1, 2. ¿Kunatsa Romanos 8 jaljajj ajllit cristianonakatakejj wali wakiskirejja?

JESUSAN jiwäwipajj amtaskäna uka semananakajja, inas Romanos 8:15-17 qellqata liytʼawaysta. Uka qellqatajja, kunjamatsa ajllit cristianonakajj alajjpachar sarañataki ajllitäpjjatap yatisipjje ukwa sum qhanañchi. Romanos 8:1 qellqatajja, ajllit cristianonakajj ‘Cristo Jesusankirïpjjewa’ sasaw qhanañchi. Ukampis Romanos 8 jaljajja, ¿ajllit cristianonakarukit yanaptʼpacha? Jan ukajj ¿aka Oraqen wiñay jakañ suyapki ukanakarojj yanaptʼarakispacha?

² Romanos 8 jaljajj ajllit cristianonakatakiw qellqasiwayi. Jupanakaw qollan ajayu katoqapjje, ‘suyasipkarakiw kunürutejj Diosajj wawanakapjama tukuykani uka uru, kunapachatejj jañchinakapajj qhespiyat uñjaskani uka uru’ (Rom. 8:23). Jutïrinjja, Diosan wawanakapjamaw alajjpachan jakapjjani. Cristianjam bautisasipjjatapatjja, Jehová Diosajj Jesusan jiwatapjjaruw juchanakap perdonawayi. Ukatsti  wawanakapjam uñtʼatäpjjañapatakiw jupanakar qʼomachawayi (Rom. 3:23-26; 4:25; 8:30).

3. Aka Oraqen wiñay jakañ suytʼäwinïpki ukanakarojja, ¿Romanos 8 jaljajj yanaptʼarakispati?

³ Romanos libron nayrïr jaljanakapanjja, apóstol Pablojj Abraham chachatwa parläna, jupajj janiw alajjpachar sarañatak ajllitäkänti. Ukhamäkchïnsa Jehová Diosajj aski jaqetwa Abrahamar uñjäna. Diosar taqe chuyma serviri Abraham chachajja, Jesusajj aka Oraqer janïr jutkäna ukhaw jakäna (Romanos 4:20-22 liytʼañataki). Jichhürunakanjja, Jehová Diosajj ukhamarakiw aka Oraqen wiñay jakañataki suytʼäwinïpki ukanakar askit uñjaspa. Taqe jupanakarojja, Romanos 8 jaljan utjki uka ewjjtʼanakajj yanaptʼarakispawa.

4. Romanos 8:21 qellqata liytʼasajja, ¿kunsa jisktʼasiñasa?

⁴ Romanos 8:21 qellqatanjja, Jehová Diosajj aka Oraqe mä paraisor tukuyaña ukhamarak jaqenakar juchampita jiwañampit qhespiyañ arskäna uka toqetwa parli. Uka qellqatarjamajja, jupanakajj “Diosan wawanakapan qhespiyat jakäwipan[wa]” jakasipjjani. ¿Niyas paraison jakasksna ukhamti amuyastanjja? ¿Kunsa ukan jakañatakejj lurañasa? Uk jichhajj yatjjatañäni.

5. Romanos 8:4-13 qellqatanjja, ¿kuna toqetsa Pablojj parläna?

⁵ (Romanos 8:4-13 liytʼañataki). Romanos 8 jaljanjja, Pablojj ‘jañchin munañaparjam jakirinakata’ ukhamarak ‘ajayurjam jakirinakatwa’ parläna. Ukham sasinjja, Pablojj cristianonakata ukhamarak jan cristianöpkäna ukanakatwa parlaskäna sasaw yaqhepanakajj sapjje. Ukampis uka arunakjja, Pablojj ‘Diosatak yaqhachat’ cristianonakaruw qellqäna (Rom. 1:7). Ukhamasti ‘jañchin munañaparjam jakirinakasa’ ukhamarak ‘ajayurjam jakirinakasa’ cristianonakäpjjänwa. ¿Kunansa uka cristianonakajj jan kikpäpkäna?

6, 7. 1) “Jañchi” sasin Biblian parlki ukajja, ¿kamsañsa muni? 2) Romanos 8:4-13 qellqatan “jañchi” sasinjja, ¿kuna toqetsa parlaski?

⁶ “Jañchi” sasin Biblian parlki ukajja,  awisajj cheqpach jañchitwa parli (Rom. 2:28, MT; 1 Cor. 15:39, 50). Maysa toqetjja, jañchi toqe familiat parlañatakiw apnaqasiraki. Amuytʼañataki, Jesusajj “janchi toqetsti rey Davidan familiapatarakïnwa” sasaw Biblian qhanañchi. Apóstol Pablosti, judionakarojj ‘jañchi toqet parientenaka’ sasaw sarakïna (Rom. 1:3; 9:3, MT).

⁷ Romanos 8:4-13 qellqatan ‘jañchin munañaparjam jakirinaka’ sasin Pablojj siskäna uka arunakampejja, ¿kamsañsa munäna? Uk sum amuytʼañatakejja, Romanos 7:5 qellqat sum yatjjatañaw yanaptʼistani. Pablojj sänwa: “Janchin munañapankaskäyätan ukkhajja, leyejj jiwasanakarojj juchachasiñ amtayirikïnwa” sasa. Uka arunakampejja, ‘jañchin munañaparjama jakirinakatakejj’ jan wali luräwinakaparjama, munañaparjama sarnaqañaw nayranki sasaw Pablojj qhanañchäna.

8. ‘Jañchin munañaparjama’ jan sarnaqapjjañapatakejja, ¿kunatsa Pablojj ajllit cristianonakaru ewjjtʼäna?

⁸ ‘Jañchin munañaparjama’ jan sarnaqapjjañapatakejja, ¿kunatsa Pablojj ajllit cristianonakaru ewjjtʼäna? ¿Kunatsa taqe cristianonakajj uka ewjjtʼar istʼapjjañapa? Jichhürunakanjja, munañasarjam sarnaqañaw jakäwisan nayrankaspa. Amuytʼañataki, Romankir yaqhep cristianonakajj ‘jañchin munañaparjamaw’ sarnaqapjjäna. Sañäni, wachoq jucha lurañanaka, manqʼañanaka, yaqha ukham lurañanakaw jupanakatakejj nayrankäna, ukaw Pablon qellqatapan amuyasi (Rom. 16:17, 18; Fili. 3:18, 19; Jud. 4, 8, 12). Khä nayra tiemponjja, Corintonkir taman mä cristianojj ‘pachpa madrastra taykaparuw warmisïna’ (1 Cor. 5:1). Kunjamtï uñjtanjja nayrïr cristianonakatakejj ‘jañchin munañaparjama’ jan sarnaqapjjañapatakejja, Pablon ewjjtʼapajj wali wakiskirïnwa (Rom. 8:5, 6).

9. Romanos 8:6 qellqat liytʼasajja, ¿kunsa jan amuyañasäki?

⁹ Uka ewjjtʼar istʼañajj jiwasanakatakejj wali wakiskirirakiwa. Walja maranakas maynejj Diosar serviskchejja, ‘jañchin munañaparjam’ sarnaqañwa qalltaspa. Pablon ewjjtʼanakapar istʼasajja, ¿janit manqʼañatsa,  trabajiñatsa, kusistʼañatsa, maynimpi uñtʼasiñatsa lupʼiñasäjje? Pablojj janiw uk sañ munkänti. Ukanakajj jakäwin wakiskiriwa. Jesusat amtañäni, jupajj manqtʼasirïnwa, yaqhanakarus manqʼañ churarakirïnwa. Samartʼañatakis tiempo apstʼasirakirïnwa. Maysa toqetjja, jaqechatanakan ikthapipjjañapajj wakiskiriwa sasaw Pablojj sarakïna.

10. ¿‘Llakisiña’ arojj kamsañsa muni?

¹⁰ ‘Akapachankkis ukanakat llakisiña’ sasinjja, ¿kamsañsa Pablojj munaskäna? “Llakisiña” sasin Pablojj griego arut apnaqkäna uka arojja, mä toqet wal lupʼiña jan ukajj kuntï lurañ amtktan ukat lupʼiña sañ muni. Yatjjattʼat mä jaqejj ukham chuymaninakat akham sänwa: “Mä toqet wal llakisipjje, jan ukajj mä toqet wal parlapjje” sasa. Ukatjja, jupanak pachpatwa wal llakisipjje, munañanakaparjamaw sarnaqapjjaraki.

11. ¿Kunanakas jakäwisan nayrankaski uk kunjamatsa amuysna?

¹¹ Romankir cristianonakajja, chuymapan kunjamäsipkänsa, kunsa nayrar uchasipkäna uka toqenakat sum amuytʼasipjjañapänwa. ¿‘Jañchin munañaparjamati’ sarnaqapjjpachäna? Jichhürunakanjja, kunas jiwasatakejj nayranki ukjja amuytʼasiñasarakiwa. ¿Kuna toqetsa jilpach parltanjja? ¿Kun lurañas jiwasatakejj nayranki? Ukham jisktʼasisajja, inas taqe kasta vino malltʼaña, uta sum kʼachachtʼaña, machaq isinak alaña, jukʼamp qollqe ganaña, vacacionat mistusin pasiytʼir sarañ lupʼiskatas amuyasstan. Taqe ukanakat lupʼiñajja, janiw jan walïkiti, jakäwisansa wakiskiriwa. Amuytʼañataki, Jesusajj mä casarasïwir sarasajj mä milagro lurasaw umjja vinor tukuyäna, Pablosti “purak usumpi usuntatam laykojja [...] mä jukʼa vinjja umjjattʼarakim” sasaw Timoteor ewjjtʼäna (1 Tim. 5:23; Juan 2:3-11). Ukampisa janiw jupanakatakejj vino umañajj nayrankkänti. ¿Jiwasat kamsasirakispasa? ¿Kunas jakäwisan nayranki?

12, 13. Kunas jakäwisan nayranki uka toqetjja, ¿kunatsa amuytʼasiñasa?

¹² Pablojj akham sänwa: “Akapachankkis ukanakat llakisiñajja jiwañar apiriwa” sasa (Rom. 8:6). Ukham sasinjja, ¿kamsañsa munäna? Jiwasatï ‘jañchin munañaparjam jaksna’ ukhajja, Jehová Diosampejj janiw sum apasjjsnati, wiñay jakañsa aptʼasiraksnawa. Ukampis ukajj janiw ukhamapunïkaspati, maynejj nayra jakäwip jaytaspawa. Corintonkir taman jan wal lurkäna uka chachajja, tamat jaqsutänwa. Ukampis wachoq jucha lurañ jaytjjasajja, Jehová Diosarojj qʼoma chuymampiw sirvjjäna (2 Cor. 2:6-8).

¹³ Uka chachajj jan walsa sarnaqchïnjja, nayra jakäwip jaytänwa. Ukhamasti mä cristianotï Diosar istʼañat sipan jan wali luräwinakan sarnaqchejja, jan wali luräwinakap jaytarakispawa. Pablon ewjjtʼapar istʼañajja, jan wali luräwinak jaytañatakiw yanaptʼistaspa.

14, 15. 1) Pablon ewjjtʼaparjamajja, ¿kunas jakäwisan nayrankañapa? 2) ‘Ajayurjam jakañat llakisiri’ jaqetjja, ¿kunsa jan amuyañasäki?

¹⁴ ‘Jañchin munañaparjam jakasajja’ kuna jan walinakansa uñjassna uka toqet parlasajja, Pablojj akham sarakïnwa: “Ajayun jakañat llakisiñajja wiñay jakañaru, ukhamarak sumankañaruw api” sasa. ¡Uk yatiñajj wal kusisiyistu!

 ¹⁵ ‘Ajayurjam jakañat llakisiri’ jaqejj janis akapachat kuns yatiñ munkaspa ukham janiw sañ munkiti. ‘Ajayurjam jakañat llakisiri’ jaqejj janirakiw Jehová Diosata, Bibliata sapa kuti parlkiti. Nayrïr cristianonakat amtañäni, jupanakajj manqtʼasiri, umtʼasiri ukhamäpjjänwa, uka tiemponjja cristianonakajj casarasipjjänwa, familianïpjjänwa, ukatjja trabajonïpjjarakïnwa (Mar. 6:3; 1 Tes. 2:9).

16. ¿Kunas Pablotakejj nayrankäna?

¹⁶ Pablosa, nayrïr patak maranakan jakir cristianonakasa, janiw kunatï jakañataki wakiski ukanak jakäwinakapan nayrar uchapkänti. Amuytʼañataki, Pablojja carpanak lurasaw trabajïna. Ukampis jupatakejj Jehová Diosar serviñaw ukat sipan jukʼamp wakiskirïnjja. Pablotakejj Diosan Reinopat yatiyaña ukhamarak yatichañaw nayrankäna (Hechos 18:2-4; 20:20, 21, 34, 35 liytʼañataki). Romankir cristianonakajj Pablotwa yateqasipjjañapäna, jiwasajj jupat yateqasiñasarakiwa (Rom. 15:15, 16).

17. ‘Ajayurjam jakañataki’ chʼamachasiñäni ukhajja, ¿kunsa katoqañäni?

¹⁷ Jehová Diosar serviñatï jakäwisan nayrankanejja, ¿kunjamsa jakasiñäni? Romanos 8:6 qellqatajj akham siwa: “Ajayun jakañat llakisiñajja wiñay jakañaru, ukhamarak sumankañaruw api” sasa. Ukatakejj Jehová Diosan qollan ajayupampiw yanaptʼayasiñasa, ukatjja Jupjam amuyañatakiw chʼamachasiñasaraki. Ukhamtï lurañänejja, Jehová Diosajj kusisit jakasiñatakiw yanaptʼistani, jutïrinsa wiñay jakañwa churarakistani.

18. ¿Kunjamsa ‘ajayurjam jakañataki’ chʼamachasiñajj suman jakasiñatak yanaptʼistaspa?

¹⁸ “Ajayun jakañat llakisiñajja [...] sumankañaruw api” sasajja, ¿kamsañsa Pablojj munäna? Taqeniw suman jakasiñ muntanjja, jukʼampis chuymasan sum jikjjatasiñ muntanjja, ukhamäkchisa jukʼanikiw sumankañ jikjjatapjje. Jehová Diosakiw chuymasan sum jikjjatasiñatakisa, familiasan sumankañatakisa, taman taqenimpi sum apasiñatakis yanaptʼistu. Ukampis niyakejjay pantjasirïstanjja, jilat kullakanakasampi jan waltʼayasiñajj utjakipuniniwa. Ukhamäni ukhajja Jesusan aka ewjjtʼaparuw istʼañasa, jupajj sänwa: “Jilamampi sumankthapiri saram” sasa (Mat. 5:24). Jilat kullakanakasajj jiwasjamarakiw ‘sumankañan Diosar’ servipjje, uk janipun armañäniti (Rom. 15:33; 16:20).

19. ¿Kunsa Jehová Diosat katoqañäni?

¹⁹ ‘Ajayurjam jakañataki’ chʼamachasiñäni ukhajja, Jehová Diosan sumankañapwa katoqañäni. Isaías profetajj akham sänwa: “[Jehová] jumaw sum uñjtajja [sumankañsa churaraktajja, NM] khititejj mä sapa amtañanikïki ukarojja, jupan jumaru iyawsatap layku” sasa (Isa. 26:3; Romanos 5:1 liytʼañataki).

20. Romanos 8 jaljan jikjjataski uka ewjjtʼanakatjja, ¿kunatsa wal yuspärtanjja?

²⁰ Alajjpachan jakañataki suytʼäwinïkstansa, jan ukajj aka Oraqen wiñay jakañ suytʼäwinïkstansa, Romanos 8 jaljajj taqeniruw yanaptʼistaspa. Biblian ewjjanakapajja, munañasarjam sarnaqañat sipansa, Jehová Diosar taqe chuyma serviñatakiw chʼamañchistu, ukat wal yuspärtanjja. ‘Ajayurjam jakañataki llakisiñäni’ ukhajja, wiñay jakañwa katoqañäni. Romanos 6:23 qellqatajj akham siwa: “Diosan wajjtʼäwipajj wiñay jakañawa Cristo Jesús Tatitusana” sasa.