¿KUNA urus jumatakejj jan armkayajja? ¿Casaraskta uka uruti, jan ukajj wawamajj naski uka urucha? Inas bautisaskta uka urüchi. Uka urojja jumasa, mayninakasa wali kusisitaw jikjjatasipjjpachayäta, ukjj janiw armkpachätati. Bautisasisaw Jehová Diosar ‘taqe chuymamampi, taqe almamampi, taqe amuyumampi, taqe chʼamamampi’ munasitam uñachtʼaytajja (Mar. 12:30).

Jehová Diosar servisajja wali kusisitaw jikjjataspachätajja. Ukampis yaqhep jilat kullakanakajj Diosar walja maranak servisajja, janiw nayrjam kusisit jikjjatasjjapjjeti. Ukampis ¿kunatsa Diosarojj kusisit serviskakiñasa?

Diosan Reinopat suma yatiyäwinakajj wal kusisiyistu. ¿Kunatsa? Akanak amtañwa yanaptʼistu, Jehová Diosajj niyaw aka pachjja tʼunjani ukatjja mä suma Paraisonwa jakasjjarakiñäni. Taqe ukanakajj niyaw phoqasini. Sofonías 1:14 qellqatajj akham siwa: ‘Jehová Diosan jachʼa urupajj wali jakʼankiwa’ sasa. Uk yatkasasa, ‘uka urojj janirakis jankʼak purinkitejjä’ sasaw yaqhep jilat kullakanakajj Diosar taqe chuyma jan yupaychjjapjjaspati, janirakiw nayrjamas irnaqjjapjjaspati (Pro. 13:12).

Jehová Diosan markapankañajj wali kusiskañawa. Jumajj inas Diosan servirinakapar sum sarnaqer uñjasajj Bibliat yatjjatañ qalltawaysta (1 Ped. 2:12). Ukampis mä jilataru jan sum sarnaqer uñjasajja, ¿kunjamakis jikjjatasta? Yaqhep jilat kullakanakarojj aynachtʼayaspawa, janirakiw kusisitäjjapjjaspati.

Supayan aka ñanqha pachapajj kunaymanïñatakiw chʼamañchistu, ukanakanïsakis sum jakassna ukham amuyañaswa muni. Ukatwa Diosarojj jan kusisit yupaychjjaraksnati. Jesusan aka arunakap amtañäni: “Janiw khitis pä patronarojj sirvkaspati, maynirojj munaniwa, maynirusti uñisirakiniwa, jan ukajj maynirojj jachʼachaniwa, maynirusti jiskʼacharakiniwa; Diosampiru qollqempirojj janiw khitis sirvkaspati” (Mat. 6:24). Akapachajj kunanaktï churañ munkistu ukanak jikjjatañ wal munañäni, Diosarus serviñ munarakiñäni ukhajja, Jehová Diosarojj janiw kusisit yupaychksnati.

Jehová Diosar munasipki ukanakatakejj janiw Diosan munañaparjam sarnaqañajj chʼamäkiti (1 Juan 5:3). Jan ukasti, Jesusan arkiripäñajj wali askiwa, kusisitäñatakis yanaptʼarakistuwa. Jesusajj sänwa: “Nayar jutapjjam taqe qarjatanaka jatjatanaka, nayaw samarayapjjäma. Nayan yugojja apapjjam, ukatsti nayat yateqasipjjarakita. Nayasti llampʼu chuymani, altʼat chuymanirakïtwa, ukatwa almaman samarañapjja jikjjatapjjäta. Nayan yugojjasti jasa apañakiwa, khumojjasti sinti phisnakirakiwa” sasa (Mat. 11:28-30). ¿Kunatsa Diosar serviñajj wal kusisiyistu sasin sissna? Uk jichhajj kimsa toqet yatjjatañäni (Hab. 3:18).

Kusisir Jehová Diosaw jakäwi churistu (Hech. 17:28; 1 Tim. 1:11, NM). Jehová Diosar jakäwis katuyasitasat walja maranakas pasjjchejja, kusisitaw serviskaktanjja, ¿kunatsa? Jupaw jakäwi churistu uk jan armasaw ukham serviskaktanjja.

Héctor jilatajja, pusi tunka maranakaw tamanak tumptʼasajj irnaqtʼawayi. Jupajj chuymanëjjewa, esposapas wali usutarakiwa, ukatwa Diosatak nayrjam jan irnaqtʼirjamäjjeti, ukhampachasa Diosarojj kusisitaw serviskaki (Sal. 92:12-14). Jilatajj siwa: “Esposajajj kunjamsa urut urutjam qʼal aynachtʼaskäna uk uñjañajj wali llakkañänwa, jupar uñjañas chʼamarakïnwa, ukampis janipuniw aynachtʼawaykti. Diosar kusisit chuymampi serviskaktwa. Jehová Diosaw jakäwi churirejja, jaqenakarus mä amtampiw lurawayaraki, uk yatiñaw Jupar munasiñatakisa, taqe chuyma serviñatakis yanaptʼawayitu. Kusisitäñatakejj Diosan arunakap yatiyir sarapuntwa, kuntï Reinopajj jiwas layku lurkani uksa amtapuntwa” sasa.

Jehová Diosaw juchatsa jiwañatsa qhespiyistu. Bibliajj akham siwa: “Diosajj akapachar wal munatap laykuw mä sapa Yoqapar khitani, taqe khitinakatejj jupar iyawsapki ukanakajj jan chhaqañapataki, jan ukasti wiñay jakañanïñapataki” sasa (Juan 3:16). Uka arunakarjamajja, Jesusan loqtasitapar iyawsañäni ukhajj juchanakasat perdonatäñäniwa, wiñayatak jakañatakis mä suytʼäwinïñäniwa. Uka toqenakat lupʼisajja, ¿janit Diosarojj wal yuspärañ munktanjja? Jïsa, kusisitaw Jupar serviñ muntanjja.

México markan jakiri Jesús jilatajj akham sänwa: “Jukʼamp qollqe ganañ munasajj jan tiemponiw trabaj-jjayäta. Ukampis Jehová Diosar uñtʼasajja, Yoqapar aka Oraqer  jiwañapataki khitanitapwa yateqawayta. Uk yatisaw Diosar serviñ amtawayta, ukatwa jakäwij Jupar katuyasjjayäta. Pä tunka kimsaqallqo maranak mä empresanak trabajisajja, uka trabajot mistuñwa amtjjayäta, ukhamat Diosan arunakap jukʼamp yatiyañataki” sasa. Ukhamatwa jilatajj Diosar kusisita serviñ qalltawayi.

Diosatakjam sarnaqañajj kusisiyistuwa. Jehová Diosar janïr uñtʼkayäta ukhajja, ¿jakäwimajj kunjamänsa uk amtastati? Roma markankir jilat kullakanakarojj akham sasaw apóstol Pablojj amtayäna: ‘Jumanakajj juchan esclavopäpjjayätawa, jichhasti cheqa sarnaqäwin servirëjjapjjtawa’ sasa. Diosatakjam sarnaqasajj wiñay jakañwa jupanakajj katoqapjjañapäna (Rom. 6:17-22). Jiwasajja, Diosatakjam sarnaqasajj jan wal sarnaqañanakatsa nuwasiñanakatsa jarkʼaqatätanwa, ¿janit ukajj kusisiykistu?

Jaime jilatat parltʼañäni, jupajj nuwasirïnwa (boxeador), Diosan utjatapsa janiw creykänti. Jakäwejj ina ukhamataksa uñstkaspa ukhamwa amuyäna. Tantachäwinakar sarañ qalltäna ukhajja, jilat kullakanakan munasiñap uñjañaw chuymapar purtʼäna. Jakäwip mayjtʼayañatakejj Diosaruw creyiñapäna, ukatwa Jupar iyawsañatak yanaptʼa mayisïna. Jilatajj akham siwa: “Jehová Diosajj wali munasirïtapsa khuyaptʼayasirïtapsa jukʼat jukʼatwa amuyjjayäta. Jupar uñtʼañajj jan walinakatwa jarkʼaqawayitu. Jakäwij jan mayjtʼaykiriskayäta ukhajja, nayra amigonakajajj jiwayat uñjasipkäna ukhamarakiw uñjasiriskayäta. Jehová Diosar servisakiw wali kusisit jikjjatasta” sasa.

¿Kunjamsa aka pachan tukusiñap suytʼañasa? Ak amtapuniñäni, maynitï “ajayun munañaparjam yapuchchejja, ajayojj wiñay jakañ achwa churarakini. Ukhamajja, aski lurañanjja janiw qarjasiñasäkiti, janitejj qarjtkañäni ukajja, horasaparuw cosechjja apthapiñäni” (Gál. 6:8, 9). Yantʼanakan uñjasisajj janipun aynachtʼapjjañäniti, Jehová Diosajj jiwasampïskiwa. Kunjam chuymanïñas jachʼa tʼaqhesïwi uru pasañatakisa, kusisit chuymampi serviskakiñatakis yanaptʼistani ukham jaqëñatakiw chʼamachasiñasa (Apo. 7:9, 13, 14; Sant. 1:2-4).

Jan waltʼäwinakan aguantatasjja, Jehová Diosajj janiw armkaniti. Sapa maynejj kunjamsa chʼamachastan, qawqsa Juparojj munastan uk sumwa yati. Diosarojj kusisit serviskakiñäni ukhajja, kunjamtï Davitajj jikjjataskäna ukhamarakiw jikjjatasiñäni, jupajj sänwa: “Nayajj Tatitump chikapuniw sarnaqaskta, jupaw kupëjjajjanki, janiw kunas tinkuykitaniti. Ukat chuymajjajj walpun kusisi, ajayojjas kusisi, janchejjas samararaki” sasa (Sal. 16:8, 9).