1-3. 1) Taqeniw Jehová Diosan amigopäsna sasinjja, ¿kunatsa sistanjja? 2) ¿Khitinakatsa aka yatichäwin yatjjataskañäni?

BIBLIANJJA, Abraham chachajj Diosan amigopawa, jan ukajj munatapawa sasajj kimsa kutiw qhanañchasi (2 Cró. 20:7; Isa. 41:8; Sant. 2:23). Biblianjja janiw khititsa ukham parlkiti, jupa sapatakwa ukham qhanañchi. Ukhamïpanjja ¿Abraham chachakit Diosan amigopat uñtʼatäpachäna? Janiwa, Jehová Diosampejj taqeniw sum apasiraksna sasaw Bibliajj qhanañchi.

² Diosan Arupanjja, Jehová Diosar ajjsartʼiri walja chachanakata warminakatwa parli. Jupanakajja, Diosamp wali sumwa apasipjjäna Juparus confiyapjjarakïnwa (Salmo 25:14 liytʼañataki). ‘Iyawsañani walja jaqenakatwa’ apóstol Pablojj qellqäna, jupanakajj janis mä kikpak jakapkchïnjja Diosampejj wali sum apasipjjarakïna (Heb. 12:1).

³ Aka yatichäwinjja, Jehová Diosan kimsa amigonakapatwa yatjjataskañäni. 1) Diosar taqe chuyma servir Moab markankir Rut viuda warmita, 2) Diosat jan jitheqtas serviri Judá marka apnaqeri Ezequías reyita, 3) Jesusan altʼat chuymani María taykapata. Jupanakat sapa maynejja, ¿kunsa Jehová Diosamp sum apasiñatakejj lurapjjäna? ¿Kunsa jupanakat yateqassna?

4, 5. ¿Kuna amtarus Rut warmejj puriñapäna, ukat uka amtar puriñajj kunatsa chʼamakïna? (13 janankir dibujo uñjjattʼam.)

⁴ Kimsa viuda warminakat amuytʼapjjañäni, jupanakajj Moab satäkis uka qollunak taypnamaw thaknam sarasipki. Maynïristi Noemí satawa, mayninakasti Rut ukhamarak Orfa satäpjjewa, jupanakasti Noemí warmin yojjchʼanakapawa. Orfa warmejja jupanakar jaytasajj Moab markaparuw kuttʼaski. Noemí warmisti, Israel markaparu puriñkam sarañwa amtaraki. Jupamp chikasti Rut yojjchʼapaw qhepari. Jupasti, Noemí suegrapamp chikati Belén markar sarani, jan ukajj Moab markaparuch kuttʼani uka toqetwa mä amtar puriñapa (Rut 1:1-8, 14).

⁵ Rut warmejj inas akham amuychispäna: “Taykajasa familiaranakajasa, Moab markanwa jakasipjje, niyakejjay viudästjja, jupanakaw uñjasipkitani, yanaptʼa munkä ukhas yanaptʼapjjetaniwa” sasa. Rut warmejj Moab markatänwa, ukhamajj uka markan jakasiri jaqenakarusa, uka jaqenakan costumbrenakapsa sum uñtʼäna, arupsa yatirakïnwa. Ukampis Noemí warmimpi Belén markar sarasajj janiw ukham jakaskaspänti, ukatwa Noemí warmejj Moab markar kuttʼjjañapatak mayïna. ¿Kunatsa? Noemí warmejja, yojjchʼanakaparojj janiw utanïñatakisa ni familianïñatakis yanaptʼirjamäkänti. Ukhamätapatjja, ¿Rut warmejj Orfa warmjamarakit ‘markaparu, ukhamaraki diosanakaparu kuttʼawayjjäna’? Janiwa (Rut 1:9-15).

6. 1) ¿Kuna suma amtarus Rut warmejj purïna? 2) Rut warmirojja, ¿kunatsa Booz chachajj ‘walik Israel markan Diosaparu imantasiñ thaqtajja’ sasin sispachäna?

⁶ Rut warmejja, chachap toqe jan ukajj Noemí suegrap toqew Jehová Diosar uñtʼpachäna. Jehová Diosajja janiw Moab markankir diosanakjamäkänti. Rutajja, Jehová Dios saparuki munasiña ukhamarak Jupa saparuki yupaychañ wakisitapjja yatïnwa. Ukampis janiw aleq ukhamak yatiñapäkänti, jan ukasti khitirus yupaychani ukwa ajlliñapäna. Ukatwa Noemí warmir akham säna: “Juman markamajj markajjäniwa, Diosamasti, Diosajjarakïniwa” sasa (Rut 1:16). Cheqansa Rut warmejj Noemí warmir wal munasïna, ukampis Jehová Diosaruw jukʼamp munasïna. Mä qawqha urunak qhepatjja, Booz chachajj akham sasaw Rut warmir säna: ‘Walik Israel markan Diosaparu imantasiñ thaqtajja’ sasa (Rut 2:12 liytʼañataki). Uka arunakajja, kunjamtï mä jiskʼa chhiwchhejj taykapan chheqhapan imantaski ukwa amtayistu (Sal. 36:7; 91:1-4). Rut warmejj Jehová Diosaruw imantasïna. Ukham Jupar confiyatapatjja Jehová Diosajj bendicïnwa. Rut warmisti Jehová Diosar servitapat janipuniw amtaskänti.

7. Jehová Diosar jakäwip katuyasiñat pächasipki ukanakarojja, ¿kunas yanaptʼaspa?

⁷ Jichhürunakanjja, walja jaqenakaw Jehová Diosar uñtʼapjje, ukampis Jupar imantasiñat pächasipjjewa. Jakäwinakap Jehová Diosar katuyasiñsa, bautisasiñsa ajjsarayasipjjewa. Jumatï ukham ajjsarayassta ukhajja, akham jisktʼasiñamaw wakisispa: “¿Kunatsa Jehová Diosar serviñ ajjsarayastjja?” sasa. Aka pachanjja taqeniw mä diosanïpjje, uk janipun armamti (Jos. 24:15). Ukhamajja, ¿janit Jehová Diosar serviñajj wakiskaspa? Jehová Diosar jakäwis katuyasisajja, Jupar confiyataswa uñachtʼaytanjja. Ukham lurañäni ukhajja, Jupajj amtas phoqañatak yanaptʼistaniwa, jan waltʼäwinakan uñjasiñäni ukhasa yanaptʼarakistaniwa. Rut warmirojj ukhamwa yanaptʼäna.

8. ¿Kunjam jaqenak taypinsa Ezequiasajj jilsüna?

⁸ Rut warmit sipansa, Ezequiasajj Diosar katuyat markanwa nasïna. Ukampis Israel markankirinakat waljaniw Jehová Diosat jitheqtapjjäna. Ezequías chachan awkipas ukhamarakiw Diosat jitheqtasajj jan walinak luräna.  Jupasti, mä arunjja Acaz reyejj kʼari diosanakaru yupaychapjjañapatakiw jaqenakar chʼamañchäna, Jehová Diosan temploparusa janiw respeto uñachtʼaykänti. Wawanakapsa yaqha diosanakaruw sacrificiot loqtäna. Ukhamajja Ezequiasajj jiskʼatpachaw jan walinak uñjpachäna (2 Rey. 16:2-4, 10-17; 2 Cró. 28:1-3).

9, 10. 1) ¿Kunatsa Ezequiasajj Jehová Dios contra parlasapäna? 2) ¿Kunatsa Jehová Dios contrajj janipuni parlañasäki? 3) Kunjamjjay jilsuwaystan ukarjamaw sarnaqañäni sasin ¿kunatsa jan amuyañasäki?

⁹ Jan walinak luriri jaqenak taypin jilsusajja, Ezequiasajj jan walinakwa lurarakispäna, Jehová Dios contras jan walinakwa parlasapäna. Jichhürunakanjja, yaqhep jaqenakajj janiw Ezequías chachjamajj sinti jan walinakan uñjasipkiti, ukampis Jehová Dios contra jan ukajj markap contraw jan walinak parlapjje (Pro. 19:3). Yaqhepasti jiskʼatpachaw familiapan jan walinak uñjawayapjje, ukatwa akham sapjje: “Jiskʼatpachajj jan wali familianwa jilsuwayta ukatwa jichhajj jan walinak luraraktjja” sasa (Eze. 18:2, 3). Ukampis ukajj ¿ukhamapunïñapati?

¹⁰ Ezequías chachajj jan wali familiansa jiskʼatpach jilsuwaykchejja, janiw Jehová Dios contrajj jan walinak parlkänti. Ukhamajj janipuniw kunäkipansa Jehová Dios contrajj parlañasäkiti. ¿Kunatsa? Akapachankir jaqenakajj kunayman jan walinakansa uñjasipkchejja, janipuniw Jehová Diosajj taqe ukanakat juchanïkiti (Job 34:10). Maysa toqetjja, wawanakajj awk taykanakapatwa sum sarnaqañatakisa, jan ukajj jan sum sarnaqañatakis yateqasipjje (Pro. 22:6; Col. 3:21). Ukampis kunjam jaqëñänisa, kunanaksa jakäwisan lurañäni, uk sapa mayni amtañasatakiw Jehová Diosajj lurawayistu (Deu. 30:19). ¿Kunjam jaqëñsa Ezequiasajj amtäna?

11. ¿Kunatsa Ezequiasajj wali suma reyïnjja?

¹¹ Ezequías chachan awkipajj jan wali reyïnwa, ukampis Ezequiasajj janiw ukhamäkänti, wali suma reyïnwa (2 Reyes 18:5, 6 liytʼañataki). Awkipjam sarnaqañat sipansa, Jehová Diosan profetanakaparuw istʼäna. Uka tiemponjja Isaías, Miqueas, ukhamarak Oseas jupanakaw Israel markan profetäpjjäna. Uka profetanak toqe Jehová Diosan arunakap istʼasasti, Ezequiasajj awkipan jan wali luratanakap cheqañchañwa amtäna. Nayraqatjja, Jehová Diosan templopwa qʼomachayäna, ukatsti Jehová  Diosajj Judá markan jakasiri jaqenakan juchanakap perdonañapatakejj ofrendanakwa loqtayarakïna, kʼari diosanaksa taqpachwa tʼunjayarakïna (2 Cró. 29:1-11, 18-24; 31:1). Kunapachatï Asiria marka apnaqer Senaquerib reyejj Jerusalén marka tukjiri jutäna ukhajja, Ezequiasajj Jehová Diosar confiyatapa ukat jan ajjsarirïtapwa uñachtʼayäna. Uka markan jakasirinakarus Diosar taqe chuyma confiyapjjañapatakiw chʼamañchtʼäna (2 Cró. 32:7, 8). Qhepatjja, Ezequías reyejj jachʼa jachʼaw tukjjäna, ukampis ukham tukutapat Jehová Diosampi cheqañchayasïna ukhajja, wali altʼat chuymampiw arrepentisïna (2 Cró. 32:24-26). Kunjamtï uñjktanjja, Ezequiasajj jan wali familia taypinsa jilsuwaykchïnjja, janiw awkipjam sarnaqkänti, jan ukasti Jehová Diosampejj wali sum apasïna. Ezequiasan sarnaqäwipajj jiwasatak wali yateqaskayawa.

12. ¿Kunsa Diosan walja servirinakapajj Ezequías chachjam lurawayapjjaraki?

¹² Jichhürunakanjja, jiwasajj jan munasiri jan sinttʼasiri jaqenak taypinwa jakasiraktanjja. Ukatwa walja wawanakajj awk taykapan jan munata jan yanaptʼata jilsupjje (2 Tim. 3:1-5). Jichha tiempon jakasiri cristianonakatjja, waljaniw ukhaman jilsuwayapjjaraki. Ukhamäkchi ukasa, Ezequías chachjamarakiw Jehová Diosamp sum apasiñatak chʼamachasipjje. Jehová Diosajja, taqeniruw kunsa jakäwisan lurañäni uk jiwaspachpa amtir lurawayistu. Ukatwa sapa maynejj Jehová Diosar serviñäniti ukhamarak jachʼañchañäniti janicha uk amtjjañasa. Amtañäni, Ezequiasajj taqe chuymaw Jehová Diosar servïna, Jupar jachʼañchañsa amtarakïnwa.

13, 14. 1) ¿Kunanakas Mariarojj llakisiypachäna? 2) ¿Mariajj kamsänsa Gabriel angelarojja?

¹³ Ezequías reyejj jakkäna ukhat walja maranak qhepatjja, altʼat chuymani mä judía tawaqow Jehová Diosampejj wali sum apasirakïna. Jupasti María satänwa, Jehová Diosajj wali wakiskir mä luräwi juparojj churäna. María toqew Jehová Diosan mä sapa Yoqapajj nasiñapäna, ukatsti jupaw uka wawarojj uywañaparakïna. Uka wakiskir luräwi churasajja, Jehová Diosajj Mariar wali confiyatapwa uñachtʼayäna. Ukampis uka luräw katoqasajja, ¿kunjamakis Mariajj jikjjatasïna?

¹⁴ Cheqansa, Jehová Diosajj mä suma luräwi Mariarojj churäna. Ukampis uka luräwi phoqañajj Mariatak chʼamakïpachänwa. Amuytʼañataki, Mariajj janïr casaratäkän ukhaw Gabriel sat mä angelajj jupar akham säna: “Jichhajj usur jaqeptätawa, ukatsti mä yoqall waw wawachasïta” sasa. Uka angelajja janiw Mariarojj ‘nayaw familiamarusa vecinonakamarus uka toqet yatiyä’ sasin siskänti. Ukampis Marian usurïtap yatisajja, familiapasa vecinonakapas ¿kunsa amuyapjjaspäna? Mariajj José waynampi casarasiñataki parlatänwa, ¿kunjamsa juparojj uka toqet yatiyasapäna? Maysa toqetjja  Mariajj Jehová Diosan Yoqaparuw uywañapäna, yatichañaparakïna. Ukanak phoqañatakejj wal chʼamachasiñapäna. Mariarojj kunanakampis llakisiypachäna uka toqetjja janiw sumpach amuyksnati. Ukhamäkchïna ukasa Mariajj akham sasaw Gabriel angelarojj säna: “Nayajj Tatitun serviripätwa [jan ukajj ‘uywatapätwa’, MT]. Jupajj arsutaparjam nayampejj lurpan” sasa (Luc. 1:26-38).

15. ¿Kunatsa Mariajj Jehová Diosar taqe chuym confiyäna?

¹⁵ Mariajj taqe chuymaw Jehová Diosar iyawsäna. Kunjamatï mä uywatajj uywiripar taqe kunan istʼkejja, ukhamarakiw jupajj Jehová Diosar istʼañ munäna. ‘Jehová Diosaw sum uñjaskitani’ sasaw taqe chuym confiyäna. ¿Kunatsa Mariajj Jehová Diosar confiyäna? Jupajj janiw Diosar confiykirpun naskänti, jan ukasti iyawsäwip jiltañapatakejj wal chʼamachaspachäna. Ukham chʼamachasitapatsti Jehová Diosajj bendicïnwa (Efe. 2:8). ¿Kunjamatsa Jehová Diosar jukʼampi confiyañataki chʼamachasitap yattanjja? Uk jichhajj pä toqet yatjjatañäni.

16. ¿Kunjamatsa Marian suma istʼirïtap yattanjja?

¹⁶ Mariajj sum istʼirïna. Bibliajj akham sasaw ewjjtʼistu: “Sapa maynis jumanakatjja jankʼakïñapaw istʼañataki, ukampis janiw jankʼaki kunsa parlañapäkiti” sasa (Sant. 1:19). Mariajj uka arunakarjamaw sarnaqerïna. Jehová Diosat parlapjjerïkäna ukhajja sumwa jupajj istʼirïna, ukatsti uka toqet lupʼiñatakisa tiemp apstʼasirïnwa sasaw Bibliajj qhanañchi. Amuytʼañataki, Jesusajj naskäna ukhajja, uwij awatirinakat mä qawqhaniw kuntï mä angelajj siskäna uka arunak Mariar yatiyapjjäna. 12 maranak qhepatsti, Jesusan wali yatiñani arunakap istʼasajja, wal muspharäna. Mariajj uwij awatirinakarusa Jesusarusa, wali sum istʼäna, janirakiw uka arunak armkänti, uka toqenakat lupʼiñatakis tiempo apstʼasirakïnwa (Lucas 2:16-19, 49, 51 liytʼañataki).

17. ¿Kuna toqenakatsa Mariajj parlirïna, ukat kunsa ukajj jupat yatichistu?

¹⁷ Kuna toqenakatsa Mariajj parlirïna. Biblianjja, Marian mä qawqha arunakapakiw uñsti. Uka arunakapat jilpachajja, Lucas 1:46-55 qellqatanwa jikjjatasi. Uka arunakapajja Diosan arunakap sum uñtʼatapwa uñachtʼayistu. ¿Kunatsa ukham sistanjja? Mariajja, kuna arunaktï Samuel profetan taykapajj arskäna niya uka pachpa arunakwa arsurakïna (1 Sam. 2:1-10). Uka arunakapanjja Mariajj niya 20 kutiw qollan arunakat aytäna. Ukhamajja kunanaktï Jehová Dios amigopat yateqkäna ukanakat taqe chuymaw parlirïna.

18. ¿Kunjamsa Mariat yateqasitas uñachtʼaysna?

¹⁸ Awisajja, Mariarjamarakiw Jehová Diosajj mä luräwi churistaspa. Uka luräwi phoqañajj chʼamakïkaspas ukhamwa amuysna. Ukampis María warmjamarakiw altʼat chuymanïñasa, ukatsti ‘Jehová Diosaw uka luräwi phoqañatakejj yanaptʼitani’ sasaw confiyañasa. Jehová Diosata ukhamaraki amtanakapata yatichapkistu ukhajja, jupjamaraki wali sum istʼapjjañäni, ukatsti uka toqenakat lupʼiñatakis tiempo apstʼasirakiñäni. Yaqhanakarus kusisit yatiyapjjañäni. Ukhamatwa María warmjam Diosar iyawsatas uñachtʼayañäñi (Sal. 77:11, 12; Luc. 8:18; Rom. 10:15).

19. Jehová Diosan amigonakapat yateqasiñäni ukhajja, ¿kunjam uñtʼatäñänisa?

¹⁹ Rut warmisa Ezequías reyisa María warmisa, Abraham chachjamarakiw Jehová Diosampejj wali sum apasipjjäna. Jupanakajja, Diosan amigonakapata uñtʼatäpki uka ‘walja iyawsañani jaqenaka’ taypinkapjjewa. Nayra tiempot jichhakamajja waljanirakiw Jehová Diosan amigopäpjjäna. Jiwasajj jupanakjamarakiw Jehová Diosarojj taqe chuyma iyawsañasa (Heb. 6:11, 12). Ukhamtï lurañänejja, jiwasajj jupanakjamarakiw Jehová Diosan amigopjam wiñayataki uñtʼatäñäni.