1, 2. 1) ¿Kunatsa llakisiñajj utji? (Aka janankir foto uñjjattʼam). 2) ¿Kuna toqenakatsa aka yatichäwin yatjjataskañäni?

JICHHÜRUNAKANJJA, Supayajj “mä leonar uñtataw warartʼasisa sarnaqaski khitiru manqʼantañatakisa” (1 Ped. 5:8; Apo. 12:17). Ukatwa jaqenakajj llakita jakasipjje, Jehová Diosan servirinakapas ukhamarakiw jikjjatastanjja. Nayra tiemponsa Diosan servirinakapajj ukhamarakiw awisajj llakinakan jakapjjäna. Amuytʼañataki, David reyejj wali llakitaw jikjjatasïna sasaw Bibliajj qhanañchi (Sal. 13:2). Apóstol Pablojj ‘sapürurakiw tamanakat llakisïna’ (2 Cor. 11:28). Ukhamajj llakinakamp jan aynachtʼañatakejj ¿kunas yanaptʼistaspa?

² Nayra maranakanjja, llakimp jan aynachtʼapjjañapatakejj Jehová Diosajj servirinakapar yanaptʼänwa, jichha tiempon ukhamarakiw yanaptʼañ munistu. Bibliajj akham siwa: “Taqe llakisiñanakamsti Diosar jaytapjjarakim, jupasti jumanakatjja llakisirakiwa” sasa (1 Ped. 5:7). Ukampis ¿kunjamsa llakinakas Jehová Diosar jaytsna? 1) Diosar mayisisa, 2) Biblia liyisa ukhamarak liyktan ukjjat lupʼisa, 3) Diosan qollan ajayupampi yanaptʼayasisa, 4) khitinakarutï confiyktan ukanakar llakis yatiyasa. Uka toqenakat yatjjatkasajja, kunan chʼamachasiñasas wakisi uk amuytʼapjjañäni.

3. ¿Kunjamsa ‘Diosar llakinakas katuysna’?

³ Taqe chuyma mayisisaw Jehová Diosar llakinakas katuysna, ukham lurañaswa Jupajj muni. Salmonak qellqer Davidajj akham sasaw Diosar mayisïna: “Diosajjay, mayisitajjarojj istʼakimaya” sasa. Qhepatsti akham sarakïnwa: “Diosar llakinakam katuyam, jupasti chʼaman tukuyätam” sasa (Sal. 55:1, 22). Mä jan waltʼäwi askichañatakiw nayraqat chʼamachasiñasa, ukatsti Jehová Diosaruw taqe chuyma mayisiñasa, ukaw jan sinti llakisiñatakejj yanaptʼistaspa. Ukampis ¿kunjamsa Diosat mayisiñajj llakinakampi jan aynachtʼañatakejj yanaptʼistaspa? (Sal. 94:18, 19).

4. Llakita jikjjatasisajja, ¿kunatsa Jehová Diosar mayisiñasa?

⁴ (Filipenses 4:6, 7 liytʼañataki). Jehová Diosajja, ¿taqe chuyma mayisitasarusa, sapa kuti mayisitasarusa istʼistuti? Jïsa, Jupajj jan sinti llakisiñataki, jan walinak jan amuyañataki, chuymasan sum jikjjatasiñatakiw yanaptʼistaspa. Jehová Diosajj chuymasan sum jikjjatasiñatakiw yanaptʼistu, ukhamatwa llakimpejj jan apayasktanti, ni ajjsarayasktansa. Jilat kullakanakasat waljaniw Diosan yanaptʼatajj sum jikjjatasipjje, jiwasas ukhamarakiw jikjjatassna. ‘Diosan sumankañapaw’ kunayman jan walinakar saykatañatak yanaptʼistaspa. Jehová Diosan aka arunakaparuw confiyañasa, Jupajj sistuwa: “Jan ajjsaramti, nayaw jumampïskta, [...] nayäsktwa juman Diosamajja. Nayaw chʼamañchaskäma” sasa (Isa. 41:10).

5. ¿Kunjamsa Bibliajj jan llakisiñatak yanaptʼistaspa?

⁵ Biblia liyiñasa, liyktan ukjjat lupʼiñasa, jan llakisiñatakiw yanaptʼarakistu. ¿Kunatsa uk lurañasa? Bibliajj Diosan Arupawa, ukanwa taqe kuna luriri Jehová Diosan ewjjtʼanakapajj jikjjatasi, ukasti jiwasan askisatakiwa. Kunapachatï llakitäktan ukhajja, Jehová Diosan Arupata ukhamarak ewjjtʼanakapatwa lupʼiñasa, ukaw llakimp jan aynachtʼañatakisa, llakir jan purtʼasiñatakis yanaptʼistani. Jehová Diosajja, “jan ajjsaramti” sasinwa sistu, ukatwa ‘chʼamani saytʼasiñatakejj’ Biblia liyiñasa (Jos. 1:7-9).

6. ¿Kunjamsa Jesusan arunakapajj jiwasar yanaptʼistaspa?

⁶ Kunjamsa Jesusajj jaqenakar parläna ukwa Biblian liytʼsna. Jaqenakajja Jesusar wal istʼañ munapjjerïna, ¿kunatsa? Jupan arunakapajj chʼamañchtʼkirïnwa, arunakap istʼasajj jaqenakajj llakinakapatsa armtʼasipjjerïnwa. Jukʼampisa khitinakatï aynachtʼatäpkäna, llakitäpkäna ukanakaruw yanaptʼäna (Mateo 11:28-30 liytʼañataki). Jesusajja jaqenakan sum jikjjatasipjjañapwa munirïna (Mar. 6:30-32). Maysa toqetjja, Jesusajj jupamp chika viajipkäna uka apostolonakarojj ‘yanaptʼasipkämawa’ sasaw säna, jichhürunakan ukhamarakiw jiwasar yanaptʼistani. Ukampis Jesusampi yanaptʼatäñatakejja, janiw jupar uñjañajj wakiskapuniti. Reyit alajjpachan uttʼayatäsajja, yanaptʼasinkakistuwa. Ukhamajj llakitäkañäni ukhajja, jupajj yanaptʼistaniwa, inas yanaptʼa munkañäni ukhapun yanaptʼchistani. Jesusajj chʼamañchtʼistuwa, mä suytʼäwsa churarakistuwa, ukaw llakimpi jan aynachtʼañatakejj yanaptʼistu (Heb. 2:17, 18; 4:16).

7. ¿Kunjamsa Diosan qollan ajayupajj yanaptʼistu?

⁷ Jumanakatï Diosar qollan ajayup mayipjjätajja, Jupajj qollan ajayup churapjjätamwa  sasaw Jesusajj säna (Luc. 11:10-13). ¿Kunjamsa Diosan qollan ajayupajj llakimp jan aynachtʼañatak yanaptʼistaspa? Diosan qollan ajayupajja, mä arunjja, chʼamapajja, Taqe Chʼamani Diosjam suma chuymanïñatakiw yanaptʼistu (Col. 3:10). Ukajj ‘qollan ajayun luräwipa’ satawa sasaw Bibliajj qhanañchi (Gálatas 5:22, 23 liytʼañataki). Suma chuymanïñatak chʼamachasiñajja, taqenimp sum apasiñatakiw yanaptʼistu, ukhamatwa kunanakatï llakisiykistaspa ukanak jan lurktanti. Kunjamsa ‘qollan ajayun luräwipajj’ jakäwisan yanaptʼistu uk jichhajj uñjañäni.

8-12. ¿Kunjamsa qollan ajayun luräwipajj llakimp jan aynachtʼañatak yanaptʼistaspa?

⁸ “Munasiña, kusisiña, samaraña”. Yaqhanakar respetompi uñjañajja, jan sinti llakisiñatakiw yanaptʼistu. Jiwasatï jilat kullakanakar munasiñampi uñjañäni, mayninakarus respetompi uñjarakiñäni ukhajja, janiw colerampejj atipayaskañäniti, ni llakimpis aynachtʼkarakiñäniti. Cheqas ukanakaw mayninakamp sum apasiñatakejj yanaptʼistani (Rom. 12:10).

⁹ ‘Paciencianïña, taqempis sumankaña, khuyapayasirïña’. Bibliajj akham siwa: “Sumankapjjam, maynit maynikama khuyaptʼayasirïpjjam, perdonasirïpjjarakim maynit maynikama” sasa (Efe. 4:32). Uka ewjjtʼarjam sarnaqañajja, taqenimp sum apasiñatakiw yanaptʼistu, ukarakiw kunanakatï llakimp aynachtʼaykistaspa ukanak jan lurañatak yanaptʼistu. Ukatsti pantjasirïtasat kun lurañäni ukhasa, ukanak askichañajj janiw chʼamäkaniti.

¹⁰ Iyawsäwi. Jichhürunakanjja, taqeniw qollqetsa cosasanakatsa llakistanjja (Pro. 18:11). Ukampisa, ukanakat jan sinti llakisiñatakejj Pablon ewjjtʼapaw yanaptʼistaspa, jupajj sänwa: “Kunatejj utjapjjtam ukampejj kusisitakïpjjam” sasa. Jehová Diosar taqe chuyma iyawsañäni ukhajja, kunanakatï jakañataki munaski uk Diosaw churistani sasaw confiyañäni. Jehová Diosajj siwa: “Janiw kunapachas jaytkämati ni armtʼaskämasa” sasa. Ukatwa Pabljam akham saraksna: “Tatituw yanaptʼirejjajja; janiw kuntejj jaqejj lurkitaspa ukjj ajjsarkäti” sasa (Heb. 13:5, 6).

¹¹ “Llampʼu chuymanïña, janchin munañapar atipjaña”. Llampʼu chuymanïñasa, jañchin munañapar atipjañasa kunjamsa jakäwisan yanaptʼistaspa uk amuytʼañasawa. Ukanakaw kunanakatï llakimp aynachtʼaykistaspa ukanak jan lurañatakisa, jan arsuñatakis yanaptʼistaspa. Ukhamatwa ‘chuyma usuchjasiñanakatsa, taqe thithiñanakatsa, colerat chuymampi jachʼat artʼasiñanakatsa, jan wali arunakampi toqesiñanakatsa’ jitheqtañäni (Efe. 4:31).

¹² “Diosan munañani amparapa[ru]” confiyañatakisa, ‘Juparu taqe llakinaka jaytañatakisa’ altʼat chuymanïñaw wakisi (1 Ped. 5:6, 7, MT). Altʼat chuymanïñäni ukhajja, Jehová Diosajj sum uñjistani ukatsti yanaptʼarakistaniwa. Kuntï lurirjamäktan ukhamarak jan lurirjamäktan uk amuytʼasiñäni ukhajja, jiwas pachpar confiyasiñat sipansa Jehová Diosaruw confiyañäni, ukaw llakimp jan aynachtʼañatakejj yanaptʼistani (Miq. 6:8).

13. “Jan llakisipjjamti” sasinjja, ¿kunsa Jesusajj sañ munaskäna?

¹³ Mateo 6:34 (liytʼañataki) qellqatanjja, Jesusajj akham sänwa: “Jan llakisipjjamti” sasa. Jesusan uka ewjjtʼaparjam sarnaqañajj chʼamakïspawa. Ukampis ¿kuna toqetsa  Jesusajj parlaskäna? Kunjamtï yatjjataniwayktanjja, David reyisa, Pablosa awisajj llakitaw jikjjatasipjjäna. Ukhamajja, Diosan servirinakapajj jan llakiniw jakasipjjani sasin janiw Jesusajj sañ munkänti. Jan ukasti, ina chʼusat llakisisasa, jan ukajj sinti llakisisasa jan walinak janiw chhaqtayksnati sañwa munaskäna. Jan waltʼäwinakajj utjakipuniniwa, ukhamajj jan wali luratanakasat amtasasa, jan ukajj jutïrit lupʼisasa, janiw llakisiñasäkiti. Jesusan ewjjtʼapajj ¿kunjamsa yanaptʼistaspa?

14. Davidat yateqasisajja, ¿kunsa llakimpi jan aynachtʼañatakejj lursna?

¹⁴ Awisajja, jan wali luräwinakap amtasaw jaqenakajj llakisipjje. Walja maranakas pasawaykchejja, sinti jan walsa lurapkaspäna ukhamwa amuyasipjje. David reyejj ukhamarakiw jan wali luräwinakap amtasajj chuym wal usuyasïna, ukatwa akham säna: “Chuymajjan aynachtʼatap laykuw ayqorakta” sasa (Sal. 38:3, 4, 8, 18). Ukhaman uñjasisajja, Jehová Diosajj khuyaptʼayasisin perdonitaniwa sasaw Davidajj confiyäna. Ukatsti perdonatäjjatap yatisajj wal kusisïna (Salmo 32:1-3, 5 liytʼañataki).

15. 1) ¿Kunsa Davidat yateqsna? 2) ¿Kunsa llakimp jan aynachtʼañatakejj lursna? (“ Jan sinti llakisiñatak yanaptʼanaka” siski uka recuadro uñjjattʼäta).

¹⁵ Maysa toqetjja, akapachan jan walinak uñjasaw llakita jikjjatasiraksna. Amuytʼañataki, Davidajj jiwayatäñatak arknaqatäkäna ukhajja, wali llakitänwa, ukhaman uñjasisaw Salmo 55 qellqatan jikjjataski uka arunak qellqäna (Sal. 55:2-5). Ukham llakinakan uñjasisajja, Jehová Diosar confiyaskakïnwa. Ukatwa jan waltʼäwinakat mistuñatakejj Jehová Diosar yanaptʼap mayïna. Ukatsti mayitaparjamaw kuns lurarakïna (2 Sam. 15:30-34). ¿Kunsa Davidat yateqsna? Llakinakampi aynachtʼañat sipansa, jan waltʼäwinakat mistuñatakiw chʼamachasiñasa, ukatsti Jehová Diosaw yanaptʼitani sasaw confiyañasaraki.

16. Kuntï Diosan sutipajj sañ munki uk yatiñajja, ¿kunjamsa Diosar confiyañatakejj yanaptʼistaspa?

¹⁶ Jutïrin kuna jan walinakatï utjkaspa ukanakat lupʼisaw cristianonakajj llakisipjje. Ukampis kunanakatï janïr paski ukanakat janiw llakisiñasäkiti. ¿Kunatsa? Niya jila partejja, janiw kunjamtï jutïrin pasañap suyktan ukhampun paskaspati. Maysa toqet ak amtañäni, Jehová Diosan sutipajj “Jupaw taqe kunsa utjayi” sañ muni, ukarjamajja Jupatakejj janiw kunas chʼamäkiti (Éxo. 3:14, NM). Ukhamajja, kunatï jutïrin paskani ukat janiw llakisiñasäkiti. Kuntï Diosan sutipajj sañ munki ukarjamajja, jaqenakatak amtki ukajj phoqasipuniniwa. Jiwasatï Diosar taqe chuyma serviñäni ukhajja, bendicionanakapwa katoqañäni. Ukatsti nayra luratanakasata, kunatï jichhasa jutïrinsa paskani ukanakat jan sinti llakisiñatakis yanaptʼarakistaniwa.

17, 18. ¿Kunjamsa llakinakas maynir yatiyañajj yanaptʼistaspa?

¹⁷ Wali llakitäsinjja, khitirutï confiyktan ukaruw llakinakas yatiyañasa. Sañäni, chachasaru jan ukajj warmisaruw yatiysna, jan ukajj amigosaru, tamankir jilïr irpirinakaruw yatiyaraksna. Jupanakaw llakimp jan aynachtʼañatakejj yanaptʼistaspa. Bibliajj akham siwa: “Llakejj jaqerojj mayjtʼayiwa; suma arusti kusisiyiwa” sasa (Pro. 12:25). Ukatsti Bibliajj akham saskakiwa: “Kunapachatejj jan jisktʼasiñajj utjki ukkhajj, amtäwinakajja aynachtʼiwa; walja amuytʼayirinakampiw sumar mistsuñajj utji” sasa (Pro. 15:22).

¹⁸ Jilat kullakanakamp tantachtʼasiñaw llakimpi jan aynachtʼañatakejj yanaptʼarakistu. Sapa semanaw jilat kullakanakampejj tantachäwinakan parltʼastanjja. Jupanakajj jiwasat wal llakisipjje, ukatsti chʼamañchtʼapjjarakistuwa (Heb. 10:24, 25). ‘Maynit maynikam’ chʼamañchtʼasiñajja, llakimpi jan aynachtʼañatakiw yanaptʼistani (Rom. 1:12).

19. Jehová Diosamp sum apasiñaw yanaptʼistaspa sasajja, ¿kunatsa sissna?

¹⁹ Canadá markankiri mä jilïr irpiritakejja, Jehová Diosaru llakinakap katuyañajj wali askiwa. Uka jilatajj profesoratwa mä yateqañ utan trabaji, ukan trabajisajj qarita, llakita ukhamaw jikjjatasi. Maysa toqetjja, llakimp aynachtʼayir mä usunirakiwa. Ukanakamp jan aynachtʼañatakejja, Jehová Diosamp sum apasiñataki chʼamachasiñaw jilatar yanaptʼawayi. Ukhamanakan uñjaskäna ukhajja, amigonakapamp parltʼañaw yanaptʼawayi, kunjamsa jikjjatasïna uk esposaparu qhana arunakamp parltʼañas yanaptʼawayarakiwa. Ukatsti jilïr irpirinakasa, tamanak tumptʼiri jilatasa, kunjamsa Jehová Diosajj jupar uñji uk amuyañapatakis yanaptʼapjjarakïnwa. Mä doctoras uka usumpi jan aynachtʼañatakejj kunsa luraspa uk amuytʼañapatakis yanaptʼarakiwa. Ewjjtʼanakap katoqasajja, samartʼañatakisa, ejercicio lurañatakisa tiempo apstʼasjjarakiwa. Jichhajj llakimp jan aynachtʼañatakisa, chuymapan sum jikjjatasiñatakisa, kunas yanaptʼaspa uk sum amuytʼi. Jukʼamp aynachtʼirjamäki ukhajja, jilatajj Jehová Diosampiw yanaptʼayasi.

20. 1) ¿Kunjamsa Jehová Diosar llakinakas katuysna? 2) ¿Kuna toqetsa jutïr yatichäwin yatjjataskañäni?

²⁰ ¿Kunsa aka yatichäwin yateqawaytanjja? Llakit jikjjatasktan ukhajja, Diosar mayisiñasa, Biblia liyiñasa, ukjjat lupʼiñasa wali wakiskirïtapwa yateqawaytanjja. Ukatsti, Jehová Diosan qollan ajayupampi yanaptʼayasiñasa, khitirutï confiyktan ukar llakinakas yatiyañasa, jilat kullakanakamp tantachasiñasa wali wakiskirïtapwa yateqawayaraktanjja. Jutïr yatichäwinjja, kunjamsa Jehová Diosajj jutïritak mä suytʼäwi churasajj yanaptʼistu ukwa yatjjataskañäni (Heb. 11:6).