AWK taykajajj 1910 maranwa Tbilisi, Georgia markat Canadá markar sarjjapjjatayna. Ukansti Pelly, Saskatchewan marka jakʼankir chʼojjña pampanwa mä jiskʼa granjan utjnoqapjjäna. Nayajj 1928 maranwa nasta, pä jilani kimsa kullakaniyätwa. Tatajajj nasiñajatak sojjta phajjsinak faltkipanwa jiwjjatayna, mamajasti mä maranïskayäta ukhaw jiwarakïna. 17 marani, Lucy sat jilïr kullakajasti mä jukʼa tiempotwa jiwjjarakïna. Ukatwa Nick tiojajj nayampiru jilanakajampir kullakanakajampir uñj-jjapjjetäna.

Pä maranïkayäta ukhajja, orqo caballon wichʼinkhap jiyaskir uñjanisajj matʼaqtʼayasiniwa sasaw familiajajj wali sustjata artʼanipjjatayna, nayajj janiw jupanakar uñtkayätti ukatwa jan istʼkayätti. Caballojj janiw matʼaqtʼkitänti, ukampis ukürukiw familiajajj oqarätaj amuyapjjäna.

Familiajan mä amigopaw oqar wawanakatak utji uka escuelar apapjjañamaw wakisispa säna, ukatwa Nick tiojajj Saskatoon (Saskatchewan) markankir escuelar qellqayanitäna. Ukajj utajat jayankänwa. Phesqa maranïkayäta ukhaw uka markar apapjjetäna, walpun ajjsarirïta. Familiajarojj feriadonakana, vacacionan visitirïta. Tiempompejj lenguaje de señas yateqayäta, mayni wawanakampis anatarakirïtwa.

Marion kullakajajj Bill Danylchuck jilatampiw 1939 maran casarasïna, jupanakaw nayampir Frances kullakajampir uñj-jjapjjetäna. Jupanakarakiw Jehová Diosan Testigonakaparojj nayraqat uñtʼapjjäna. Vacacionat utar sarirïkta ukhajj Bibliat yatichañatakiw chʼamachasipjjeri. Janiw lenguaje de señas yatipkänti, ukatwa  kamsapjjesa uk amuyañajj chʼamakïna, ukampis Bibliat yateqañ munataj amuyapjjpachänwa. Jupanakajj Biblian siski ukarjam sarnaqapjjatapwa amuyayäta, ukatwa jupanakamp chikajj Diosan arunakap yatiyir sarirïta. Ukatsti bautisasiñ munayäta, ukatwa septiembre 5, 1941 marajj uma pozot apsuta mä tinan Bill cuñadojajj bautisitäna. ¡Umajj wali thayapunïnwa!

Khä 1946 maran vacacionat utar sarkayäta ukhajja, Cleveland, Ohio (Estados Unidos) markan apaskäna uka jachʼa tantachäwiruw sarapjjta. Qalltanjja kullakanakajaw discursonak amuyañajätakejj qellqtʼapjjerïna. Ukampis qhepürutakejja, oqar jilat kullakanakatak mä kullaka tradusiskatapwa yatipjjayäta. Ukajj wali kusiskañapunïnwa, ukürupuniw Bibliajj kuntï cheqpachapun yatichki uk sum amuyayäta.

Ukhanakaw Segunda Guerra Mundial sat guerrajj tukuyaskäna, ukatwa markap arjjatiri jaqenakajj utjäna. Jachʼa tantachäwit kuttʼanjjayäta ukhajja, escuelansa Diosar taqe chuyma serviñ amtawayta. Ukatwa banderar aruntañatakejj himno nacional jan cantjjayätti. Escuelan fiestachapkäna ukanakar janiw sarjjayätti, religiosonakajj tantachasipkäna ukanakarus janirakiw sarjjayätti. Escuelan trabajirinakajj wal colerapjjäna, toqepjjetänwa kʼarinak sapjjarakitäna. Uk uñjasaw compañeronakajajj wal jisktʼapjjetäna, ukhamatwa Diosan arunakap jupanakar yatiyayäta. Compañeronakajat kimsaniw Jehová Diosar jakʼachasiwayapjje, Larry Androsoff, Norman Dittrick, Emil Schneider, jupanakajj jichhakamaw Diosar taqe chuyma servisipki.

Yaqha markanakar sarasajj oqaranakar Bibliat yatiyañatakiw chʼamachasirïta. Montreal markan oqaranakajj tantachasipkäna ukaruw sarayäta, ukanjja Eddie Taeger waynaruw yatiyta, jupajj mä pandillankänwa. 2016 maran jiwjje, ukhakamaw Laval, Quebec markankir lenguaje de señas taman serviwayi. Juan Ardanez sat waynaruw uñtʼarakiyäta, jupajj Berea markankir cristianonakjamaw Diosan Arupajj cheqäskapuniti janicha uk yatjjatirïna (Hech. 17:10, 11). Qhepatsti bautisasjjänwa, Ottawa, Ontario sat markanwa jilïr irpirjamajj jiwañapkam Diosar taqe chuyma serviwayi.

Vancouver markaruw 1950 maran sarjjayäta. Oqaranakar yatiyañajj wal gustitäna, ukampis mä kutejj istʼiri Chris Spicer sat warmiruw callen yatiyta. Jupajj revistanak sapa phajjsi katoqañatakiw qellqayasitu, ukatsti Gary esposopar  uñtʼañajwa wal munäna. Ukatwa utapar visittʼir sarta, wali jayaw parltʼapjjayäta, jupanakajj qellqtʼasipjjarakïnwa. Ukatsti janiw mayampsa jupanakamp jikisjjapjjayätti. Walja maranak qhepatwa Toronto, Ontario markan apaskäna uka jachʼa tantachäwin jikisipjjta. Gary jilatajj uküruw bautisasiskäna. Uka experienciajja, kawkhansa Diosat yatiyañajj wali wakiskirïtapwa amtayitäna, kunattejj kawkhanjjay jathajj jiltchini uk janiw yatktanti.

Qhepatjja, Saskatoon markaruw kutʼjjayäta, ukanjja mä warmiw gemela oqar wawanakajar Bibliat yaticharapita sitäna, jupanakajj Jean, Joan Rothenberger satäpjjänwa. Sarkayäta uka escuelaruw jupanakajj sarapjjarakïna. Kuntï Bibliat yateqapkäna ukanakjja jankʼakiw escuelan yatiyapjjäna. Qhepatsti, phesqa amiganakapaw Jehová Diosan Testigopäjjapjjäna. Jupanakat maynejj Eunice Colin satänwa, juparojj escuela tukuyaskayäta uka maraw uñtʼayäta, mä jiskʼa dulce wajjtʼitäna, amigösnati sasaw jisktʼarakitäna. Tiempompejj jupaw munat esposajajjäna.

Bibliat yateqaskatap yatisajja, Eunicen mamapajj directorampiw jan yateqjjañapatak parlayäna. Bibliat yatjjatañatak qellqatanaksa aparayänwa. Ukhampachasa, Eunicejj Jehová Diosar serviñ amtäna. Bautisasiñ munäna ukhajja, “Jehová Diosan Testigopjam bautisasïtajja, aka utat sarjjätawa” sasaw awk taykapajj sapjjäna. 17 maraniw utapat sarjjäna, Testigo mä familiaw utapar munasiñampi katoqapjjäna. Bibliat yateqaskakïnwa, ukatwa qhepat bautisasjjäna. 1960 maran casarasipkta ukarus janiw awk taykapajj jutapkänti. Ukampis tiempompejja, creencianakajatsa wawanakar kunjamsa uywapjjta uk uñjasas respetompiw uñj-jjapjjetäna.

Oqaräkasas paqallqo yoqall wawanak uywawayapjjta. Istʼiri wawanakar uywañajj chʼamakïnwa, ukampis lenguaje de señas yatichapjjayäta, ukhamat jupanakampi parltʼañataki, Bibliat yatichañataki. Tamankir jilat kullakanakajj wal yanaptʼawäpjjarakitu. Mä kutejja, mä wawajajj jan wali arunak tantachasiñ utan parlaskatapwa mä jilatajj qellqtʼasin yatiyitäna. Esposajampejj jankʼakiw wawajar ewjjtʼapjjayäta. Wawanakajat James, Jerry, Nicholas, Steven uka pusiniw familianakapampi chikajj Diosar taqe chuyma servisipki. Pusinpachaw taman jilïr irpirïpjjaraki. Nicholas yoqajajj Deborah esposapampiw Gran Bretaña markankir sucursalan lenguaje de señas arur traduccionan yanaptʼasipki. Steven yoqajasti Shannan esposapampejj Estados Unidos markan lenguaje de señas arur traduccionan yanaptʼasipkaraki.

Eunice esposajäjja, casadjam 40 maranak phoqañataki mä phajjsi faltkipanwa cáncer usumpi jiwawayjje. Jupajj walpun aguantawayi. Jiwatanakan jaktanipjjañap yatiñaw wal chʼamañchtʼawayi. Nayajj mä suma oraqen jaktaniñap walpun suyta.

Febrero 2012 maran tinkusaw caderaj pʼakjasta, janiw sapakïñ puedjjayätti. Ukatwa mä yoqajampi esposapampi jakir sarjjta. Jichhajj Calgary markankir lenguaje de señas aru parlir tamankapjjtwa, ukanjja jilïr irpirjamaw yanaptʼaskakta. Jichhapuniw aruj parlir tamankta. 1946 marat jichhakamaw inglés aru parlir tamankawayta. ¿Kunjamsa uka maranakan Diosar serviwaytjja? Jan awk taykani wawanakar uñjirïtapjja, Jehová Diosajj phoqawayiwa (Sal. 10:14). Khitinakatï entiendeñajätak qellqarapipkitäna, amuytʼayañatakis lenguaje de señas aru yateqapkäna ukanakarojj walpun yuspärta.

Cheqas awisajja, kamsapjjesa uk jan entiendesasa, oqaranakajj janis yäqatäpkaspa ukham amuyasasa, aynachtʼirïtwa, chʼamachasiskakiñsa janiw munjjerïkti. Ukhanakaw Pedrojj Jesusar siskäna uka arunak amtirïta, jupajj akham sänwa: “Tata, ¿khitirus arkapjjeristjja? Juman arunakamajj wiñay jakañ arunakawa” sasa (Juan 6:66-68). Uka tiempon jakiri mayni oqar jilat kullakanakjamaw paciencianïña yateqawayta. Jehová Diosampir markapampir pacienciampi suyañ yateqawayta, ukham suyatajätjja walja bendicionanak katoqawayta. Jichhajj arujat walja qellqatanakaw utj-jje, tantachäwinakansa, jachʼa tantachäwinakansa lenguaje de señas americano arutwa parltʼasipjjta, ukajj wali kusiskañawa. Diosar servisajj wali kusisitaw jakasiwayta.