1, 2. Davitajj taqe chuymaw Diosar servïna sasajja, ¿kunatsa sissna? (Aka janankir dibujo uñjjattʼam.)

DAVITAR jiwayañ munasajja, Saúl reyejj 3.000 soldadonakampiw Judá wasarar thaqheri saräna. Mä arumajja, jupanakajj ikirasipkäna ukhaw Davitampi Abisai chachampejj Saulan campamentopar mantapjjäna. Abisai chachajj Saular jiwayañ munasaw Davitar akham säna: ‘Jichhajj nayaw pachpa lanzapampi chhoqontasin jiwayäʼ sasa. Davitasti sänwa: “Khititejj aka reyir jiwayañ munani, ukajj Tatitun castigatapunïniwa. Jupa reyisti Tatitun ajllitarakiwa. [...] Tatitusti qhespiyitpan, jupan ajllit reyipar jiwayañatjja” sasa (1 Sam. 26:8-12).

² ¿Kunatsa Davitajj Saúl reyir jan jiwaykäna? Uka reyir jiwayasajja, janiw Dios toqet saytʼasitap uñachtʼaykaspänti. ¡Jehová Diosaw Saularojj reyïñapatak uttʼayäna! Diosar taqe chuyma servirinakajja, markap uñjapjjañapatak Diosajj uttʼayki ukanakarojj wali respetompiw uñjapjje. Taqe servirinakapajj ukham chuymanïpjjaspa ukwa Jehová Diosajj muni (Salmo 18:25 liytʼañataki).

3. ¿Kunjamsa Abisai chachajj Davitar jan jaytanukuñ munatap uñachtʼayäna?

³ Abisai chachajj janipuniw Davitar jaytanukkänti, respetompiw uñjarakïna. Mä kutejja, David chachajj Betsabé warmimpiw wachoq juchar purtʼasïna, uka juchap imtʼañ munasajj akham sasaw Joab  chachar säna: ‘Betsabé warmin Urías chachaparojj nuwasïwin nayraqatar uchapjjam, ukhamat jiwañapataki’ sasa (2 Sam. 11:2-4, 14, 15; 1 Cró. 2:16). Abisai chachajj Joab chachan jilapänwa, ukhamajj Davitan juchachasitapat yatpachänwa. Ukhampachas Davitarojj respetaskakïnwa, ¿kunatsa? ¡Diosaw Davitarojj reyïñapatak uttʼayäna! Abisai chachajj soldadonakan pʼeqtʼiripäkchïna ukasa, janipuniw David lantejj reyit uttʼayasiñ munkänti, antisas taqe chuymaw Davitar servïna, uñisirinakapatsa jarkʼaqarakïna (2 Sam. 10:10; 20:6; 21:15-17).

4. 1) ¿Kunjamsa Davitajj Jehová Diosat jan jitheqtañ munatap uñachtʼayäna? 2) ¿Khitinakatsa aka yatichäwin yatjjataskañäni?

⁴ Davitajj janipuniw Saularojj kuna jan walsa lurañ munkänti, ukhamatwa Dios toqet saytʼasitap uñachtʼayäna. Ukampis janiw ukhakejj ukham lurkänti. Filistea markankir Goliat sat jachʼa jaqejj ‘Diosan ejercitopat burlaskäna’ ukhajja, jan pächasisaw Davitajj nayaw jupamp nuwasir sarä sasin säna (1 Sam. 17:23, 26, 48-51). Reyëjjän ukhasti, altʼat chuymampiw Natán profetan cheqañchäwip katoqasïna, wachoq juchar purtʼasitapatsa, Urías chachar jiwayatapatsa taqe chuymaw arrepentisïna (2 Sam. 12:1-5, 13). Chuymanëjjäna ukhajja, Diosat jan jitheqtañ munatap uñachtʼayaskakïnwa, ¿kunjamsa? Jerusalenankir templo lurasiñapatak kunatï wakiskäna ukanakjja taqe chuymaw churäna (1 Cró. 29:1-5). Davitajj wali jachʼa juchanakarus purtʼaskchïnjja, janipuniw Diosat jitheqtkänti (Sal. 51:4, 10; 86:2). Aka yatichäwinjja, jupata ukhamarak jupajj jakkäna uka tiempon jakiri yaqha chachanakatwa yatjjataskañäni. Ukatsti, aka jisktʼanakaruw qhanañcharakiñäni: ¿Khititsa janipun jitheqtañasäki? ¿Diosat jan jitheqtañatakejj kunjam chuymanïñasas wakisi?

5. ¿Kunsa Abisai chachan luratapat yateqsna?

⁵ Saúl reyir jiwayañ munasajja, Abisai chachajj David toqet saytʼasitapwa uñachtʼayaskäna. Ukampis khiti toqet saytʼasiñas jukʼamp wakiskirejja ukwa armasiskäna. Ukatwa Davitajj akham säna: ‘Tatitun ajllitapar’ jiwayañajj janiw walïkiti sasa (1 Sam. 26:8-11). ¿Kunsa ukajj yatichistu? Amigonakasaru jan ukajj familiasar munasiñajj walikïskchisa, ¿khiti toqet saytʼasiñas jukʼamp wakiskirejja? Uk yatiñatakejj Bibliat yatjjatañasawa, ukaw uka toqet sum amuytʼañatak yanaptʼistani.

6. Mayninakar chuymatpach munasiñajj walikïskchisa, ¿kunatsa uka toqet wal amuyasiñasa?

⁶ Mayninakar chuymatpach munasiñajj walikïskiwa, ukampis chuymasajj pantjasiyistaspawa (Jer. 17:9). Wali munat mä amigosatï jan ukajj mä familiarasatï jan walinak luraspa, Diosan markapatsa jitheqtjjaspa ukhajja, jupanak toqet saytʼasiñwa munjjsna. Ukampis jaqenak toqet saytʼasiñat sipansa, Jehová Dios toqet saytʼasiñaw jukʼamp wakiskirejja (Mateo 22:37 liytʼañataki).

7. ¿Kunjamsa mä kullakajj Jehová Dios toqet saytʼasitap uñachtʼayäna?

⁷ Familiarasat maynejj tamat jaqsuta uñjasispa ukhajja, ¿khiti toqetsa saytʼasiñäni? Uk amuytʼañatakejj Ana ^[1] kullakat parltʼañäni, jupajj khiti toqetsa saytʼasini ukwa ajlliñapäna. Tamat jaqsut taykapaw mä urojj telefonot jawsatayna. Taykapajj wali llakitänwa, familiapajj janis jupat llakiskaspa ukhamwa amuyasïna, ukatjja ‘visittʼiriw jutañ munsma’ sasaw kullakar sarakïna. Uk istʼasasti Ana kullakajj wali llakitaw jikjjatasïna, ‘carta toqew jaysanïma’ sasaw mamapar säna. Ukampis uka carta janïr qellqkasajja, Bibliajj uka toqet kamsisa ukwa yatjjatäna (1 Cor. 5:11; 2 Juan 9-11). ‘Janiw nanakajj armasipksmati. Jumaw jan walinak luratamat jan arrepentisiñ munasajj nanakat jitheqtañ amtawaytajja’ sasaw kullakajj mamapar suma arunakampi qellqäna. Ukat akham sarakïnwa: ‘Jehová Diosar kuttʼam, ukaw jan llakisjjañatak yanaptʼätam’ sasa (Sant. 4:8).

8. ¿Kunjam chuymanïñas Diosat jan jitheqtañatak yanaptʼistani?

⁸ Davitajj jakkäna uka tiemponjja, Jehová  Diosat jan jitheqtiri jaqenakajj utjarakïnwa, jupanakajj altʼat chuymani, munasiri, jan ajjsariri ukhamäpjjänwa. Uka toqet jichhajj yatjjatañäni, ukatsti ukham chuymanïñajj kunjamsa Diosat jan jitheqtañatakejj yanaptʼistaspa ukwa yatjjatarakiñäni.

9. ¿Kunatsa Abner chachajj Davitar jiwayañ munäna?

⁹ Davitajj Goliat chachan pʼeqep aptʼata Saúl reyin ukar saräna ukhajja, Jonatanampi Abner chachampiw ukankasipkäna. Qhepatjja, Jonatanampi Davitampejj wiñay munasiñatakiw mä juramento lurapjjäna. Soldadonakar pʼeqtʼiri Abner chachasti Davitar jiwayañatakiw Saúl reyimp mayachasjjarakïna (1 Sam. 17:57–18:3). Ukatwa Davitajj ‘jan wali qhoru jaqenakaw jiwayañ munapjjetu’ sasin säna (Sal. 54:3; 1 Sam. 26:1-5). Davitarojj Jehová Diosaw Israel markan reyïñapatak ajllïna, uk sumwa Jonatanasa Abner chachas yatipjjäna. Ukhamajj ¿kunatsa jupanakajj Davitar mä kikpak jan uñjapkäna? Jonatanajj altʼat chuymanïnwa, Abner chachajj janiw ukhamäkänti. Jupasti Saúl reyejj jiwjjäna uka qhepatjja, David toqet saytʼasiñat sipansa Saúl reyin Is-boset yoqap toqetwa saytʼasïna. Abner chachajj inas reyjam apnaqañ munarakchïna, ukatwa Saúl reyin uñtʼatapampi ikintaspachäna (2 Sam. 2:8-10; 3:6-11).

10. ¿Kunatsa Absalonajj Dios toqet jan saytʼaskäna?

¹⁰ David reyin Absalón yoqapajj ukhamarakiw jachʼa jachʼa tukusajj Dios toqet jan saytʼaskänti. Israel marka apnaqañ munasajja, guerran nuwasiñ mä carro lurayasïna, caballonaks jikjjatarakïnwa, ukatsti phesqa tunka jaqenakwa jupa nayraqatan tʼijupjjañapatak uttʼayarakïna (2 Sam. 15:1). Davitar yanaptʼayañat sipansa, Absalón chachajj jupa toqe saytʼasipjjañapatakiw waljanir chʼamañchäna. Jehová Diosaw Davitarojj reyïñapatak ajllïna, Absalonajj uk yatkchïna ukasa, Abner chachjamarakiw Davitar jiwayañ munäna (2 Sam. 15:13, 14; 17:1-4).

11. ¿Kunsa Abner, Absalón ukat Baruc chachanakan sarnaqäwipajj yatichistu?

¹¹ ¿Kunsa uka sarnaqäwinakajj yatichistu? Maynitakik taqe kun munañajj jukʼat jukʼatwa Diosat jitheqtayistaspa. Cheqansa janiw khitis Saulatsa ni Abner chachatsa yateqasiñ munktanti. Ukampis chuymasanjja jukʼamp qollqenïña, mayninakat sipansa jukʼamp suma trabajonïñwa munjjsna. Uka amuyunakajj Jehová Diosatwa jitheqtayistaspa. Jeremías chachan Baruc sat secretariopajj ukhamanwa uñjasïna. Jupajj jukʼampinak jikjjatañ munasajj janiw Diosarojj kusisit chuymamp yupaychjjänti. Ukatwa Diosajj akham säna: “Nayajj kuntejj saytʼaykta ukjja tʼunjtwa, kuntejj ayruntkta uksa jikʼinukuraktwa.  Jichhajj taqe akapachampejj ukhamrakwa luräjja. ¿Kuncha jumataki mayisiñ munta? ¡Jan kunsa mayimti!” sasa (Jer. 45:4, 5). Baruc chachajj Diosan ewjjtʼap istʼänwa. ¿Jiwasat kamsasirakispasa? Niyakejjay akapachan tukusiñapajj wali jakʼankchejja, jiwasajj Baruc chachjamarakiw Diosan ewjjtʼanakap istʼañasa.

12. ¿Kunjamsa munañanakasampi apayasiñajj Diosat jitheqtayistaspa? Uk mä uñachtʼäwimp qhanañchtʼam.

¹² México markan jakasiri Daniel jilatajj khiti toqetsa saytʼasini ukwa amtañapäna. Jupajj Diosar jan servir mä tawaqompiw casarasiñ munäna. Precursoräjjäna ukhasa uka tawaqorojj cartanak apayaskakïnwa. Jupatï munañapamp apayasispäna ukhajja, Diosatwa jitheqtasapäna, ukwa jilatajj amuyasïna. Ukatwa mä irpir chuymanin yanaptʼap thaqhäna, ukatakejj altʼat chuymanïñapänwa. Uka irpir chuymanejj Diosat jan jitheqtañapatakiw yanaptʼäna. Daniel jilatajj akham siwa: “Diosat jan jitheqtañatakejj janiw uka tawaqor cartanak apayjjañajäkänti, ukwa uka jilatajj sum amuytʼayitäna. Ukatakejj Diosat wal mayisiyäta, jacharakiyätwa. Tiempompejj janiw uka tawaqor qellqjjayätti. Diosan arunakaps jukʼamp kusisitaw yatiyjjarakiyäta” sasa. Qhepatjja, uka jilatajj suma chuyman mä kullakampiw casarasïna, jichhajj tamanak tumptʼiritwa irnaqtʼaskaraki.

13. Davitajj juchachaskäna ukhajja, ¿kunjamsa Natán profetajj Diosatsa Davitatsa jan jitheqtkäna?

¹³ Jehová Diosat jan jitheqtir jaqejja, janiw jaqe masipar jaytanukkiti antisas yanaptʼiwa. Amuytʼañataki, Natán chachajj Diosat jan jitheqtiri profetänwa, ukatwa Davitarus yanaptʼarakïna. Mä kutejja, Davitamp parlaniñapatakiw Diosajj uka profetar khitäna, ukhamat Betsabé warmimpi wachoq juchar purtʼasitapata ukat Urías chachar jiwayatapat amuytʼayañataki. Natán profetajj taqe chuymas Davitarojj yanaptʼkchïnjja, Diosar istʼasaw Davitan ukar jan ajjsaras saräna. Jucha luratapajj kunja jan walïnsa uk amuytʼayañatakejj qhana ukhamarak suma arunakampiw Davitar parläna. Mä qamir jaqejj kunjamsa mä pobre jaqerojj uwijap aparatayna uka toqetwa Natán profetajj Davitar parläna. Uk istʼasajja, Davitajj walpun qamir jaqetak colerasïna. Ukhaw Natán profetajj Davitar akham säna: “¡Jumätaw uka jaqejja!” sasa (2 Sam. 12:1-7, 13).

14. ¿Kunjamsa munasirïñajj jaqe masisar yanaptʼañatakisa Dios toqet saytʼasiñatakis yanaptʼistaspa?

¹⁴ Kunjamansay jikjjataskchiñänejja, munasir chuymanïñaw Diosat jan jitheqtañatakejj yanaptʼistani. Amuytʼañataki, mä jilatana jan ukajj mä kullakan jachʼa juchar purtʼasitap yatsna ukhajja, ¿kamachsnasa? Jupatï wali munat amigosächi  jan ukajj familiarasächi ukhajja, juchap imtʼañwa munsna. Ukampis jaqe masis toqet saytʼasiñat sipansa, Jehová Dios toqetwa nayraqat saytʼasiñasa. Ukatwa Diosar istʼasajj juch luririr yanaptʼañatak chʼamachasiñasa. ¿Kunjamsa uk lursna? Natán profetat yateqasisajj jan pächasisaw jupamp parltʼañasa. Irpir chuymaninakamp parlañapatakis suma arunakampiw chʼamañchtʼañasa. Jupatï mä qawqha tiempot juchap jan yatiykani ukhajja, jiwasaw irpir chuymaninakamp parltʼañasa. Ukhamatwa Jehová Dios toqet saytʼasitas uñachtʼayañäni. Amigosaru jan ukajj familiarasaru munasitassa uñachtʼayarakiñäniwa, ¿kunatsa ukham sistanjja? Irpir chuymaninakajj munasiñampi ukhamarak pacienciampiw yanaptʼapjjani (Levítico 5:1; Gálatas 6:1 liytʼañataki).

15, 16. Jehová Dios toqet saytʼasiñatakejja, ¿kunatsa Husai chachajj jan ajjsarirïñapäkäna?

¹⁵ Husai chachajj Davitan wali munat amigopänwa, jupajj Jehová Diosat jan jitheqtañatakisa David toqet saytʼasiñatakisa, jan ajjsarirïñapänwa, ¿kunatsa? Niyakejjay walja jaqenakajj Absalón chachamp mayachasipjjchïnjja, Absalonajj awkip lantiw reyit uttʼayasiñ munäna. Ukatwa Davitajj jan jiwayatäñatakejj Jerusalén markat sarjjäna (2 Sam. 15:13; 16:15). ¿Kunsa Husai chachajj luräna? ¿Davitar yanaptʼañat sipansa Absalonampit mayachasjjpachäna? Janiwa. David reyejj chuymanëjjänwa, Jerusalenatsa jan jiwayatäñatakiw sarjjäna, ukhampachasa Husai chachajj Davitar yanaptʼaskakïnwa. Niyakejjay Jehová Dios toqet saytʼasiñ amtchïnjja, Olivos qolluruw Davitamp jikisiñatakejj saräna (2 Sam. 15:30, 32).

¹⁶ Ukanjja, Davitajj Jerusalenar kuttʼañapatakiw Husai chachar mayïna, ukhamat Absalón chachan amigopäkaspas ukham tukuñapataki. Ahitofel chachan ewjjanakapar jan istʼañapatakiw Husai chachajj Absalonar parlañapäna. Husai chachajj jakäwip aptʼasirjamäkchïn ukasa, Absalonamp parliriw saräna, ukhamatwa Dios toqet saytʼasitap uñachtʼayäna. Davitasti Husai chachar yanaptʼañapatakiw Jehová Diosar mayïna, Diosajj mayisitapar istʼänwa, ukatwa Absalonajj Ahitofel chachar istʼañat sipansa, Husai chachar istʼäna (2 Sam. 15:31; 17:14).

17. Jehová Dios toqet saytʼasiñatakejja, ¿kunatsa jan ajjsarirïñajj wakisi?

¹⁷ Familiaranakasasa, trabajonkir masinakasasa jan ukajj marka apnaqerinakas jan walinak lurañasatakiw chʼamañchapjjestaspa, ukhamajja Dios toqet saytʼasiñatakejj jan ajjsarirïñasawa. Walja jilat kullakanakaw ukham chuymanïpjjatap uñachtʼawayapjje. Taro sat jilatat parltʼañäni, jupajj wawatpachaw awk taykapar istʼañatak wal chʼamachasïna. Ukjja, janiw phoqañ laykuk lurkänti, jan ukasti, jupanakar kusisiyañatakiw luräna. Ukampis jupanakajj janiw Jehová Diosan Testigonakapampi Bibliat yatjjatañap munapkänti, ukajj Taro jilatar wal llakisiyäna. Tantachäwinakaparuw sarañ qalltjjä sasin säna ukhajja, awk taykapajj wal colerasipjjäna. Jilatajj akham siwa: “Walja maranakaw nayamp jan visittʼayasiñ munapkänti. Ukhaman uñjasisajja, Diosat jan jitheqtañatakejj wal mayisirïta. Jichhajja, awk taykajajj janiw nayrjam amuyjjapjjeti, jupanakar visittʼirisa niya sapa kutiw sartjja” sasa (Proverbios 29:25 liytʼañataki).

18. ¿Kunjamsa aka yatichäwejj yanaptʼawaytamjja?

¹⁸ Jiwasajja David, Jonatán, Natán, Husai chachanakat yateqasisajj ukhamarakiw Jehová Dios toqet saytʼassna, kusisitas jakasiraksnawa. Janipun Abner chachatsa ni Absalón chachatsa yateqasipjjañäniti, jupanakajj janiw Dios toqet saytʼasipkänti. Cheqansa, jiwasajj pantjasirïtanwa, jucharus purtʼasiraksnawa, ukampis David chachat yateqasisajj janipun Jehová Diosat jitheqtapjjañäniti. Jupa toqet saytʼasiñaw taqe kunat sipansa jukʼamp wakiskirejja, ukjj sarnaqäwisamp uñachtʼayapjjañäni.