1, 2. 1) ¿Kunatsa bautisasiñatakejj sum amuytʼasiñama? 2) ¿Janïr bautisaskasajj kunanaksa jisktʼasiñama?

¿JUMAJJ bautisasiñti amtaskta? Bautisasiñajj wali askipuniwa, ukampis kunjamtï pasïr yatichäwin yatjjatawayktanjja, janiw bautisasiñjja ukhamak amtañamäkiti, jan ukasti wali amuytʼasisaw uk lurañama. Bautisaskasajja, ‘munañam lurañaw nayatakejj nayrankani ukhamarak wiñayatakiw servïma’ sasin Diosar siskayäta ukwa taqenir yatiyasktajja. Ukhamasti janïr bautisaskasajj akham jisktʼasiñamaw wakisispa: “¿Amuytʼasirëjjtti? ¿Diosar jakäwi katuyasiñajj kunasa uk sumti amuytjja? ¿Kunatsa bautisasiñ muntjja?” sasa.

² Jumajj bautisasiñatak janis wakichtʼatäkasma ukhamwa amuyasisma. Jan ukajj inas wakichtʼatäjjaraksta, ukampis awk taykamaw akham sapjjeristam: “Jiskʼäsktawa, mä jukʼamp suytʼakim” sasa. Ukhamächi ukhajja jan aynachtʼamti, jan ukasti ajay toqet jiltañatak chʼamachasiskakim, ukhamatwa bautisasiñatakejj wakichtʼatäjjäta. Ukäñkamajja, iyawsäwiman jiltañataki, luratanakaman sumäñapataki, ukatsti Jehová Diosar jukʼamp munasiñatakiw chʼamachasiñama.

3, 4. ¿Kunsa wayn tawaqonakajj Timoteot yateqapjjaspa?

³ Aka jisktʼanakar kunjamsa qhanañchtʼasma uk amuytʼam: Diosajj utjaskapuniw sasin ¿kunatsa amuytjja? Bibliajj Diosan amuytʼayatawa sasin ¿kunatsa sistjja? Akapachankir jaqenakjam sarnaqañat sipansa, ¿kunatsa Diosan leyinakapar istʼtjja? Ukham jisktʼasiñajja, apóstol Pablon ewjjtʼaparjam sarnaqañatakiw yanaptʼätam. Jupajj cristianonakar akham sänwa: ‘Jumanakajj Diosan munañapjja yatipjjañamawa, kunatejj askïki, kunatejj Diosarojj kusisiyki, qʼomäkaraki ukanaksa’ sasa (Rom. 12:2). ¿Kunatsa Pablon ewjjtʼapar istʼañama?

⁴ Uka toqet amuytʼañatakejja, Timoteo waynitut parltʼañäni. Juparojja jiskʼatpachaw taykapasa awichapasa Diosan Arupat yatichapjjäna, ukatwa Diosan Arup sum uñtʼpachäna. Ukhamäkchïna ukasa, Pablojj akham sasaw Timoteor ewjjtʼäna: “Kuntejj yateqkta, ukat iyawskarakta ukarojj jan pächasis arkam” sasa (2 Tim. 3:14, 15). Timoteojj kuntï yateqkäna ukarojja, janiw taykapana awichapana jariyatakejj iyawskänti, jan ukasti jupa pachpaw amuytʼäna, ukhamatwa kuntï yateqkäna ukajj cheqätap yatïna (1 Tesalonicenses 5:21 liytʼañataki).

5, 6. ¿Kunatsa jichjatpach sum amuytʼañ yateqañama?

⁵ Jichhajj jumat amuytʼarakiñäni. Inas jiskʼatpachajj Diosan arunakap yateqawaysta, ukhamächi ukajja, Timoteot yateqasisajj juma pachpaw kuntï yateqkta ukjja amuytʼañama. Ukaw Diosar jukʼamp iyawsañatakisa, yateqer masinakaman yantʼanakaparu saykatañatakisa ukhamarak akapachan yänakaparu jan munañatakis yanaptʼätam. Ukatsti, munañanakamar atipañatakis yanaptʼarakïtamwa.

⁶ Jumatï jichjatpach sum amuytʼañ yateqäta ukajja, yateqer masinakaman jisktʼanakapar suma amuytʼat arunakampi qhanañchtʼañwa yatïta. Inas jupanakajj akham jisktʼapjjchïtam: ‘Diosatï munasirïchi ukajja, ¿kunatsa jan walinakajj utjaskaki? ¿Kunjamatsa Diosan utjatap yattajja? Niyakejjay taqe kunas Diosan luratächejja, ¿khitis Diosar lurawayi?’ sasa. Jumatï wakichtʼatästa ukhajja, uka jisktʼanakajj janiw iyawsäwiman aynachtʼaykätamti, jan ukasti jukʼamp yatjjatañatakiw yanaptʼätam.

7-9. Internetan jw.org cheqan utjki uka yanaptʼajja, ¿kunjamsa Diosan Arupat yateqkta ukar jukʼamp confiyañatak yanaptʼiristam?

⁷ Diosan Arupat sum yatjjatañatak chʼamachasïta ukajja, jisktʼapjjätam ukhajj sum qhanañchtʼäta. Biblian yatichäwinakapatsa janiw pächaskätati, ukatsti iyawsäwimas jukʼampirakiw jiltani (Hech. 17:11). Ukham lurañamatakejj walja yanaptʼanakaw utji. Yaqhep wayn tawaqonakajja El origen de la vida. Cinco cuestiones dignas de análisis sat folletompi, ukhamaraki ¿Existe un Creador que se interese por nosotros? sat librompiw yanaptʼasipjje. Yaqhepanakasti, guías de estudio ¿Qué enseña realmente la Biblia? sat yanaptʼajj utjki ukampiw yanaptʼasipjjaraki. Ukasti, Internetan jw.org cheqanwa jikjjatasi. Ukatakejja, PREGUNTAS SOBRE LA BIBLIA > JÓVENES > ¿QUÉ ENSEÑA REALMENTE LA BIBLIA? (GUÍAS DE ESTUDIO) uka cheqaruw mantañama. Guías de estudio uka yanaptʼajja, Biblian yatichäwinakapat jukʼamp yatjjatañamataki wakichtʼatawa.

⁸ Guías de estudio uka cheqanjja walja jisktʼanakaw utji. Niyakejjay jumajj Biblian yatichäwinakap yatjjstajja, uka jisktʼanakat yaqhep jisktʼanaka qhanañchañajj janiw jumatak chʼamäkaniti. Ukampis janiw uka jisktʼanakaru qhanañchañak yatiñamäkiti, jan ukasti kunats ukham qhanañchta uks yatiñamarakiwa. Guías de estudio yanaptʼajja, Biblian jiskʼa tʼaqanakap thaqtañataki ukhamarak uka jiskʼa tʼaqanakat kunsa amuyta uk qellqtʼañatakiw maytamjja. Ukaw kunjamsa mayninakan jisktʼatajj qhanañchtʼäta uk amuytʼañatak  yanaptʼätam. Guías de estudio uka yanaptʼajja, walja wayn tawaqonakaruw kuntï Diosan Arupat yateqapki ukar jukʼamp confiyañatak yanaptʼaski. Jumajja, Bibliat sapak yatjjatkasaw uka yanaptʼanakamp yatjjatasma.

⁹ Janïr bautisaskasajja, juma pachpaw Biblian cheqa yatichäwinakapat jan pächasiñatak chʼamachasiñama. Mä kullakajj akham siwa: “Janïr bautisaskasajja, kutin kutiniw Diosan Arupat yatjjatayäta, ukaw cheqa religionankatajat jan pächasiñatak yanaptʼitäna. Jichhasti, sapürutjamaw cheqa religionankataj jukʼamp amuyasta” sasa.

10. Bautisat mä cristianojja, ¿kunatsa Diosar iyawsatapjja luräwinakamp uñachtʼayañapa?

¹⁰ Diosan Arupajj akham siwa: “Iyawsañajja, janitejj luräwinak toqe uñachtʼayaski ukkhajja, uka iyawsaña sapakejj jiwatawa” sasa (Sant. 2:17). Diosar taqe chuyma iyawsatamjja, luratanakampiw uñachtʼayañama. Jehová Diosajja, ‘Jupar katuyasita’ ukhamarak ‘Jupa chuym’ sarnaqasma ukwa muni (2 Pedro 3:11 liytʼañataki).

11. ¿Kunas ‘Diosar katuyasit’ sarnaqañajja?

¹¹ ¿Kunas ‘Diosar katuyasit’ sarnaqañajja? Jakäwisan qʼom sarnaqañawa. ¿Kunjamas jakäwimajja? Uka toqet amuytʼañatakejja, aka qhepa sojjta phajjsinakan kunanaksa lurawayta uk amtañäni. ¿Janïr kun lurkasasa, “kunatejj walïki, jan walïkaraki” uk yatitam amuyawaytati? (Heb. 5:14). ¿Yateqer masinakamampi yantʼata uñjasisajj uka yantʼanakapar saykatawaytati? ¿Jehová Diosan Testigopjamat sarnaqta, jan ukajj yateqer masinakamampi jan jiskʼachayasiñ laykojj jupanakjamach sarnaqta? (1 Ped. 4:3, 4). Cheqansa taqeniw pantjasirïtanjja, Jehová Diosar walja maranak servirinakatakisa, ‘Jehová Diosan serviripätwa’ sañajj chʼamakïspawa. Ukampis taqe khitinakatï Diosar jakäwip katuyasipki ukanakajja, Jehová Diosan markapankatapat janiw phenqʼasipkiti, jan ukasti sum sarnaqasaw Diosan serviripätap uñachtʼayapjje.

12. 1) ¿Kunanak lurasas ‘Dios chuymätas’ uñachtʼaysna? 2) ¿Kunjamsa ukanak lurañ uñjañama?

¹² ¿Kunanak lurasas ‘Dios chuymätas’ uñachtʼaysna? Mä qawqhajj akanakäspawa: Tantachäwinakaru saraña, arunakapat yatiyir saraña, sapäkasinsa Diosar oracionan mayisiña, Arupat yatjjataña. Diosar jakäwip katuyasir jaqejja, janiw ukanak lurañajj wali chʼamäkaspas ukham amuykiti. Jan ukasti kunjamtï David reyejj amuykäna ukhamarak amuyi, jupasti akham sänwa: “Dios Tatitojjay, munañam lurañaw kusisiyitu; yatichäwinakamajj chuymajjankiwa” sasa (Sal. 40:8).

13, 14. 1) ¿Kuna yanaptʼas ‘Dios chuyma’ sarnaqañatak yanaptʼiristam? 2) Uka yanaptʼajja, ¿kunjamsa walja wayn tawaqonakar yanaptʼawayi?

¹³ ¿Kunas ‘Dios chuyma’ sarnaqañatak yanaptʼiristam? Kunsa wayn tawaqunakax yatiñ munapxi sat payïr libronjja, mä yanaptʼaw 308, 309 jananakapan utji. Uka jananakanjja, aka jisktʼanakaru qhanañchañatakiw maytam: “¿Kuna toqenakatsa Diosar mayisiñ yatta? ¿Parlatamajj Jehová Diosar munasitamti uñachtʼayi? ¿Sapaki Bibliat yatjjatasajj kuna toqetsa yatjjatta? ¿Awk taykamajj jan mistupki ukhasa jumajj jaqenakar yatiyir sartati?”. Janiw ukakïkiti, jan ukasti Diosar jukʼamp sum mayisiñatakisa, Bibliat jukʼamp sum yatjjatañatakisa, Diosan arunakap jukʼamp sum yatiyañatakisa, kun lurañsa amtaskta uka toqenakatsa uka jananakan qellqtʼasirakismawa.

¹⁴ Uka yanaptʼajja, bautisasiñ amtapki uka walja wayn tawaqonakaruw yanaptʼawayi. Amuytʼañataki, Tilda sat mä kullakajj akham siwa: “Uka jisktʼanakajja, kunanaksa bautisasiñatak lurirista uk amtañatakiw yanaptʼawayitu. Ukatsti uka amtanakaj jukʼat jukʼa phoqañatakis yanaptʼawayituwa. Janiw mä maras  paskänti, bautisasiñatakejj wakichtʼatäjjayätwa” sasa. Patrick jilatarusa uka jisktʼanakajj yanaptʼawayarakiwa, jupasti siwa: “Nayajja, kunsa bautisasiñatak lurañajäna uk yatjjayätwa. Ukampis amtanakaj qellqtʼañajja, jukʼamp chʼamachasiñatakiw yanaptʼawayitu” sasa.

15. ¿Kunatsa Diosar jakäwi katuyasiñajj sapa maynitäjjewa sasin sistanjja?

¹⁵ Kunsa wayn tawaqunakax yatiñ munapxi sat libronjja, yaqha jisktʼaw utjaraki, uka jisktʼajj akham siwa: “Amigonakamas jan ukajj awk taykamas Jehová Diosar jan loqtañ munjjapjjaspati ukhajja, ¿jumajj Jehová Diosar loqtaskakismati?” sasa. Amtapunim, sapa mayniw Diosarojj cuenta churañäni. Jehová Diosamp sum apasiñajj janiw kuntï amigonakamasa, awk taykamas lurapki ukarjamañapäkiti, jan ukasti jumaw Diosampi sum apasiñatakejj chʼamachasiñama. Kuntï yateqkta ukajj jumatak cheqächi ukajja, ‘Diosar katuyasita’ ukhamarak ‘Jupa chuymaw’ sarnaqäta. Ukaw Diosan mayitanakapar respetañ munatamsa, bautisasiñ munatamsa uñachtʼayani.

16, 17. 1) ¿Kunatsa maynejj bautisasiñapa ukhamarak Jesusan arkiriparus tukuñapa? 2) ¿Kunas Jesusan jiwataparojj jukʼamp askit uñjañataki yanaptʼätam? Uk mä uñachtʼäwimp qhanañchtʼam.

¹⁶ Moisesan Leyinakapat yatjjattʼat mä jaqejj akham sasaw Jesusar jisktʼäna: “Yatichiri, ¿kawkïr mandamientos taqet sipansa wali jachʼajja?” sasa. Jesusasti juparojj akham sasaw säna: “[Jehová] Tatit Diosamaruw munäta taqe chuymamampi, taqe almamampi, taqe amuyumampiraki” sasa (Mat. 22:35-37). Uka arunakarjamajja, maynitï bautisasiñ munchi ukhamarak Jesusan arkiripar tukuñ munchi ukhajja, Diosarojj wal munasiñapa. ¿Kunjamatsa jumajj Jehová Diosar jukʼamp munasisma? Jehová Diosajj juchampita jiwañampita jiwasar qhespiyañataki Yoqapar khitaniwayki uka toqetwa lupʼiñama (2 Corintios 5:14, 15; 1 Juan 4:9, 19 liytʼañataki). Uka toqet lupʼïta, ukhamarak Jesusan jiwatapajj kunjamsa yanaptʼistu uka toqets lupʼirakïta ukhajja, kuntï Jehová Diosajj juma layku lurawayki ukarojj sapürutjamaw jukʼamp askit uñjäta.

¹⁷ Jesusan jiwas layku jiwataparojj wali askitwa uñjañama. Uk sum amuytʼañatakejj aka toqet parltʼañäni. Uman niyas jiwañampïkasma ukham amuytʼam, ukhaman uñjasitamat maynejj qhespiyiristam ukhajja, ¿wañsuyasisajj ukhamakit jan yuspärasis sarawayjjasma? ¿Umar jalantatamatsa armasjjasmati? Janiwa. Antisas jiwañat jumar qhespiyatapatjja, uka jaqer wal yuspärasma. Jehová Diosampi Jesusampiw juchampita jiwañampita  qhespiyapjjestu, ukhamatwa Paraison wiñayataki jakasiñäni. Ukhamasti jupanakarojj wal yuspärañasa.

18, 19. 1) ¿Kunatsa Diosar jakäwim katuyasiñ jan ajjsarañamäki? 2) Diosar servïta ukhajja, ¿kunjamsa jakasïta?

¹⁸ Kuntï Jehová Diosajj juma layku lurawayki ukar ¿kunjamsa yuspäratam uñachtʼayasma? Diosar jakäwim katuyasisa ukhamarak bautisasisaw yuspäratam uñachtʼayasma. Jehová Diosar jakäwi katuyasisajja, ‘munañam wiñayatakiw luräjja’ sasaw maynejj arsu, uk janipuniw armañamäkiti. Diosar jakäwim katuyasiñsa janiw ajjsarañamäkiti. ¿Kunatsa? Jehová Diosajj jumat llakisiwa, ukatjja jumatï Jupar jakʼachasiñatak chʼamachasïta ukhajja, Jupajj bendicïtamwa (Heb. 11:6). Diosar jakäwim katuyasïta bautisasirakïta ukhajja, jukʼamp sumaw jakasïta. Mä jilatajja, janïr qʼajjo waynäkasinwa bautisasïna. Jichhasti 24 maranëjjasajj akham siwa: “Nayatï mä qawqha maranakampi suytʼiriskayäta ukhajja, bautisasiñ toqet jukʼamp sumwa amuyiriskayäta. Ukampis aka pachan utjki uka sipitanakar jan puriñatakiw bautisasiñajj yanaptʼawayitu” sasa.

¹⁹ Jehová Diosajj jumat wal llakisi, ukampis Supayajj taqe kunsa jupatakikiw muni. Supayajj janiw kuna suytʼäwinïkisa, janirakiw kuna askinaksa jaqenakar churkaspati. Ukhamasti munañap lurapki ukanakarojj janiw kuna suytʼäwsa churkaspati. Jupajj jiwayataw uñjasini, jupar arkirinakas ukhamanwa uñjasipjjarakini (Apo. 20:10).

20. ¿Kunsa Jehová Diosar jakäwin katuyasiñatakisa bautisasiñatakisa lurasma? (“ Jehová Diosamp sum apasiñamatak yanaptʼanaka” siski uka recuadro uñjjattʼäta).

²⁰ Diosar jakäwis katuyasiñat sipan yaqha luräwejj janipuniw utjkaspati. ¿Jumajj uk lurañatak wakichtʼatäjjtati? Jan jukʼamp suyamti. Ukampis jan wakichtʼatjamäksta ukhajja, aka yatichäwin yatjjatawayktan ukarjamaw ajay toqen jiltaskakisma. Apóstol Pablojja, ukham lurapjjañapatakiw Filipos markankir cristianonakar ewjjtʼäna (Fili. 3:16). Jumatï uka ewjjtʼarjam luräta ukhajja, Diosar jakäwin katuyasiñsa bautisasiñsa munätawa.