¿KAWKHANTÏ yatiyirinakajj jukʼamp munaski uka cheqanakaru sarir jilat kullakanakar uñtʼtati? Inas jumajj akham jisktʼasirïsta: “¿Kunas jupanakarojj yaqha markar sarañatak yanaptʼpachäna? ¿Kunjamsa yaqha markan serviñatakejj wakichtʼasipjjpachäna? ¿Kunjamsa nayajj jupanakjam servirakirista?” sasa. Ukanak yatiñatakejja uka jilat kullakanakamp parltʼañäni.

¿Kawkhantï yatiyirinakajj jukʼamp munaski uka cheqaru sarañatakejj kunas yanaptʼawaytam? Amy kullakajj Estados Unidos markatawa, jupajj 30 jila maraniwa. Kullakajj siwa: “Nayratpachaw Diosarojj yaqha markan serviñ munayäta, ukampis ukajj nayatak wali chʼamänwa” sasa. ¿Kunas juparojj yanaptʼäna? Jupajj saskakiwa: “2004 maranjja, Belice markan serviri mä chacha warmiw jupanakamp chika mä phajjsi yatiyañatak invittʼapjjetäna. Sarayäta ukhajja, ukan yatiyañajj wali kusiskañänwa. Mä mara qhepatsti, Ghana markaruw precursorjam serviñatak sarjjayäta” sasa.

Niya 30 marani Stephanie kullakajja, yaqha markar sarirjamati janicha ukjja aka qhepa maranakakiw amuytʼañ qalltäna. Jupajj Estados Unidos markatawa. Kullakajj akham amuytʼasïna: “Janiw usutäkti, familiajansa janirakiw khitir uñjañas utjkituti. Diosatakejj jukʼampiw luriristjja” sasa. Ukaw kullakarojj Ghana markar sarañatak yanaptʼäna. Filip jilatampi Ida esposapampejj Dinamarcanwa jakasipjje. Jupanakajj 50 jila maranïpjjewa. Uka chacha warmejja, kawkhantï yatiyirinakajj munaski uka cheqanakaru yanaptʼir sarañ munasajj wal chʼamachasipjjäna. Filip jilatajj siwa: “Yaqha markar sarañjamäjjäna ukhajja, Diosas ‘¡sarapjjam!’ sapkitaspa ukhamänwa” sasa. 2008 maranjja, Ghana markaruw sarapjjäna ukanwa jichhajj kimsa mara jila servisipki.

Hans jilatampi Brook kullakampejj Estados Unidos markanwa Diosar servisipki. Jupanakasti 30 jila maranïpjjewa. 2005 maranjja, Katrina sat jachʼa thayampi jan waltʼayatanakaruw yanaptʼapjjäna. Qhepatsti, Tantachasiñ Utanakajj yaqha markanakan luraski ukan yanaptʼañatakiw mä solicitud phoqantapjjäna, ukampis janiw ukar jawsapkänti. Hans  jilatajj siwa: “Mä jachʼa tantachäwinwa David reyit parlasïna, jupajj templo utachañsa munkchïnjja janiw utachañapäkänti. Ukaw amtäwinakaj mayjtʼayañatak yanaptʼapjjetäna” sasa (1 Cró. 17:1-4, 11, 12; 22:5- 11). Brook kullakajj sarakiwa: “Jehová Diosajj yaqha punku leqtʼapjjam sapkitaspas ukhamänwa” sasa.

Yaqha markan serviri jilat kullakanakan suma experiencianakap istʼasajja, Hans jilatampi Brook kullakampejj yaqha markan precursorjam serviñwa amtapjjäna. 2012 maranjja, Ghana markaruw sarapjjäna, ukanwa amparampi parlirinak taman pusi phajjsi yanaptʼapjjäna. Qhepatjja Estados Unidos markarus kuttʼanjjapjjchïnjja, Ghana markankañajj Diosar jukʼamp serviñ munañatakiw jupanakar yanaptʼäna. Ukat aksaruw Micronesia markan sucursalajj utachaski ukan yanaptʼasipki.

Yatiyirinakajj jukʼamp munaski uka cheqar sarañatakejja, ¿kunjamsa wakichtʼasiwayta? Stephanie kullakajj siwa: “Kawkhantï yatiyirinakajj jukʼamp munaski uka cheqanakaru sarañat parlki uka yatichäwinakwa Yatiyañataki revistan thaqhayäta” sasa. * “Tamajankir irpir chuymaninakampisa, tamanak tumptʼir jilatampisa, esposapampisa uka toqet parltʼarakiyätwa, Diosarus oracionan mayisirakiyätwa” sasa. Maysa toqetjja, qollqe tantasiñatakejj kunatï jakasiñatak munaski ukampikiw Stephanie kullakajj jakasïna.

Hans jilatajj akham siwa: “Kawkharutï Jehová Diosajj sarapjjañaj munkäna ukaruw sarañ munapjjayäta, ukatakejj Juparuw yanaptʼap mayisipjjayäta. Kuna urus sarañ amtapjjayäta uksa oracionan sapjjarakiyätwa”. Jupanakajj pusi sucursalanakaruw cartanak qellqapjjäna. Ghana sucursalat mä jaysäwi katoqasajja pä phajjsitakiw uka markar sarapjjäna. Hans jilatajj siwa: “Jilat kullakanakampi irnaqañajj wali kusiskañänwa, ukatwa ukan mä qawqha tiempompi qheparañ amtapjjayäta” sasa.

 George jilatampi Adria esposapampejj Canadá markanwa jakasipjje. Jupanakajj niya 40 maranakanïpjjewa. Jilatampi kullakampejj sapjjewa: “Jehová Diosajj janiw yaqha markar sarañ munatasak bendiskiti, jan ukasti suma amtäwinakwa bendisi” sasa. Ukatwa jupanakajj amtanakap phoqañatak chʼamachasipjjäna. Ukatakejj Ghana markan serviri mä kullakampiw parltʼapjjäna, juparojj walja jisktʼanakwa lurapjjäna. Ukatjja, Canadá markankir sucursalarusa Ghana markankir sucursalarusa cartanak qellqapjjarakïnwa. Adria kullakajj siwa: “Kunatï wakiski ukampikiw jakasiñ munapjjayäta” sasa. Ukham amtanakar puripjjatapatwa Ghana markarojj 2004 maran sarapjjäna.

Yaqha markar sarasinjja, ¿kuna jan walinakansa uñjasiwayta, ukat kunjamsa ukar saykatawayta? Qalltanjja Amy kullakajj familiapatwa wal llakisïna. Jupajj siwa: “Uka markanjja taqe kunaw mayjäna” sasa. ¿Kunas kullakarojj jan sinti llakisiñatak yanaptʼäna? Kullakajj saskakiwa: “Familiajajj jawsanipjjapunirïtuwa. ‘Walik Diosarojj ukham servisktajja’ sasin sapjjerïtu ukhajja, kuna amtampis uka cheqar sarayäta ukwa amtayapjjerïtu. Ukatjja, Internet toqew familiajampejj parlasipjjarakirïta. Niyakejjay jupanakampejj Internet toqe uñjasipjjchiyätjja, janis jupanakat sinti jayankkirista ukhamänwa. Maysa toqetjja, uka markan jakasiri wali experienciani kullakampi uñtʼasiñawa jaqenakan costumbrenakapa amuytʼañatakejj yanaptʼitäna” sasa. “Uka kullakajj amigajänwa, ukhamasti jan ajjsarasaw juparojj jaqenakan costumbrenakapat jisktʼasirïta. Jupan yanaptʼapampejja, kunsa lurañajäna, kunsa jan lurañajäkarakïna ukanakwa yateqawayta. Uk yatiñaw Diosan arunakap kusisita  yatiyañatak yanaptʼawayitu” sasaw kullakajj saraki.

George jilatampi Adria esposapampejj akham sapjjarakiwa: “Ghana markar sarasajja, walja maranakas qhepar kuttʼapkirista ukhamänwa” sasa. Kullakajj siwa: “Isi tʼajjsuñ maquinanakana isi tʼajjsuñat sipansa, baldenakanwa jichhajj tʼajjsupjjayäta. Manqʼsti nayrajj ratukiw qhatiyapjjerïta, ukampis jichhajj walja tiempow munasjjäna” sasa. “Qalltan chʼamäkäna ukanakajja, jichhajj wali suma experienciäkaspas ukhamwa amtapjjta” sasaw kullakajj saraki. Brook kullakasti sarakiwa: “Precursorjamajj jan walinakansa uñjasipkchiyätjja, wali kʼuchikiw jakasipjjta. Taqe uka experiencianakajja nanakatakejj mä suma regalopuniwa” sasa.

¿Kunatsa yaqha markaru sarasina Diosar servipjjañapatakejj yaqhanakar chʼamañchtʼasma? Stephanie kullakajj siwa: “Diosan cheqa yatichäwinakap yateqañsa sapüru visittʼayasiñsa wal munapki uka cheqanakan yatiyañajj wali kusiskañawa” sasa. Kullakajj saskakiwa: “Yatiyirinakajj jukʼamp munaski uka cheqanakaru yatiyir sarañataki amtatajatjja walpun kusista” sasa. Stephanie kullakajj Aaron jilatampiw 2014 maran casarasjjäna, jichhasti Ghana markankir sucursalanwa jupanakajj servisipkaraki.

Christine kullakajj Alemania markatawa, jupajj 30 jila maraniwa. Ghana markar janïr sarkasajja, Bolivianwa Diosar servïna. Jupajj siwa: “Familiajat jayankasajja, Diosan yanaptʼap mayisipuntwa. Nayrat sipansa Jupampejj jukʼamp sumaw apasirakta. Jilat kullakanakajj kunjamsa mayachtʼat sarnaqasipjje uksa uñjawayaraktwa. Ukaw Diosaru jukʼamp jakʼachasiñatakejj yanaptʼawayitu” sasa. Christine kullakajj jichhakiw Gideon jilatamp casarasi, jupanakajj Ghana markanwa jichhajj servisipki.

Filip jilatampi Ida kullakampejj kunjamsa Bibliat yateqerinakaparojj yanaptʼapjjäna uka toqet akham sapjjewa: “Nayrajja Bibliat yateqerinakajajj tunka phesqanit jilänwa, qhepatjja sum yatichañatakejj tunkanirukiw yatichjjapjjayäta” sasa. ¿Yateqerinakajj sumti yateqawayapjje? Filip jilatajj siwa: “Michael sat mä waynampiw yateqapjjayäta. Jupajj sapüruw Bibliat yateqañatak tiemponïna, niyakejjay wali sum wakichtʼaschïnjja, mä phajjsinakwa Kunsa yatichi sat librjja tukuyapjjayäta. Qhepatjja yatiyiriw mistjjäna. Nayrïr kuti jupamp mistupkayäta ukhajja, ‘¿Bibliat yateqerinakajar yatichañ yanaptʼitasmati?’ sasaw jupajj sitäna. Janiw cheqaw sañjamäkänti. Michael waynajj akham sitänwa: ‘Kimsaniruw Bibliat yatichañ qalltta, jupanakar yatichañatakiw yanaptʼa munta’” sasa. Amuysnati, uka markanjja Bibliat yatichirinakajj waljaw munasi, yateqerinakas yatichirïpjjarakiwa.

Yatiyirinak wal munasitapjja Amy kullakajj jankʼakiw amuyäna, jupajj siwa: “Ghana markar purisajja, amparamp parlirinakar thaqhañatakejj mä jiskʼa markaruw yatiyir sarapjjayäta, ukanjja kimsaqallqoniruw jikjjatapjjayäta” sasa. Tiempompejja, Amy kullakajj Eric jilatampiw casarasjjäna, jichhasti jupanakajj amparamp parliri mä tamanwa precursor especialjam servisipki. Ghana markanjja, 300 jilaw amparamp parlirinakajj utji, jupanakat yaqhepajj Diosan arunakap yatiyirinakäpjjewa yaqhepasti Bibliat yateqañ munirinakäpjjarakiwa. Maysa toqetjja, George jilatampi Adria esposapampirojj kunjamsa misioneronakajj yaqha markanakan servisipki uk amuyañatakiw Ghana markan serviñajj yanaptʼäna. Ukhamasti Galaad Escuelaru (clase 126) invittʼapjjäna ukhajj wali kusisitaw jikjjatasipjjäna. Jichhajja, Mozambique markanwa misionerot servisipki.

Yaqha markanakat jutiri jilat kullakanakajj kunjamsa Ghana markankir jilat kullakanakampejj yatiyasipki uk uñjañajj wali kusiskañawa (Juan 4:35). Ghana markanjja, 120 jaqenakaw sapa semanajj bautisasipjje. Kunjamatï 17 jilat kullakanakajj Ghana markar sarapkänjja, ukhamarakiw waljanejj Diosar serviñatak yaqha markanakar sarapjje. Jupanakajj Diosar munasitapatwa yatiyirinakajj jukʼamp munaski uka cheqanakar sarapjje. Ukham lurapjjatap uñjasinjja, Jehová Diosajj walpun kusispacha (Sal. 110:3, NM; Pro. 27:11).