Kunatï qorit sipansa jukʼampïki uk thaqhapjjañäni
¿Mä jiskʼa qori jikjjatirïtati? Mä qawqhanikiw ukham jikjjatawayapjje. Ukampis kunatï qorit sipansa jukʼampïki uk waljaniw jikjjatawayapjje. Ukajj Diosan yatichäwinakapawa, ukasti “janiw qorimpisa alatäkaspati” (Job 28:12, 15).
BIBLIAT taqe chuyma yatjjatapki ukanakajja, qorsa thaqhapkaspa ukhamawa. Jupanakajj suma yatichäwi jikjjatañatakejj wal chʼamachasipjjañapa. Qori thaqherinakajj kunjamsa qori jikjjatapjje uk amuytʼkasajja, kunjamsa cheqa yatichäwinak jikjjatsna uk kimsa toqet amuytʼañäni.
BIBLIAT YATJJATAM
Mä jawirnamsa sarkasma ukham amuytʼañäni. Sarkasinjja, mä jiskʼa qala kʼajtanir uñjtajja. Altʼasisin uka qala aptasin qorïtap uñjasajja, wal kusistajja. Uka qorejja, fosfor lawan pʼeqepatsa jukʼamp jiskʼakiwa, janiw suma diamanter uñtatäkisa. Ukhamäkchisa, walja ukham jiskʼa qalanak jikjjatañatakiw thaqtasma.
Niya ukhamarakiw jiwasampejj pasawayi. Mä urojja, mä jilata jan ukajj mä kullakaw kunjamsa jutïrin jakasiñäni uk Bibliampi qhanañchtʼistäna. Uka cheqa yatichäwinak istʼasajj kunjamsa jikjjatasiyätan uk taqeniw amtasiskpachätanjja. Inas ‘Diosajj Jehová satawa’ sasin Bibliamp qhanañchtʼapjjchistäna (Sal. 83:18, NM). Diosan amigopäsnawa sasin inas sapjjchistäna (Sant. 2:23). Ukanak yateqasajja, kunatï qorit sipans jukʼampïki uk jikjjatataswa amuyayätanjja. Ukatsti Bibliat jukʼamp yatjjatañwa munarakiyätanjja.
BIBLIAT JUKʼAMPI YATJJATAM
Jiskʼa qorinakajja, jawiranakana, larqanakanwa awisajj tantasi. Qori thaqherinakajja, mä tiemponakwa chʼamachasisajj walja libra qori jikjjatapjje. Ukatsti walja waranq dolaranakaruw aljapjjaraki.
Mä jilatampi jan ukajj mä kullakampi Bibliat yatjjatañ qalltkayätan ukhajja, kunjamtï qori thaqherejj mä bañadoran walja qori jarkasin kusisit jikjjataskejja, ukhamwa jikjjatasiyätanjja. Biblian mä jiskʼa tʼaqapat amuytʼasajja, Diosarojj jukʼampiw uñtʼayätanjja. Cheqa yatichäwinak amuytʼasajja, kunjamsa Diosarojj jakʼachassna, Jupar munasisas kunjamsa wiñay jakañ jikjjatsna ukanakwa yatjjatayätanjja (Sant. 4:8; Judas 20, 21).
Qori thaqherinakajja, qori jikjjatañatakejj wal chʼamachasipjje, ¿jiwasajj ukhamarakit Biblian cheqa yatichäwinakap jikjjatañatakejj chʼamachasisktan?
Qori thaqherejja, walja qori jikjjatañatakejj wal chʼamachasi, jiwasajj ukhamarakiw Biblian cheqa yatichäwinakap jikjjatañatakejj chʼamachasiyätanjja. Ukanak yatjjatasasti, kunanakatï Diosar jakäwis katuyasiñataki ukhamarak bautisasiñataki yanaptʼkistaspa ukanak lurañwa amtayätanjja (Mat. 28:19, 20).
¡BIBLIAN SUMA YATICHÄWINAKAP THAQHASIPKAKIÑÄNI!
Qori thaqherinakajja, awisajj ígneas sat jachʼa qalanakanwa jiskʼa qorinak jikjjatapjje. Uka jachʼa qalan yaqhep cheqanakan walja jiskʼa qorinakaw utji. Qorinïki uka cheq apsusasti qori thaqherinakajj leqʼjjapjjewa ukatsti qori apsupjjaraki. Qalltanjja, uka jachʼa qalan janiw qorejj jankʼak amuyaskiti. ¿Kunatsa? 1.000 kiloni mä jachʼa qalatjja, 10 gramo qorikiw apsusispa. Ukhamäkchisa, qori thaqherinakatakejj ukham chʼamachasitapajj janiw inamayäkiti.
“Cristo toqet qallta yatichäwinak” yatjjatasajja, ukhamarakiw nayrar sartaskakiñatakejj chʼamachasiñasa (Heb. 6:1, 2). Ukatakejja, Bibliat sapaki yatjjatkasin suma yatichäwinak jikjjatañataki ukhamarak jukʼamp sum amuytʼañatakiw chʼamachasiñasa. Ukampis walja maranakas Bibliat yatjjataskstanjja, ¿kunas Bibliat yatjjatkasin jukʼamp sum yatjjatañatak yanaptʼistaspa?
Jukʼamp yatjjatañ munaskakiñasawa. Taqe kun sum amuytʼañatakiw chʼamachasiñasa. Urut urutjamaw chʼamachasiñasa, ukaw Diosan yanaptʼapa ukhamarak cheqa yatichäwinaka jikjjatañatak yanaptʼistani (Rom. 11:33). Bibliat sum amuytʼañatakejja, parlktan uka arun jukʼamp yatjjatañatak yanaptʼanakajj utjki ukwa thaqtañasa. Biblia toqet utjki uka jisktʼanakan qhanañchäwipsa, yanaptʼanaksa pacienciampiw thaqtañasa. Bibliankir kawkïr jiskʼa tʼaqasa jan ukajj Bibliat apstʼat kawkïr yatichäwis yanaptʼistaspa ukhamarak chuymachtʼistaspa uk yatiñatakejja, mayni jilat kullakanakaruw jisktʼaraksna. Bibliat yatjjatkasajja, kuna suma yatichäwinaksa jikjjatawaytan ukwa mayni jilat kullakanakar yatiyaraksna.
Ukampisa, janiw jukʼamp yatjjatañ munasakejj yatjjatañasäkiti. Uka toqet amuyasiñatakiw apóstol Pablojj akham säna: “Yatitasajja jachʼa jachʼwa tukuyistu” sasa (1 Cor. 8:1). Ukhamasti iyawsäwin jan aynachtʼañataki, altʼat chuymanïñatak chʼamachasipjjañäni. Familiana Diosar Yupaychañataki Aruma jan jaytasin apañasa, sapaki Bibliat yatjjatañasa, Jehová Diosan munañaparjam sarnaqañatakiw yanaptʼistani, jilat kullakanakar yanaptʼañatakis yanaptʼarakistaniwa. Taqe ukanakat sipansa, kunatï qorit sipansa jukʼampïki uk jikjjatasaw kusisiñäni (Pro. 3:13, 14).