¿Aka qhepa phajjsinakan Yatiyañataki sat revista mistkäna uk liytʼtati? Ukhamächi ukhajja, aka jisktʼanakar qhanañchtʼma:

Israelitanakarojja, ¿kunatsa Diosajj guerrar khitpachäna?

Jehová Diosajj munasiriwa. Ukampis awisajja, markapar jarkʼaqañatakiw guerran nuwasipjjañapatak yanaptʼirïna. Kunapachasa, khitisa guerran nuwasini uk Diosakiw amtirïna (w15 11/1, 4, 5 jananaka).

Qʼajjo wayn tawaqo wawanakapajj Jehová Diosaru servipjjañapatakejja, ¿kunsa awk taykanakajj lurapjjañapa?

Munasiri, altʼat chuymani ukhamäpjjañapawa, uksti luräwinakapampiw uñachtʼayapjjañapa. Amuytʼasirïpjjañapas wali wakiskirirakiwa. Ukatjja, kunjamsa wawanakapajj jikjjatasipjje uksa amuyapjjañaparakiwa (w15 11/15, 9-11 jananaka).

Papajj Pedro lanti ajllitawa sasin ¿kunatsa jan amuyañasäki?

Mateo 16:17, 18 qellqatanjja, ‘Pedrow taman pʼeqepajja’ sasin janiw siskiti. Antisas Biblianjja, Pedror jachʼañchañat sipansa, Jesusaw taman ‘esquin qalapajja’ sasinwa qhanañchi (1 Ped. 2:4-8) (w15 12/1, 12-14 jananaka).

¿Kunanakatsa janïr parlkasajj amuytʼañasa?

1) Kunapachas parlañasa (Ecl. 3:7), 2) kunanaksa parlañasa (Pro. 12:18), 3) kunjamsa parlañasa (Pro. 25:15) (w15 12/15, 19-22 jananaka).

Honradöñatakejj ¿kunanaksa cristianonakajj jan lurapjjañapäki?

Cheqpach cristianonakajj janiw kʼarisipkiti, janirakiw jan wali amtampis mayninakar kʼarintapkiti, ni tʼaqhesiyañatakis uk lurapkiti. Janiw kʼarimp kuns apaqapkiti ni lunthatasipkisa ( wp16.1, 5 jana).

¿Khitinakäpjjänsa Biblian parlki uka ‘jilïr sacerdotenakajja’?

‘Jilïr sacerdotenakajja’, wali uñtʼat familianakat jutapkäna uka sacerdotenakänwa. Sacerdotet apaqatanakas jupanak taypinkarakïnwa (wp16.1, 10 jana).

Jesusan jiwäwipajj amtaski ukan tʼantʼa manqʼerinakaru, jan ukajj vino umirinakarojja, ¿kunjamsa uñjañasa?

Cheqpach ajllitanakajj janiw mayninakamp sum uñjatäñ suyapkiti, ni Diosan ajllitäpjjatapatsa taqenir yatiyapkiti (Mat. 23:8-12) (w16.01, 23, 24).

Abrahaman Diosamp sum apasiñ qalltatapatjja, ¿kunsa yateqsna?

Abrahamarojja, Sem chachaw Jehová Diosar sum uñtʼañapatakejj yanaptʼpachäna. Kunjamsa Diosajj juparusa familiaparus sum uñjäna uk uñjasas jukʼampiw Diosarojj uñtʼarakpachäna. Jiwasajja, Diosamp sum apasiñatakejj ukhamarak lursna (w16.02, 9, 10 jananaka).

Jaljanakarusa tʼaqanakarusa, ¿khitis Biblia jalanoqawayi?

Khä 1200 maranakanjja Stephen Langton sat tatakuraw Bibliar jaljanaka uskuwayi. Uka tiempotakejja, Judea markankir qellqerinakajj Hebreo Arut Qollan Qellqatanak jiskʼa tʼaqanakar jalanoqjjapjjänwa. 1500 maranakansti, Robert Estienne chachajj Griego Arut Qollan Qellqatanakampejj ukhamarakiw luräna (wp16.2, 14, 15 jananaka).

Supayajj Jesusar yantʼkäna ukhajja, ¿cheqapunit templor irppachäna?

Janiw yatktanti. Mateo 4:5 ukat Lucas 4:9 qellqatanakarjamajja, inas Supayajj mä visionan irpchïna, jan ukajj cheqpachapun templo patjjar irpchïna (w16.03, 31, 32 jananaka).

Yatiyañampi sullampejj ¿kunansa niya kikpaki?

Sullajj jukʼat jukʼatwa uñsti, jakañatakis yanaptʼistaspawa. Sullajj Diosan bendicionapawa (Deu. 33:13). Diosan servirinakapajj maynit maynikam yanaptʼasisin Diosan arunakap yatiyapki ukamp sasiwa (w16.04, 4 jana).