Taqe jupanakasti, angelanakampi sasiwa, jupanakaw Jerusalén marka tʼunjañatak yanaptʼapjjäna, niyarakiw jupanakajj Supayan apnaqata akapachar Armagedonan tʼunjapjjarakini. ¿Kunatsa ukham amuyjjtanjja?

Jerusalén markajj 607 nayrïr pacha maran janïr tʼunjatäkipanjja, kunas pasañapäna ukwa Jehová Diosajj Ezequielar mä visionan uñjayäna. Kuna jan walinaksa uka markan lurasipkäna ukwa uñjäna. Ukatjja sojjta jaqenakaruw “sapa maynis tʼunjañataki mä jachʼa thuru lawa aptʼatkama” uñjarakïna. Ukatsti, ‘lino isimpi isthapita, qellqañ yänak aptʼata’ mä jaqeruw uñjarakïna (Eze. 8:6-12; 9:2, 3). Qellqañ yänak aptʼat jaqerusti, Diosajj akham sänwa: “Jerusalén marka muytam, kawkïrinakatejj aka markan jan wali luräwinakap layku wali llaktʼatäsipki ukanakaru mä chimpu paranakaparu uskurakim” sasa. Tʼunjañataki lawa aptʼatäpkäna uka sojjta jaqenakarusti, khitinakatï jan chimpunïpkäna taqe ukanakar jiwarayapjjañapatakiw mayirakïna (Eze. 9:4-7). ¿Kunsa uka visionat yateqsna? ¿Khitis qellqañ yänak aptʼata jaqejja?

Uka visionjja, 612 nayrïr pacha maranwa Ezequielajj uñjäna. Uka profeciajja, phesqa maranak qhepata, kunapachatï babilonionakajj Jerusalén marka tʼunjapkäna ukhaw nayrïr kuti phoqasïna. Ukhamatwa Jehová Diosajj jan istʼasiri jaqenakaru babilonionakampi tʼunjayäna (Jer. 25:9, 15-18). Ukampis Jehová Diosan munañaparjam sarnaqerinakajj janiw tʼunjatäpkänti jupanakarojj Diosaw qhespiyäna.

Visionanjja, Ezequielajj janiw khitirus cheqpachapun chimptʼkänti, ni Jerusalén marka tʼunjañatakis yanaptʼkänti. Jan ukasti, angelanakaw uka marka tʼunjañatakejj pʼeqtʼapjjäna. Uka visionajja, kunas alajjpachan pasäna ukwa amuytʼayistu. Jehová Diosaw angelanakarojj jan wali jaqenakar tʼunjapjjañapatak waktʼayañataki mayïna, suma chuyman jaqenakar qhespiyapjjañapatakis mayirakïnwa. *

Uka profeciajj jichha tiemponwa phoqasirakini. Qellqañ yänak aptʼatäki uka jaqejja, aka oraqenkasipki uka ajllit cristianonakampi sasiwa sasaw nayrajj amuyayätanjja. Ukatsti, Diosan suma yatiyäwinakap istʼapkistu ukhaw jaqenakajj qhespiyasiñatak chimpu katoqapjje sasaw qhanañchayätanjja. Ukampis uka toqet jukʼamp yatjjatasajja, jan ukhamätapwa amuyjjtanjja. Mateo 25:31-33 qellqatarjamajja, Jesusaw jaqenakarojj jachʼa tʼaqhesiñ urun juzgani. Uka tiemponsti uwijanakjam uñtʼatäpkani ukanakajja qhespiyatäpjjaniwa, cabritonakjam uñtʼatäpkani ukanakasti tʼunjatäpjjarakiniwa.

Ezequielajj uñjkäna uka visionatjja, ¿kunsa yateqsna? Uk jichhajj phesqa toqet uñjañäni.

1. Jerusalén markajj janïr tʼunjatäkäna ukhajja, Ezequiel profetajj Jeremías ukhamarak Isaías profetanakjamarakiw Jerusalén markan tʼunjäwipat yatiyäna. Jichhürunakansti, Jehová Diosajj mä qawqha ajllitanak toqew janïr jachʼa tʼaqhesiña uru purinkipan yatiyaskaraki, yatichaskaraki. Cheqansa Diosan taqe servirinakapaw uka yatiyäwinak yatiyasipki (Mat. 24:45-47).

2. Jupanakasti, Ezequiel chachjamarakiw jaqenakarojj qhespipjjañapatak jan chimpupkiti.  Jan ukasti angelanakan yanaptʼatäsajj kunas jutïr urunakan pasani uka toqetwa yatiyapjje (Apo. 14:6).

3. Ezequiel profetajj jakkäna uka tiempon qhespirinakajja, janiw paranakapan cheqpach mä chimpunïpkänti. Jutïrinsa janirakiw cheqpachapun mä chimpu katoqapkaniti. Ukhamasti jachʼa tʼaqhesïwi urun qhespiñatakejja, ¿kunsa jaqenakajj lurapjjañapa? Akapachan tʼunjatäñap yatisajja, Jesusatwa yateqasipjjañapa, jakäwipsa Diosaruw katuyasipjjañapa, ukatsti Criston jilanakaparu yanaptʼasajja, Diosan Reinopat yatiyiriw sarapjjañapa (Mat. 25:35-40). Ukhamatwa jachʼa tʼaqhesïwi urunjja, qhespiñatak chimpu katoqapjjani.

4. Qellqañ yänak aptʼata jaqejja Jesusampi sasiwa. Jachʼa tʼaqhesïwi urunjja, uwijanakjam uñtʼatäpkani uka walja jaqenakaruw chimptʼani. Ukhamatwa jupanakajj aka oraqen wiñayataki jakapjjani (Mat. 25:34, 46). *

5. Thuru lawa aptʼatäpkäna uka sojjta jaqenakajja, angelanakampi sasiwa. Jupanakajja Jesusan pʼeqtʼataw taqe markanakar tʼunjapjjani, ukatsti jan walinaksa chhaqtayapjjarakiniwa (Eze. 9:2, 5-7; Apo. 19:11-21).

Jehová Diosajj janipuniw aski jaqenakarojj jan wali jaqenakampi chikajj tʼunjkaniti, ukwa Ezequielan visionapat amuytanjja (2 Ped. 2:9; 3:9). Jaqenakar yatiyir sarañajj kunja wakiskirisa uksa amtayarakistuwa. Akapacha janïr tʼunjatäkipanwa taqenejj uka toqet yatipjjañapa (Mat. 24:14).