1, 2. 1) ¿Diosar servitasatjja Elifaz, Bildad chachanakajj kamsapjjänsa? 2) ¿Jehová Diosajj kamsarakïnsa?

NAYRA tiemponjja, Jehová Diosar taqe chuyma serviri Job chacharojj kimsa jaqenakaw parlapjjäna. Jupanakat maynejj temanita Elifaz satänwa, jupajj akham sasaw Job chachar jisktʼäna: “¿Jumasti amuytati jaqesti, wali yatiñanïskpasa ukasti askïspati Tatitutakisti kuna lurañansa? ¿Kuna askiraki taqe chʼamani Diosatakisti jumana chʼikhi, ukhamaraki jan juchani askïtamasti?” sasa (Job 22:1-3). Elifaz chachajja, Diosatakejj janiw askïktanti sasaw amuyäna. Suhita Bildad chachasti, Dios nayraqatan janiw cheqap jaqejj utjkaspati sasaw sarakïna (Job 25:4 liytʼañataki).

² Job chachajj inamayas Diosar serviñatak chʼamachaskaspa ukham amuyayañ munapjjäna. Dios nayraqatanjja, mä thuthata, mä laqʼot sipansa janiw jilanktanti sasaw Job chachar amuyayañ munapjjäna (Job 4:19; 25:6). ¿Altʼat chuymanïsati ukham sapjjpachäna? (Job 22:29). Cheqas taqeniw Jehová Dios nayraqatan wali jiskʼakïtanjja. Mä qolluta jan ukajj jalaskiri avionat oraqer uñtanktan ukhajja, jaqenakajj wali jiskʼakiw uñjasi. ¿Jehová Diosajj Jupar serviñataki, Reinopar yanaptʼañataki chʼamachasitas ukhamti uñjpacha? ¡Janiwa! Elifaz, Bildad, Zofar chachanakarojj kʼarisipjjtawa  sasaw Diosajj säna. Ukatjja Job chachar sum uñjatap uñachtʼayañatakejja, “Job servirejjaw” sasaw Diosajj säna (Job 42:7, 8). Ukhamasti, jucharar jaqëkstansa Diosajj askitwa uñjistu.

3. Diosar serviñatak chʼamachasitasatjja, ¿Elihú waynajj kamsänsa, uka arunakapajj kamsañsa munäna?

³ Job chachampi uka kimsa jaqenakampejj kuntï parlapkäna ukjja Elihú waynajj istʼaskänwa. Ukatwa Job chacharojj Jehová Diosat akham jisktʼäna: ‘Jumatejj askinaka lursta ukasti, ¿kunsa [Diosar] churta, kunsa Jupajj amparamat katoqe?’ sasa (Job 35:7, NM). Elihú waynajj ¿‘inamayaw Diosar serviñatak chʼamachastanjja’ sañti munpachäna? Janiwa. Jehová Diosas janirakiw uka kimsa chachanakarjam cheqañchkänti. Elihú waynajj janiw uka chachanakjam jan wal amuyayañ munkänti. Cheqas Jehová Diosajj janiw Jupar yupaychañas necesitkiti, kunalaykutejj Jupajj phoqatäjjewa. Jehová Diosan jukʼampi qamirïñapatakisa, chʼamanïñapatakisa janiw kunsa lurksnati. Jupaw suma jaqëñatakisa, kun sum lurañatakisa yanaptʼistu, kunanaksa lurtan uksa Diosaw uñjasinki.

4. ¿Jaqe masisar khuyaptʼayatas kunjamsa Jehová Diosajj uñji?

⁴ Diosar servirinakar munasiñampi uñjtan ukhajja, Jehová Diosajj juparus munasiñamp uñjksna ukham amuyi. Proverbios 19:17 qellqatajj akham siwa: “Mä pobre jaqer maytʼirejj Tatituruw maytʼaski, ukatsti Tatit pachpawa uka manjja phoqjjani” sasa. Jaqe masisar khuyapayasiñampi uñjatasjja Jehová Diosajj uñjasinkiwa. Diosas taqe kun lurawaykchejja, pisinkirinakar churktan ukhajj Juparus churksna ukhamawa, Diosarakiw walja bendicionanakampi kuttʼayjjestu. Jesusas ukham amuyarakïna (Lucas 14:13, 14 liytʼañataki).

5. ¿Kuna jisktʼanakarus qhanañchaskañäni?

⁵ Nayra tiemponjja, Jehová Diosajj Isaías profetaruw Jupa lanti jaqenakar yatiyañapataki ukhamarak Jupar serviñapataki invitäna (Isa. 6:8-10). Isaiasajj taqe chuymaw akham säna: “Akankasktwa nayajj, nayar khitasita” sasa. Jichhürunakanjja, Jehová Diosajj ukhamarakiw taqe chuyma servirinakaparojj markapar yanaptʼapjjañapatak invittʼaski. Waljaniw Isaías profetjamajj Diosan markapan taqe chuyma yanaptʼapjje, kun lurañatakisa, yaqha markar sarañatakis jankʼakïpjje, jan waltʼañanakarus saykatapjjaraki. Ukampis inas maynejj akham amuychispa: “Jehová Diosan markapar yanaptʼasajj wal kusista, ukampis ¿luratajajj wakisipuniti? Jan yanaptʼjjeristjja, ¿Diosajj janit amtap phoqjjaspa?” sasa. ¿Jumajj ukham amuyarakirïtati? Uka jisktʼanakar qhanañchañatakejja, Débora warmisa, Barac chachas kunsa lurapjjäna uk amuytʼañäni.

6. ¿Kunatsa Jabín reyin ejercitopaw israelitanakar atipjani sañjamänjja?

⁶ Barac chachajj israelitanakan mä soldadopänwa, Deborajj profetiza warmïnwa. Cananeonakan Jabín reyipajj 20 maranakaw israelitanakarojj ‘tʼaqesiyäna’. Jabín reyin ejercitopajj jan sinttʼasisaw jaqenakar tʼaqesiyapjjerïna, ukatwa uka jakʼankir jiskʼa markanakanjja, israelitanakajj utanakapat mistuñ ajjsarapjjäna. Uka ejercitojj guerrataki fierrot lurat 900 carronakanïnwa, israelitanakasti janiw armamentonïpkänti, ni escudonïpkänsa (Jue. 4:1-3, 13; 5:6-8). *

7, 8. 1) ¿Kun lurañapsa Jehová Diosajj Barac chachar mayïna? 2) ¿Kunjamatsa israelitanakajj Jabín reyin ejercitopar atipapjjäna? (28 janankir dibujo uñjjattʼäta).

⁷ Jabín reyin ejercitop nayraqatanjja, israelitanakajj janis chʼamanïpkaspa, atipjañas facilakïkaspas ukhamänwa. Diosajj Débora  profetiza taypiw Barac chachar akham säna: “Saram Tabor sat qolluru ukansti tunka waranqa chachanaka tantachtʼam Neftalí, Zabulón sat tribunkirinakata. Nayasti jutayäwa Sísara sat Jabín reyin ejercitopan jilïriparu Cisón sat jawir thiyaru, ukanwa jumarojj carronakapampi soldadonakapampi nuwantätam nuwasiñataki. Ukampis nayawa juparojj juman amparamaru katuyäma” sasa (Jue. 4:4-7).

⁸ Guerrar sarapjjañapataki walja chachanakaw munasi sasaw yatiynoqasipjjäna, ukatsti 10.000 chachanakaw Tabor qollun tantachasipjjäna. Ukhamatwa Barac chachampejj Jabín reyin ejercitopampi Taanac cheqan nuwasipjjäna (Jueces 4:14-16 liytʼañataki). ¿Diosajj israelitanakar yanaptʼpachänti? Jïsa, jallojj wal purintäna, nuwasipkäna uka cheqajj ñeqʼew tuküna. Ukaw israelitanakar yanaptʼäna. Barac chachajj 24 kilometronakwa Haróset cheqakamajj Sísara chachan ejercitopar arkjäna. Ukham escapkasaw Sisaran carropajj ñeqʼer achuntäna, kayukiw Zaananim cheqakam tʼijüna, uka markajj inas Quedes marka jakʼankchïna. Zaananim markanwa Jael warmin carpapan imantasïna. Sisarajj wali qarita puritapatsti jiw iktʼjjäna. Ukhamaruw Jaelajj jan ajjsaras jiwayäna (Jue. 4:17-21). Ukham atipapjjañapatakejj Jehová Diosaw israelitanakar yanaptʼäna. *

9. Israelitanakajj Sísara contra nuwasipkäna ukatjja, ¿kunsa Jueces 5:20, 21 qellqatajj qhanañchi?

⁹ Jueces 4 jaljan parlki ukanakjja, 5 jaljaw jukʼampi qhanañchi. Jueces 5:20, 21 qellqatajj akham siwa: “Warawaranakasti alajjpacha altotwa Sísara chachatakejj nuwasinipjjäna. [...] Ukhamarak Cisón sat jawirasa taqe jupanakaruw chhaqtayi” sasa. ¿Guerran atipapjjañapatakejj angelanakat israelitanakar yanaptʼpachäna, jan ukajj qalanakat chhijchjam purintpachäna? Biblianjja janiw qhanañchkiti. Ukampis Jehová Diosaw wakiski ukkharu, tiempoparu jallu wal purintayasajj israelitanakar qhespiyäna, ukatwa uka 900 carronakampi sarnaqañajj chʼamäna. Jueces 4:14, 15 qellqatanjja, israelitanakan atipapjjatapat Jehová Diosarojj janiw may kutik jachʼañchaskiti. Ukhamasti, voluntariot guerrar sariri 10.000 chachanakatjja janiw maynis yanaptʼajampiw atipapjjta siskaspänti.

10, 11. ¿Kunatsa Meroz markajj maldecitäpachäna?

¹⁰ Guerran atipapkäna uka qhepatjja, Deborasa Barac chachasa, cantasaw Diosar akham jachʼañchapjjäna: “Diosan angelapasti yatiyiwa: ‘¡Meroz sat markjjaru, ukhamarak ukan jakirinakjjarusti jutaniwa mä jachʼa maldiciona!’ sasa. Jupanakasti janiw jutapkiti Diosan yanapapampejja, kunjämtejj Diosan yanapata chʼamaninakajj jutapki ukhamjja” (Jue. 5:23).

¹¹ Meroz markjjar jutkäna uka maldicionajj inas uka markpach chhaqtaychïna. Jan ukajj inas uka markankirinakajj guerratak voluntarionak jawsaskäna ukhajj Barac chachamp jan sarapkchïnti. Cananeonakampi nuwasiri 10.000 chachanakajj sarapkäna ukhajja, Meroz markankirinakajj guerratak voluntarionak jawsasitapjja istʼapjjarakpachänwa. Jan ukajja, Sísara chachajj Barac chachat escapkäna ukhajj inas markapnäm pasawaychïna. Jan ukajj inas Sisarar katuntañjamäskipan pasayapjjakchïna. ¡Jan sinttʼasiri Sísara chachar markapnäm qhespiñatak tʼijukipir ukhamak uñchʼukipjjäna! Jehová Diosan amtap phoqasiñapatakejj janiw yanaptʼapkänti, janirakiw Diosajj jupanakar bendiskänti. Yanaptʼañajj amparapankkäna ukhajj janiw kunsa lurapkänti. Meroz markankirinakajj janiw Jael warmjam jan ajjsartʼas yanaptʼapkänti (Jue. 5:24-27).

12. Jueces 5:9, 10 qellqatan parlki uka jaqenakajja, ¿kunansa jan kikpäpkäna? ¿Jiwasajj kunsa amuytʼañasaraki?

¹² Jueces 5:9, 10 qellqatanjja, voluntariot  guerrar sariri 10.000 chachanakampi jan saririnakampejj jan kikpätapaw amuyasi. Débora profetizampi Barac chachampejja, ‘Israelan jachʼa jilïrinakapajj’ ‘jawsatajj mäki istʼasipjjatapat’ wal yuspärapjjäna. Istʼasirinakajj janiw ‘janqʼo asnor qonjjatat’ jaqenakjamäpkänti, jupanakajj jachʼa jachʼa tukusaw voluntariot guerrar sarañ jan munapkänti. Uka jaqenakarojj “aski uñjañatak qonuñan qonurinaka”, ‘saririnaka’ sasiwa, jupanakajj wali sumaw jakasisipkäna. Ukampis voluntarionakajj taqe chuymaw Barac chachampejj Tabor cheqankir qalarar qollunakaru, Cisón cheqankiri ñeqʼerar vallerus guerratak sarapjjäna. Jan kuna llakini jakasiñ munirinakajj amuytʼasipjjañapänwa, Jehová Diosan munañap phoqasiñapataki yanaptʼir jan sarasajj kunanaksa aptʼasipjjäna uk amuytʼasipjjañapänwa. Jiwasajj Diosar serviñ kunjamsa uñjasktan uk amuytʼasiñasarakiwa.

13. ¿Rubén, Dan, Aser tribunakampi Zabulón, Neftalí tribunakampejj kunansa jan kikpäpkäna?

¹³ Guerrar sariri 10.000 chachanakajja, jupanak kikpaw kunjamsa Taqe Kunjjar Munañani Jehová Diosajj yanaptʼäna uk uñjapjjäna. Ukhamatwa Diosajj cheqaparjam juchañchatap yaqhanakar yatiyapjjaspäna (Jue. 5:11). Rubén, Dan, Aser tribunakan wawanakapajj Diosan amtaparjam lurañat sipansa, utjirinakapatwa jukʼampi llakisipjjäna, sañäni: uywanakapata, barconakapata, puertonakapata (Jue. 5:15-17). Janiw taqpach tribunakajj jupanakjamäpkänti. Zabulón ukhamarak Neftalí tribunakajj Deboraru, Barac chacharu yanaptʼañatakejj “niyapiniw jakañanakapsa aptʼasip[jjäna]” (Jue. 5:18). ¿Kunsa ukajj yatichistu? Taqe chuyma yanaptʼiri uka tribunakatwa yateqasiñasa.

14. ¿Kunjamsa Jehová Diosan gobiernopar jichhürunakan yanaptʼtanjja?

¹⁴ Jehová Diosan gobiernopar yanaptʼañatakejj janiw mä guerrar sarañasajj wakiskiti. Jan ukasti, Diosan arunakapa taqe chuyma, jan ajjsartʼasa yatiyasaw yanaptʼtanjja. Diosan amtap phoqasiñapatakejja, jichhaw yanaptʼajj jukʼamp munasi. Jilïrinakatsa wayn tawaqonakatsa waranq waranqaniw Diosar sapürunjam  serviñ amtapjje. Waljaniw precursoräpjje, Betelana, Tantachasiñ Utanak lurañana, jachʼa tantachäwinakana taqe chuyma yanaptʼapjje. Jilïr irpirinakat yaqhepajj Comités de Enlace con los Hospitales ukan yanaptʼapjje, yaqhepajj jachʼa tantachäwinak organizañatakiw yanaptʼapjjaraki. Diosan markapan yanaptʼajj munaski ukan taqe chuyma yanaptʼatasjja, Jehová Diosajj wali askit uñji, ukham luratassa janiw armkaniti (Heb. 6:10).

15. ¿Jehová Diosan markapar taqe chuyma yanaptʼaskakiñatakejj kunas yanaptʼistaspa?

¹⁵ Jehová Diosan markapar voluntariot yanaptʼañarojj kunjamsa uñjtan ukanakat amuytʼasiñasawa. Akham jisktʼasiñaw yanaptʼistaspa: ‘¿Yaqhanakay jukʼampi yanaptʼapjjpan sistti? ¿Diosar serviñat sipansa utjirinïñatakit jukʼampi chʼamachastjja? Jan ukajj Diosar confiyiri, jan ajjsartʼiri Barac, Débora, Jael ukhamarak 10.000 chachanakat yateqasisajja, ¿Diosan markaparojj kunatï utjkitu ukanakampit yanaptʼasktjja? ¿Jukʼamp sum jakasiñataki, jukʼamp qollqenïñatakejj yaqha markar sarjjañti amtasktjja? ¿Sarjjasajj familiajarusa tamarusa jan waltʼayäti, Jehová Diosar uka toqet orasiskti?’ sasa. *

16. Jehová Diosajj taqe kunanïkchisa, ¿kunsa mayistu?

¹⁶ Jehová Diosan gobiernopar yanaptʼañajj wali askiwa. Adanampi Evampi jakapkäna ukhatpachwa Dios contra saytʼasiñas Supayajj muni. Ukampis Diosan gobiernopar yanaptʼktan ukhaw khiti toqetsa saytʼasisktan ukajj amuyasi. Diosar confiyatasata, taqe chuyma serviñ munatasatwa voluntariot sirvtanjja, ukasti Diosarojj wal kusisiyi (Pro. 23:15, 16). Jehová Diosajj taqe chuyma yanaptʼatasa, istʼasirïtasa uñjasaw Supayan kʼarïtap uñachtʼayaspa (Pro. 27:11, NM). Diosatakejj istʼasirïtasaw jukʼamp wakiskirejja, istʼasktan ukhajj wal kusisiraki.

17. ¿Jueces 5:31 qellqatajj kunsa jutïr urunakat qhanañchi?

¹⁷ Akat mä jukʼarojja, taqeniw Jehová Diosan gobiernopamp apnaqatäñ munapjjani. Cheqas ¡uka uru wal suytanjja! Débora ukhamarak Barac chachjamaw akham canttanjja: “¡Dios Tatitu, ukhama tukjatäpana jumaru taqe uñisirinakajja, ukampis jumaru taqe munirinakasti waliraki qhanapjjpan kunjämtejj intejj qhanki ukhama!” sasa (Jue. 5:31). Uka arunakajja, Diosajj Supayan apnaqat aka pachar tukjkani ukhaw phoqasini. Armagedón sat jachʼa guerra qalltkani ukhajja, enemigoparu tukjañatakejj janiw Jehová Diosajj aka Oraqenkir voluntarionak mayjjaniti. Jan ukasti, ‘kunjamsa Tatitojj qhespiyistu’ ukwa uñjañäni, janiw kunsa lurkañäniti (2 Cró. 20:17). Uka uru puriniñapkamasti, taqe chuyma, jan ajjsartʼasaw Diosan amtap phoqasiñapatakejj yanaptʼañasa.

18. ¿Diosan markaparu voluntariot yanaptʼatamajj kunjamsa mayninakar yanaptʼaspa?

¹⁸ Débora profetizampi Barac chachampejja, guerran atipasajj jaqenakar jachʼañchañat sipansa, Jehová Diosar jachʼañchasaw akham cantañ qalltapjjäna: “Diosaru taqeni yupaychapjjam, Israel markanjja utjaskiwa [...] jawsataru istʼiri chachanakajja” sasa (Jue. 5:1, 2). Diosan markapar wakisitarjam taqe chuyma yanaptʼktan ukhajja, yaqhanakajj Jehová Diosaruw jachʼañchapjjarakispa.