1, 2. 1) Aka qhepa urunakanjja, ¿kunjamsa Isaías 60:22 qellqatajj phoqasiski? 2) ¿Kunas Diosan markapan jukʼamp wakisi?

“AKA mä jukʼa jaqenakasti waranqanakaruw tukupjjani, aka mä qawqha jaqenakasti mä jachʼa markaw tukupjjarakini” (Isa. 60:22). Uka arunakajja, aka qhepa urunakanwa phoqasiski. 2015 maranjja, 8.220.105 Diosan servirinakapaw aka oraqpachana Diosan Reinopat yatiyawayapjje. Kunjamsa markapajj jiljjattani uka toqetjja, Diosajj akham sänwa: “Nayätwa [Jehová] Tatitojja, nayaw taqe ukanakjja horasaparu phoqhasiyarakï” sasa. Diosan markapanjja, sapürutjamaw jukʼamp luräwejj utjistani. Ukhamasti Diosan arunakap yatiyañatakisa, yatichañatakisa, ¿jukʼampit jichhürunakan chʼamachasisktanjja? Walja jilat kullakanakaw precursorjama jan ukajj precursor auxiliarjamas irnaqtʼasipki. Yaqhepanakasti kawkhantï yatiyirinakajj munaski uka cheqaruw sarawayapjje, yaqhepanakajj Tantachasiñ Utanak lurañanwa yanaptʼasipkaraki.

² Sapa marajj niya 2.000 machaq tamanakaw uttʼayasi. Uka tamanakanjja, irpir chuymaninaka, ukhamarak irpir chuymaninakan yanapirinakapaw munasi. Sapa marajja, irpir chuymaninakan  yanapirinakapat waljaniruw irpir chuymanjam uttʼayasiñapajj wakisi, ukatsti walja jilatanakaruw irpir chuymaninakan yanapiripjam uttʼayasiñapajj wakisiraki. Kunjamtï uñjtanjja, walja lurañanakaw Diosan markapan jilatanakatakejj utji, kullakanakatakis ukhamaraki (1 Cor. 15:58).

3, 4. ¿Kunjamsa maynejj Diosar serviñan nayrar sartaspa?

³ (1 Timoteo 3:1 liytʼañataki). Apóstol Pablojj khitinakatï taman jilïrïñataki chʼamachasipkäna ukanakarojja, ukham lurapjjatapat wal chʼamañchtʼäna. Amuytʼañataki, mä qoqan suma achup apaqañatakejja, maynejj wal chʼamachasiñapa. Niya ukhamarakiw irpir chuymanin yanapiripjam irnaqtʼañ munapki ukanakajj chʼamachasipjjañapa. Ukatakisti cristianjam sarnaqañatakiw chʼamachasipjjañapa. Irpir chuymaninakan yanapiripjam irnaqtʼjjasasti, irpir chuymanjam serviñatakiw chʼamachasipjjañaparaki.

⁴ Yaqhep jilat kullakanakajja, Jehová Diosar jukʼamp serviñatakiw wal chʼamachasisipki. Inas precursorata irnaqtʼañ munapjjchi, jan ukajj Betel Utana, Tantachasiñ Utanakajj luraski ukan yanaptʼañ munapjjarakchi. Jichhajja, kunjamsa Bibliajj Diosar serviñan nayrar sartañatakejj yanaptʼistaspa uka toqet yatjjañäni.

5. ¿Kunjamsa wayn tawaqonakajj Diosan markapar yanaptʼapjjaspa?

⁵ Wayn tawaqonakajj kʼumara chʼamani ukhamäpjjewa, ukatwa Diosan markapan walja lurañanakan yanaptʼapjjaspa (Proverbios 20:29 liytʼañataki). ^[1] Yaqhep wayn tawaqonakajj Betelanwa irnaqtʼapjje, ukansti Biblia ukhamarak Bibliat apstʼat qellqatanak imprimisin libror tukuyañkamaw yanaptʼapjje. Yaqhepanakasti Tantachasiñ Utanak lurañana, Tantachasiñ Utanak askichañanwa yanaptʼapjjaraki. Yaqhep wayn tawaqonakajja, jan waltʼäwinakajj utjki ukanwa yanaptʼapjjaraki. Ukatjja waljanirakiw yatiyañatakejj yaqha aru yateqapjje, jan ukajj yaqha markanakar yatiyir sarapjje.

6-8. 1) Diosar servisajja, ¿kunjamsa mä wayna jilatajj jikjjatasïna, ukat kunas ukham jan jikjjatasiñatakejj yanaptʼäna? 2) ¿Kunjamatsa Jehová Diosajj munasirïtap yatsna?

⁶ Jehová Diosarojj wal munastanjja, ukatwa Jupar taqe chuyma serviñ muntanjja. Ukampis inas Aarón jilatjam jikjjatassna. Jupajj taqe chuymaw Jehová Diosar serviñ munäna, ukampis ukham servisajj janiw kusisita jikjjataskänti. Aarón jilatajj wawatpachaw tantachäwinakarusa, yatiyiris sarirïtayna. Jilatajj siwa: “Tantachäwir sarasasa, yatiyir sarasasa janiw kusisit jikjjataskayätti” sasa. Ukhamïpanjja, ¿kunsa jilatajj lurpachäna?

⁷ Biblia sapüru liyiñatakiw wal chʼamachasïna. Tantachäwinakatak wakichtʼasiñatakisa, ukan arstʼañatakisa chʼamachasirakïnwa. Jehová Diosar sapür mayisiñatakis wal chʼamachasïna. Taqe ukanakaw Diosar serviñan nayrar sartañatak yanaptʼäna. Jehová Diosar jukʼamp uñtʼasinsa jukʼampiw Jupar munasirakïna. Ukham lurasajja, Aarón jilatajj wali kusisitaw jikjjatasïna. Qhepatjja precursorjamaw irnaqjjäna, jan waltʼäwinakajj utjkäna ukhajja, mayninakarojj yanaptʼarakïnwa, yaqha markar yatiyiris sararakïnwa. Jichhasti irpir chuymanjamaw Betel Utan irnaqtʼaski. ¿Kunjamsa jichhajj Aarón jilatajj jikjjatasi? Jilatajj akham siwa: “Jehová Diosajj ‘kunja munasirisa ukwa uñjawayta’. Jupan bendicionanakap katoqasajj wali manükiristsa ukhamwa amuyasta, ukatwa Diosar jukʼamp serviñatak chʼamachasta, ukham lurasajj jukʼamp bendicionanakwa katoqta” sasa.

⁸ Salmo qellqerejj akham sänwa: “Yantʼapjjam, uñjapjjarakim, [Jehová] Tatitun munasir kankañapa, [...] Tatitur thaqerinakasti  janiw kunats tʼaqhesipkaniti” sasa (Salmo 34:8-10 liytʼañataki). Diosar taqe chuyma servisajj Juparuw kusisiytanjja, uk yatisajj wali kusisitaw jikjjatastanjja. Ukham taqe chuyma serviñäni ukhajja, Diosajj yanaptʼapunistaniwa.

9, 10. ¿Kunatsa paciencianïñajj wali wakiskirejja?

⁹ Inas Jehová Diosarojj jukʼamp serviñ munstan. Ukampis taman mä luräwi katoqañatak walja maranak chʼamachasisajja, inas jan katoqkstanti. Jan ukajj inas Diosar jukʼamp serviñ munstan, ukampis jakäwisan kun utjatap laykuw jan puedksnati. Ukhamïpanjja janiw aynachtʼañasäkiti, jan ukasti paciencianïñasawa (Miq. 7:7). Kunjamas jikjjatastan uk Jehová Diosajj sumwa yatistu. Ukhamajj yanaptʼapunistaniwa. Abraham chachajj jiwasatak wali yateqaskayawa. Jehová Diosajja, ‘mä wawanïyätawa’ sasaw jupar säna. Ukampis Isaac wawap nasiñapkamajj walja maranakaw pasäna. Abrahamajj Jehová Diosar wal confiyäna, ukatwa pacienciampi suytʼaskakïna (Gén. 15:2-4; 21:5; Heb. 6:12-15).

¹⁰ Paciencianïñajj chʼamakïspawa (Pro. 13:12). Ukampis kunjamsa jikjjatastan ukatak llakisjjsna jan ukajj amtas jan phoqhatasat llakisjjsna ukhajja, jukʼampikiw aynachtʼjjsna. Ukhamajj llakisiñat sipansa, taman jukʼamp yanaptʼañatakiw chʼamachasiñasa.

11. ¿Kunanakansa chʼamachasiñasa, ukat kunatsa ukanakajj wali wakiskirejja?

¹¹ Kunanakansa chʼamachasiñasa. Biblia liytʼañasa, liyktan ukjjat lupʼiñasa, suma amuytʼasirïñataki ukhamarak suma amtanakar puriñatakiw yanaptʼistaspa. Jilatanakatï ukhamäpjjanejja, tamarojj wali sumaw yanaptʼapjjani  (Pro. 1:1-4; Tito 1:7-9). Jiwasatï Biblia sum yatjjatañäni ukhajja, kunjamsa Jehová Diosajj taqe kun uñji ukwa amuyañäni. Ukatjja, kunanakatï Jehová Diosar kusisiyki ukanak lurañwa sapür amtañäni. Amuytʼañataki, kunjamsa mayninakarojj uñjañasa, kunjamsa qollqjja apnaqañasa, kunjamsa isisiñasa, kunanakampis kusistʼañasa taqe ukanakjja, sumwa amuyañäni.

12. ¿Kunjamsa jilat kullakanakajj confiykayäpjjatap uñachtʼayapjjaspa?

¹² Mä luräwi katoqasajj sum phoqañatak chʼamachasipjjañäni. Israelitanakajj wasitat templo saytʼayapkäna ukhajja, walja luräwinakaw utjäna, ukatwa Nehemiasajj uka luräwinak phoqapjjañapatakejj mayninakan suma uñjat chachanakar thaqhäna. ¿Kunatsa? Jupanakajj Jehová Diosar wal munasipjjäna, kuna luräwi katoqasas taqe chuymaw phoqapjjäna. Ukatwa ukham confiykay chachanakar thaqhäna (Neh. 7:2; 13:12, 13). Jichhürunakanjja, khitinakatï Diosar taqe chuyma servipki, wal irnaqtʼapkaraki ukanakaw mayninakan suma uñjatäpjje, ukatwa tamansa jukʼamp luräwinak katoqapjjaraki (1 Cor. 4:2). Ukhamasti, mä luräwi katoqasajj taqeniw sum phoqañatak chʼamachasiñasa (1 Timoteo 5:25 liytʼañataki).

13. Mayninakatï ina chʼusat jan wal uñjapjjestani ukhajja, ¿kunjamsa José waynat yateqassna?

¹³ Jehová Diosar confiyapjjañäni. Mayninakatï ina chʼusat jan wali uñjapjjestani ukhajja, ¿kunsa lurañäni? Kunjamas jikjjatastan ukwa qhanañchtʼsna. Ukampis jiwas pachpat arjjatasisin parlaskaksna ukhajja, jukʼamp jan waltʼayasiñaw utjaspa. José waynatwa yateqassna. Juparojja, jilanakapajj janiw sum uñjapkänti. Maysa toqetjja, ina chʼusat kʼarintatäsinwa carcelan llawintat uñjasirakïna. Ukhamäkchïnsa, José waynajj Jehová Diosampiru arsutanakapampiruw confiyäna, ukatwa Jupat jan jitheqtkänti (Sal. 105:19). Jan walinakan uñjasiñajja, jutïritakiw Joseyar wakichtʼaskäna (Gén. 41:37-44; 45:4-8). Mayninakatï ina chʼusat jan wal uñjapjjestani ukhajja, sum amuytʼasiñatakejj Jehová Diosaruw yanaptʼa mayiñasa. Jupaw colerampi jan atipayasiñatakisa, mayninakar munasiñampi parltʼañatakis yanaptʼistani (1 Pedro 5:10 liytʼañataki).

14, 15. 1) ¿Kunatsa jukʼamp sum yatiyañatak chʼamachasiñasa? 2) ¿Kunsa jaqenakar jikjjatañatakejj lursna? (20 janankir foto uñjjattʼäta, ukatsti “ ¿Kunjam toqenakatsa yatiyasma?” siski uka recuadro uñjjattʼarakïta).

¹⁴ Apóstol Pablojj akham sasaw Timoteor säna: “Jaqenakan nayraqatapana Diosan arunakap leeñaru uchasim, jilatanakar chʼamañchasina, ukhamarak yatichasina” sasa (1 Tim. 4:13, 16). Niyakejjay Timoteo waynajj walja maranak Diosan Reinopat yatiyjjchïnjja, ¿kunatsa sum yatiyañatak chʼamachasiñapajj wakisïna? Timoteo waynajja, jaqenakan amuyunakapasa jakäwipasa mayjtʼirïtap sum amuyäna. Jupajja jaqenakan chuymapar purtʼañwa munäna, ukatwa jukʼamp sum yatichañataki ukhamarak kunayman toqet yatiyañatak chʼamachasïna. Jichhürunakanjja jupatwa yateqasiraksna.

¹⁵ Yaqhep cheqanakanjja, utat uta yatiyktan ukhajj janiw jaqenakarojj utanakapan jikjjatktanti. Yaqhep cheqanakanjja, jaqenakajj jachʼa edificionakanwa jakasipjje, ukatwa jupanakarojj jan yatiyañjamäkiti. Yatiyktan uka cheqanakantï ukhamächejja, ¿kunsa jaqenakar jikjjatañatakejj lursna?

16. Walja jaqenakajj utjki uka cheqanakan yatiyañajj wali askiwa sasinjja, ¿kunatsa sissna?

¹⁶ Walja jilat kullakanakajja, walja jaqenakajj utjki uka cheqanakanwa yatiyapjje. Amuytʼañataki, jaqenakar jikjjatañatakejja, kawkhantï trenanakasa autonakasa sayapki uka cheqaruw sarapjje. Qhatunakarusa plazanakarus sarapjjarakiwa. Jichhak mistki uka noticianakat parlasaw maynejj yatiyañ qalltaspa. Jan ukajj wawanakapat sum parltʼasasa, trabajopat jisktʼasasa, parlañ qalltarakispawa. Jaqenakatï sum  istʼapjjani ukhajja, jilatasa jan ukajj kullakasa Bibliatwa mä cheqa uñachtʼayaspa jan ukajj uka toqetwa jisktʼarakispa. Jila parte jaqenakajja Bibliat jukʼampiw yatjjatañ munapjje.

17, 18. 1) Walja jaqenakajj utjki uka cheqanakan jan ajjsaras yatiyañatakejja, ¿kunas yanaptʼistaspa? 2) Diosan arunakap yatiyir sarkasinjja, ¿kunatsa Davitjam chuymanïñajj wali wakiskirejja?

¹⁷ Callenakan jan uñtʼat jaqenakamp parlañajj inas chʼamakïchispa. Ukaw Nueva York markankir Eddie jilatampejj pasatayna. ¿Kunas jan ajjsarañatakejj yanaptʼpachäna? Jupajj akham siwa: “Esposajampejja, jaqenakajj kuna toqetpunsa jisktʼasipjje jan ukajj kuna toqetpunsa parlapjje ukanakatwa Familiana Diosar Yupaychañataki Aruman yatjjatapjjerïta. Ukatjja, mayni jilat kullakanakaruw uka toqet jisktʼasipjjerïta” sasa. Eddie jilatajj jichhajj janiw ajjsarayasjjeti, walja jaqenakajj utjki uka cheqanakar wali kusisitaw yatiyir sarjje.

¹⁸ Jiwasatï Diosan Reinopat taqe chuyma yatiyir sarañäni ukhamarak jukʼamp sum yatiyañatak chʼamachasiñäni ukhajja, Diosar serviñan nayrar sartataswa jilat kullakanakajj amuyapjjani (1 Timoteo 4:15 liytʼañataki). Maysa toqetjja, Diosar servipjjañapatakiw mayninakarus yanaptʼsna. David chachajj akham sänwa: “Jan qarjasisaw Tatiturojj jachʼañchä, lakajjajj jupar jachʼañchapuniniwa. Ajayojjajj Tatitunkasaw kusisi: llampʼu chuymaninakajj istʼapjjpan, kusisipjjarakpan” sasa (Sal. 34:1, 2).

19. Kunjamtï munki ukham janis maynejj Diosatak lurirjamäkchejja, ¿kunatsa kusisita jikjjatasiñapa?

¹⁹ David chachajj akham saskakïnwa: “Tatay, luratanakamajj taqpachapun jumar jachʼañchpan, iyawsirinakamajj jumar jachʼañchapjjpan. Aytat qollan sarayäwimat yatiyapjjpan, jachʼa luräwinakamat parlapjjpan. Muspharkañ luratanakamat jaqenakar yatiyaspan, aytkay qhapaq sarayäwimat parlasirakpan” sasa (Sal. 145:10-12). Khitinakatï Jehová Diosar wal munasipki, Jupats janirak jitheqtapki ukanakajja, Jehová Diosat mayninakar wal parlañ munapjje. Ukampis yaqhepanakajj usuta, chuymankipstata ukhamaw jikjjatasipjje, ukatwa utat uta walja horanak jan yatiyirjamäpkiti. Ukhamanakantï jikjjatasstan ukhajja, ak amtañasawa: doctoranakaru enfermeranakaru, jan ukajj yaqhanakampiru Diosat parlasajj Juparuw jachʼañchasktanjja. Jumatï Diosar servitamat carcelan llawintata jikjjatassta ukhajja, mayninakar suma yatiyäwinak yatiyasinwa Jehová Diosar kusisiyasma (Pro. 27:11). Familiamat juma sapaki Diosar servisas Juparojj kusisiyarakismawa (1 Ped. 3:1-4). Jan walinakan jikjjataskasasa, Jehová Diosarojj jachʼañchasmawa, jukʼampirakiw Jupar jakʼachasisma, Diosar serviñansa nayraruw sartasma.

20, 21. Diosan markapan jukʼamp luräwinak katoqasajja, ¿kunjamsa mayninakar yanaptʼsna?

²⁰ Jiwasatï Jehová Diosar jukʼamp jakʼachasiskakiñäni, Jupar serviñatakis chʼamachasiskakiñäni ukhajja, Jupajj walja bendicionanakwa churistani. Ukhamajj Jehová Diosan suma yatiyäwinakap jaqenakar yatiyañatakisa, jilat kullakanakasar yanaptʼañatakis chʼamachasipjjañäni, ukatakisti inas kunanaktï sapür lurirïktan ukanak mayjtʼayañajj wakischispa. Jiwasatï taman jukʼamp yanaptʼañatak chʼamachasiñäni ukhajja, jilat kullakanakajj wal munasipjjestani.

²¹ Walja maranakasa jan ukajj jichhakis Diosar serviskstanjja, Jupar jukʼamp jakʼachasiñatakisa, Diosar serviñan nayrar sartañatakis taqeniw chʼamachassna. Jutïr yatichäwinjja, kunjamsa Diosar serviñan nayrar sartapjjañapatakejj mayninakar yanaptʼsna, uka toqetwa yatjjataskañäni.