1. ¿Kunjamsa Jehová Diosaru ukhamarak marka apnaqerinakaru istʼatas uñachtʼaysna?

DIOSAN ARUPAJJA, marka apnaqerinakar istʼañasatakiw ewjjtʼistu, maysa toqetsti ‘jaqenakar sipansa Diosaruw nayraqat istʼapjjañama’ sasaw sarakistu (Hech. 5:29; Tito 3:1). ¿Kunjamsa Biblian uka ewjjtʼanakapar phoqsna? Jesusan arunakapaw yanaptʼistaspa, jupajj sänwa: “Cesarankkis ukjja Cesarar churapjjam, Diosankkis uksti Diosarurak churapjjam” sasa (Mat. 22:21). ^[1] Jesusan arunakapar phoqañatakejja, kawkintï jakasktan uka marka apnaqerinakaruw istʼañasa. Mä arunjja, leyinakaparusa, jupanakan uttʼayat irnaqerinakarus respetañasawa, impuestonaksa pagañasarakiwa (Rom. 13:7). Ukampis marka apnaqerinakatï Diosan leyinakap pʼakintayañ munapjjestani ukhajja, Diosaruw nayraqat istʼañasa.

2. ¿Kunjamsa politicar jan mitisitas uñachtʼaysna?

² ¿Kunjamsa Diosankkis ukjja Diosar chursna? Politicar jan mitisisa (Isa. 2:4). Marka apnaqerinakajj Diosan uchatawa, ukatwa autoridadanak contrajj jan saytʼañasäkiti. Maysa toqetjja, janirakiw markarus uruyktanti ni yaqha ukhamanaksa lurktanti (Rom. 13:1, 2). Eleccionanakanjja, janiw kuna partidorus votosampi yanapktanti ni mä partidon yanapiripjamas uñtʼayasktanti. Janirakiw  marka apnaqerinakarus munañasarjam apnaqapjjañapatak chʼamañchktanti, ni mä apnaqeri jaqsusin yaqha apnaqeri uttʼayasiñapatakis yanapktanti.

3. ¿Kunatsa akapachar jan mitisiñasäki?

³ Kunatsa Diosajj akapachar jan mitisiñas munki ukjja Bibliajj sumwa qhanañchi. Maya, Jesusajj aka oraqenkkäna ukhajja, janiw akapachar mitisirïkänti. Jupajj janipuniw politicar mitiskänti ni guerrarus nuwasir sarkänti. Jiwasajj jupan arkiripjamajj janirakiw akapachar mitisiñasäkiti, ukhamatwa yatichäwinakaparjam sarnaqatas uñachtʼayañäni (Juan 6:15; 17:16). Paya, Diosan Reinopar taqe chuyma yanaptʼañ munasaw akapachar jan mitisiñasäkiti. Uka Reinokiw taqe jan waltʼäwinak chhaqtayjjani sasaw jaqenakar yatiytanjja. Ukhamasti, akapachar mitisisksna ukhajja, ¿kunjam chuymampirak Reino toqet parlsnasti? Kimsa, janiw kʼari religionanakar sarapki uka jaqenakjamäktanti. Jupanakajja, politicar mitisisaw tʼaqa tʼaq sarnaqapjje. Jiwasasti, Diosan leyinakaparjam sarnaqasajj janiw akapachar mitisktanti, ukhamatwa taqe jilat kullakanakasampejj mayachtʼat sarnaqtanjja (1 Ped. 2:17).

4. 1) ¿Kunatsa akapachar jan mitisiñatakejj jukʼamp chʼamachasiñasa? 2) ¿Kunatsa akapachar jan mitisiñatakejj jichjatpach wakichtʼasiñasa?

⁴ Kawkhantï jakastan ukanjja, inas jaqenakajj politicar mitisiñatak jan sint chʼamañchapkchistuti, ukatsti inas Diosan arunakap istʼañsa munapjjarakchi. Ukampis Supayan apnaqat akapachajj niyaw tukjatäni, ukhamasti sapürutjamaw akapachar jan mitisiñatakejj jukʼampi chʼamachasiñasa. Niyakejjay akapachajj amtaparjam sarnaqer jaqenakampi, ukhamarak mä amtarus jan purirjam sarnaqer jaqenakamp phoqantatächejja, sapürutjamaw tʼaqjjtaski (2 Tim. 3:3, 4). Yaqhep markanakanjja, jilat kullakanakasajj akapachar jan mitisiñatakejj wal chʼamachasiwayapjje. ¿Kunatsa? Uka markanakanjja, akatjamatwa marka apnaqerinakajj mayjtʼawayi. Jiwasajja, jan waltʼäwinakar saykatañatakejj jichjatpachaw wakichtʼasiñasa, jan ukhamäkaspa ukajja, akapachan luräwinakaparu mitisiñaruw purtʼassna. Ukhamajja, ¿kunjamsa akapachar jan mitisiñatakejj wakichtʼassna? ¿Kunsa akapachar jan mitisiñatakejj lurañasa? Ukwa aka yatichäwin pusi toqet yatjjataskañäni.

5. Jehová Diosajja, ¿kunjamsa marka apnaqerinakar uñji?

⁵ Akapachar jan mitisiñatakejja, kunjamtï Jehová Diosajj marka apnaqerinakar uñjki ukhamarakiw jiwasajj uñjañasa. Yaqhep marka apnaqerinakajja amuyatajj janis jan walinak lurapkchejja, Jehová Diosajj janiw jupanak pachpa apnaqasipjjañapataki jaqer lurkänti (Jer. 10:23). Marka apnaqerinakajja, markapar wal munasipjjañapatakiw jaqenakar chʼamañchapjje, ukatwa tʼaqa tʼaqa sarnaqañajj akapachan utji. 1914 marat aksarusti marka apnaqerinakajj Diosan Reinop contraw saytʼawayapjje. Uka Reinow akapach apnaqerinakarojj qʼal tukjani (Salmo 2:2, 7-9 liytʼañataki).

6. ¿Kunjamsa marka apnaqerinakar uñjañasa?

⁶ Marka apnaqerinakajja, akapachan mä jukʼa sumankañ utjañapatakiw yanaptʼapjje, ukhamatwa Diosan arunakap yatiyasiñapatakis yanaptʼapjjaraki. Ukatwa Jehová Diosajj jupanakar utjayi (Rom. 13:3, 4). Marka apnaqerinakatakejj mayipjjañamawa sasaw Diosajj sistu. Yamas khitinakatï Diosan arunakap yatiyañ jarktʼañ munapki ukanakatakejja, jukʼampïñapawa sasaw sarakistu (1 Tim. 2:1, 2). Jiwasajja, apóstol Pabljamarakiw marka apnaqerinakarojj cheqapar uñjatäñatak maytanjja (Hech. 25:11). Marka apnaqerinakajj Supayan apnaqatawa sasaw Bibliajj qhanañchi, ukampis jupanakat sapa mayniruw apnaqe sasin janiw siskiti (Luc. 4:5, 6). Ukhamasti ‘marka apnaqerinakan uttʼayatäpki ukanakajj Supayan apnaqatäpjjewa’ sasin janipuniw amuyañasäkiti. Janirakiw jupanakarojj jan wali arunakamp parlañasäkiti (Tito 3:1, 2).

7. ¿Kuna amuyus jiwasan jan utjañapäki?

 ⁷ Diosar istʼatasjja, candidatonakaru, politiconakar jan yanaptʼasaw uñachtʼaytanjja. Jupanakajj jiwas conträpasa janisa, janipuniw kunäkipansa yanaptʼañasäkiti. ¿Kunapachanakansa akapachar jan mitisitas uñachtʼaysna? Amuytʼañataki, mä qawqha jaqenakajja, jaqenakaru ukhamarak Diosan servirinakapar tʼaqhesiyir marka apnaqeriru jaqsuñ munapjjaspa. Ukapachanjja, janiw jupanakamp chikajj uka marka apnaqer contrajj saytʼkañäniti. Ukampis chuymasanjja, ¿uka jaqenakjamarakit uka marka apnaqerirojj jaqsuñ munañäni? (Efe. 2:2). Akapachar jan mitisiñ munatasajja, janiw arunakasanaki, ni luratanakasanaksa amuyasiñapäkiti, jan ukasti chuymasanwa amuyasiñapa.

8. Akapachar mitisiñatak yantʼat uñjastan ukhajja, ¿kunjamatsa chʼikhïtassa, llampʼu chuymanïtassa uñachtʼaysna?

⁸ Akapachar jan mitisiñatakejja, ‘katarinakjam chʼikhïñasawa’, ukatsti ‘palomanakjam llampʼu chuymanïñasarakiwa’ (Mateo 10:16, 17 liytʼañataki). Chʼikhïtasjja, jan walinakat janïräkipan amuyastan ukhaw uñachtʼaytanjja. Llampʼu chuymanïtassti, jan waltʼäwinakan uñjaskasajj akapachar jan mitisisaw uñachtʼayaraktanjja. Akapachar jan mitisiñatakejj kunanakansa amuyasiñasa uka toqetwa jichhajj yatjjataskañäni.

9. Mayninakampi parlasajja, ¿kunjamsa chʼikhïtas uñachtʼaysna?

⁹ Arunakasa. Jaqenakajj política toqet parlapjjestani ukhajja, amuyasiñasawa, mä arunjja chʼikhïñasawa. Amuytʼañataki, Diosan Reinopat maynimp parlañäni ukhajja, janiw politiconak toqesa ni partidonak toqesa, ni amuyunakap toqes jan walinak parlañasäkiti. Jan ukasti, parlktan uka jaqempejj kunansa pachpa amuyunïtan, ukwa amuytʼañasa. Politiconakajj kunjamsa jan waltʼäwinak askichañ munapjje uka toqet parlañat sipansa, kunatsa jan waltʼäwinakajj utji uka toqetwa parltʼasiñasa. ‘Diosan Reinopakiw taqe jan waltʼäwinak chhaqtayjjani’ sasinwa Bibliampi qhanañchtʼañasa. Maynitï chacha pura, warmi pura casarasiñat parlañ munani, jan ukajj wawa jaqsuyañ (aborto) toqet parlañ munani ukhajja, Diosajj uka toqet kamsisa ukwa qhanañchañasa. Ukatsti, jiwasajj kunjamsa Diosan leyinakaparjam sarnaqtan uksa qhanañcharaksnawa. Uka toqenakat parlasajja, janipuniw walsa jan walsa politiconakat parlañasäkiti. Janirakiw kawkïr leyinakas apsusiñapa, kawkïrinakas janiraki, jan ukajj kawkïrinakas mayjtʼayasiñapa uka toqenakatsa parlañasäkiti.

10. Televisión uñchʼukisasa, radio ischʼukisasa, ¿kunatsa akapachar jan mitisiñatakejj amuyasiñasa?

¹⁰ Televisión, radio, periódico, Internet. Awisajja, periodistanakajj mä qawqhanin amuyunakapakwa parlapjjaspa. Yaqhep markanakanjja, televisionasa, radiosa, periodicos marka apnaqerinakan apnaqatawa. Ukhamasti kunanakas yatiyasini ukjja uka marka apnaqerinakaw sapjje. Yaqhep markanakanjja janiw ukhamäkarakiti. Uka markanakan jakasir cristianonakasa, kunanakatsa periodistanakajj parlapjje ukanakat wal amuyasipjjañapa. Ukatwa akham jisktʼasiñasa: “¿Política toqet nayjam amuyiri mä periodistajj parlki ukhajja, jupar istʼañajj gustituti?” sasa. Cheqas mä partido toqetak sum parlir yatiyäwinakjja janiw ischʼukiñasäkiti, leyiñasäkisa ni televisionansa uñchʼukiñasäkiti. Ukatsti, uka yatiyäwinakajj ‘kuna suma yatichäwinaktejj’ Diosan Arupan yateqktan ukarjamäskiti janicha uksa amuytʼañasarakiwa (2 Tim. 1:13).

11. Kunanakatï utjkistu ukanakar sinti munañajja, ¿kunjamsa akapacharu mitisiñar apistaspa?

¹¹ Kunanakatï utjkistu ukanakar sinti munaña. Kunanakatï utjkistu ukanakar sinti munañajja, akapachar mitisiñaruw apistaspa. Malaui markan jakasiri Ruth kullakajj ukwa uñjäna. 1970 maranakanjja, walja jilat kullakanakaw arknaqat uñjasipjjäna. Kullakajj siwa: “Jilat kullakanakajja, kunanakanïpkäntï ukanakjja janiw  jaytirjamäpkänti. Nanakamp chikas yaqha cheqar sarapkchïnjja, utapar kuttʼañ laykojj politiconakampiw mayachasjjapjjäna. Kawkharutï sarapkayäta ukan jakañajj chʼamakïnwa, ukatwa uka cheqan jan jakañ munjjapjjänti” sasa. Ukampis Diosan servirinakapat waljanejj pisinsa jakasipkchïnjja, cosasanakap aptʼasipkchïna ukasa, janiw politicar mitisipkänti (Heb. 10:34).

12, 13. 1) ¿Kunjamsa Jehová Diosajj jaqenakar uñji? 2) Nasiwayktan uka markat jachʼa jachʼa tukuskatasjja, ¿kunjamsa amuyassna?

¹² Jachʼa jachʼa tukuña. Jaqenakajja, markapatsa, jañchipatsa, costumbrenakapatsa jachʼañchasipjjapuniwa. Ukampis Jehová Diosajja, janiw mä qawqha jaqenakakis mayninakat sipan jukʼamp sumäkaspas ukham amuykiti, jan ukasti Jupatakejj taqenis mä kikpakïtanwa. Jehová Diosajj janiw costumbrenakasat armtʼasiñas munkiti, jan ukasti walja costumbrenak utjatapajja, kunayman jakasiri jaqenak utjatapwa uñachtʼayi (Rom. 10:12).

¹³ Nasiwayktan uka markat jachʼa jachʼa tukuñajja, uka markar jukʼamp munañatakiw chʼamañchistaspa. Ukarakiw akapachar mitisiñatakejj apistaspa. Cristianonakasa, markasaru jukʼamp munasiñarojj purtʼasiraksnawa. Nayrïr patak maranakansa, yaqhep cristianonakajj yaqha markatäpjjatap laykojja, jilat kullakanakapar jiskʼachapjjänwa (Hech. 6:1). Jiwasajja, ¿kunjamatsa markasat jachʼa jachʼa tukuskatas yatsna? Amuytʼañataki, yaqha markat jutiri mä jilatatï ewjjtʼistaspa ukajja, ¿uka jilatar istʼañäniti? Jan ukajja, ¿“nanakaw jukʼamp sum lurañ yatipjjta” sasin janich istʼjjañäni? Ukham lurañat sipansa, maynirojj “jukʼamp sumäkaspas ukhama” uñjañatakiw Bibliajj chʼamañchistu (Fili. 2:3).

14. ¿Kunjamsa oración mayisiñajj yanaptʼistaspa, ukat Bibliankir kawkïr sarnaqäwis uk uñachtʼayi?

¹⁴ Akapachar jan mitisiñatakejja, Jehová Diosaruw yanaptʼa mayisiñasa. Ukatakejja qollan ajayupwa Diosar mayiñasa, ukaw paciencianïñatakisa, munañanakasampi jan apayasiñatakisa, jan wali apnaqerinakaru respetomp uñjañatakis yanaptʼistani. Kunanakatï akapacharu mitisiykistaspa ukanakat amuyasiñatakiw Jehová Diosar yatiñ kankañap mayiñasa (Sant. 1:5). Jumatï Jehová Diosar yupaychatamat carcelan jistʼantatästa, jan waltʼayatas uñjassta ukajja, Jehová Diosaruw chʼamap mayisiñama. Iyawsäwim jan ajjsaras arjjatañatakisa, arknaqat uñjasisin aguantañatakisa Diosaruw mayisiñama (Hechos 4:27-31 liytʼañataki).

15. Yantʼanakan uñjaskañäni ukhajja, ¿kunjamsa Bibliajj akapachar jan mitisiñatak yanaptʼistaspa? (“Bibliaw Diosat jan jitheqtapjjañapatak yanaptʼawayi” siski uka recuadro uñjjattʼäta).

¹⁵ Jehová Diosajj Biblia toqew chʼamañchtʼistaspa. Ukhamasti yantʼanakan uñjasiñäni ukhajja, kawkïr qellqatanakas aka pachar jan mitisiñatak yanaptʼistaspa ukwa amuytʼañasa. Uka qellqatanak pʼeqer yatsuñatakis chʼamachasiñasawa. Bibliajj jan utjkistani ukhajja, uka qellqatanak amtañaw chʼamañchtʼistani. Ukatsti Diosan Reinopajj kuna bendicionanaktï apankani ukanak suytʼañatakis yanaptʼarakistaniwa. Uka suytʼäwiw arknaqat uñjasiñäni ukhajj aguantañatak yanaptʼistani (Rom. 8:25). Kunanak phoqasirsa Paraison uñjañ munsna, uka toqet parlir qellqatanaka Biblian ajllipjjañäni. Ukatsti niyas ukanak phoqasir uñj-jjsna ukham amuytʼarakiñäni.

16, 17. Diosat jan jitheqtiri servirinakapat yateqasiñajja, ¿kunjamsa akapachar jan mitisiñatak yanaptʼistaspa? (27 janankir foto uñjjattʼam).

¹⁶ Akapachar jan mitisiñatakejja, Diosat jan jitheqtiri servirinakapat yateqasiñaw yanaptʼarakistaspa. Ukaw amuytʼasirïñatakisa, jan walinakan aguantañatakis yanaptʼistani. Amuytʼañataki, Sadrac, Mesac, Abed-nego waynanakajja, kuntï Babilonia marka apnaqerejj jachʼañchayasiñatak luraykäna ukarojj janiw yupaychapkänti  (Daniel 3:16-18 liytʼañataki). Uka waynanakan sarnaqäwipajja, Jehová Diosan walja Testigonakaparuw banderar jan jachʼañchapjjañapatak yanaptʼawayi. Jesusasti, aka oraqenkäna ukhajja, janirakiw politicarusa ni akapachan chʼajjwäwinakaparus mitiskänti. Sarnaqäwipajj kunjamsa yaqhanakar yanaptʼaspäna ukjja Jesusajj yatïnwa. Ukatwa arkirinakapar akham säna: “Chʼam katjjatapjjam, nayajj akapacharojj atipjtwa” sasa (Juan 16:33).

¹⁷ Jichhürunakanjja, Jehová Diosan walja Testigonakapaw akapachar jan mitisipkarakiti. Yaqhepajj nuwjata, carcelan jistʼantata jan ukajj jiwayataw uñjasiwayapjje. Jupanakan sarnaqäwipajja, kunjamtï Turquía markan jakasiri Barış jilatarojj yanaptʼkäna ukhamarakiw yanaptʼistaspa. Barış jilatajj siwa: “Franz Reiter jilatarojja, Hitler chachan ejercitoparu jan sarañ munatapatwa jiwayapjjäna. Janïr jiwayatäkasajja, jupajj mä cartwa taykapar qellqäna. Uka cartanjja, qawqha iyawsäwinïnsa, Diosarus qawqsa confiyäna ukajj qhanaw amuyasi. Nayajja, yantʼanakan uñjaskasajj uka jilatjamäñwa munarakta” sasa. ^[2]

18, 19. 1) ¿Kunjamsa jilat kullakanakajj akapachar jan mitisiñatakejj yanaptʼapjjestaspa? 2) ¿Kunsa jichjatpach lurañasa?

¹⁸ Tamanjja, jilat kullakanakas yanaptʼarakistaspawa. Akapachar mitisiyiri yantʼanakan uñjasstan ukhajja, irpir chuymaninakampiw parltʼañasa. Jupanakaw Bibliarjam ewjjtʼapjjestani. Jilat kullakanakasa yantʼanakan uñjasitas yatipjjani ukhajja, Diosar serviskakiñatak yanaptʼapjjestaniwa. Jupanakarojja, jiwasatak oración lurapjjañapatakiw mayiraksna. Jiwasatï mayninakamp yanaptʼayasiñ munstan ukhajja, oración lurapjjañapsa munarakstan ukhasa, jupanakatakejj ukham lurañasarakiwa (Mat. 7:12). “Testigos de Jehová presos por sus creencias (por países)” sat cheqaw khiti jilat kullakanakatakis oración lursna uk yatiñatak yanaptʼistaspa. Ukasti Internetan jw.org cheqanwa jikjjatasi. Ukatakejja, PRENSA > ASUNTOS LEGALES ukaruw mantañama. Uka cheqar mantasaw carcelan llawintatäpki uka jilat kullakanakan sutinakap jikjjatäta. Jupanakar yanaptʼañapatakiw oración mayisma. Ukhamatwa Jehová Diosajj Jupat jan jitheqtapjjañapatak chʼam churani (Efe. 6:19, 20).

¹⁹ Marka apnaqerinakajj niyaw tukjatäpjjani. Ukatwa jupanakajj Jehová Diosata ukhamarak Reinopat jitheqtañas munapjje. Ukhamasti, akapachar jan mitisiñatakejj jichjatpach wakichtʼasipjjañäni.