Haykanush kullakajj Armenia markanwa jakasi, jupajj janïraw bautisatäkiti. Mä kutejja, mä pasaportwa utap jakʼan aptasïna, uksti esposoparuw yatiyäna, jupajj janirakiw bautisatäkiti. Pasaportemp chikasti, walja qollqew utjäna, bancot qollqe apsuñ tarjetas utjarakïnwa.

Uka chacha warmejj walja manunïpkchïnsa, pasaporten direccionajj utjkäna ukaruw kuttʼayañatak apapjjäna. Pasaporte chhaqayir chachasa familiapasa ukham kuttʼayatapat walpun muspharapjjäna. Haykanush kullakasa esposopasa, Bibliat yateqasaw nanakajj honradöpjjta sasaw qhanañchapjjäna. Ukatsti, Testigonakat parlasinjja Bibliat apstʼat qellqatanaks jaytawayapjjarakïnwa.

Pasaporte chhaqayasirejja, qollqwa Haykanush kullakar churañ munäna, ukampis jupajj janiw katoqaskänti. Qhepürusti, chhaqayasirin esposapajj kuttʼayatapat yuspäririw Haykanush kullakampiru esposopampir visitir saräna. Ukatakejja, diamante qalat lurat mä anillwa apäna.

Uka familjamarakiw waljanejj Haykanush kullakampiru esposopampiru honradöpjjatap uñjasajj wal muspharapjjarakispa. Ukampisa ¿Jehová Diosajj ukhamarakit muspharpachäna? ¿Kunjamsa Diosajj honrado jaqenakar uñji? ¿Cheqapunit honradöpjjañapajj wakisïna?

Uka jisktʼanakaru qhanañchañajj janiw chʼamäkiti. ¿Kunatsa? Diosan servirinakapatakejja, Jupat yateqasisin sarnaqañaw diamante qalat sipansa, qorit sipansa jukʼamp wakiskirejja, uk jiwasajj sum yattanjja. Ukhamasti, Jehová Diosatakejj janiw diamantesa ni qorisa jukʼamp wakiskirïkiti, jan ukasti servirinakapajj Jupat yateqasisin sarnaqapjjaspa ukaw Diosatakejj jukʼamp wakiskirejja. Servirinakapasti sumwa uk yatipjje (Isa. 55:8, 9).

¿Kunjamatsa uk yattanjja? Bibliajja, yatiñ kankañatsa chʼikhi kankañatsa akham siwa: “Kusisiñaniwa khititejj yatiña kankañ jikjjatki ukajja, ukhamarak chʼikhi kankaña katoqki ukasa; ukasti qollqet sipansa, suma qorit sipansa jukʼamp askinakwa jikjjatayaraki. Yatiñ kankañajj perlanakata sipansa jukʼamp jila alaniwa, ¡janiw wali munatäki ukanakampisa chikachayat uñjaskaspati” sasa (Pro. 3:13-15). Jehová Diosatakejja, ukham jaqëñaw jila alani cosasanakat sipansa jukʼamp wakiskirejja.

¿Kamsasirakispas honrado sarnaqañatjja?

Jehová Diosajj cheq parlir Diosawa, Jupajj ‘janiw kʼariskaspati’ (Tito 1:2). Jupajja, hebreo cristianonakar akham sas qellqañapatakiw apóstol Pablor amuytʼayäna: “Orapjjamay nanakataki. Yatisipjjaraktwa nanakan chuymanakajjajj walikïskatapa taqe kunans sum sarnaqañ munapjjatanakajj layku” sasa (Heb. 13:18).

Honradöñatakejj Jesusatwa yateqasiraksna. Mä kutejja, Caifás sat jilïr sacerdotejj Jesusar akham sänwa: “Jakkiri Diosan sutiparuw juramentompi maysma cheq arsuñamataki. Sapjjeta: ¿Jumätati Diosan Yoqapa Cristojja?” sasa. Jiwayatas uñjasiñapäkchïna, jan ukajj “Diosaruw jiskʼachi” sasinsa Sanedrinankirinakajj sapjjañapäkchïnjja, Jesusajj jan kʼarisisaw “jïsa nayätwa” sasin säna (Mat. 26:63-67).

¿Jiwasat kamsasirakispasa? Qollqe jikjjatañ laykusa jan ukajj kunanak jikjjatañ laykusa, ¿kʼarisiñäniti?

Jupanakatakik taqe kuns muniri ukhamarak qollqe chuyma jaqenak taypin jakasin honradöñajj chʼamakïspawa (2 Tim. 3:2). Qollqe toqet aynachtʼasasa, jan ukajj trabajo jan jikjjatañjamäjje ukhasa, waljanitakejj lunthatasiñasa kʼarisiñas walikëjjewa. ‘Jan kʼarisisin qollqe ganañajj chʼamakïspawa’ sasaw waljanejj amuyapjje. Yaqhep cristianonakajja, facilak qollqe jikjjatañ munasajj jan wali amtanakaruw puripjje. Ukhamätapatjja taman jan walit uñjatäpjjewa (1 Tim. 3:8; Tito 1:7).

Ukampis cristianonakat jila partejj Jesusat yateqasipjje. Diosat yateqasis sarnaqañaw taqe kunat sipans jupanakatakejj wali wakiskirejja. Colegionjja, jila notanak apsuñ laykojj janiw cristiano wayn tawaqonakajj kʼarisipkiti (Pro. 20:23). Honradötasatjja, inas Haykanush kullakjamajj regalonak jan katoqkchiñäniti. Ukampis honradöpjjañamawa sasaw Diosajj sistu. Ukham sarnaqasajj suma chuymanïñäniwa, ukaw jukʼamp wakiskirejja.

Gagik sat jilatat amuytʼañäni, jupajj akham siwa: “Janïr cristianökasajja, mä jachʼa empresanwa pʼeqtʼirjam trabajiyäta. Ukansti, impuestonak jan pagañ laykojja, empresan dueñopajj janiw taqpach ganancianak yatiyirïkänti. Impuestonak cobririrojja, kuntï lurapkayäta ukajj walikïkaspas ukham uñjañapatakejj qollqwa churirïyäta. Ukham luratajatjja, kʼarisiri jaqet uñtʼatäyätwa. Diosan arunakap uñtʼjjasinsti, walja qollqsa gankchiyätjja, janiw uka jan walinak lurañ munjjayätti. Ukatwa nä pachpa negocio lurañ amtayäta. Empresaj-jja, kunjamtï leyinakajj siski ukarjamaw nayrïr urutpach qellqayjjayäta. Impuestonaksa taqpachwa pagjjarakta” sasa (2 Cor. 8:21).

Gagik jilatajj saskakiwa: “Nayrat sipansa chikatakwa qollq ganjjayäta. Ukhamïpanjja, familiajar janiw taqe kuns churirjamäjjayätti. Ukampis jichhajj kusisitaw jikjjatasta, Jehová Diosampis sum apasirakta, wawanakajatakis yateqaskayarakïtwa, tamansa luräwinakwa katoqarakta. Impuesto cobririnakampisa, yaqha jaqenakampisa honradot uñtʼatätwa” sasa.

Jehová Diosajja, Jupat yateqasis sarnaqerinakarusa honradonakarusa munasiwa (Tito 2:10). Diosajja akham sas qellqañapatakiw David reyir amuytʼayäna: “Nayajj waynäyätwa, jichhasti niyaw chʼama qaritäjjta: janipuniw aski jaqer apanukut uñjkti, janirakiw wawanakapar mayjasirs uñjkti” sasa (Sal. 37:25).

Uka arunakan cheqätapjja, Rut warmin sarnaqäwipaw uñachtʼayi. Chuymankipstat Noemí suegrapar jaytanukuñat sipansa, Israel markaruw suegrapamp chik saräna. Ukanwa cheqpach Diosar yupaychäna (Rut 1:16, 17). Jupajj cheqaparjamaw sarnaqäna. Pobrenakatak leyinakajj utjkäna ukarjamaw cebada puyanak apthapis trabajïna. Kunjamatï Jehová Diosajj David chachar jan jaytanukkänjja, ukhamarakiw Diosajj juparusa Noemí suegraparus jan jaytanukkänti (Rut 2:2-18). Diosajja, Rut warmirojj cosasanakat sipansa, jukʼamp suma bendicionanakwa churäna. Jupa toqew David reyisa Mesiasas jutäna (Rut 4:13-17; Mat. 1:5, 16).

Diosan yaqhep servirinakapatakejja, kunatï jakañatak munaski uk alasiñatak qollqe jikjjatañajj chʼamakiwa. Ukampis qollq facilak jikjjatañat sipansa, jan jayrasisaw wal trabajipjje. Ukhamatwa Diosat yateqasipjjatap  uñachtʼayapjje, jupanakatakejja honradöñajj wali wakiskiriwa (Pro. 12:24; Efe. 4:28).

Oraqpachanjja, walja jilat kullakanakaw Rut warmit yateqasisin Jehová Diosar confiyas sarnaqapjje. Jupanakajja, Diosan aka arunakaparuw taqe chuym confiyapjje. Jupasti siwa: “Janiw kunapachas jaytkämati ni armtʼaskämasa” sasa (Heb. 13:5). Honradöpki ukanakarojja, Jehová Diosajj yanaptʼapuniwa. Kunatï jakañatak munaski uksa Jupajj arsutaparjamaw servirinakapar churi (Mat. 6:33).

Jaqenakajja, diamante qalanaksa yaqha ukham cosasanaksa wali askitwa uñjapjje. Ukampis alajjpachankir Awkisatakejja, honrado jaqëñasa sum sarnaqañasa jila alani qalanakat sipans jukʼamp wakiskiriwa.