1, 2. 1) ¿Kunatsa jaqenakajj Diosan amigopäpjjaspawa sasin sissna? 2) ¿Kuna toqetsa aka yatichäwin yatjjataskañäni?

NASÏWISAT jiwañkamajja taqeniw munatäñ muntanjja. Janiw kunjamtï mä chachampi mä warmimpi munasipki ukham munatäñak suyktanti, jan ukasti taqenimp munatäñwa suytanjja. Ukampis taqe ukanakat sipansa, Jehová Diosamp munatäñwa muntanjja. Kunjamtï yatktanjja Jehová Diosarojj janiw uñjksnati, ukatwa walja jaqenakajj akham amuyapjje: “Diosampejj janiw jaqenakajj sum apasksnati” sasa. ¿Jiwasajj jupanakjamarakit amuyañasäspa? ¡Janiwa!

² Nayra tiemponjja, jiwasjam pantjasir jaqenakajj wali sumwa Diosampejj apasipjjäna uka toqetwa Biblian parli. Uka jaqenakan sarnaqäwinakap yatiñajj wali wakiskiriwa, ukaw Jehová Diosamp sum apasiñataki, mä arunjja amigopäñatak yanaptʼistani. Uka jaqenakat maynejj Abraham chachänwa, jupajj Jehová Diosan amigopa satänwa (Santiago 2:23 liytʼañataki). ¿Kunas Abraham chacharojj  Jehová Diosamp sum apasiñatak yanaptʼäna? Diosar iyawsatapaw yanaptʼäna. Ukatwa Bibliajj jupat akham sasin qhanañchi: “Abrahamajj taqe khitinakatejj iyawsäwi layku Diosampi katoqatäpki ukanakan awkipa[wa]” sasa (Rom. 4:11). Ukhamasti, kunjamsa Abrahamajj iyawsäwinïtap laykojj Diosamp sum apasïna uk jichhajj yatjjatañäni. Yatjjatkasajja, akhamwa jisktʼasiñasa: “¿Kunjamsa Abraham chachjam iyawsäwinïrista? ¿Kunjamsa Diosampejj jukʼamp sum apasirista?” sasa.

3, 4. 1) ¿Kuna yantʼansa Abrahamajj uñjasïna? 2) ¿Kunatsa Abrahamajj Isaac yoqapar sacrificiot loqtañ jan pächaskäna?

³ Abraham chachajj kunjamsa niya 125 maranïsajj mä qollu patar makataski uk amuytʼañäni. ^[1] Jupatakejj ukar makatañajj wali chʼamawa. Ukampis janiw walja maranïtap laykojj ukham jikjjataskiti. Jan ukasti kuna amtampitï uka patar saraski ukaw llakisiyi. Jupan qhepapjja, 25 marani Isaac yoqapaw lawanak qʼeptʼat saraskaraki. Abrahamasti, mä cuchillo ukhamarak kunanakatï nina naktayañatak wakiski ukanakwa apaskaraki. ¡Jehová Diosaw Abrahamarojj yoqaparu sacrificiot loqtañapatak mayïna! (Gén. 22:1-8.)

⁴ Uk lurañajj Abrahamatak wali chʼamäpachänwa, cheqas iyawsäwipaw yantʼat uñjasïna. Yaqhepanakajj Diosat akham sapjjewa: “Sacrificiot Isaac yoqaparu loqtañapatak Abrahamar mayisajja jan sinttʼasirïtapwa uñachtʼayi” sasa. Ukatsti yaqhepajj sapjjarakiwa: “Abrahamajja, Diosar istʼasajj jan amuytʼasirïtapwa uñachtʼayi” sasa. Ukampis ukham amuyirinakajj janiw iyawsäwinïpkiti, janirakiw kunjamsa iyawsäwejj maynir yanaptʼaspa uksa amuyapkiti (1 Cor. 2:14-16). Abrahamajj Diosar istʼasajj janiw jan amuytʼasirïtap uñachtʼaykänti. Jan ukasti Jehová Diosar taqe chuyma iyawsatapwa uñachtʼayaskäna. Diosajj janipuniw servirinakaparojj kunatï wiñayatak llakin uñjasiykaspa uk lurapjjañap maykaspati, Abrahamajj uk sum yatïna. Cheqas Jehová Diosar istʼasakiw jupasa wawapas walja bendicionanak katoqapjjaspäna. Taqe ukanakat jan pächasiñatakejja, Diosar uñtʼaña, ukhamarak jakäwipan experiencianïñaw yanaptʼäna.

5. ¿Kunjamatsa Abrahamajj Diosar uñtʼpachäna, ukat kunatakis ukajj yanaptʼäna?

⁵ Diosaruw uñtʼäna. Abraham chachajj Ur markanwa jakasïna, ukanjja jaqenakajj kʼari diosanakaruw yupaychapjjäna. Uka markanwa Abrahamajj Jehová Diosar uñtʼäna, Taré awkipajj janiw Jehová Diosar uñtʼkänti, jan ukasti kʼari diosanakaruw yupaychäna. Ukhamajja, ¿kunjamatsa Abrahamajj Jehová Diosar uñtʼpachäna? (Jos. 24:2.) Bibliajj janiw uka toqet qhanañchkiti. Abrahamajj Sem sat Noé chachan yoqapat jutiriwa, ukakwa Bibliajj qhanañchi. Sem chachajja, Diosar taqe chuymaw iyawsäna, jupajja kunapachatï Abrahamajj 150 maranëjjäna ukhaw jiwjjäna. Ukhamajj inas Sem chachajj Abrahamar Diosat parlchïna. ¿Kunatsa ukham sistanjja? Sem chachajj familiapar Diosat parlirïpachänwa. Ukhamatwa Abrahamajj Diosat istʼpachäna, kuntï istʼkäna ukas chuymaparuw purtʼpachäna. Diosar uñtʼasasti, jukʼampiw Jupar munasïna, kuntï yateqkäna ukajj Diosar taqe chuyma iyawsañatakiw yanaptʼäna.

6, 7. ¿Kunanak uñjasas Abraham chachajj Jehová Diosar jukʼamp confiyäna?

⁶ Jakäwipan experiencianïnwa. Jehová Diosar taqe chuyma iyawsaskakiñatakejja, ¿kunjamatsa Abrahamajj jakäwipan experiencia jikjjatpachäna? Jaqenakajj akham sañ yatipjje: “Kunatï amuyusansa chuymasansa utjki ukanakajja, luratanakasanwa uñjasi” sasa. Kuntï Abrahamajj Diosat yateqkäna ukajja, ‘alajjpacha, akapacha Luriri’ Jehová Diosar respetañatakiw  yanaptʼäna, ukatsti ‘Diosar ajjsartañataki’, mä arunjja, Diosan chuymap jan ustʼayas sarnaqañatakiw yanaptʼarakïna (Gén. 14:22; Pro. 9:10; Sal. 25:14). Ukarakiw Diosatakjam sarnaqañatakejj yanaptʼäna.

⁷ Jehová Diosajja, Abrahamarusa Sara warmirusa markapat yaqha markar sarjjapjjañapatakiw mayïna. Jupanakajj carpanakanwa jakapjjañapäna. Abrahamajj chuymanëjjchïnsa, Diosar istʼänwa, ukatwa Diosajj jupar bendicïna jarkʼaqarakïna. Amuytʼañataki, Abrahamajja ‘yaqhanakaw warmij aparapjjetani, nayarus jiwayapjjetaniwa’ sasaw llakisïna. Walsa ajjsarayaskchïnjja, Jehová Diosar istʼaskakïnwa. Ukatwa Jehová Diosajj Abrahamarusa, Sara warmiparus walja kuti jarkʼaqäna, awisajj milagro toqew jarkʼaqarakïna (Gén. 12:10-20; 20:2-7, 10-12, 17, 18). Ukanak uñjasaw Abrahamajj Jehová Diosar jukʼamp confiyäna.

8. ¿Kunas Jehová Diosar jukʼamp uñtʼañatakisa experiencianïñatakis yanaptʼistaspa?

⁸ Jiwasajja, ¿Abraham chachjamarakit Jehová Diosampejj sum apassna? Jïsa sum apasiraksnawa. Ukatakejja, Bibliaw yanaptʼistaspa. Ukanjja, Diosat jukʼamp yatjjatañatakisa, Abrahamat sipan jukʼamp experiencianïñatakisa walja yatichäwinakaw utji (Dan. 12:4; Rom. 11:33). Bibliajja, ‘alajjpacha, akapacha Lurir jachʼa Diosar’ jukʼamp uñtʼañatakiw yanaptʼistu, ukaw Jupar munasiñataki ukhamarak respetañatak yanaptʼistu. Respetomp uñjatasata, munasiñata Jehová Diosar istʼtan ukhajja, Jupar servisajj jukʼamp kusisitaw jikjjatastanjja. Ewjjanakapas jakäwisan yanaptʼarakistuwa. Cheqansa, Jehová Diosar taqe chuyma servisajj wali kusisitaw jikjjatastanjja (Sal. 34:8; Pro. 10:22). Diosar jukʼamp uñtʼasasa, kunjamsa Jupajj yanaptʼistu uk uñjasasa, jukʼampiw Jehová Diosar confiytanjja, Jupampis jukʼamp sumaw apasiraktanjja.

9, 10. 1) Mä amigomp sum apasiñatakejja, ¿kun lurañas wakisi? 2) Abrahamatakejj Jehová Diosamp sum apasiñajj wali askïnwa, ¿kunjamatsa uk yattanjja?

⁹ Mä suma amigojj wali munatawa (Proverbios 17:17 liytʼañataki). Munat amigosampi sum apasiñajja, mä panqar jilayañampi sasiwa. Mä panqaran sum panqarañapatakejja, umamp warjjattʼaña ukhamarak sum uñjañaw wakisi. Abraham chachajj Jehová Diosamp sum apasiñjja, ukhamarakiw wali askit uñjäna. ¿Kunjamatsa wali askit uñjatap uñachtʼayäna?

¹⁰ Abraham chachajj taqe kunanwa Diosar istʼirïna, Jupar respetasapuniw sarnaqerïna. Amuytʼañataki, Abraham chachajj familiapampi, servirinakapampi Canaán oraqer sarapkäna ukhasa, Jehová Diosar istʼaskakïnwa. Abrahamajj 99 maranëjjäna ukhajja, utapan jakiri taqe chachanakar circuncidañapatakiw Jehová Diosajj mayïna. ¿Diosan uka arunakap phoqpachänti? Jïsa, Jupar confiyasajj “ukürpacharakiw” Diosan mayitaparjam luräna (Gén. 17:10-14, 23). Ukhat mä mara qhepatwa Isaac yoqapajj nasïna.

11. ¿Kunatsa Abraham chacharojj Sodoma ukhamarak Gomorra markanakan tʼunjatäñapajj llakisiyäna, ukat kunjamsa Jehová Diosajj yanaptʼäna?

 ¹¹ Abraham chachajj Jehová Diosar istʼapunirïnwa, ukatwa Jupampejj wali sum apasïna. Taqe kunwa Jehová Diosar yatiyirïna, awisajj kunanakatï llakisiykäna ukhasa Diosampiw yanaptʼayasïna. Amuytʼañataki, Sodoma ukhamarak Gomorra markanak tʼunjatäñap yatisajja, Abrahamajj akham sasaw llakisïna: ‘Ukankir suma jaqenakajj jan wali jaqenakamp chikaw tʼunjatäni’ sasa. Inas Lot sobrinopampita familiapampit llakischïna, jupanakajj Sodoma markanwa jakasipjjäna. Abrahamajj wali altʼat chuymampi ukat jan ajjsartʼasaw Oraqpachana ‘jachʼa Juesaru’, mä arunjja, Jehová Diosar jisktʼäna. Jupasti suma chuymampiw kunja khuyapayasirisa uk Abrahamar amuytʼayäna. Ukatsti, jan wali jaqenakar tukjki ukhajj suma chuymani jaqenakar qhespiyirïtapsa amuytʼayarakïnwa (Gén. 18:22-33).

12, 13. 1) Jehová Diosar uñtʼañasa ukhamaraki jakäwin experiencianïñasa, ¿kunjamsa Abrahamarojj yanaptʼäna? 2) ¿Kunatsa Abrahamajj taqe chuymaw Diosar confiyäna sasin sistanjja?

¹² Jehová Diosar uñtʼaña ukhamaraki jakäwin experiencianïñaw Abrahamarojj Jehová Diosampi sum apasiskakiñatak yanaptʼäna. Kunapachatï Jehová Diosajj ‘Isaac yoqamar sacrificiot loqtita’ sasin säna ukhajja, Abrahamajj jankʼakiw jan pächasis istʼäna. ¿Kunatsa? Jupajj Jehová Diosar sum uñtʼäna, kunjam Diosasa uksa sum yatirakïna, ukatwa Diosarojj jan pächasis istʼäna. Jichhajja, Moriah sat cheqan Abraham chachajj qollu patar makataski uka toqet parltʼaskakiñäni. Qollur makatkasajja, Abrahamajj janipuniw akham amuykänti: “Jehová Diosajj ¿kunatsa akatjamat wali qhoru, jan sinttʼasiri tukpacha?” sasa. ¿Kunjamatsa ukham jan amuyatap yattanjja?

¹³ Qollur janïr makatkasajja, Abrahamajj akham sasaw servirinakapar säna: “Jumanakajj akhar asnompi chika qheparapjjam. Wawajjampi nayampisti sarasipkakïwa, Diosaruw yupaychanipjjä, ukatsti jumanakan ukaruw kuttanjjapjjarakï” sasa (Gén. 22:5). ¿Abrahamajj kunsa uka arunakampejj sañ munäna? ‘Kuttanjjapjjäw’ sasinjja, ¿kʼarispachänti? Janiwa. Kunatsa ukham sispachäna uk sum amuyañatakejj Bibliaw yanaptʼistaspa (Hebreos 11:19 liytʼañataki). Hebreos qellqatajj akham siwa: “Abrahamajj yatïnwa Diosajj jiwatanak jaktayañatakis chʼamanïtapa” sasa. Jiwatanakajj jaktaniniwa sasin taqe chuymaw Abrahamajj confiyäna. Chuymanëjjäna ukhajja, kunjamsa Jehová Diosajj juparusa Sara warmiparus wawanïpjjañapatak yanaptʼäna uk janirakiw armkänti (Heb. 11:11, 12, 18). Jehová Diosatakejj janiw kun lurañas chʼamäkiti, uksa Abrahamajj sumwa yatïna. Yoqapar loqtañapäkäna uka urojj kunas paskchispänjja, ‘Jehová Diosajj kunjamatsa yoqajar kuttʼayitaniwa’ sasaw taqe chuyma confiyäna. Ukhamatwa Jehová Diosan arsutanakapajj phoqasispäna. Ukatwa Bibliajj Abrahamat akham sispacha: “Taqe khitinakatejj iyawsäwi layku Diosampi katoqatäpki ukanakan awkipa” sasa.

14. ¿Jehová Diosan kawkïr mayitap phoqañas jumatak chʼamakejja, ukat kunjamsa Abraham chachan sarnaqäwipajj yanaptʼistaspa?

 ¹⁴ ¿Jiwasat kamsasirakispasa? Jehová Diosajja, janiw kuntï Abraham chachar maykäna ukham lurañas maykistuti. Diosajj maykistu ukanak janis sum amuykstanjja, jan ukajj ukanak phoqañajj chʼamakïchi ukasa, istʼaskakiñasawa, ukwa Diosajj muni. Yaqhep jilat kullakanakatakejja, jan uñtʼat jaqenakaru Diosan arunakapat parlañaw chʼamakïspa. Yaqhepatakisti yateqer masinakapata, jan ukajj trabajir masinakapata mayjäñaw chʼamarakïspa (Éxo. 23:2; 1 Tes. 2:2). Inas awisajj Abraham chachjam jikjjatasirïsta. Jupajja, mä qollur sarasinwa Isaac yoqaparojj sacrificiot loqtañapäna, uk lurañajja jupatak wali chʼamänwa. Ukham jikjjatasirïsta ukhajj jan sint llakisimti. Kunas Abraham chacharojj Diosan mayitanakap phoqañatakejj yanaptʼäna uk amtapunim. Diosar confiyiri nayra tiempon jakasir chachanakarusa warminakarusa, Diosan mayitanakap phoqañatakejj kunas yanaptʼäna uka toqenakat lupʼiñajja, jupanakat yateqasiñataki ukhamarak Diosamp sum apasiñatakiw yanaptʼistani (Heb. 12:1, 2).

15. Abrahamajj jiwañkamaw Diosar taqe chuyma servïna sasinjja, ¿kunatsa sissna?

¹⁵ Abraham chachajja, ¿Jehová Diosar taqe chuyma istʼatapat amtaspachänti? Janiwa. Jupajj taqe chuymaw Diosar jiwañkam servïna (Gén. 25:8). Abrahamajj 175 maranëjjäna ukhajj janis chʼamanëjjchïnjja, kuntï nayra maranakajj lurkäna ukanakat janiw chuym pisayaskänti. Jupajj Jehová Diosamp sum apasiñatakiw chʼamachasïna, jutïrinsa wiñayatakiw jakasiñ munäna.

16. Paraison jakasajja, ¿kunanak yatisas Abraham chachajj wal kusisini?

¹⁶ Abraham chachatjja, Bibliajj akham siwa: “Abrahamajj suytʼaskarakïnwa suma uttʼayata marka, uka markan luriripajja Diosawa” sasa (Heb. 11:10). Uka markajja Diosan Reinopawa. Abraham chachajj uka marka uñjañwa suyäna, mä arunjja, Diosan Reinopajj aka Oraqjjar apnaqjjani uk uñjañwa suyäna. ¿Abraham chachajj kunja kusisitas Paraisoptayat oraqen jakaspachäni? Jehová Diosamp sum apasiskakisajja, ¿kunjamakis jikjjataspachäni uk amuyasmati? Diosar taqe chuyma iyawsatapajja, kunjamsa Diosan servirinakapar walja maranakan yanaptʼawayi uk yatisajja, ¡wal kusispachäni! Maysa toqetjja akham sasaw yatiyapjjarakini: ‘Moriah qollun lurkayäta ukajj mä uñtasïwïnwa, Jesusajj sacrificiot loqtaskäna ukhaw phoqasiwayi’ sasa (Heb. 11:19). Ukatsti sapjjarakiniwa: ‘Isaac yoqamar sacrificiot loqtañatak niya jiwayañampïskayäta ukhajj wali llaktʼataw jikjjataspachäyäta. Ukasti kunjamsa Diosajj Yoqaparu sacrificiot loqtkasajj jikjjatasïna uk amuyañatakiw yanaptʼawayapjjetu’ sasa (Juan 3:16). Jesusan jiwas layku jiwatapajja, Jehová Diosajj kunja munasirisa ukwa uñachtʼayistu. Abraham chachan Diosar taqe chuyma confiyatapajja, Jesusan loqtasïwipar wali askit uñjañatakiw yanaptʼawayistu.

17. ¿Kunatakis taqenis chʼamachasiñasa, ukat kuna toqetsa jutïr yatichäwin yatjjataskañäni?

¹⁷ Abraham chachat yateqasisinjja, Diosar taqe chuyma confiyañatak chʼamachasipjjañäni. Jiwasatï Jehová Diosar jukʼamp uñtʼañataki ukhamarak Jupat jan jitheqtas serviñatak chʼamachasiñäni ukhajja, Jehová Diosajj bendicistaniwa jan walinakatsa jarkʼaqarakistaniwa (Hebreos 6:10-12 liytʼañataki). Ukhamasti ¡Jehová Diosajj wiñayatak amigosäpan! Jutïr yatichäwinjja, Jehová Diosamp sum apasiri kimsa servirinakapatwa yatjjataskañäni.