DIOSAN arunakap yatiyañajj wali wakiskiriwa. Ukhamäkchi ukasa janiw taqenejj ukham uñjapkiti. Diosan arunakap yatiyir sartan ukhajja, yaqhepajj sum istʼapjje, ukampis janiw jiwasampejj Bibliat yatjjatañ munapkiti.

Ukaw Gavin jilatampejj pasäna, jupajj tantachäwinakar sarirïkchïnsa janiw Bibliat yateqañ munkänti. Jilatajj siwa: “Bibliat mä jukʼak yatiyäta, uk amuyasajj mayninakajj kamsapjjanisa sasaw llakisiyäta. Jan engañjatäñ munasasti janiw khitimpis Bibliat yatjjatañ munkayätti” sasa. Jumatï Gavin jilatar uñtʼasmäna ukhajja, ¿janipuniw Bibliat yatjjatkaniti sasat amuyasmäna? Biblian cheqa yatichäwinakapajj kunjamsa maynir yanaptʼaspa uk amuytʼam. Jehová Diosajj markapar akham sänwa: “Nayan arsutajjas mä sulljamäniwa, sulla jalljamaw qoranak patjjaru purini” sasa (Deu. 31:19, 30; 32: 2). Sullajj kunjamasa uk yatjjatañaw Diosan arunakap taqe kasta jaqenakar yatiyañatak yanaptʼistaspa, uk jichhajj uñjañäni (1 Tim. 2:3, 4).

Sullajj janiw usuchaskiti. Sullajj jukʼat jukʼat uñstasaw uma chʼaqar tuku. ¿Kunatsa Jehová Diosan arunakapajj sullar uñtasitäna? Markaparojja, munasiñampi suma arunakampi ukhamarak respetompiw Diosajj parläna. Jupat yateqasisajja, istʼapkistu ukanakan amuyunakap respetañasawa, mä arunjja, jupa pachpa amuytʼasiñapataki, mä amtar puriñapatakiw yanaptʼañasa. Ukhamatwa yatichkañäni uk istʼapjjani, yatiyatasasa janirakiw inamayäkaniti.

Sullajj yanaptʼasiwa. Jaqenakajj kuna toqetsa yatiñ munapjje uk lupʼiñäni ukhajja, jupanakar yanaptʼañäniwa. Amuytʼañataki, Chris jilatajj Gavin jilatar nayrïr kuti Diosan Arupat yatiykasajja, janiw munkir jan munkir yatichkänti, jan ukasti Diosan arunakap kunayman toqetwa amuytʼayäna. Sañäni, Bibliajja qalltat tukuykamajj mä amuyukiwa uk maynejj yatjjatani ukhajja, kuntï tantachäwinakan yatichaski uk sumwa amuyani sasaw säna. Ukatsti, profecianakajj kunjamsa phoqasiski uk yatjjatañaw Bibliar confiyañatak yanaptʼitäna sasaw Chris jilatajj Gavin jilatar sarakïna. Bibliat ukham walja kuti parlasajja, Gavin jilatarojj Bibliat yatjjatañapatakiw yanaptʼäna.

Sullajj jakañatakiw yanaptʼi. Israel markanjja, walja phajjsinakaw wal lupinti, uka phajjsinakansti janiw kuna jallus purkiti. Janitejj sullajj utjkaspa ukhajja, qoqanakajj wañsusin qʼalaw jiwarjjaspa. Jichhürunakatjja Diosajj akham sänwa: ‘Arujat istʼaña machʼäniwa’ sasa (Amós 8:11). Ukampis ajllit cristianonakajja, “Tatitojj apayanki uka sullanakjamäniwa” sasaw sarakïna. Jupanakaw kuna bendicionanaktï Diosan Reinopajj apankani uk yatiyapjje. Ukatsti ‘yaqha uwijanakjamʼ uñtʼatäpki ukanakasa jupanakaruw yanaptʼapjjaraki (Miq. 5:7; Juan 10:16). Diosan Reinopat mayninakar yatiyasajja, ajay toqetsa jupanakar jaktayksna ukhamawa. Ukhamajja, Diosan Reinopat suma yatiyäwinak wali askit uñjapjjañäni.

Sullajj Diosan bendicionapawa. (Deu. 33:13). Diosan arunakap yatiyatasajja, jaqenakarojj yanaptʼiwa. Ukaw Gavin jilatampejj pasäna, taqe jisktʼanakaparu Bibliampi qhanañchapkäna ukat mä qawqha tiemporojj bautisasjjänwa. Jichhajja, Joyce esposapampejj taqe chuymaw suma yatiyäwinak yatiyasipki.

Sullat lupʼiñajja, Diosan arunakap yatiyañ wali askit uñjañatakiw yanaptʼistani. Amuytʼañataki, mä sapa chʼaqat sipansa walja chʼaqanakaw oraq jasaptayaspa. Jiwasampejj ukhamarakiwa, sapakejj janis waljanir yatiyksna ukham amuysna, ukampis jilat kullakanakasampi yatiyasajj ‘taqe markanakanʼ yatiyasiñapatakiw yanaptʼtanjja (Mat. 24:14). Ukhamasti yatiyir mistuñäni ukhajja, ¿arunakasajj jaqenakatak mä bendicionjamäniti? Jiwasatï suma arunakampi respetompi parltʼañäni ukhajja, mä bendicionäniwa.