1, 2. 1) Mateo 24:12 qellqatan Jesusan arunakapajja, ¿kunapachas nayraqat phoqasïna? 2) ¿Nayrïr cristianonakat jila partejj Diosar taqe chuyma munasisipkakitap kunjamsa Hechos librojj uñachtʼayi? (Aka paginankir dibujo uñjjattʼäta).

JESUSAJJ aka Oraqenkkäna ukhajja, ‘akapachan tukusiñap urunakankatas’ kunjamatsa jaqenakajj yatipjjaspa ukwa qhanañchäna. Qhepa urunakanjja, waljanin ‘munasiñapaw chhaqtani’ sasaw säna (Mat. 24:3, 12). Nayrïr patak maranakan jakiri judionakajj Diosan markapanktwa sapkchïnsa, Diosarojj janiw taqe chuyma munasjjapjjänti.

² Ukampis uka tiempon jakiri cristianonakat waljanejj janiw ukhamäpkänti. Jupanakajj taqe chuymaw ‘Jesucristjjat yatichapjjäna’, Diosarusa, jilat kullakanakarusa, Diosar jan serviri jaqenakarus munasipjjänwa. Uka cristianonakajj taqe chuymaw Diosar munasisipkakïna (Hech. 2:44-47; 5:42). Ukhamäkchïna ukasa, yaqhep cristianonakan munasiñapajj janiw utj-jjänti. ¿Kunjamatsa uk yattanjja?

3. ¿Kunatsa yaqhep cristianonakan munasiñapajj chhaqtjjpachäna?

 ³ Éfeso markan jakiri nayrïr cristianonakarojja Jesusajj akham sänwa: “Qalltan utjkäyätams uka munasiñamajj janiw utjkjjtamti” sasa (Apo. 2:4). Éfeso markankir cristianonakajja, inas uka markan jakiri jaqenakat yateqasipjjchïna, jupanakajj askipakwa nayraqat thaqapjjerïna (Efe. 2:2, 3). Éfeso markankir jaqenakajj wali qamirïpjjänwa, walja cosasanakani, suman jakasiñaw jupanakatak jukʼamp wakiskirïnjja. Maysa toqetjja, jupanakat waljaniw qʼañu luräwinakan sarnaqapjjäna, Diosan leyinakaparus janiw respetapkänti. Diosaru jaqe masiparu taqe chuyma munasiñat sipansa, kʼuchirtʼasiñatakikiw tiempo apsupjjerïna.

4. 1) ¿Kunjamsa jaqenakan munasiñapajj jichhürunakan chhaqtawayjje? 2) ¿Khitinakarus munasiskakiñasa?

⁴ Jesusan arunakapajj jichhürunakanwa phoqasiraki. Jaqenakajj janiw nayrjam Diosar munasjjapjjeti. Jan walinak askichañataki Diosan yanaptʼap thaqañat sipansa, jaqen uttʼayata organizacionanakaruw yanaptʼa mayipjje. Cheqas jaqenakan munasiñapajj thayaraskiwa. Kunjamtï Éfeso markankiri cristianonakan munasiñapajj jan utj-jjänjja, ukhamarakiw jichha tiempon Jehová Diosan servirinakapan munasiñapajj jan utj-jjaspati. Aka yatichäwinjja, kunatsa munasiñasajj jan chhaqtañapäki uk kimsa toqet yatjjataskañäni: 1) Jehová Diosar munasiña, 2) Biblian cheqa yatichäwipar munasiña, 3) jilat kullakanakar munasiña.

5. ¿Kunatsa Diosar munasiñasa?

⁵ ¿Khitirus jukʼamp munasiñasa? Jesusajj akham sänwa: “‘Tatit Diosamaruw munäta taqe chuymamampi, taqe almamampi, taqe amuyumampiraki’. Akawa taqet sipansa jachʼa mandamientojja” sasa (Mat. 22:37, 38). Diosar munasiñaw mandamientonakap phoqañatakisa, aguantañatakisa, jan walinak uñisiñatakis yanaptʼistu (Salmo 97:10 liytʼañataki). Ukampis Supayasa, jupan apnaqata akapachasa Diosat jitheqtañasa, Diosar jan munasiñaswa munapjje.

6. ¿Jaqenakajj Diosar jan munasjjapjje ukhajj kunas pasi?

⁶ Akapachankir jaqenakajja, kunas cheqpach munasiñajja uk janiw amuyjjapjjeti. Diosar munasiñat sipansa, jupanakakiw jaqëñ munapjje (2 Tim. 3:2, MT). Jupanakajja, “janchin jan wali munañanakapa, kuntejj nayrajj uñjkis ukansa munañanaka, jachʼa jachʼa tukuñanaka[kwa]” thaqapjje (1 Juan 2:16). Mayni pachpatak llakisisajja, kuna jan walinsa uñjasipjjaspa ukwa apóstol Pablojj qhanañchäna. Jupajj akham sänwa: “Akapachankkis ukanakat llakisiñajja jiwañar apiriwa [...]. Janchin jakañat llakisirinakajja Diosan uñisiripäpjjewa” sasa (Rom. 8:6, 7). Khitinakatï qollqe thaqañaru, jañchin munañanakapa lurañaru chuym uchapki ukanakajj llakinakanwa uñjasipjje (1 Cor. 6:18; 1 Tim. 6:9, 10).

7. ¿Kuna amuyunakampis cristianonakajj apayasipjjaspa?

⁷ Diosajj janiw utjkiti sirinakasa (ateos), Diosar janiw khitis uñtʼkaspati sirinakasa (agnósticos), evolucionar creyirinakasa, Diosar jan munasiñataki, jan creyiñatakiw jaqenakar chʼamañchapjje. Jan amuytʼasirinaka, jan suma yatjjatatanakakiw Diosar creyipjje sasaw sapjje. Jaqenakat waljanejja, taqe kun Luririru respetañat sipansa, cientificonakarukiw respetapjje (Rom. 1:25). Cristianonakas uka amuyump apayasiraksnawa. Ukhamäspajja, Jehová Diosamp sum apasitasajj aynachtʼaspawa, janirakiw munasjjsnati (Heb. 3:12).

8. 1) ¿Kunanakas Jehová Diosan mä serviriparojj aynachtʼayaspa? 2) ¿Kunjamsa Salmo 136 qellqatan utjki uka arunakajj chuymachtʼistaspa?

 ⁸ Niyakejjay Supayan apnaqat akapachan jakstanjja, kunayman jan walinak utjipanwa aynachtʼata uñjassna (1 Juan 5:19). Jiwasatï aynachtʼata sarnaqañänejja, Diosarojj janiw taqe chuyma confiyjjsnati ni munasjjsnasa. Chuymankipstan, usunttan, qollqet pistʼat uñjastan ukhaw ukajj pasarakispa. Jan ukajj munkayätan ukarjam jan lurirjamätas amuyasaw llakita uñjasiraksna. Amtkayätan ukarjam jan phoqasitap uñjasasa aynachtʼaraksnawa. Kunayman jan walinakan uñjaskañäni ukhasa, Jehová Diosas jaytjkistaspa ukham janiw amuyañasäkiti. Salmo 136:23 qellqatan utjki uka chuymachtʼkir arunak amtapuniñäni, ukanjja Diosat akham siwa: “Aynachtʼañasan jiwasanakat amtasiri[wa]: khuyapayasiñapajj wiñayawa” sasa. Jehová Diosajj mayisitanakas istʼistuwa, yanaptʼarakistaniwa, uk janipun armapjjañäniti (Sal. 116:1; 136:24-26).

9. ¿Kunas Pablorojj Diosar taqe chuyma munasiskakiñatak yanaptʼäna?

⁹ Apóstol Pablojj Jehová Diosan mä serviripänwa, kunjamsa Jehová Diosajj jan aynachtʼañapatak yanaptʼäna uk amtañaw Diosat jan jitheqtañatak yanaptʼäna. Ukatwa akham säna: “Tatituw yanaptʼirejjajja; janiw kuntejj jaqejj lurkitaspa ukjj ajjsarkäti” sasa (Heb. 13:6). Jan walinakamp jan aynachtʼañatakejja, Pablorojj Diosar confiyañaw yanaptʼäna. Jan walinakan uñjaskasas Jehová Diosar confiyaskakïnwa. Carcelan jistʼantatäkasasa, Pablojj tamankir jilat kullakanakar chʼamañchtʼañatakejj cartanak apayäna (Efe. 4:1; Fili. 1:7; File. 1). Kunayman jan walinakan uñjaskasasa, Jehová Diosarojj taqe chuymaw munasiskakïna. “[Diosaw] chuymachirisasa. Taqe tʼaqhesiñanakasanwa Diosajj chuymachistu” sasaw confiyarakïna (2 Cor. 1:3, 4). ¿Kunanakansa Pablot yateqassna?

10. ¿Kunas Jehová Diosar taqe chuyma munasiskakiñatakejj yanaptʼistani?

¹⁰ Jehová Diosar taqe chuyma munasiskakiñatakejj kun lurañas wakisi ukwa Pablojj qhanañchäna, jupajj sänwa: “Jan inaktʼas orapjjam” sasa. Qhepatsti akham sarakïnwa: “Janirak Diosat oracionan mayisiñjja armasipjjamti” sasa (1 Tes. 5:17; Rom. 12:12). ¿Kunatsa orasiñajj Diosar jakʼachistu? Orasktan ukhajja, Jehová Diosampiw parltanjja, ukaw Jupamp sum apasiñatak yanaptʼistu (Sal. 86:3). Kunatï amuyusansa, chuymasansa utjki uk Jehová Diosar yatiyktan ukhajja, Juparojj jukʼamp jakʼachastanjja (Sal. 65:2). Kunjamsa mayisitasar istʼistu uk uñjasajja, jukʼampiw Diosarojj munasiñäni. “Tatitojj artʼasirinakapan jakʼapankaskiwa” uk janipun armapjjañäniti (Sal. 145:18). Jehová Diosar munasiña ukhamarak yanaptʼap thaqañaw kuna jan walinakantï jichhasa, jutïrinsa uñjaskañäni ukanakamp jan aynachtʼañatak yanaptʼistani.

11, 12. ¿Kunas Biblian cheqa yatichäwinakapar munasiñatakejj yanaptʼistaspa?

¹¹ Cristianonakajja, Diosan Arupan utjki uka cheqa yatichäwinakarojj wal munastanjja. Jesusajj Awkipar akham sänwa: “Arunakamasti cheqawa” sasa (Juan 17:17). Biblian cheqa yatichäwinakapar munasiñatakejja, Bibliajj kunsa yatichi ukwa yatiñasa (Col. 1:10). Janiw uk lurañakejj wakiskiti, kunamp lurañas wakisi uk yatiñatakejj Salmo 119 qellqataw yanaptʼistaspa (Salmo 119:97-100 liytʼañataki). Biblian liytʼktan ukjjat sapüruw lupʼiñasa ukhamarak amuytʼañasa.  Biblian cheqa yatichäwinakaparjam sarnaqañajj kunjamsa yanaptʼistu uk amuytʼasajj jukʼampiw Diosan Arupar munasiñäni.

¹² Salmo qellqerejj akham sänwa: “Arunakamajj lakajjatak wali mojjsawa: miskʼit sipan jukʼampiwa” sasa (Sal. 119:103). Diosan markapajj Bibliat apstʼat qellqatanak wakichki ukajj mä suma manqʼar uñtasitawa. Wal gustkistu uka manqʼjja wali sum manqtʼasiñ muntanjja. Diosan Arupat sum yatjjatañatakejj ukhamarakiw tiempo apstʼasiñasa. Ukhamatwa “suma arunaka” katoqañäni, janirakiw armtʼaskañäniti, yaqhanakarus yanaptʼarakiñäniwa (Ecl. 12:10).

13. ¿Kunas Jeremiasarojj Diosan arunakap taqe chuyma katoqasiñatak yanaptʼäna? ¿Kunatakis ukajj yanaptʼarakïna?

¹³ Jeremías profetajj taqe chuymaw Diosan arunakap katoqasïna. Jupajj akham sänwa: “Kunapachatejj jumajj nayaru parljjayista ukapachajja, arunakamjja nayajj manqʼjamwa manqʼayäta; uka arunakamaw chuymajjarojj kusisiyarakïnjja, nayasti jumankarakstjjaya, taqe chʼamani Dios Tatitu” sasa (Jer. 15:16). Jeremiasajj Diosan arunakapar wal munasïna ukatsti lupʼirakïnwa. Maysa toqetjja, Diosan sutipjjaru yatiyañ wali askit uñjäna. Jiwasatï Biblian cheqa yatichäwinakapar munasiñäni ukhajja, Jehová Diosan Testigopäñsa, Diosan Reinopat aka qhepa urunakan yatiyañsa wali askit uñjarakiñäni.

14. Biblian cheqa yatichäwinakap jukʼamp munasiñatakejja, ¿kunsa luraraksna?

¹⁴ Biblian cheqa yatichäwinakapar jukʼamp munasiñatakejja, ¿kunas yanaptʼarakistaspa? Tantachäwinakarojj sarañasapuniwa, ukanwa Jehová Diosar munasiñatakejj yatichistu. Yatiyañataki revista sapa semana Bibliampi yatjjatktan ukaw cheqa yatichäwinakar munasiñatakejj jukʼamp yanaptʼarakistu. Uka tantachäwin sum yateqañatakejja, wakichtʼasiñasawa. Textonaksa taqpach thaqtañasa. Aka tiemponjja, Yatiyañataki revistajj tabletaru jan ukajj celulararuw apaqasispa, Internetan jw.org uka cheqansa JW Library programansa walja arunakanwa liyiñatak utj-jje. Tabletansa, celularansa textonak jankʼakiw katjsna. Kunjam yatjjatkasasa, Bibliat wali  amuyumpiw liytʼañasa ukhamarak lupʼiñasa, ukaw cheqa yatichäwir jukʼamp munasiñatak yanaptʼistani (Salmo 1:2 liytʼañataki).

15, 16. 1) Juan 13:34, 35 qellqatanjja, ¿kuna mandamientsa Jesusajj churäna? 2) Jehová Diosaru, Biblian cheqa yatichäwinakaparu munasiñajja, ¿kunatakis yanaptʼistu?

¹⁵ Jiwañapäkäna uka arumajja, Jesusajj akham sasaw discipulonakapar säna: “Aka machaq mandamientwa churapjjsma: Maynit maynikama munasipjjam. Kunjämtejj nayajj munasipjjsma, ukhama jumanakajj maynit maynikam munasipjjañamarakiwa. Jumanakatejj maynit maynikama munasipjjätajja, taqeniw amuyapjjani nayan discipulonakajjäpjjatama” sasa (Juan 13:34, 35).

¹⁶ Jehová Diosar munastanjja, jilat kullakanakar munasirakiñäniwa. Diosar jan munaskstanjja, janirakiw jilat kullakanakar munasksnati. Jilat kullakanakar jan munaskstanjja, janirakiw Diosar munasksnati. Apóstol Juanajj akham sänwa: “Maynitejj jilapar uñjkasina jan munkchejja, ¿kunjämatsa Diosarojj munaspa jan uñjasajja?” sasa (1 Juan 4:20). Biblian cheqa yatichäwinakaparu munastanjja, Jehová Diosarusa jilat kullakanakarus munasirakiñäniwa. ¿Kunatsa ukham sistanjja? Biblian yatichäwinakaparutï munastanjja, Bibliankir mandamientonaksa phoqarakiñäniwa. Sañäni, Biblianjja Jehová Diosaru jilat kullakanakar munasim sistuwa (1 Ped. 1:22; 1 Juan 4:21).

17. ¿Kunanak lurasas jilat kullakanakar munasiñamp yanaptʼsna?

¹⁷ (1 Tesalonicenses 4:9, 10 liytʼañataki). ¿Kunanak lurasas tamasankir jilat kullakanakar munasiñamp yanaptʼsna? Inas mä jilïri jilatasa jan ukajj kullakas tantachäwinakar sarañataki, utar kuttʼañatak yanapa munchispa. Yaqhep viuda kullakanakajja utap askichañatakiw yanaptʼa munapjjaspa (Sant. 1:27). Llakita, aynachtʼata, jan ukajj jan walinakan uñjasipki uka jilat kullakanakaruw chuymachtʼañasa munasiñamp yanaptʼañasaraki (Pro.  12:25; Col. 4:11). ‘Tamankir’ jilat kullakanakar munasitasajj luratanakasana arunakasanwa amuyasi (Gál. 6:10, NM).

18. Jilat kullakanakamp jan waltʼayasiñäni ukhajja, ¿kunas jankʼak askichañatakejj yanaptʼistani?

¹⁸ Supayan apnaqat aka “qhepa urunakanjja”, jaqenakat waljanejj jupanakan askipak thaqeri, jukʼamp muniri ukhamäpjjaniwa sasaw Bibliajj qhanañchi (2 Tim. 3:1, 2). Cristianonakajja Jehová Diosaru, Bibliaru, jilat kullakanakaru jukʼamp munasiñatakejj chʼamachasiñasawa. Ukampis pantjasirïtas laykojja, awisajj jilat kullakanakamp jan waltʼayasiñaw utjaspa. Maynit mayni munasitasatwa jan waltʼayasiñanak munasiñampi jankʼak askichañasa (Efe. 4:32; Col. 3:14). ¡Munasiñasajj janipun chhaqtpanti! Jehová Diosarusa, Bibliarusa, jilat kullakanakarus taqe chuyma munasiskakiñäni.