1, 2. ¿Kunatsa mayninakarojj Diosan markapan jukʼamp luräwinak katoqapjjañapatak yanaptʼañasa?

JESUSAJJA, Diosan Reinopat yatiyañatakiw chʼamachasïna. Arkirinakapar yanaptʼañatakis tiempo apstʼasirakïnwa. Sañäni, kunjamsa mayninakar yatichapjjañapa, kunjamsa Diosan markap uñjapjjañapa ukwa yatichäna (Mat. 10:5-7). Maysa toqetjja, Felipejj Diosan arunakap yatiyañatakiw chʼamachasïna, ukham lurapjjañapatakis phuchanakapar yanaptʼarakïnwa (Hech. 21:8, 9). Jichhürunakanjja, ukhamarakiw yaqhanakar yanaptʼañasa. ¿Kunatsa?

² Oraqpachanjja, Bibliat yateqerinakajj waljaniw tantachäwinakar sarjjapjje, ukampis janïraw bautisatäpkiti. Ukatwa qawqha wakiskiris Biblia liyiñasa, jukʼamp yatjjatañasa uk amuyapjjañapatak yanaptʼañasa. Ukatsti, suma yatiyäwinak yatiyapjjañapatakis yanaptʼañasarakiwa. Jichhak bautisasipki uka jilatanakarus yanaptʼañasarakiwa, ukhamat irpir chuymaninakan yanapiripjama, jan ukajj irpir chuymanjam irnaqtʼapjjañapataki. Bibliat yateqasipki ukanakarus taqeniw yanaptʼaraksna (Pro. 4:2).

3, 4. 1) Pablon arunakaparjamajja, ¿kunjamsa Bibliat yatjjatañajj jaqenakan chuymapar purtʼañatak yanaptʼistaspa? 2) Bibliat yateqerinakasan Bibliat sapaki jukʼamp yatjjatapjjañap munstan ukhajja, ¿kunsa jiwasajj nayraqat lurañasa?

³ Kunas Diosan munañapajja uk yatiñatakejja, Diosan taqe servirinakapaw Biblia liyisin jukʼamp yatjjatapjjañapa. Uk lurapjjañapatakiw apóstol Pablojj Colosas markankir cristianonakar chʼamañchtʼäna, jupajj akham sänwa: “Jumanakatakejj jan qarjasi[saw] orapjjta, Diosatjja mayipjjta jumanakajj jupan munañapa amuytʼapjjañamataki” sasa. ¿Kunatsa Colosankir cristianonakajj Qollan Qellqatanak liyisin yatjjatapjjañapäna? Ukaw suma amuytʼasirïpjjañapatakisa, Diosatakjam ‘sarnaqapjjañapatakisa, kunatejj Jupatakejj askïki ukanak lurapjjañapatakis’ yanaptʼaspäna. Ukatsti Diosan munañaparjam ‘suma luräwinaka’ lurapjjañapatakis yanaptʼarakispänwa, ukanakat mayajj suma yatiyäwinak yatiyañawa (Col. 1:9, 10). Ukhamasti jiwasamp Bibliat yateqapki ukanakarojja, Diosar serviñatakejj Biblia sapüru liyiñasa, jukʼamp yatjjatañasa, kunja wakiskirisa ukwa amuytʼayañasa.

⁴ Jiwasatï Bibliat sapaki jan yatjjatksna ukhajja, ¿kunjamarak yateqerinakasarojj Bibliat sapaki yatjjatañajj kunja wakiskirisa uk amuytʼaysnasti? Biblia sapüru liyiñasa, liyktan ukjjat lupʼiñasa jakäwisansa, Diosan arunakap yatiyañansa yanaptʼistaniwa. Amuytʼañataki, yatiyktan ukhajj maynitï wal jisktʼistani ukhajja, juparojj Bibliampiw qhanañchtʼañäni. Maysa toqetjja kunjamsa Jesusasa, Pablosa, yaqha cristianonakasa jan walin uñjasisajj yatiyasipkakïna uk yatiñajja, taqe chuyma yatiyaskakiñatakiw yanaptʼistu. Bibliat sapaki yatjjatasajj kuna yatichäwinaksa jikjjattan kunjamsa ukajj yanaptʼistu ukwa mayninakar sissna. Ukaw ukham lurapjjañapatak yanaptʼaspa.

5. ¿Kunjamsa Bibliat yateqerinakarojj Bibliat jukʼamp yatjjatapjjañapatak yanaptʼasma?

⁵ Inas akham jisktʼassta: “¿Kunjamsa Bibliat yateqerijarojj Bibliat sapüru yatjjatañapatak yanaptʼirista?” sasa. Yatjjatapkta uk qellqat sum wakichtʼasiñapatakiw yanaptʼasma. ¿Kunsa Bibliax chiqpachapuni yatichi? libron yaqhep cheqanakanjja, “Jukʼamp yatjjatañataki” siski uka cheqaw uñjjattʼasiñapa, ukhamajj uka cheq uñjjattʼañapatakiw mayisma. Ukatsti, tantachäwin arstʼañataki wakichtʼasiñsa yaticharakismawa. Yatiyañataki ukat ¡Despertad! revistanak liytʼañapatakis chʼamañchtʼarakismawa. Biblia toqet jisktʼanakajj utjki uk sum yatjjatañatakejja, Watchtower Library jan ukajj Watchtower INTERNETANKIR BIBLIOTECA satäkis ukana, ukhamarak yaqha qellqatanakan thaqtañapatakiw yaticharakisma. Ukhamatwa Bibliat yateqerejj jukʼamp yatjjatañ munani.

6. 1) ¿Kunjamsa Bibliat yateqapki ukanakarojj jukʼamp yatjjatapjjañapatak yanaptʼsna? 2) Bibliat yateqeritï Bibliat jukʼamp yatjjatani ukhajja, ¿kunjamas jikjjatasini?

⁶ Maynimpi yatjjatktan ukhajja, Bibliajj wali  wakiskirïtap amuyañapwa muntanjja. Uka toqew Jehová Diosar uñtʼaspa. Jukʼamp yatjjatañapataki jariyañat sipansa, Bibliat jukʼamp yatjjatañ munañapatakiw yanaptʼañasa. Jehová Diosar jukʼamp uñtʼasajja, salmonak qellqerjamarakiw jikjjatasini. Jupajj sänwa: “Diosaruw jakʼachasï, ukaw nayarojj kusisiyitu. Tatay, jumaw arjjatirejjätajja” sasa (Sal. 73:28). Diosajja, jupar jakʼachasiñ munirinakarojj qollan ajayupampiw yanaptʼani.

7. Suma yatiyäwinak yatiyapjjañapatakejja, ¿kunjamsa Jesusajj apostolonakapar yatichäna? (25 janankir foto uñjjattʼam).

⁷ Jesusajj apostolonakapar sum yatichäna, jiwasajj jupatwa yateqassna. Yatiyir sarkäna ukhajja, apostolonakapampiw sarirïna, ukhamatwa apostolonakajj yaqhanakar yatichañ Jesusat yateqapjjäna. Kunjamsa yatiyapjjañapa uksa Jesusajj yaticharakïnwa (Mateo 10 jalja). ^[1] Ukaw apostolonakaparojj mä jukʼa tiempot cheqa yatichäwinak yatiyañatak yanaptʼäna (Mat. 11:1). Jichhajja yatiyir sarkasin kun lurapjjañapatakis Bibliat yateqerinakarojj yanaptʼsna uk pä toqet uñjañäni.

8, 9. 1) ¿Kunjamsa Jesusajj jaqenakar yatiyirïna? 2) Jesusat yateqasisajja, ¿kunjamsa Bibliat yateqerinakarojj yatiyapjjañapatak yanaptʼsna?

⁸ Jiwasaw parlañ qalltañasa. Jesusajja, janiw walja jaqenakaruk parlirïkänti, jan ukasti sapa maynimpiw parlarakirïna, jupanakarojj wali munasiñampiw parlirïna. Amuytʼañataki, mä kutejja, Sicar marka jakʼan utjkäna uka phujut um waysuñatakiw mä warmejj saräna, uka warmiruw Jesusajj parläna (Juan 4:5-30). Impuesto cobriri Mateo Leví chachampis parlarakïnwa, juparojj arkiripäñapatakiw invittʼäna. Jesusan arkiripar tukjjäna uka qhepatjja, Jesusampiru yaqhanakampiruw manqtʼasiñatak invittʼäna. Ukanjja, Jesusajj waljanimpiw parläna (Mat. 9:9; Luc. 5:27-39).

⁹ Natanaelajj jan walinakwa Nazaretankirinakat parläna, Jesusajj uka markansa naskchïnjja, juparojj suma arunakampiw parläna. Ukaw Jesusat sum amuyañapatakisa, jupat jukʼamp yateqañatakis Natanaelar yanaptʼäna (Juan 1:46-51). ¿Kunsa Jesusat yateqsna? Jaqenakan sum istʼapjjañapatakejja, suma arunakampiw parlañasa. ^[2] Ukham parlapjjañapatak Bibliat yateqerinakar yanaptʼañäni ukhajja, jupanakajj kusisitaw yatiyapjjani.

10-12. 1) Suma yatichäwinak yatiñ munapkäna ukanakarojja, ¿kunjamsa Jesusajj yanaptʼäna? 2) Jichhak yatiyir mistusipki ukanakarojja, ¿kunjamsa suma yatichirïpjjañapatak yanaptʼsna?

¹⁰ Istʼapkistu ukanakaruw yatichañasa. Jesusajj jan inaktʼasas yatiyirïkchïnjja, yateqañ munapkäna ukanakar yatichañatakiw tiemp apstʼasirïna. Sañäni, mä kutejj waljaniw Jesusar istʼañatakejj qota lakar sarapjjäna. Uk uñjasasti Pedrompi mä boter makatasinwa Jesusajj uka jaqenakar yatichäna. Qhepatjja, jaqenakar jikjjatañajj kunja wakiskirisa ukwa Jesusajj Pedror yatichañ munäna, ukatwa mä milagro lurasajj chawllanak waljaptayäna, ukhamatwa Pedrojj walja chawllanak katsüna. Ukatsti Jesusajj jupar sänwa: “Jichhat uksarojj jaq katjjäta” sasa. Uk istʼasasti Pedrosa jupan yanapirinakapasa botenak jaytasin Jesusampiw sarjjapjjäna (Luc. 5:1-11).

¹¹ Nicodemojj Jesusan yatichäwinakap wal yatiñ munarakïna. Ukampis Jesusamp parlañ wal ajjsarayasïna, ¿kunatsa? Jupajj Sanedrinankirïnwa, jaqenakatï Jesusamp parlir uñjapjjaspäna ukhajja, jan walinakwa parlapjjaspäna, ukatwa Jesusan ukarojj arumanakaki sarirïna. Suma chuymampi katoqasinjja, cheqa yatichäwinakwa Jesusajj jupar yatichäna (Juan 3:1, 2). Mayninakar yatichañatakisa, iyawsäwinakap chʼamañchtʼañatakisa, Jesusajj tiempo apstʼasipunirïnwa. Jupat yateqasisajja, khitinakatï Bibliat yatiñ munapki ukanakar yatichañatakejj tiempo apstʼasiraksnawa.  Ukatakejj tiemponïpki ukhaw sarsna, ukhamatwa Bibliat sum amuyapjjañapatakejj yanaptʼsna.

¹² Yaqhepanakajj wali sum istʼapjjestu. Jupanakan ukar kuttʼañatakiw jichhak yatiyir mistusipki ukanakar yatichañasa. Ukhamarusa, khitinakatï Bibliat jukʼamp yatiñ munapki jupanakan ukar kuttʼañatakisa, yatichañatakisa jupanakampiw sarsna. Ukhamtï lurañänejja, jichhak yatiyir mistupki ukanakajja, mayninakar sum yatichañwa yateqapjjani. Janiw ukakïkiti, mayninakar cheqa yatichäwinak yatichasajj kunja kusisitas maynejj jikjjatasispa uksa amuyapjjarakiniwa. Qhepatjja, Bibliat yateqañ munapki ukanakar kuttʼasajja, Bibliat yatichañwa qalltapjjani. Awisajja, Bibliat jukʼamp yatiñ munapki ukanakar wasitampi kutʼtan ukhajja, janiw jikisktanti, ukhamajj jichhak yatiyir mistusipki ukanakajja, jan qarjtasin kuttʼañsa, paciencianïñsa yateqapjjarakiniwa (Gál. 5:22; “ Jan qarjtasaw kuttʼaskakïna” siski uka recuadro uñjjattʼäta).

13, 14. 1) ¿Kunanaksa Diosan servirinakapajj mayninak laykojj lurapjjerïna? 2) Wayn tawaqonakarusa, Bibliat yateqasipki ukanakarusa, ¿kunjamsa jilat kullakanakar munasipjjañapatak yanaptʼsna?

¹³ Diosajja, servirinakapajj maynit maynikam munasipjjaspa, yanaptʼasipjjarakispa ukwa muni (Lucas 22:24-27; 1 Pedro 1:22 liytʼañataki). Bibliajj Jesusat akham siwa: “Janiw serviyasiñatak jutkiti jan ukasti serviriw juti, ukhamarak jakañap churiri walja jaqenakar qhespiyañataki” sasa (Mat. 20:28). Dorcas sat mä warmejja, “aski lurirïnwa, pobrenakar yanaptʼirirakïnwa” (Hech. 9:36, 39). Mariajj Romankir jilat kullakanakapar yanaptʼañatakejj “wal irnaqäna” (Rom. 16:6). Ukhamasti Bibliat yateqasipki ukanakarojja, jilat kullakanakar yanaptʼañajj kunja wakiskirisa ukwa yatichañasa. ¿Kunjamsa uk lursna?

¹⁴ Chuymankipstata, jan ukajj usuta jilat kullakanakar tumptʼir sarkañäni ukhajja, ¿janit Bibliat yateqerinakamp sarksna? Yaqhep jilat kullakanakajj wawanakanïpjjewa, ukhamajj chuymankipstata, usuta jilat kullakanakar tumptʼir sarapkani ukhajja, wakisispa ukhajj wawanakaparuw irpapjjarakispa. Maysa toqetjja, chuymankipstat yaqhep jilat kullakanakajja, janiw phayasirjamäpkiti, ukhamajj inas irpir chuymaninakajj tamankir wayn tawaqo jilat kullakanakaru, jan ukajj Bibliat yateqasipki ukanakaru yanaptʼir sarapjjañapatak mayipjjchispa, ukhamat phaytʼarapipjjañapataki jan ukajj utanakap askichtʼapjjañapataki. Uk uñjasajja, wayn tawaqonakasa, Bibliat yateqerinakas ukham lurañwa yateqapjjarakini. Amuytʼañataki, mä jilatajja, mä wayna jilatampiw jachʼa markat jaya cheqanakar yatiyiri saräna. Uka cheqanakan yatiykasajja, jilat kullakanakar tumptʼiriw saräna. Ukanak uñjasajja, kunjamsa jilat kullakanakar yanaptʼaspa ukwa wayna jilatajj yateqawayi (Rom. 12:10).

15. ¿Kunatsa irpir chuymaninakajj tamankir jilatanakar yanaptʼapjjañapa?

¹⁵ Jehová Diosajj mä luräwi chachanakar churawayi, jupanakaw tamarojj Diosan Arupat yatichapjjañapa. Ukhamajja, taman arstʼañajj waktʼkani ukhajja, chuymar purtʼkir arstʼañwa yateqapjjañapa. Kunapachatï irpir chuymaninakan yanapiriparu taman arstʼañajj waktʼkani ukhajja, inas mä irpir chuymanejj janïr arstʼkipan istʼchispa, ukhamat yaqhep cheqanakan yanaptʼañataki (Neh. 8:8). ^[3]

16, 17. 1) ¿Kunjamsa apóstol Pablojj Timoteor yanaptʼäna? 2) Tamar sarayapjjañapatakejja, ¿kunjamsa irpir chuymaninakajj jilatanakar yanaptʼapjjaspa?

¹⁶ Tamanak sarayapjjañapatakejja, walja jilatanakar yanaptʼañaw wakisi. Apóstol Pablojja, Timoteoruw tama sarayirïñapatak yanaptʼäna. Kunjamtï jupampejj lurkäna ukham lurañapatakiw Pablojj jupar chʼamañchtʼarakïna, akham sänwa: “Cristo Jesusampi mayaru tukutas  layku bendicionas utjkistu ukampi chʼamañchasim. Kuntejj walja testigonakan nayraqatapan arsuri istʼkista ukjja, khitinakatejj churañjamäki, ukhamarak mayninakarus yatichirjamäki ukanakarojj uka pachpa arunakampi ewjjtʼam” sasa (2 Tim. 2:1, 2). Niyakejjay Pablojj apostoljama irpir chuymanjama irnaqtʼchïnjja, Timoteojj wal jupat yateqasïna. Sañäni, kunjamsa yatiyañapa, tamansa kunjamsa jilat kullakanakar yanaptʼañapa taqe ukanakwa yateqäna (2 Tim. 3:10-12).

¹⁷ Pablojj janiw Timoteor jaytanukkänti, ¿kunatsa? Jupan yanaptʼaparjam lurañatakejj kunjamsa chʼamachasïna uk amuyañwa munäna (Hech. 16:1-5). Jichhürunakanjja, irpir chuymaninakajj Pablot yateqasipjjarakispawa. Kunapachatï mä jilataru jan ukajj mä kullakaru tumptʼir sarapkani ukhajja, irpir chuymaninakan yanapirinakapat mayniruw irpapjjaspa. Ukhamatwa kunjamsa jilat kullakanakar yatichañapa uk yateqani. Pacienciampi, munasiñampi jilat kullakanakar uñjañsa, “Jehová Diosaw ‘uwijanakap’ uñjañatakejj yanaptʼaskitani” sasin confiyañsa yateqarakiniwa (1 Ped. 5:2).

18. ¿Kunatsa mayninakar yanaptʼañasa?

¹⁸ Aka qhepa urunakanjja, mayninakar yanaptʼañaw wakisi. Sañäni, Bibliat yateqerinakaruw Diosan arunakap sum yatiyapjjañapatak yanaptʼañasa. Tama sum uñjapjjañapatakisa, walja jilatanakar yanaptʼañaw wakisiraki. Jehová Diosajja, servirinakapajj suma wakichtʼatäpjjaspa ukwa muni. Ukhamajj kunjamtï Jesusasa, Pablosa, mayninakar yanaptʼapkänjja ukhamarak mayninakar yanaptʼapjjañäni. Niyaw akapachajj tukusjjani, ukampis Diosan arunakap yatiyañajj waliw utjaski, ukatwa mayninakar yanaptʼañajj wali wakiskirejja.

19. Mayninakar yanaptʼañataki chʼamachasitasajja, ¿kunatsa jan inamayäkani?

¹⁹ Mayninakar yanaptʼañatakejja, tiempo, chʼama apstʼasiñaw wakisi. Ukampis Diosana, Jesusana yanaptʼapampejj mayninakar yanaptʼañäniwa, janipun ukat pächasiñäniti. Khitinakarutï yanaptʼktan ukanakar taman taqe chuyma yanaptʼañatak chʼamachasiri, ukhamarak jukʼamp yatiyañataki chʼamachasir uñjañäni ukhajja, wali kusisitaw jikjjatasiñäni (1 Tim. 4:10). Ukhamarus mayninakar yanaptʼasajja, Diosar serviñan nayraruw sartarakiñäni.