1, 2. Jesusajj alajjpachar sarjjäna uka qhepatjja, ¿kunsa apostolonakajj jisktʼasipjjäna?

OLIVOS qollunkasipkäna ukhaw Jesusarojj qenayanak taypnam alajjpachar sarjjeri apostolonakajj uñjapjjäna (Hech. 1:9, 10). Jesusajj pä mara jilaw apostolonakaparojj yatichäna, chʼamachtʼäna ukhamarak yanaptʼäna, jichhajj janiw jupanakampëjjänti. ¿Kunsa apostolonakajj lurapjjpachäni?

² Alajjpachar janïr sarkasajja, Jesusajj arkirinakapar akham sänwa: “Jumanakasti nayat qhanañchapjjetäta Jerusalén markana, Judeana, Samariana, taqe aka oraqpachana” sasa (Hech. 1:8). ¿Jesusan arkirinakapajj kunjamsa uka mayitarjam phoqapjjaspäna? Diosan qollan ajayupaw yanaptʼapjjätam sasaw Jesusajj säna (Hech. 1:5). Ukampis ¿khitis aka oraqpachan yatiyasiñapatakejj pʼeqtʼañapäna ukhamarak wakichtʼañapäna? Israelitanakar pʼeqtʼañapatakejja Jehová Diosajj mä jaqeruw ajllïna. Ukatwa apostolonakajj ‘¿khitiruraki markap pʼeqtʼañapatakejj jichhajj ajllini?’ sasin jisktʼasipjjpachäna.

3. 1) Jesusajj alajjpachar sarjjäna uka qhepatjja, ¿kunsa apostolonakajj lurapjjäna? 2) ¿Kuna jisktʼanakarus aka yatichäwin qhanañchaskañäni?

 ³ Jesusajj alajjpachar sarjjäna uka pasatatjja, discipulonakapajj Judas Iscariote lanti yaqhar ajlliñatakejj Qellqatanak liytʼapjjäna, Diosar oracionan mayisipjjäna, ukatsti Matías chacharuw apostolöñapatak ajllipjjäna (Hech. 1:15-26). ¿Kunatsa mä apostolar ajlliñajj jupanakatakisa Jehová Diosatakisa wali wakiskirïnjja? Jesusan arkirinakapajja 12 apostolonakaw utjañapa sasaw amuyapjjäna. * Jesusajj tunka payani apostolonakaruw Diosan markap pʼeqtʼapjjañapatakejj ajllïna ukhamarak wakichtʼäna. ¿Kunjamsa Jehová Diosampi Jesusampejj markap pʼeqtʼapjjañapatakejj uka chachanakar wakichtʼapjjäna? ¿Jichhürunakanjja kunjamsa Diosan markap sarayirinakarojj wakichtʼasiraki? ¿Diosan markap sarayapki uka chachanakata ukhamarak ‘Amuyasiri Cheqapa Uywatat’ amtasiñatakejj kunsa lursna? (Mat. 24:45; Heb. 13:7).

4. ¿Kuna lurañanaksa apostolonakasa jilïr irpirinakas Jerusalén markan phoqapjjäna?

⁴ Apostolonakajj Pentecostés, 33 maranwa Diosan markap pʼeqtʼañ qalltapjjäna. Mä kutejja, “Pedrojj tunka mayan apostolonakampi saytʼasisinjja”, walja jaqenak nayraqatanwa Diosan Arupat yatichäna (Hech. 2:14, 15). Qhepatjja waljaniw uka jaqenakat cristianöjjapjjäna. Ukatsti, “taqeniw sum arkapjjäna kunjämtejj apostolonakajj yatichkäna ukhamarjama” (Hech. 2:42). Apostolonakaw taman qollqep apnaqapjjarakïna (Hech. 4:34, 35). Jupanakaw Diosan markaparojj yatichapjjäna, oracionsa lurapjjarakïna, ukatwa akham sapjjäna: “Nanakasti Diosat mayiñaruw jukʼamp uskusipjjä, ukhamarak jupan arunakap yatichañaru” sasa (Hech. 6:4). Yaqha cheqanakan Diosan arunakap yatiyasiñapatakis wakichtʼat cristianonakaruw khitapjjarakïna (Hech. 8:14, 15). Qhepatjja qollan ajayun ajllita jilïr irpirinakaw apostolonakarojj tamar irpañatakejj yanaptʼapjjarakïna. Jupanakaw oraqpachan jilïri irpirinakjamajj tamanakar yanaptʼapjjäna (Hech. 15:2).

5, 6. 1) ¿Kunjamsa qollan ajayojj oraqpachan jilïr irpirinakar yanaptʼäna? (23 janankir dibujo uñjjattʼäta). 2) ¿Kunjamsa angelanakajj oraqpachan jilïr irpirinakarojj yanaptʼapjjäna? 3) ¿Kunjamsa Diosan Arupajj oraqpachan jilïr irpirinakarojj yanaptʼäna?

⁵ Oraqpachan jilïr irpirinakarojj Jehová Diosaw Jesucristo taypejj yanaptʼaski sasaw cristianonakajj confiyapjjäna. ¿Kunatsa? Maya, oraqpachan jilïr irpirinakarojj qollan ajayuw yanaptʼäna (Juan 16:13). Uka tiemponjja taqpach ajllitanakaw qollan ajayu katoqapjjäna, ukampis Jerusalenankir apostolonakampiru jilïri irpirinakampiruw qollan ajayojj tamanak uñjapjjañapatak jukʼampi yanaptʼäna. Amuytʼañataki, 49 maranjja circuncisión toqet mä amtar puriñatakiw qollan ajayojj oraqpachan jilïr irpirinakarojj yanaptʼäna. Cristianonakajj uka amtarjamaw phoqapjjarakïna, ukhamatwa “wali chʼaman saytʼapjjäna iyawsäwinakapana. Tatitur iyawsirinakasti sapürunjamaw yapjjattarakïna” (Hech. 16:4, 5). Circuncisión toqet kuntï amtapkäna uk mä cartan tamanakar apayapjjatapajja, jilïri irpirinakajj qollan ajayun yanaptʼap katoqapjjatapa, wali munasirïpjjatapa ukhamarak Diosar wal confiyapjjatap uñachtʼayi (Hech. 15:11, 25-29; Gál. 5:22, 23).

⁶ Paya, angelanakaw oraqpachan jilïri irpirinakarojj yanaptʼäna. Amuytʼañataki, apóstol Pedror jawsayanim sasaw mä angelajj Cornelio chachar säna. Pedrojj Cornelio chachampiru  familiapampiruw Diosan arunakap yatiyäna. Uka familiajj janis circuncidatäpkchïnjja qollan ajayu katoqapjjäna. Ukhamatwa Corneliojj jan judiökasina jan circuncidatäkasin cristianor tuküna. Kunapachatï apostolonakampi jilatanakampi uk yatipjjäna ukhajja, Diosan munañapajj kunasa ukwa amuyapjjäna, ukatsti jan judionakarus munasiñampiw tamar katoqapjjäna (Hech. 11:13-18). Ukhamatwa oraqpachan jilïr irpirinakajj Diosan arunakap yatiyasiñapataki pʼeqtʼapkäna ukarojj angelanakan yanaptʼapjjatap yattanjja (Hech. 5:19, 20). Kimsa, Diosan Arupaw oraqpachan jilïr irpirinakarojj yanaptʼarakïna. Ukhamatwa kunanaktï Bibliajj yatichki ukanak sum amuytʼapjjäna, tamanakarus yanaptʼapjjarakïna (Hech. 1:20-22; 15:15-20).

7. ¿Kunatsa Jesusaw nayra cristianonakar pʼeqtʼäna sistanjja?

⁷ Oraqpachan jilïr irpirinakas tamar pʼeqtʼapkchïnjja, tamankirinakajj Jesucristoruw pʼeqtʼiriparjam uñjapjjäna. ¿Kunjamatsa uk yattanjja? Jesucristow ‘mayninakarojj apostolot’ uttʼayi, juparakiw tamarojj pʼeqtʼaski sasaw apóstol Pablojj säna (Efe. 4:11, 15). Apostolonakajj sutipat uñtʼayasiñat sipansa, ‘cristianonaka sasin uñtʼatäpjjänwa, Diosatwa uka suti katoqapjjäna’ (Hech. 11:26). Apostolonakasa tama irpirinakasa kuntï yatichapki uk phoqañajj wakiskiriwa sasaw Pablojj amuyäna, ukatsti akham sänwa: “Cristowa taqe chachan pʼeqepajja” sasa. Ukham sasajj oraqpachan jilïr irpirinakampitwa parlaskäna. Ukatsti akham sarakïnwa: ‘Diosajj Criston pʼeqepawa’ sasa (1 Cor. 11:2, 3). Ukhamasti Jehová Diosajj Jesucristoruw markap pʼeqtʼañapatakejj ajllïna.

8, 9. ¿Kunjamsa Russell jilatajj Diosan markapan yanaptʼäna?

⁸ Khä 1870 marat aksarojja, Charles Taze Russell jilatampi yanapirinakapampejj Biblian yatichäwinakaparjam Diosar jukʼamp serviñ munapjjäna, ukatsti taqe kasta jaqenakaru, yaqha aru parlirinakaruw yanaptʼañ munapjjäna. Ukatwa 1884 maranjja, Zionʼs Watch Tower Tract Society sutimpi leyinakarjam uñtʼasjjäna, uka corporacionan presidentepajj Russell jilatänwa. * Jupasti wali sum Bibliat yatjjatäna, ukat iglesianakan Diosajj Trinidadawa, jaqejj jan jiwir almaniwa sasin yatichapki ukanakajj janiw Bibliarjamäkiti sasaw jan ajjsaras jaqenakar yatiyäna. Cristojj kuttʼankani ukjja janiw jaqenakajj uñjapkaniti, ukatsti markanakar “tiempojj churatäki” uka tiempojj 1914 maranwa tukusjjani sasaw yatjjatarakïna (Luc. 21:24). Russell jilatajj cheqa yatichäwinak jaqenakar yatiyañatakejj chʼama, qollqe, tiempo apsusïna. Ukhamasti, Jehová Diosampi Jesusampiw Russell jilatar uka tiempon markap sarayañapatakejj ajllipjjäna.

⁹ Russell jilatajj janiw jaqenakampi jachʼañchatäñ munirïkänti. Ukatwa 1896 maranjja akham qellqäna: “Nanakajj janipuniw jachʼañchatäñ munapkti. Janirakiw suma yatichirïpkiristsa ukham uñjatäñ munapkti. Ni tamanakan sutinakajat uñtʼatäñapsa munapkti” sasa. Qhepatsti akham sarakïnwa: “Ukanakajj Diosan munañaparjamaw lurasi janiw jaqen munañapäkiti” sasa.

10. 1) ¿Kuna maransa Jesusajj ‘amuyasiri cheqap uywatar’ uttʼayäna? 2) ¿Oraqpachan Jilïr Irpirinakampi Sociedad Watch Tower ukan directoranakapampi jan kikpätapajj kunjamsa qhanstäna?

¹⁰ Russell jilatajj 1916 maranwa jiwjjäna. 1919 maransti ‘amuyasiri cheqap uywataruw’ Jesusajj uttʼayäna. Ukhamat tamankirinakar “horasapar manqʼanaks churañapataki”, mä arunjja Diosan arunakap yatichapjjañapataki (Mat. 24:45). Uka maranakanjja, Brooklyn,  Nueva York markan Betelankir mä qawqha ajllit jilatanakaw Jesusan arkirinakaparojj Bibliat yatichapjjäna. “Oraqpachan jilïr irpirinaka” (“cuerpo gobernante”) sutejj 1940 marat aksaruw qellqatanakan uñsti. Uka maranakansti Watch Tower Bible and Tract Society sat corporacionan directoranakampi oraqpachan jilïr irpirinakampejj pachpakïnwa. 1971 maranwa, Oraqpachan Jilïr Irpirinakampi Sociedad Watch Tower sarayir directoranakampi jan kikpätapajj qhanstäna, Sociedad Watch Tower sat sutejj leyinakarjam uñtʼatäñatakïnwa. Uka marat aksarojj Oraqpachan Jilïr Irpirinakat janiw taqenejj directorjam sarayjjapjjänti. Aka qhepa maranakanjja ‘yaqha ovejanakjam’ uñtʼatäpki uka jilatanakat mä qawqhaniw Sociedad Watch Tower ukhamarak yaqha corporacionanakan directoranakjam sarayjjapjje. Ukhamatwa Oraqpachan Jilïr Irpir jilatanakajj Diosan markapar Bibliat yatichañatakisa ukarjam sarayañatakis jukʼamp tiemponëjjapjje (Juan 10:16; Hech. 6:4). Yatiyañataki julio 15, 2013 maran mistkäna uka revistajja, ‘amuyasiri cheqap uywatajj’ ajllit mä qawqha jilatanakawa, jupanakaw Oraqpachan Jilïr Irpirinaka satäpjje sasaw qhanañchäna.

11. ¿Oraqpachan Jilïr Irpirinakajj kunjamsa mä amtar puripjje?

¹¹ Oraqpachan Jilïr Irpirinakajj sapa semanaw suma amtanakar puriñatakejj tantachasipjje. Ukaw sum parlakipapjjañapatakisa mayachtʼatäpjjañapatakis yanaptʼi (Pro. 20:18). Jupanak taypit janiw khitis jukʼampi jilirïkaspas ukham amuyaskiti, ukatwa uka tantachäwi sarayir jilatajj sapa mara cambiasi (1 Ped. 5:1). Jupanak taypin utjki uka sojjta comitenakansa ukhamarakiwa. Oraqpachan Jilïr Irpirinakatjja janiw khitis jukʼamp jilirïkaspas ukham amuyaskiti, sapa maynejj ‘utankirinakjam’ uñtʼatäpjjewa, ¿kunatsa? ‘Amuyasiri cheqapa uywatatwa’ Biblian yatichäwinakap katoqapjje, ukarjamaw sarnaqapjjaraki.

12. ¿Kuna jisktʼanakarus qhanañchaskañäni?

¹² Oraqpachan Jilïr Irpirinakajj janiw Jehová Diosat visionanak katoqapkiti, janirakiw jan pantjasirïpkiti. Bibliat qhanañchasasa Diosan markapar irpkasas awisajj pantjasipjjaspawa. Amuytʼañataki, Índice de las Publicaciones Watch Tower sat qellqatanjja, “Aclaración de creencias” sat pʼeqeñchäwini mä listaw utji. * Ukansti 1870 marat aksarojj kunjamsa Biblian yaqhep yatichäwinakapajj sumpach amuyasjje ukaw qhanañchasi. Jesusajj janiw ‘amuyasiri cheqap uywatajj’ jan pantjasisaw Bibliat yatichani siskänti. Ukhamasti ‘¿khitiraki amuyasiri cheqap uywatasti?’ (Mat. 24:45, MT). ¿Kunatsa ‘amuyasiri cheqap uywatajj’ Oraqpachan Jilïr Irpirinakaw sistanjja? Uk sum amuyañatakejj kunas apostolonak tiempon yanaptʼäna uk kimsa toqet yatjjatañäni.

13. ¿Kunjamsa qollan ajayojj Oraqpachan Jilïr Irpirinakar yanaptʼawayi?

¹³ Oraqpachan Jilïr Irpirinakarojj Diosan qollan ajayupaw yanaptʼi. Biblian utjki uka yatichäwinakat jan sum amuyaskäna ukanak sumpach amuyapjjañapatakejj qollan ajayuw yanaptʼawayi. “Aclaración de creencias” siski uka pʼeqeñchäwin uñstki uka listat amuytʼañäni. Janiw mä jaqejj “Diosan jan amuytʼkay amtatanakapsa” sum qhanañchkaspati (1 Corintios 2:10 liytʼañataki). Oraqpachan Jilïr Irpirinakajj apóstol Pabljamaw amuyapjjaraki, jupasti akham sänwa: “Taqe akanakjja nanakajj parlapjjtwa Diosan ajayupan yatichata.  Janiw parlapkti taqe kunsa nanakan yateqatanakajjampiki” sasa (1 Cor. 2:13). Nayrajj kʼarinakaw yatichasïna, Bibliatsa janiw sum amuyaskänti. ¿Kunatsa 1919 marat aksarojj Biblian yatichäwinakapajj jukʼamp sum qhanañchasiwayi? Diosaw qollan ajayupampejj Biblia sum amuyapjjañapatak yanaptʼawayi.

14. Apocalipsis 14:6, 7 qellqatarjamajja, ¿kunjamsa angelanakajj Oraqpachan Jilïr Irpirinakarusa Diosan markaparus yanaptʼasipki?

¹⁴ Oraqpachan Jilïr Irpirinakarojj angelanakaw yanaptʼi. Oraqpachan Jilïr Irpirinakaw kimsaqallqo millón jila jilat kullakanakarojj Diosan arunakap oraqpachan yatiyapjjañapatak yanaptʼasipki. Oraqpachan yatiyasiñapatakejj angelanakaw wal yanaptʼapjje (Apocalipsis 14:6, 7 liytʼañataki). Kunapachatï mä jaqejj Diosan yanaptʼap oracionan mayisiski ukhajja, angelanakajj ukaruw yanaptʼañasatak irptʼapjjestu. * Kawkïr markanakantï Diosan arunakap yatiyañajj jarkʼatäki ukanakansa Diosan servirinakapajj jiljjattaskakiwa. Angelanakan yanaptʼapampiw ukham jiljjattaskaraki.

15. ¿Oraqpachan Jilïr Irpirinakampi religionanak sarayirinakampejj kunansa jan kikpäpki? Mä uñachtʼäwimpi qhanañchtʼma.

¹⁵ Oraqpachan Jilïr Irpirinakarojj Diosan Arupaw yanaptʼi. (Juan 17:17 liytʼañataki). Kunas 1973 maran pasäna uk uñjañäni. Yatiyañataki junio 1, revistanjja akham sasaw jisktʼäna: “¿Cigarro fumañ jan jaytirinakajj bautisasipjjaspati?” sasa. Ukarojj akham qhanañchäna:  “Biblian mayitaparjamajj janiw bautisasipkaspati” sasa. Cigarro fumañ jan jaytirejj kunatsa tamat jaqsutäñapa ukwa walja textonakampi uka revistan qhanañchäna (1 Cor. 5:7; 2 Cor. 7:1). Ukanakajj janiw jaqenakan amtapäkiti, jan ukasti “Diosan munañapawa, uksti Dios pachpaw Biblian qellqayarakïna”. Diosan markapajja, chʼamäkchi ukasa kuntï Biblian siski ukarjamapuniw taqe kuns lurapjje, yaqha religionanakajj janiw Bibliarjam phoqapkiti. Estados Unidos markanjja religionanakat parlir mä librojj jichhakiw akham säna: “Religionanakan sarayirinakapajja, ukar saririnakasa yaqha jaqenakas kunarutï creyipki amuyapkaraki ukarjamakiw yatichapjje, ukhamat jupanakan yanaptʼap katoqañataki” sasa. Oraqpachan Jilïr Irpirinakajj janiw kuntï jaqenakajj amuyapki ukarjamajj yatichapkiti, antisas Diosan markapankirinakajj Biblian siski ukarjamaw phoqapjje, ukhamatwa Jehová Diosan pʼeqtʼaskatap amuytanjja.

16. ¿Kunjamsa Oraqpachan Jilïr Irpirinakat amtastanjja?

¹⁶ (Hebreos 13:7 liytʼañataki). “Amtasipjjarakim khitinakatejj irpa[sipktam]” ukanakatjja siw Biblianjja. Ukarjam phoqañatakejja, Oraqpachan Jilïr Irpirinakatakiw oracionan mayirapiñasa (Efe. 6:18). Jupanakajj walja lurañanakanïpjjewa, sañäni: tamankirinakar Diosan arunakap yatichaña, Diosan arunakap oraqpachan yatiyasiñapatak pʼeqtʼaña, Diosan markapar qollqempi yanaptʼapki uksa jupanakaw apnaqapjje. ¡Ukatwa jupanakatakejj Diosat mayiñasapuni!

17, 18. 1) ¿Kunjamsa Oraqpachan Jilïr Irpirinakar yanaptʼtanjja? 2) ¿Diosan arunakap yatiyatasajj kunjamsa Oraqpachan Jilïr Irpirinakarusa Jesusarus yanaptʼi?

¹⁷ Oraqpachan Jilïr Irpirinakan ewjjtʼanakaparjam sarnaqasaw jupanakat amtasiraktanjja. Uka ewjjtʼanakjja qellqatanakana, tantachäwinakana ukhamarak jachʼa tantachäwinakanwa katoqtanjja. Oraqpachan Jilïr Irpirinakaw tamanak tumptʼirinaka uttʼayapjje, jupanakasti jilïr irpirinakwa tamanakan uttʼayapjjaraki. Tamanak tumptʼirinakasa jilïr irpirinakas Oraqpachan Jilïr Irpirinakan ewjjtʼanakaparjam phoqasaw jupanakat amtasipjjaraki. Jiwasasti Diosan markap sarayir jilatanakar istʼasaw Jesucristo pʼeqtʼirisar respetatas uñachtʼaytanjja (Heb. 13:17).

¹⁸ Diosan arunakap sum yatiyañataki chʼamachasisaw Oraqpachan Jilïr Irpirinakat amtasiraktanjja. Diosar serviñanjja tama sarayirinakat yateqasipjjam sasaw apóstol Pablojj cristianonakar chʼamañchtʼäna. Oraqpachan Jilïr Irpirinakajj taqe chuyma yatiyasaw Diosar confiyapjjatap uñachtʼayapjje, ¿jiwasajj yatiyañ yanaptʼasktanti? Yanaptʼaskstanjja, Jesusajj akham siskistani ukhajj wal kusisiñäni: “Nayan mä jilajjarutejj taqe ukanak lurapjjstajja altʼat chuymanïkchi ukasa, nayaruw ukham lurapjjesta” (Mat. 25:34-40).

19. ¿Kunatsa jumajj Jesucristor arkañ amtawayta?

¹⁹ Jesusajj alajjpacharus sarjjchejja, arkirinakaparojj yanaptʼaskakiwa (Mat. 28:20). Aka oraqenkaskäna ukhajja, Diosajj qollan ajayupampi, angelanakampi ukhamarak Arupampiw markap pʼeqtʼañatakejj yanaptʼawayitu sasaw Jesusajj säna. Jichhürunakanjja Jesusaw ‘amuyasiri cheqap uywatarojj’ yanaptʼaskaraki. Jupanakajj Jesusaruw “arkapjje kawkirutejj jupajj sarki ukaru” (Apo. 14:4). Ukhamasti, Oraqpachan Jilïr Irpirinakan ewjjtʼaparjam sarnaqktan ukhajja, Jesucristorus arkasksna ukhamawa, jupasti niyaw wiñay jakañar irpistani (Apo. 7:14-17). ¡Janipuniw khiti jaqes wiñay jakañ churkistaspati!