GRECIA markankir Karitsa sat mä jiskʼa markanwa 1926 maran nasta. Kimsa jilïr jilani, kimsa jilïr kullakanïtwa, mä sullka kullakajas utjarakiwa. Wali trabajtʼiri awk taykanïpjjayätwa.

Diosan arunakapa taqe chuyma yatiyiri John Papparizos jilataruw awk taykajajj 1925 maran uñtʼapjjäna, jupajj Jehová Diosan Testigopänwa (nayrajj Estudiantes de la Biblia). Uka jilataru Bibliat yäparu sum amuytʼayir uñjasajja, jakapkayäta uka markanwa tantachäwinakar sarañ qalltapjjäna. Mamajajj janis liytʼasiñ yatkchïnjja, Jehová Diosarojj taqe chuymaw confiyäna, taqenirurakiw Diosat parlirïna. Tatajasti jilat kullakanakan pantjasitapakwa uñjäna, ukatwa tantachäwinakar sarañ jan munjjänti.

Jilanakajampi kullakanakajampejj Bibliar respetapjjayätwa. Ukampis mayni wayn tawaqonakjam sarnaqasaw tiempo aptʼasipjjerïta. Europa cheqan Segunda Guerra Mundial ukajj 1939 maran apasiskäna ukhajja, markajankir 20 marani Nicolas Psarras sat primojarojj griegonakan ejercitoparuw jawsayapjjäna, jupajj uka nayrakiw Jehová Diosan Testigopjam bautisasïna. Jan ajjsartʼasaw uka ejército sarayirinakar akham säna: “Janiw guerrar sarkiristti, nayajj Criston soldadopätwa” sasa. Militaranakan cortepan juzgasasti, tunka maratakiw carcelar jistʼantapjjäna. Ukajj janiw cheqaw sañjamäkänti.

Británico soldadonakasa, yaqha soldadonakasa 1941 mara qalltaw Grecia markar mä jukʼa tiempotak mantanipjjäna, ukhamatwa primojajj carcelat mistjjäna. Jupajj Karitsa markaruw kuttʼanjjäna, ukanwa Ilias sat jilïr jilajajj Bibliat wal jisktʼäna, nayasti wali amuyumpiw istʼirïta. Ukatsti Ilias jilajampi, Efmorfia sullka kullakajampiw Bibliat yatjjatañ qalltapjjayäta, tantachäwinakarus sarapjjarakirïtwa. Qhepa maraw kimspachanejj bautisasipjjta. Tiempompejj pä jilajampi, pä kullakajampiw bautisasipjjarakïna.

Khä 1942 maranjja, Karitsa markankir taman 15 maranit 25 marankam llätunka wayna tawaqonakaw utjäna. Jan walinak utjañap yatipjjayätwa.  Diosar serviñan jan aynachtʼañatakejja, Bibliat yatjjatañataki, canticonak qʼochuñataki, orasiñataki tantachasipjjerïta. Ukaw Diosat jan jitheqtañatakejj yanaptʼawäpjjetu.

Segunda Guerra Mundialajj tukuyaskäna ukhaw comunista griegonakajj gobierno contra saytʼapjjäna, ukhamatwa guerra civil ukajj qalltäna. Comunista guerrilleronakajj taqe jiskʼa markanakanwa chachanakarojj jupanakamp chik saytʼasipjjañapatak thaqapjjäna. Markajar purinisajj Antonio Tsoukaris jilataru, Ilias jilajaru, nayampiruw apapjjetäna, kimspachaniw waynäpjjayäta. Nanakajj janiw politicar mitisipkti janirakiw guerrarus sarapkti sasaw sapjjayäta. Ukhampachaw munkir jan munkir Olimpo qollukam kayuk apapjjetäna, uka qollojj 12 horanak sarañankänwa.

Ukatsti comunista mä oficialajja, ‘guerrilleronakamp chika sarapjjam’ sasaw sapjjetäna. Nanakasti ‘cristianopjjtwa, janiw jaqe masijar jiwayañatakejj armanak apnaqapkiristti’ sapjjayätwa. Ukatwa colertʼasisajj generalan ukar apapjjetäna. Juparojj ukhamarak sapjjayäta, ukatwa akham sapjjetäna: “Mä mula irpasipjjam, guerran usuchjatanakar hospitalar apapjjam” sasa.

Nanakajj akham sapjjayätwa: “¿Janit gobiernon soldadonakapajj katjapkitani? ¿Katjasajj janit comunistanakäpjjtawa sasin sapkitani?” sasa. Generalasti, “nuwasisipki ukar tʼantʼa apapjjam” sapjjetänwa. Nanakajj akham amuytʼayapjjayäta: “Mä oficialajj mulampi saraskir uñjasajja, ¿janit armanakampi apayañ munapkitani?” sasa. Generalajj wal lupʼïna. Ukatsti akham sänwa: “Walikiwa, qollunakar ovej awatir sarapjjam” sasa.

Conciencianakajarjamajj ovej awatir sarañajj walikïskänwa. Uka cheqanakansti guerrajj wal utjäna. Mä mara qhepatjja, viuda mamajar uñjañapatakiw Ilias jilajarojj jilïr wawätap layku utar khitjjapjjäna. Antoniojj usuntjjänwa, ukatwa antutapjjäna. Nayarusti janiw antutapkitänti.

Uka urunakajj griego soldadonakajj sapa kutiw comunistanakar muyuntapjjäna. Katjjasipkitäna uka grupompejj qollunaknämaw Albania marka jakʼar tʼijtjjapjjayäta. Uka markar pasañampïsipkayäta ukhaw griego soldadonakajj akatjamat muyuntapjjetäna. Gobierno contra saytʼirinakajj tʼijtjjapjjäna. Nayajj mä qoqa tinkut qhepäjjaruw imantasiyäta, ukhaw qalltan sapkayäsma ukham soldadonakajj katuntapjjetäna.

Comunistanakaw katjjasipjjetu sasaw sayäta. Uk istʼasajja, Verria marka jakʼankiri militaranakan campamentoparuw juzgañatak apapjjetäna, uka markasti nayrajj Berea sasin uñtʼatänwa. Ukanjja, soldadonakan imantasipjjañapataki oraqe allim sapjjetänwa. Jan munatajatwa oficialajj Makrónisos sat ajjsarat islar apayitäna.

Ática marka jakʼankiri Makrónisos sat qalakamaki jiskʼa islajja, Atenas markat 50 kilometronak jayankiwa, largorojj 13 kilometroniwa,  anchorusti 500 metroniraki. 1947 marat 1958 marakamajja, 100.000 prisioneronakaw ukankapjjäna. Ukanjja, comunistanaka, comunistäpkaspas ukham uñtʼatanaka, gobierno contra saytʼasir nayra soldadonaka, Jehová Diosar taqe chuyma serviri Testigonakaw katuntatäpjjäna.

Uka islaru 1949 maran purkayäta ukhajja, prisioneronakajj gruponakar jaljatänwa. Nayarojj mä qawqha soldadonakajj uñjapkäna uka gruporuw uchapjjetäna. 10 jaqenak mantapjjañapataki lurata carpanjja, 40 chachanakaw oraqen ikipjjayäta. Tʼamantat uma umapjjayäta, lentejampi berenjenampi jila partejj manqʼapjjayäta. Ukanjj wali thayänwa, laqʼa polvorakïnwa, ukatwa jakañajj chʼamäna. Ukampis janiw mayni prisioneronakjamajj sint tʼaqesipkayätti, jupanakajj jachʼa qalanak maysat maysa nuknaqapjjäna, ukaw jupanakar wal aynachtʼayäna.

Mä urojj playan sarnaqkasaw yaqha campamentonkir Testigonakamp jikisipjjayäta. Ukatwa ¡wal kusisipjjayäta! Tantachasirjamäpkayäta ukhajja, jan katjayasiñatakejj wali amuyumpiw tantachasipjjerïta, Diosan arunakapsa yatiyapjjerïta, wal orasipjjerïta, ukanakaw Diosat jan jitheqtañatakejj yanaptʼawäpjjetu. Yatiyapkayäta ukanakat yaqhepajj Jehová Diosan Testigoparuw qhepat tukupjjäna.

Tunka phajjsi qhepatsti, amuyunakapajj mayjtʼjjpachawa sasin amuyasaw ‘militaran uniformep’ uchasim sasin sapjjetäna. Jan munatajatwa, comandanten ukar apapjjetäna. Ukanjja, akham qellqatwa comandanter churta: “Nayajj Criston soldadopäñak munta” sasa. Ajjsarayir arunak sasinjja, wali suma isthapita griegonakan arzobispoparuw katuyapjjetäna, jupajj ortodoxo religionatänwa, mä autoridadarakïnwa. Jisktʼanakapar Bibliampi qhanañchayäta ukhajja, colerataw akham säna: “Jupar akat apasipjjma. ¡Janiw amuyup mayjtʼayañjamäkiti!” sasa.

Qhepärmanthejja, soldadonakajj wasitatwa militaran uniformep uchasim sapjjetäna. Jan munatajatwa wal nuwjapjjetäna, lawat lurat thujrumpis jawqʼjapjjetäna. Ukatsti, chʼakhanakajj pʼakitäpachati janicha uk yatiñatakiw enfermerian ukar apapjjetäna. Ukat carpajaruw qatatipjjetäna. Pä phajjsiw sapüru ukham tʼaqesiyapjjetäna.

Diosan arunakap jan pʼakintirjamätaj amuyasajja, wali colerat soldadonakajj jukʼampiw tʼaqesiyapjjetäna. Amparanakaj qhepäjjar ñachʼantasaw kayu talonat jan sinttʼasis wal jawqʼjapjjetäna. Janiw aguantañjamäkänti, ukhamaruw Jesusan aka arunakap amtasta: “Kusisipjjam kunapachatejj jaqenakajj taqe jan wali arunakampi, ukhamarak janchiru chhojjriñchañanakampi uñisipjjätam [...] ukkhajja. Kusisitaki jakasipjjam, jumanakasti alajjpach markanjja [bendicionanak] katoqapjjäta. Ukhamarakwa nayra profetanakarojj uñisipjjerïna” (Mat. 5:11, 12). Wal tʼaqeskasaw desmayjjayäta.

Wali thaya mä celdanwa sarthapta, janiw tʼantʼsa ni umsa churapkitänti, janirakiw kunampi janjjatasiñas utjkänti. Ukhampachas janiw llakimpi aynachtʼkayätti. Kunjamtï Biblian siskejja ‘Diosajj samaraña’ churitäna, Jupaw ‘chuymajsa, amuyujsa imaskäna’ (Fili. 4:7). Qhepärmanthejja, khuyaptʼayasir mä soldadow tʼantʼampi, umampi, mä abrigompi churitäna. Yaqha soldadojj manqʼap churarakitäna. Jehová Diosaw ukhamanakamp uñjaskitäna.

Autoridadanakajj jan cheqañchkay waynarjamaw uñjapjjetäna, ukatwa Atenas markarojj militaranakan tribunalapar apapjjetäna. Ukanjja Yíaros islankiri carcelaruw kimsa maratak apayapjjetäna. Uka islajj Makrónisos islat Inti jalsu toqer 50 kilometronak jayankänwa.

Yíaros islanjja, carcelajj ladrillot lurata wali jachʼänwa, 5.000 politiconakaw ukan jistʼantatäpjjäna. Sojjta jilatanakampiw politicaru, guerraru jan mitisipjjatajat ukan jistʼantatäpjjayäta. Wali jarkʼatäkchïnsa, Bibliat yatjjatañatakejj tantachasipjjerïtwa. Yatiyañataki revistajj purinipuniriwa,  jamasatwa apantanipjjerïna, nanakasti yatjjatañatakejj copiaqasipjjerïtwa.

Mä urojja, jamasatakwa yatjjatasipkayäta, ukhamaruw mä soldadojj katjasin qʼal aparapjjetu. Ukatsti alcalden yanapiripan oficinaparuw apapjjetu, jichhajj jukʼamp maranakaw carcelankañäni sasaw llakisipjjayäta. Ukampis akham sapjjetänwa: “Khitïpjjtasa uk yatipjjtwa, amuyunakamsa respetapjjaraktwa. Jumanakar confiyapjjsmawa. Jichhajj trabajonakamar kuttʼapjjma” sasa. Yaqheparojj jan sinti chʼama tukuñ trabajwa churapjjetäna. Uk uñjasasti walpun Diosar yuspärapjjayäta. Carcelansa, cristianjam phoqapjjatajajj Jehová Diosaruw jachʼañchäna.

Diosar taqe chuyma servipjjatajat yaqha bendicionanakaw utjarakïna. Sum sarnaqapjatajj uñjasasti, matemática yatichir mä profesorajj kunarutï creyipkta ukanakatwa jisktʼapjjetäna. Kunapachatï 1951 mara qalltajj carcelat antutapkitäna ukhajja, juparus antutapjjarakïnwa. Tiempompisti Testigöñatakiw bautizasïna, precursor regularjamaw serviñ qalltarakïna.

Karitsa markajaruw familiajan ukar kuttʼayäta. Qhepatsti, mayni griegonakjamaw Australia markar Melbourne cheqar sarjjayäta. Ukanwa, Diosar taqe chuyma serviri Janette kullakar uñtʼta, jupampiw casarasta, pusi wawanakajarojj Diosar servipjjañapatakiw yanaptʼawayapjjta.

Jichhajj 90 jila maranëjjtwa, jilïr irpiritsa yanaptʼaskaktwa. Nayra chhojjrinakaj utjatapatjja cuerposa kayunakas awisajj usutuwa, yatiyir sarkta ukhaw jukʼamp usutu. Ukhampachas jukʼampiw ‘Criston mä suma soldadopäñʼ munta (2 Tim. 2:3).