiyapjjäna. Jichhürunakanjja, ukhamarakiw Diosan Arupar istʼasa sarnaqtanjja. Diosan markapar sarayirinakajj ewjjtʼanak churkistu ukarus istʼaraktanwa. Ukhamatwa suma yatiyäwinak aka Oraqpachan yatiyasktanjja. Ukatjja, Diosan markapankirinakjamajja, suman sarnaqasa, qʼoma, mayachtʼata ukhamaw Diosar servisktanjja.

3. ¿Kunatsa Diosaw taqe kun sum lurtʼawayi sasin sista?

³ Kunjamsa Jehová Diosajj taqe kunsa lurtʼawayi uk uñjasajja, taqe kun sum luriri Diosätapwa amuytanjja. Bibliajj akham siwa: “Tatitusti yatiñampi, chʼikhi kankañampiwa saytʼayi alajjpachsa, akapachsa” sasa (Pro. 3:19). Ukampis Diosan luratanakapat janiw taqpach yatktänti. Kuntejj Jupat istʼktan, yatktan ukasti “jiskʼa arunakakiwa”, mä arunjja, jukʼak yattanjja (Job 26:14). Diosan luratanakapat mä jukʼaksa yatkstanjja, alajjpachasa, aka Oraqesa suma lurtʼatätapwa amuytanjja (Sal. 8:3, 4). Alajjpachanjja, walja waranqa waranqa warawaranakajj suma organistʼatäpjjewa. Jakktan uka galaxian utjki uka planetanakajj Intiruw muytapjje. Jehová Diosaw ukha suma lurtʼawayi, ukatwa warawaranakasa, planetanakas yäpar onjjtapjje. ‘Alajjpacha, aka Oraqe’ wali yatiñampi luriri Diosat lupʼisajja, Juparojj wal jachʼañchañ muntanjja, serviñsa ukhamaraki, janiw Jupat jitheqtañ munktanti (Sal. 136:1, 5-9).

4. ¿Kunatsa cientificonakajj jaqenakana taqpach jisktʼanakaparu jan qhanañchapki?

⁴ Cientificonakajja, alajjpachatsa, aka Oraqetsa wal yatjjatapjje, ukatjja ukarjamaw suma jakasiñ utjañapatakejj yanaptʼañ munapjjestu. Ukampis janiw wakiskir jisktʼanakar jaysirjamäpkiti. Amuytʼañataki, astronomía toqet yatjjatatanakajja, kunanakatï alajjpachan utjki ukanakajj kunjamatsa uñstawayi, jaqesa, animalasa, panqaranakasa kunjamatsa utji uka toqenakat janiw qhanañchirjamäpkiti. Ukhamarus jila parte jaqenakajja, ‘¿kunatsa wiñay jakañ munañajj chuymasan utji?’ sasaw jisktʼasipjjaraki (Ecl. 3:11). ¿Kunatsa uka jisktʼanakar jan qhanañchañ puedipki? Cientificonakasa, yaqha jaqenakasa, Diosajj janis utjkaspa, evolución toqekis taqe kunas utjkaspa ukhamwa amuyapjje. Ukampis Diosaw Biblia toqejj taqe jisktʼanakar sum qhanañchistu.

5. Jehová Diosajja taqe luratanakapjjar apnaqeri leyinakwa usktʼawayi, ¿kunjamsa ukajj jaqenakar yanaptʼi?

⁵ Jehová Diosajja, taqe luratanakapjjar apnaqeri leyinakwa uskuwayi (leyes de la naturaleza), ukanakarjamaw electricistanakasa, plomeronakasa, ingenieronakasa, avión apnaqerinakasa, cirujanonakasa, yaqha ukham jaqenakas trabajipjje. Sañäni, taqenin chuymapajj mä cheqankakiwa, ukatwa cirujanonakajj jaqenakan chuymapajj kawkhankisa uk sum yatipjje. Maysa toqetjja, mä jaqetï alto cheqat liweqtaspa ukhajja, jiwaspawa, uk taqeniw yattanjja. Uk yatisajja, jan jiwañatakejj taqeniw amuyumpi sarnaqtanjja.

6. Diosajj organistʼata sum serviyasiñ munatapjja, ¿kunjamatsa yattanjja?

⁶ Jehová Diosajja, alajjpachsa aka Oraqsa sum organistʼawayi. Markapajj suma organistʼata Jupar servipjjaspa ukwa Diosajj munaraki. Ukatwa Biblia churistu, uka toqew kunjamsa Jupar serviñasa uk yatichistu. Jiwasatï Biblian ewjjtʼaparjama, Diosan markapar sarayapki ukanakan ewjjtʼaparjam sarnaqañäni ukhajja, kusisitaw jakasiñäni.

7. Bibliajj yäpar suma lurtʼatawa sasajja, ¿kunatsa sistanjja?

⁷ Bibliajj Diosan suma regalopawa. Ukampis yatjjatata yaqhep jaqenakajja, Bibliajj judionakata, cristianonakata parliri jaqen lurat librokiwa sasaw sapjje. Biblian utjki uka libronakjja khitinakasa, kuna pachasa, kunsa qellqapjjani ukjja, Diosaw amtawayi. Ukatwa Bibliajj Diosan arunakap sum amuytʼañataki yanaptʼistu. Génesis librot Apocalipsis librokamajja, kunjamatsa ‘warmin wawapajj’ uñstani, kunjamsa uka wawajj aka Oraqe mä suma paraisor tukuyani uka toqetwa parli. Uka wawajj Jesucristowa, jupaw Diosat sipan  yaqha suma apnaqerejj jan utjatap uñachtʼayani (Génesis 3:15; Mateo 6:10; Apocalipsis 11:15 liytʼañataki).

8. ¿Kunjam organistʼatäpjjänsa israelitanakajja?

⁸ Diosan Leyiparjam sarnaqasajja, israelitanakajj suma organistʼatäpjjänwa. Amuytʼañataki, ‘Tatitumpi Jikisiñ Carpa punkunjja, Diosar servir warminakaw utjäna’ (Éxo. 38:8). Ukhamarusa, israelitanakajj mä cheqat yaqha cheqaru carpanaka, tabernáculo onjjtayañatakejja, suma organistʼatäpjjänwa. Qhepatjja, David reyejj templon yanaptʼapjjañapatakiw sacerdotenakarusa, levitanakarus organistʼäna (1 Cró. 23:1-6; 24:1-3). Diosar istʼasajja, israelitanakajj walja bendicionanakwa katoqapjjäna. Ukhamatwa organistʼata, mayachtʼata jakasipjjäna, sumankañas utjarakïnwa (Deu. 11:26, 27; 28:1-14).

9. Diosan markapajja, ¿kunjam organisatänsa?

⁹ Nayrïr patak maranakanjja, Diosan markapajj suma organistʼatarakïnwa. Tamanakar pʼeqtʼir mä qawqha jilatanakaw utjäna, jupanakaw tamanakar ewjjtʼapjjäna. Qalltanjja, apostolonakakiw tamanakar pʼeqtʼapjjäna. Ukampis qhepatjja, yaqha jilïri irpirinakaw jupanakar yanaptʼapjjarakïna (Hech. 6:1-6; 15:6). Tamanakar cartanak qellqapjjañapatakejja, Jehová Diosaw apostolonakarusa, jupanakar yanapapkäna ukanakarus yanaptʼäna (1 Tim. 3:1-13; Tito 1:5-9). ¿Uka cartanakajj tamanakar yanaptʼpachänti?

10. Jerusalenat pʼeqtʼapkäna ukanakan ewjjtʼanakapajja, ¿kunjamsa tamanakar yanaptʼäna? (9 janankir dibujo uñjjattʼam).

¹⁰ (Hechos 16:4, 5 liytʼañataki). Nayrïr patak maranakanjja, yaqhep jilatanakajj tamanak tumptʼiriw sarapjjerïna. Ukhamat “kuntejj Jerusalenankir apostolonakampi jilïrinakampejj” amtapkäna ukanak yatiyañataki. Tamankirinakajj taqe chuymaw uk katoqasipjjäna, ukatsti ‘wali chʼamaniw iyawsäwin saytʼapjjäna, Tatitur iyawsirinakasti sapürunjamaw yapjjattarakïna’. ¿Kunsa ukat yateqsna? ¿Kunjamsa ukajj tamasan yanaptʼistaspa?

11. Jehová Diosan markapar yanaptʼapki ukanakajja, ¿kunjamsa ewjjtʼanak katoqasipjjañapa?

¹¹ Sucursal sarayirinakasa, Comités de País ukanakasa, tamanak tumptʼirinakasa, jilïr irpirinakasa, Diosan markapar sarayapki ukanakan ewjjtʼanakap istʼañatakiw chʼamachasipjje. Bibliajj akham siwa: “Istʼapjjam irpirinakamarojja, jaysapjjarakim jupanakarojja” sasa (Heb. 13:7, 17; Deu. 30:16). Diosar taqe chuyma istʼirinakajja, taqe chuymaw ewjjtʼanak katoqasipjje. Janiw Diótrefes chachat yateqasiñ munktanti, jupajj jilïrinakarojj janiw istʼkänti (3 Juan 9, 10 liytʼañataki). Jiwasatï ewjjtʼanak taqe chuyma katoqasiñäni ukhajja, taman sumankaña, mayachtʼata jakasiñ utjañapatakiw yanaptʼañäni. Akham jisktʼasiñäni: “Diosat jan jitheqtas servipjjañapatakejja, ¿jilat kullakanakar yanaptʼaskti? Diosan markapar sarayirinakajj ewjjtʼanak churki ukarojja, ¿taqe chuymat istʼtjja?” sasa.

12. ¿Khitinakas jilïr irpirinakarusa, taman yanapirinakarus uttʼayapjje?

¹² Khitinakas jilïr irpirinakarusa, taman yanapirinakarusa ajllipjjañapa ukjja niya jichhanakakiw Oraqpachan Jilïri Irpirinakajj mayjtʼayapjje. Yatiyañataki noviembre 15, 2014 revistan “Aka revista liytʼirinakan jisktʼäwinakapa” siski uka yatichäwinjja, akham sänwa: ‘Nayrïr patak maranakanjja, tamanak tumptʼirinakaw jilïr irpirinakarusa, taman yanapirinakarus uttʼayapjjäna. Ukham lurasiñapatakejj tamanak pʼeqtʼirinakaw amtapjjäna’ sasa. Septiembre, 2014 marat qalltasinjja, ukhamarakiw tamanak tumptʼirinakajj lurjjapjje. Tamankir jilïr irpirinakaw khitis jilïr irpirita jan ukajj taman yanapirita servispa uk tamanak tumptʼirir sapjje. Ukjjarusti tamanak tumptʼiriw uka jilataru, familiaparu  uñtʼañatak chʼamachasi. Ukatakejja, inas uka jilatampi yatiyir mistchispa (1 Tim. 3:4, 5). Qhepatsti tamanak tumptʼirejj tamankir jilïr irpirinakampiw tantachtʼasi. Ukanjja, jilïr irpirinakasa, taman yanapirinakas kunjam chuymanïpjjañapasa ukwa Bibliampi uñakipapjje (1 Tim. 3:1-10, 12, 13; 1 Ped. 5:1-3).

13. ¿Kunjamsa jilïr irpirinakar yanaptʼsna?

¹³ Jilïr irpirinakajja, tamarojj sum uñjañ munapjje, jan walinakatsa jarkʼaqañwa munapjjaraki, ukatwa Bibliarjam ewjjtʼapjjestu. Uka ewjjtʼanakajj jiwasan askisatakiwa, ukhamajj taqe chuymaw katoqasiñasa (1 Tim. 6:3). Nayrïr patak maranakanjja, yaqhepajj janiw sum sarnaqapkänti. Yanaptʼañat sipansa, kunanaktï jan lurapjjañapäki ukakwa lurapjjäna. Jilïr irpirinakan yanaptʼatasa, pachpakïsipkänwa. Ukham jaqenakarojj ¿kunjamsa uñjasiñapäna? Pablojj akham sänwa: “Uñtʼapjjam, janirak jupampejj sarnaqapjjamti jupa pachpa pʼenqasiñapataki” sasa. Ukhamajja, cristianonakajj jupanakat jitheqtapjjañapänwa, ukampis janiw enemigoparjam uñjapjjañapäkänti (2 Tes. 3:11-15). Jichhürunakanjja, ukhamarakiw jilïr irpirinakajj Diosatakjam jan sarnaqapki ukanakar yanaptʼañ munapjje. Inas maynejj Diosar jan servirimpi casarasiñatak uñtʼasiskchi (1 Cor. 7:39). Maynitï jan wali luräwinakapa janipun apanukuñ munkchi ukhajja, jilïr irpirinakajj tamar amuytʼayañatakiw mä discurso (discurso de advertencia) arstʼañ amtapjjaspa. Ukanjja kunjamsa maynin jan wali sarnaqatapajj tamar jan wal uñjayaspa uka toqetwa qhanañchapjjaspa. Tamasantï uka kasta discurso arstʼasispa ukhajja, ¿kunsa lursna? Khititsa parlaski uk yatsna ukhajja, ¿janit jupampi parljjsna? Ukhamtï lurañänejja, jan wali sarnaqerejj amuyasiniwa, ukatsti jupa pachpa jan waltʼayasitapwa amuyasini. Jehová Diosan chuymap ustʼayatap amuyasasa, inas jan wali luräwinakap apanukchispa. ^[1]

14. ¿Kunjamsa taman qʼomäñapatakejj yanaptʼsna?

¹⁴ Taman jan walinak jan utjañapatakejja, kunsa taqenejj lurañasa uk Bibliajj sum qhanañchi. Corintonkir taman kunas pasäna uk jichhajj uñjañäni. Pablojj ukankir jilat kullakanakarojj wal munasïna. Jupanakat waljaniruw Diosar uñtʼapjjañapataki yanaptʼäna (1 Cor. 1:1, 2). Ukampis Corinto tamanjja, mayniw qʼañu lurañan sarnaqaskäna, juparusti tamankirinakajj janiw kuns lurapkänti. Uk yatisajja ¿kunjamakis Pablojj jikjjataspachäna? Pablojj jilïr irpirinakarojj akham sänwa: “Uka jaqesti Supayaru katuyatäñapawa” sasa. Jan walin sarnaqer jaqejj tamat jaqsutäñapänwa (1 Cor. 5:1, 5-7, 12, 13). Jichhürunakanjja, inas jilïr irpirinakajj jan arrepentisitapat mayniru tamat jaqsuñ amtapjjchispa. Ukhamäni ukhajja, Bibliarjamajj janiw jan wali luririmpejj chikachasiñasäkiti. Ukhamatwa taman qʼomäñapatakejj yanaptʼañäni. Ukhamarusa, jan wali luririrojj arrepentisiñapatakisa, Jehová Diosar perdón mayisiñapatakis yanaptʼaraksnawa.

15. ¿Kunjamsa taman sumankañ utjañapatakejj yanaptʼsna?

¹⁵ Corinto tamanjja, yaqha jan waltʼäwiw utjarakïna. Yaqhep cristianonakajj jilanakaparuw tribunalanakar apapjjäna. Ukatwa Pablojj jupanakar akham jisktʼäna: “¿Kunatsa jan tʼaqhesipkta jan chʼajjwasakejja?” sasa (1 Cor. 6:1-8). Jichhürunakanjja, yaqhep jilat kullakanakajja mayni jilat kullakanakampiw negocio lurañ amtapjje. Ukampis qhepatjja, qollqwa qʼal aptʼasipjje, jan ukajj mayni jilat kullakas qollqe apaqkaspa ukhamwa amuyapjjaraki. Ukhamanakan uñjasisajja, jilat kullakanakaparuw autoridadanakan ukaru apapjje. Ukham sarnaqer uñjasajja, yaqhep jaqenakajj Jehová Diosatsa, markapatsa jan walinakwa parlapjjaspa. Ukatjja, jan waltʼañanakaw taman utjarakispa. Qollqsa aptʼaskchiñänejja, jilat kullakanakasamp  sum apasiñatakiw Bibliajj chʼamañchistu. ^[2] Kunjamsa jan waltʼäwinak askichañasa uk Jesusajj sum yatichäna (Mateo 5:23, 24; 18:15-17 liytʼañataki). Jiwasatï Jesusan ewjjtʼapar istʼañäni ukhajja, sumana, mayachtʼata ukhamaw taman sarnaqasiñäni.

16. ¿Kunatsa Diosan markapajj mayachtʼata?

¹⁶ Bibliajj akham siwa: “Uñjapjjam: ¡kunj munkayasa jilanak pur mä wawak suman jakasiñajja!” sasa (Sal. 133:1). Israelitanakajja, Jehová Diosar istʼasajj mayachtʼata, suma organistʼata ukhamaw Jupar servipjjäna. Nayraw Diosajj markapat akham sisjjäna: “Ovejanakjamwa mayaru anthapjjä” sasa (Miq. 2:12). Kunatï cheqäki uk Bibliat yateqasajja, mayachtʼataw servipjjetani sasaw Jehová Diosajj sarakïna. Jupajj akham sänwa: “Taqe markanakan parläwinakapwa qʼomachä, ukhamata taqenin [nayaru] yupaychapjjañapataki, ukatsti mayakiraki [nayaru] servipjjañapataki” sasa (Zac. 3:9). ¡Jehová Diosar mayachtʼata servisajj wal kusistanjja!

17. Tamantï maynejj jucharu purtʼaschi ukhajja, ¿kunsa jilïr irpirinakajj lurapjjañapa?

¹⁷ Maynitï jucharu purtʼaschi ukhajja, jilïr irpirinakajj jankʼakiw munasiñampi cheqañchapjjañapa. Jehová Diosajja, jupanakaruw taman sumankaña, qʼoma, mayachtʼata sarnaqañ utjañapatakisa, jan walinakat jarkʼaqapjjañapatakis confiyi (Pro. 15:3). Corintonkir jilat kullakanakarojja, Pablojj wal munasïna. Ukatwa jan wali luräwinakapat cheqañchäna, ukatakejj nayrïr cartapwa jupanakar apayäna. Uka tamankir jilïr irpirinakajj jankʼakiw Pablon arunakapar istʼapjjäna. Ukatwa Pablojj jupanakar chʼamañchtʼañ munäna, ukatakejj payïr cartapwa mä qawqha phajjsinakat apayäna. Ukhamasti, maynitï jan amuytʼasis jan wal luraskchi ukhajja, jilïr irpirinakaw munasiñampi cheqañchapjjañapa (Gál. 6:1).

18. 1) Nayrïr patak maranakanjja, ¿kunjamsa Diosan Arupajj tamanakar yanaptʼäna? 2) ¿Kuna toqetsa jutïr yatichäwin yatjjataskañäni?

¹⁸ Nayrïr patak maranakanjja, cristianonakajj Diosan arunakaparuw istʼapjjäna. Ukatwa tamanakan sumankaña, qʼoma, mayachtʼata sarnaqañajj utjäna (1 Cor. 1:10; Efe. 4:11-13; 1 Ped. 3:8). Ukhamïpanjja, uka jilat kullakanakajj ‘qhespiyasiñ arunak taqe cheqanwa’ yatiyapjjäna (Col. 1:23). Jichhürunakanjja, Diosan markapajj mayachtʼata, organistʼata ukhamaw Diosar servisktanjja. Ukatsti suma yatiyäwinak taqe aka oraqpachanwa yatiyaskaraktanjja. Jutïr yatichäwinjja, kunjamsa Diosan servirinakapajj Jehová Diosan sutip jachʼañchañatakisa, Biblian ewjjanakapar istʼañatakis chʼamachasisktan uka toqetwa yatjjatañäni (Sal. 71:15, 16).