Jehová Diosajj Jupar iyawsirinakar sum uñji
“Yateqasipjjam khitinakatejj iyawsäw toqe, jan qarjasisa taqe kunatejj Diosajj: ‘Churämaw’ siski uka herencia katoqapki ukanakata” (HEB. 6:12).
86, 54 QʼOCHUNAKA
1, 2. ¿Kun lurañas Jefté chachatakisa phuchapatakis chʼamakïnjja?
MÄ CHACHAJJA, yaqha markamp nuwasir sarasinwa utapar kuttʼaski. Awkipar uñjasinsti, phuchapajj wali kusisitaw thoqtʼasisa ukhamarak canttʼasisa katoqerejj tʼijuski. Ukampis awkipajj phuchapampi chika thoqhoñat sipansa wilarar isipwa akham sas chʼiyanoqasi: “¡Ay, imill wawajja, [...] nayajj mä arsüwi Diosarojj lurta!” sasa. Ukatsti kunsa Diosar säna ukwa yatiyarakïna. Awkipan arsutaparjamajja, phuchapajj janiw casarasiñapäkänti ni wawanïñapäkänsa. Uk yatisajja, ¿kunjamakis uka tawaqojj jikjjataspachäna? Awkiparojj sänwa: “Kuntejj Diosarojj arskta ukjja nayampejj luraskakim” sasa. Ukham sasinjja, Diosar taqe chuyma iyawsatapwa uka tawaqojj uñachtʼayäna. Jupatakejja, Diosar istʼañaw wali wakiskirïnjja (Jue. 11:34-37). Uk yatisasti, awkipajj wali kusisitaw jikjjatasïna. Phuchapan ukham luratapat Jehová Diosan kusisit jikjjatasitapsa yatirakïnwa.
2 Uka chachasti Jefté satänwa. Jupasa phuchapasa, Jehová
Diosarojj taqe chuymaw confiyapjjäna, ukatsti taqe kunansa Diosar istʼasapuniw sarnaqapjjarakïna. Awisajja ukham lurañajj chʼamakïchïna ukasa, Diosar kusisiyañatakiw chʼamachasipjjäna.3. ¿Kunsa Jefté chachatsa phuchapatsa yateqsna?
3 Jehová Diosar taqe chuyma iyawsañajj chʼamakiwa, uk jiwasajj sum yattanjja. Diosar iyawsaskakiñatakejj chʼamachasiñasawa (Jud. 3). Jefté chachasa phuchapasa kunjamanakansa uñjasipjjäna, ukatjja ukanakar saykatañatakejj kunsa lurapjjäna uk yatjjatañaw Diosar iyawsaskakiñatak yanaptʼistani. Jupanakajja, ¿Diosar iyawsaskakiñatakejj kunsa lurapjjäna?
JAN WALI JAQENAK TAYPIN JAKKASASA DIOSAR IYAWSAPJJÄNWA
4, 5. 1) Suma Oraqer mantapkäna ukhajja, ¿kunsa israelitanakajj lurapjjañapäna? 2) Salmo 106 qellqatarjamajja, ¿Diosar jan istʼapjjatapat kunjamansa israelitanakajj uñjasipjjäna?
4 Jefté chachasa phuchapasa, israelitanakajj Diosar jan istʼasajj kuna jan walinakansa uñjasipjjäna ukjja sapüruw uñjapjjäna. 300 maranak nayrajja, kʼari diosanakaru yupaychas Suma Oraqen jakapkäna ukanakar tukjapjjañapatakiw Jehová Diosajj israelitanakar mayïna (Deu. 7:1-4). Uka arunakar jan istʼapjjatapatjja, israelitanakat waljanejj cananeo jaqenakjamarakiw sarnaqjjapjjäna. Kʼari diosanakar yupaychasa, wachoq juchanakana ukhamarak yaqha jan wali luräwinakanwa israelitanakajj sarnaqjjapjjäna (Salmo 106:34-39 liytʼañataki).
5 Israelitanakajj janiw Jehová Diosan munañap lurjjapjjänti, ukatwa Diosajj jupanakar jaytjjäna, janirakiw enemigonakapatsa jarkʼaqjjänti (Jue. 2:1-3, 11-15; Sal. 106:40-43). Uka tiemponjja, Diosar munasir familianakajj Jehová Diosatakjam sarnaqañatakejj wal chʼamachasipjjañapäna. Waljanejj janis Diosan munañap lurapkchïnjja, Diosar taqe chuyma iyawsiri israelitanakajj utjänwa sasaw Bibliajj qhanañchi. Jupanakat mä qawqhanejj akanakänwa: Jefté chacha, phuchapa, ukhamarak Elcana, Ana, Samuel (1 Sam. 1:20-28; 2:26).
6. ¿Kunanak lurañatakis akapachajj chʼamañchistu, ukat kun lurañatakis chʼamachasiñasa?
6 Jichhürunakanjja, jaqenakajj cananeo jaqenakjamarakiw wachoq jucha lurañanakana, nuwasiñanakana, qollqe thaqañanakan sarnaqapjje. Jehová Diosajja, ukanakat jarkʼaqañ munasaw israelitanakarjam suma ewjjtʼanak churistu. Jiwasajj janiw israelitanakjamajj jan walinakan uñjasiñ munktanti (1 Cor. 10:6-11). Jan walinak lurañ munañatï chuymasan utjani ukhajja, jankʼakiw ukanak apanukuñasa (Rom. 12:2). ¿Ukhamti lurasktanjja?
JAN WALINAKAN UÑJASKASASA TAQE CHUYMAW DIOSAR IYAWSÄNA
7. 1) Jefté chacharojja, ¿kunjamsa jilanakapasa, Israel marka pʼeqtʼirinakas uñjapjjäna? 2) ¿Kunsa Jefté chachajj luräna?
7 Jefté chachajj jakkäna uka tiemponjja israelitanakajj janiw Jehová Diosar taqe chuyma servipkänti. Ukatwa amonitanakampi filisteonakampi tʼaqhesiyata uñjasipjjäna (Jue. 10:7, 8). Jefté chachajj enemigonakapampi jan waltʼayatas uñjaskchïnjja, pachpa jilanakapampi, marka pʼeqtʼirinakamp jan waltʼayataw uñjasirakïna. Jilanakapajja Jefté chachar wal uñisipjjäna, ukatwa kawkhantï jakaskäna uka cheqat alisnukupjjäna (Jue. 11:1-3). Ukham luratpachasa Jefté chachajj janiw ayñachtʼkänti, jan ukasti Diosan munañaparjam sarnaqaskakïnwa. Kunapachatï markankir jilïrinakajj yanaptʼap thaqapkäna ukhajja, Jefté chachajj yanaptʼänwa (Jue. 11:4-11). ¿Kunatsa ukham lurpachäna?
8, 9. 1) Moisesan Leyipan utjkäna uka aski yatichäwinakatjja, ¿kawkïrinakas Jefté chachar yanaptʼäna? 2) ¿Kunas Jefté chachatakejj wali wakiskirïnjja?
8 Jefté chachajj nuwasiñan suma pʼeqtʼirïnwa. Jue. 11:12-27). Moisesan Leyipan utjkäna uka aski yatichäwinakarjamaw Jefté chachajj kuns luräna. Diosajja, servirinakapan maynit maynikama munasiñampi uñjasipjjañap munatapsa yatïnwa. Yanaptʼa munapki ukanakarojj yanaptʼañapänwa. Enemigopäkchïn ukasa yanaptʼañapänwa, uksa sumwa yatirakïna (Éxodo 23:5; Levítico 19:17, 18 liytʼañataki).
Moisesan Leyipsa Israel markan sarnaqäwipsa sum uñtʼäna. Ukaw Jefté chacharojj kunatï Jehová Diosatakejj walïki jan walïkaraki uk sum amuyañatak yanaptʼäna (9 Jefté chacharojja, wali iyawsañani yaqha chachanakat yateqasiñaw yanaptʼarakpachäna. Inas José chachat amtchïna, jupan jilanakapajj uñisipkchïnsa, Joseyajj jupanakar yanaptʼaskakïnwa (Gén. 37:4; 45:4, 5). Joseyata ukhamarak yaqha chachanakat yatjjatañaw Jefté chacharojj Jehová Diosatakjam sarnaqañatak yanaptʼpachäna. Jilanakapajj walsa Jefté chachar chuym ustʼayapkchïnjja, jupatakejj Jehová Diosaru ukhamarak markaparu yanaptʼañaw nayrankäna (Jue. 11:9). Jefté chachatakejja, Diosan sutip arjjatañaw jukʼamp wakiskirïnjja. Iyawsäwi uñachtʼayatapatjja, Jehová Diosajj juparusa, markaparus bendicïnwa (Heb. 11:32, 33).
10. ¿Diosan kawkïr yatichäwinakapas cristianjam sarnaqañatak yanaptʼistaspa?
10 Jichhürunakanjja, inas mä jilatasa jan ukajj kullakas jan walinak lurasajj jiwasar chuyma ustʼaychistaspa. Ukhaman uñjasisajj ¿kunsa lurañäni? Jefté chachan sarnaqäwipat sum amuytʼstan ukhajja, jan walin uñjaskasas Jehová Diosar serviskakiñäniwa. Tantachäwinakarus saraskakiñäniwa, jilat kullakanakatsa janiw jitheqtkañäniti. Jefté chachajj jan walinakan uñjaskäna ukhajja, Jehová Diosan Arupaw ukanakar saykatañataki yanaptʼäna. Jiwasajj jan walin uñjasisajj jupatwa yateqassna (Rom. 12:20, 21; Efe. 4:32).
IYAWSATAS LAYKUW DIOSAR SERVIÑATAK CHʼAMACHASTANJJA
11, 12. 1) Jefté chachajja, ¿Jehová Diosar kamsänsa? 2) ¿Kunsa uka arsutap phoqañatakejj lurañapäna?
11 Jefté chachajja, Diosan yanaptʼapampikiw israelitanakarojj amonitanakat qhespiyaspäna, ukjja jupajj sum yatïna. Jehová Diosarojj akham sänwa: “Jumatejj amonitanakaru atipjayitäta ukajja, nayajj ninaru phichhantata sacrificio loqtäma, khititejj utajjata nayraqata mistsunkani nayaru katoqeri, kunapachatejj nuwasïwita kuttʼjjä ukkhajja” sasa (Jue. 11:30, 31). Uka arsutap phoqañatakejja, ¿kunsa Jefté chachajj lurañapäna?
12 Jehová Diosajja, jaqenakaru sacrificiot loqtasiñap uñisiwa. Ukhamajja, Jefté chachajj janiw mä jaqeru sacrificio loqtañat parlkänti (Deu. 18:9, 10). Moisesan Leyiparjamajja, maynejj sacrificio loqtkäna ukhajja taqpachwa Jehová Diosarojj churañapäna. Ukhamasti, Jefté chachajj “sacrificio loqtäma” sasinjja, ‘mä jaqwa jumar serviñapatak churäma’ sasaw Jehová Diosar saskäna. Uka jaqejja, tabernaculonwa Jehová Diosar serviñapäna. Kuntï Jefté chachajj arskäna ukajj Jehová Diosatak walikïskänwa, ukatwa amonitanakar atipjañapatakejj yanaptʼäna (Jue. 11:32, 33). Jefté chachajja, ¿khitirus ‘ofrendat loqtañapäna’?
13, 14. Jefté chachan Diosar iyawsatapatjja, ¿kunsa Jueces 11:35 qellqatajj qhanañchi?
13 Aka yatichäwi qalltan parlaniwaytan uka toqet ¿amtasisktati? Jefté chachajj nuwasïwit kuttʼanjjäna ukhajja, wali munat mä sapa phuchapaw jupar katoqerejj nayraqat mistunïna. ¿Jefté chachajj arsutap phoqpachäniti? Tabernaculon jiwañkam serviñapatakejja, ¿mä sapa phuchap Jehová Diosar katuypachäniti?
14 Jefté chacharojja, Moisesan Leyipan utjkäna uka aski yatichäwinakaw suma amtar puriñapatakejj yanaptʼäna. Inas Éxodo 23:19 qellqatan jikjjataski uka arunak amtchïna, ukanjja kunatï sumäki uk churapjjañapatakiw Diosan servirinakapar mayïna. Moisesan Leyipanjja aka arunakaw qellqatäna: “Kunapachatejj mä jaqejj arunakapampi mä arsüwi lurani [...] ukasti arsutaparojj phoqhañapawa, lurañapaw kunjämatejj arski ukhamarjama” sasa (Núm. 30:2). Jefté chachajja, inas Ana warmejj jakkäna uka tiempon jakarakchïna. Ukhamasti kunjamtï Ana warmejj arsutap phoqkänjja ukhamarakiw arsutap phoqañapäna. Uka arsutap phoqañajja jupatakisa phuchapatakisa chʼamakïpachänwa. Jupajj janiw walja wawanïkänti, phuchap sapakiw sutipsa apañapäna oraqenakapsa katuñapäna (Jue. 11:34). Ukhamäkchïna ukasa, Jefté chachajj akham sänwa: “¡Nayasti mä arsüwi Diosarojj lurta, jichhasti phoqhañajjaw wakisi!” sasa (Jue. 11:35). Arsutap phoqañajj chʼamakïchïna ukasa, Jefté chachajj Diosar taqe chuymaw iyawsäna, ukham iyawsatapatwa Jehová Diosajj jupar bendicïna. ¿Jumajj Jefté chachjamarakit arsutam phoqasamäna?
15. 1) Diosar jakäwis katuyaskayätan ukhajja, ¿kunsa arsuwaytan? 2) ¿Kunjamsa Diosar iyawsatas uñachtʼaysna?
15 Diosar jakäwis katuyastan ukhajja, ‘kunäkipansa munañam lurañaw nayatakejj nayrankani’ sasaw Diosar sayätanjja. Uka arsutas phoqañajj chʼamakïñapsa sum yatiyätanjja. Kunapachatï jan gustkistu ukanak lurañ mayipkistu ukhaw Diosar istʼañ muntanti janicha ukajj yantʼat uñjasispa. Jehová Diosar serviñajj chʼamäkchi ukasa, Jupar serviskakiñatak chʼamachasiñäni ukhajja, Diosar iyawsataswa uñachtʼayañäni. Diosar serviñatakejj kunanaktï lurktan ukat sipansa jukʼamp bendicionanakwa katoqañäni (Mal. 3:10). Jichhajja, Jefté chachat parltʼaskakiñäni. ¿Kunas phuchapampejj paspachäna?
Jefté chachjama, phuchapjama iyawsäwinïtasjja, ¿kunjamsa uñachtʼaysna? (16, 17 tʼaqanak uñjjattʼäta).
16. Jefté chachan phuchapajja, ¿kunsa awkipan arsutap yatisajj luräna? (5 janankir dibujo uñjjattʼam).
16 Jefté chachan phuchapatakejja, awkipan arsutap phoqañajj chʼamakïpachänwa. Jefté chachan arsutapajj janiw Ana warmin arsutapjamäkänti. Ana warmin Samuel wawapajj Diosatak yaqhachatänwa, tabernaculonwa Jehová Diosar serviñapäna (1 Sam. 1:11). Diosatak yaqhachatanakajja, casarasiñatakisa wawanakanïñatakisa janiw jarkʼatäpkänti. Ukampis Jefté chachan phuchapajja, ‘ninaru phichhantat mä sacrificiönwa’, mä arunjja, Diosar katuyatänwa, janiw casarasiñapäkänti (Jue. 11:37-40). Jefté chachajj Israel markan pʼeqtʼiripänwa, nuwasiñanakansa atiparakïnwa, ukhamasti phuchapajj suma chachampiw casarasispäna. Ukampis jichhajja, Jehová Diosaruw tabernaculon altʼat chuymampi serviñapäna. Jupatakejja, Jehová Diosar serviñaw taqe kunat sipans wali wakiskirïnjja, ukatwa awkipar akham säna: “Kuntejj Diosarojj arskta ukjja nayampejj luraskakim” sasa (Jue. 11:36). Jehová Diosar serviñ munasajja, janiw casaraskänti ni wawanakanïkänsa. ¿Kunsa jupat yateqsna?
17. 1) Jefté chachana ukhamarak phuchapana iyawsäwipat yateqasiñatakejja, ¿kunsa lurañasa? 2) Hebreos 6:10-12 qellqatajja, ¿kunjamsa Jehová Diosar jukʼamp serviñatak yanaptʼistu?
17 Jichhürunakanjja, Jehová Diosar jukʼamp serviñ laykojj wayn tawaqonakatsa chachanakatsa warminakatsa waljaniw jan casarasipkiti ni wawanïpkarakisa. Maysa toqetsti, chuymankipstat jilat kullakanakajja, wawanakapampïñata allchhinakapampïñat sipansa, Tantachasiñ Utanaka ukhamarak yaqha ukham utanak lurañanwa yanaptʼapjje. Jan ukajj Diosan Reinopat Yatiyirinakataki Escuelar sarañataki, kawkhanakantï yatiyirinakajj munaski uka cheqanakar sarañatakiw chʼamachasipjjaraki. Yaqhepanakasti, Jesusan jiwäwip amtaski uka phajjsinakanwa jukʼamp yatiyañatak chʼamachasipjjaraki. Jehová Diosar taqe chuym sirvtan ukhajja Jupajj wal kusisi, kunanaktï Jupar serviñatak lurktan ukanaksa janirakiw armkiti (Hebreos 6:10-12 liytʼañataki). ¿Jumat kamsasirakispasa? ¿Jehová Diosar jukʼamp serviñatak chʼamachasirakismati?
¿KUNSA YATEQAWAYTANJJA?
18, 19. 1) ¿Kunsa Jefté chachatsa phuchapatsa yateqawaytanjja? 2) ¿Kunjamsa jupanakat yateqasitas uñachtʼaysna?
18 Jefté chachajja kunayman jan walinakanwa uñjasïna, ukhampachasa Jehová Diosan leyinakaparjamaw kun lurañsa amtirïna. Janipuniw jan wali sarnaqer jaqenakjamajj sarnaqkänti. Yaqhepanakajj jan walinaksa jupar lurapkchïnjja, Jehová Diosar confiyaskakïnwa. Phuchapasa jupasa, Jehová Diosar serviñataki chʼamachasipkäna ukajj janiw inamayäkänti, ukatwa Diosajj jupanakar bendicïna. Jupanak toqerakiw Jehová Diosajj cheqa yatichäwinakap uñtʼapjjañapatakejj yaqhanakar yanaptʼäna. Jefté chachajj jakkäna uka tiemponjja, waljanejj janis Jehová Diosan leyinakaparjam sarnaqapkchïnjja, jupasa phuchapasa Diosan leyinakaparjamaw sarnaqapjjäna.
19 Diosan Arupajj akham sasaw ewjjtʼistu: “Yateqasipjjam khitinakatejj iyawsäw toqe, jan qarjasisa taqe kunatejj Diosajj: ‘Churämaw’ siski uka herencia katoqapki ukanakata” sasa (Heb. 6:12). Ukhamajja, Jefté chachampita phuchapampit yateqasipjjañäni. Ukatsti janipun aka arunak armañäniti: Jehová Diosajj Jupar iyawsirinakar sum uñji.