1, 2. 1) Kuntï suyktan ukasa, kuntï akapachankir jaqenakajj suyapki ukanakasa, ¿kunansa jan kikpäki? 2) ¿Kunsa aka yatichäwin yatjjataskañäni?

JEHOVÁ DIOSAJJ sutip qollanaptayañwa arsuwayi, ukatsti alajjpachana, aka Oraqena munañap phoqasiyañwa arsuwayaraki (Mat. 6:9, 10). Ukanak phoqasiñapajj wali wakiskiriwa, taqe chuymaw suyasktanjja. Maysa toqetjja, Jehová Diosajj servirinakapar alajjpachana, jan ukajj aka Oraqena wiñay jakañ churañwa arsuwayaraki. ¡Taqe ukanak phoqasir uñjañajj wali sumäniwa! (Juan 10:16; 2 Ped. 3:13). Ukatjja, kunjamsa Jehová Diosajj aka qhepa urunakan markaparojj yanaptʼaskakini uksa uñjañ munaraktanwa.

² Iyawsañajja, mä arunjja, confiyañajja, “‘katoqäwa’ sas taqe chuymampi suytʼktans ukawa” sasaw Bibliajj qhanañchi. Iyawsäwini mä jaqejja, kuntï Diosajj arsuwayki ukajj phoqasipuniniwa sasin taqe chuymaw suytʼi (Heb. 11:1). Maysa toqetjja, akapachankir jaqenakajj kun katoqañsa wal suyapjje, jan ukajj kunanakanïñsa wal munapjjaraki, ukhamäkchisa ukanak katoqapjjaniti janicha uk janiw sum yatipkiti. Amuytʼañataki, maynejj mäki qollq jikjjatañ munasaw lotería fichanak alasispa, ukampis uka qollqe jikjjatpachäniti janicha uk janiw yatkaspati. Aka yatichäwinjja, Jehová Diosan arsutanakapar iyawsaskakiñatakejj kuns lursna ukwa  yatjjataskañäni. Ukatjja, iyawsäwejj kunjamsa jichhürunakan yanaptʼistaspa uksa yatjjatarakiñäniwa.

3. ¿Kunatsa Jehová Diosan arsutanakapajj phoqasipuniniwa sasin confiytanjja?

³ Janiw khitis iyawsäwini naskiti. Iyawsäwinïñatakejj Diosan qollan ajayupampiw yanaptʼayasiñasa (Gál. 5:22). Qollan ajayuwa Diosar jukʼamp uñtʼañatakejj yanaptʼistaspa. Diosajj wali chʼamanïtapa, ukhamarak wali yatiñanïtapa yatisajja, kuntï Jupajj arsuwayki ukjja phoqapuniniwa sasinwa confiytanjja. Jehová Diosajja, arsutanakapajj niyas phoqasjjaspa ukhamwa arsu, Jupasti akham siwa: “Taqe kunas luratäjjewa” sasa (Apocalipsis 21:3-6 liytʼañataki). “Diosajj arsutanakaparojj phoqhapuniwa”, janipuniw ukat pächasktanti (1 Cor. 1:9).

4. Diosan nayra servirinakapajja, ¿kuna suytʼäwinïpjjänsa?

⁴ Hebreos 11 jaljanjja, Diosan arsutanakapar iyawsiri 16 chachanakata ukhamarak warminakatwa parli. Ukatsti, wali iyawsäwini yaqha chachanakatsa, warminakatsa parlarakiwa (Heb. 11:39). Taqe jupanakasti, ‘mä wawaw jutani’ sasin Diosajj siskäna uka wawaruw suyasipkäna. Uka wawaw Diosan taqe enemigonakapar tukjani, aka Oraqsa mä paraisoruw tukuyani sasinwa confiyapjjäna (Gén. 3:15). Ukatjja, Diosaw jiwatat jaktayistani sasinsa iyawsapjjarakïnwa. Jesusan jan jiwatap laykojja, uka tiempon janïraw alajjpachar sarañatak suytʼäwejj utjkänti, ukhamasti uka chachanakasa, warminakasa janiw alajjpachar sarañatak suytʼäwinïpkänti (Gál. 3:16). Jan ukasti, paraisoptayat aka Oraqen wiñayatak jakasiñwa suyapjjäna (Sal. 37:11; Isa. 26:19; Ose. 13:14).

5, 6. Abraham chachasa familiapasa, ¿kunsa suyapjjäna, ukat kunsa iyawsäwinïskakiñatakejj lurapjjäna? (21 janankir dibujo uñjjattʼam).

⁵ Hebreos 11:13 qellqatajj akham siwa: “Taqe uka jaqenakajj kuntejj Diosajj churañatak arsuwaykäna uk jan katoqasaw jiwarapjje, ukampis iyawsañanïpjjatap laykojj jayatak uñtapjjäna” sasa. Jupanakajj paraison jakasiñwa suyapjjäna, niyas ukan jakasipkaspa ukhamwa amuyapjjarakïna. Diosan nayra servirinakapat maynïrejja, Abraham chachänwa. Jesusajj jupat akham sänwa: ‘Abrahamajj kusisïnwa kunatï jutïrin phoqasiñapäki uk uñjañ suyasajja’ sasa (Juan 8:56). Sara, Isaac, Jacob ukhamarak Diosan yaqha servirinakapasa, Diosan Reinopajj aka Oraqjjar apnaqkani uka tiempo phoqasiñap suyapjjarakïnwa, uka Reinon “luriripajja Diosawa” (Heb. 11:8-11).

⁶ Abraham chachasa, familiapasa, ¿kunsa iyawsäwinïskakiñatakejj lurapjjäna? Jupanakajja, Jehová Diosat yatjjatasipkakïnwa. Awisajja, Diosajj angelanak toqe, visionanak toqe, ukhamarak samkanak toqew jupanakar parlirïna. Diosan servirinakapajj kunjamsa walja maranak servipjjäna uk uñjasina, jan ukajj nayra qellqatanak liytʼasinwa Diosar iyawsañ yateqapjjpachäna. Abrahamasa, familiapasa kuntï Diosajj arskäna ukanak janipuniw armapkänti, ukanakat lupʼipjjapunirïnwa. Uk lurañajja, Jehová Diosajj arsutanakap phoqapuniniwa sasin confiyañatakiw yanaptʼäna. Ukarakiw jan walinakansa, arknaqat uñjaskasinsa Jehová Diosat jan jitheqtañatakejj yanaptʼäna.

7. ¿Kunsa Jehová Diosajj iyawsäwin jan ayñachtʼañatakejj churawayistu, ukat kunsa lurañasa?

⁷ ¿Kunas iyawsäwin jan aynachtʼañatakejj yanaptʼistaspa? Jehová Diosajj Biblia churawayistu, ukaw kuntï Diosajj jutïritak arsuwayki ukanak yatiñatakejj yanaptʼistu. Biblia toqerakiw kunsa kusisit jakasiñatakejj lurañasa uk yatsna. Cheqas Biblia sapür liytʼañasa, ukarjam sarnaqañas wal yanaptʼistu (Sal. 1:1-3; Hechos 17:11 liytʼañataki). Ukhamarusa Jehová Diosajj ‘amuyasiri, cheqapa uywata’ toqew “horasaparu manqʼa” churarakistu  (Mat. 24:45, MT). Jehová Diosan nayra servirinakapjamaw kuntï Diosajj arsuwayki ukanakat yatjjatañasa, ukhamarak lupʼiñasa. Ukaw Jehová Diosat jan jitheqtañatakisa, Diosan Reinopajj aka Oraqjjar apnaqjjani uka tiempo suytʼañatakis yanaptʼistani.

8. ¿Kunjamsa Diosar mayisiñajj iyawsäwin jan aynachtʼañatak yanaptʼistaspa?

⁸ Iyawsäwin jan aynachtʼañatakejja, ¿kunas Diosan servirinakapar yanaptʼarakïna? Diosar mayisiñaw yanaptʼäna. Kunjamsa Diosajj mayisitanakapar istʼäna uk uñjasajja, iyawsañanakapajj jukʼampiw jiltäna (Neh. 1:4, 11; Sal. 34:4, 15, 17; Dan. 9:19-21). Kunjamsa Diosajj mayisitanakas istʼasina horasapar yanaptʼistu uk uñjasajja, ukhamarakiw iyawsäwisajj jukʼamp jiljjatti (1 Juan 5:14, 15 liytʼañataki). Iyawsäwisan jan aynachtʼañatakejja Jehová Diosarojj qollan ajayup mayiskakiñasawa (Luc. 11:9, 13).

9. ¿Kunsa Diosar mayisiñasa?

⁹ Jehová Diosar mayiskasajja, janiw kuntï munktan ukak mayisiñasäkiti. Jan ukasti, mayiskasajj sapüruw yuspärañasa, jachʼañchañasaraki. Cheqas Diosajj walja toqenakatwa yanaptʼawayistu (Sal. 40:5). Maysa toqetjja, oraqpachankir jilat kullakanakatakiw mayiñasaraki. Sañäni, carcelan llawintatäpki uka jilat kullakanakatakisa, Diosan markap sarayapki uka jilatanakatakisa mayiñasawa. Kunjamsa Jehová Diosajj mayisitanakas istʼistu uk amuyasajja, iyawsäwisajj jukʼampiw jilti, jukʼampirakiw Jupar jakʼachastanjja (Heb. 13:3, 7).

10. ¿Kunas Diosan servirinakaparojj Jupat jan jitheqtañatakejj yanaptʼäna?

¹⁰ Hebreos 11 jaljanjja, apóstol Pablojj akham sänwa: “Utjarakïnwa jiwatanakaparus wasitat jaktanirinakar katoqer warminakasa. Yaqhanakajj tʼaqhesiñanwa jiwarapjjaraki libre sarnaqaña utjatap jan jaysasina, jukʼamp suma jakañar jakatatañataki” sasa (Heb. 11:35). Jiwatanakar jaktayäwa sasin Diosajj arsuwaykäna uka arunakarojja, nayra servirinakapajj taqe chuymaw iyawsapjjäna, ukatwa jan walinakan uñjaskasas Jupat jan jitheqtapkänti. Diosajj jutïrin jaktayistaniwa, wiñayatakiw aka Oraqen jakasirakiñäni sasaw jupanakajj confiyapjjäna. Amtañäni, Nabot chachasa, Zacarías chachasa, Diosar servipjjatapat qalampi kʼupjatäsaw jiwayat uñjasipjjäna (1 Rey. 21:3, 15; 2 Cró. 24:20, 21). Daniel chachajj leonanakan ukar jaqontataw uñjasïna, amigonakapasti wali parintat hornor jaqontataw uñjasipjjarakïna. Jupanakajj janiw Jehová Diosat jitheqtañ munapkänti, ukatwa jiwañ jan ajjsarapkänti. Uka chachanakajja, Diosaw qollan ajayupampi jan walinakan aguantañatak yanaptʼistani sasaw taqe chuyma iyawsapjjäna (Dan. 3:16-18, 20, 28; 6:13, 16, 21-23; Heb. 11:33, 34).

11. Iyawsäwinïpjjatap laykojja, ¿kuna jan walinakansa yaqhep profetanakajj aguantapjjäna?

¹¹ Micaya, Jeremías ukhamarak yaqha profetanakajja, jiskʼachata jan ukajj carcelanakan llawintataw uñjasipjjäna. Yaqhepanakasti Elías profetjamaw ‘wasaranakana, qollunakana, putunakana, oraq pʼiyanakana sarnaqapjjäna’. Taqe jupanakajja, jan walinakan uñjaskasasa janipuniw Diosat jitheqtapkänti, Diosajj arsutanakap phoqapuniniwa sasin taqe chuymaw confiyapjjäna (Heb. 11:1, 36-38; 1 Rey. 18:13; 22:24-27; Jer. 20:1, 2; 28:10, 11; 32:2).

12. ¿Khititsa aguantañ yateqañasa, ukat kunas juparojj aguantañatak yanaptʼäna?

¹² Jesucristow taqet sipansa jachʼa yantʼan uñjasïna, ukhamäkchïnsa Diosat janiw jitheqtkänti. ¿Kunas aguantañatakejj yanaptʼpachäna? Apóstol Pablojj akham sänwa: “Jesusasti [lawanwa] tʼaqhesi, jan uka casta jiwañaru pʼenqasisa. Jupajj yatisïnwa uka tʼaqhesitapatjja qhepürunjja kusisiñ jikjjatañapata; ukatsti Diosan tronopan kupëjjaparuw qontʼasi” sasa  (Heb. 12:2). Ukat akham sasaw Pablojj cristianonakar ewjjtʼarakïna: “Amuyapjjam Jesusana uñachtʼäwipatjja” sasa (Hebreos 12:3 liytʼañataki). Nayrïr patak maranakan jakir cristianonakajja, Jesusjamarakiw Diosar servipjjatapat jiwayat uñjasipjjäna. Ukanakat maynejj Antipas chachänwa (Apo. 2:13). Uka cristianonakajj Diosan bendicionap katoqjjapjjewa. Ukampis Diosan nayra servirinakapajj aka Oraqen wiñay jakañwa katoqapjjani (Heb. 11:35). Jesusajj 1914 maran reyjam alajjpachan uttʼayatäkäna uka qhepatjja, jiwapkäna uka ajllit cristianonakajj alajjpachan jaktayatäpjjänwa, jupanakasti Jesusampi chikaw aka Oraqjjar apnaqanipjjani (Apo. 20:4).

13, 14. Rudolf Graichen jilatajja, ¿kuna jan walinakansa uñjasïna, ukat kunas Diosat jan jitheqtañatakejj yanaptʼäna?

¹³ Diosan servirinakapat waljaniw Jesusat yateqasipjje. Kuntï Diosajj jutïritak arsuwayki ukanakatwa lupʼipjje, jan walinakan uñjasisajj janirakiw Jupat jitheqtapkiti. Rudolf Graichen jilatat amuytʼañäni, jupasti Alemania markanwa 1925 maran nasïna. Awk taykapajj uta perqaruw paraíso dibujon cuadronak uchapjjerïna, ukwa waynitükasajj uñjäna. Jilatajj akham sänwa: “Kunjamsa qamaqempi uwijampi, tigrempi cabritompi, waka qallumpi leonampejj  sum apasipjjäna, ukaw uka cuadronakat maynïrin uñjasïna, uka animalanakarojj mä jiskʼa yoqall wawakiw uñjäna” sasa (Isa. 11:6-9). Uk amtañaw Rudolf jilatarojj paraisot lupʼiñatakisa, ukar iyawsañatakis yanaptʼäna. Ukatwa Alemaniat inti jalsu toqenkiri Gestapo ukhamarak Stasi sat policianakampi walja maranak arknaqatäsin Diosat jan jitheqtkänti.

¹⁴ Rudolf jilatajj jan walinakan uñjaskasasa, janiw Diosat jitheqtkänti. Mamapajj campos de concentración Ravensbrück sat cheqanwa fiebre tifoidea usumpi jiwäna. Tatapasti janiw Jehová Diosan Testigopäjjäti sasin qhanañchir mä documentoruw firmantäna. Ukhamäkchïnsa Rudolf jilatajj janipuniw iyawsäwipan aynachtʼkänti. Carcelat mistjjasajja, tamanak tumptʼirjamaw Diosar servïna. Ukatjja, Galaad Escuelar sarañapatakiw invittʼapjjäna, Galaad Escuelatsti, Chile markaruw khitapjjäna. Ukanjja, wasitampiw tamanak tumptʼirjam Diosar servïna. Ukanwa Patsy misionera kullakampi casarasïna. Mä mara qhepatsti, asu wawapaw jiwjjäna, mä qawqha tiempotsti, esposapaw jiwjjarakïna, jupajj 43 maranikïskänwa. Kunayman yantʼanakansa uñjaskchïnjja, Rudolf jilatajj Jehová Diosat janipuniw jitheqtkänti. Chuymankipstatäsin usutas jikjjataskchïnjja, jilatajj precursorjama ukhamarak jilïr irpirjamaw Diosar serviwayäna. Rudolf jilatat jukʼamp yatiñatakejja, La Atalaya agosto 1, 1997 revistat 20 janat 25 janakama uñjjattʼäta. ^[1]

15. Jan walinakan uñjaskasasa, ¿kunjamsa jilat kullakanakajj Jehová Diosar wali kusisit servisipki?

¹⁵ Jichhürunakanjja kunayman jan walinakan uñjaskasasa, walja jilat kullakanakaw Jehová Diosar wali kusisit servisipki. Waljanirakiw ‘espadampi nuwasir jan sarañ munapjjatapat’ Eritrea, Singapur, Corea del Sur markanakan carcelan llawintat uñjasipjje (Mat. 26:52). Amuytʼañataki, Isaac, Negede, Paulos jilatanakajj Eritrea markan 20 jila maranakaw carcelan llawintatäsin tʼaqhesiyata uñjasipjje. Ukham llawintatäsinjja, janiw casarasiwayapkiti, ni awk taykaparus uñjawayapkiti. Ukhamäkipansa, Jehová Diosat janipuniw jitheqtapkiti, ni iyawsäwipansa aynachtʼapkiti. Cárcel uñjiri guardianakajj respetompiw uka jilatanakar uñjapjje. Internetan jw.org cheqanwa uka jilatanakan fotopajj uñsti, jupanakajj walsa tʼaqhesipkchejja, kusisitaw jikjjatasipjje.

16. ¿Kun lurañatakis iyawsäwejj yanaptʼistu?

¹⁶ Walja jilat kullakanakajja, janiw uka jilatanakjamajj carcelan llawintatäsin tʼaqhesiyata uñjasiwayapkiti. Ukampis waljaniw pisin jakasisa, guerranakan uñjasisa, oraq khatatinakan uñjasisa, jan ukajj yaqha ukham jan waltʼäwinakan uñjasisajj tʼaqhesiwayapjje. Yaqhepanakasti, Abraham, Isaac, Jacob, Moisés chachanakatwa yateqasipjje. Jupanakajj qamirïñat sipansa, akapachan wali uñtʼatäñat sipansa Jehová Diosar taqe chuyma serviñwa amtapjjäna. Jehová Diosar kusisit chuymampi serviskakiñatakejja, ¿kunas jilat kullakanakar yanaptʼi? Jehová Diosar taqe chuyma munasiña ukhamarak arsutanakapar iyawsañaw yanaptʼi. Jehová Diosajj jupat jan jitheqtiri servirinakaparojj paraison wiñay jakasipjjañapatakiw jaktayani, tʼaqhesiñsa wiñayatakiw chhaqtayani (Salmo 37:5, 7, 9, 29 liytʼañataki).

17. Iyawsäwin jan aynachtʼañatakejja, ¿kunsa jumajj luräta, ukat kunsa jutïr yatichäwin yatjjataskañäni?

¹⁷ Aka yatichäwinjja, iyawsäwejj “‘katoqäwa’ sas taqe chuymampi suytʼktans ukawa” sasinwa yateqawaytanjja. Iyawsäwin jan aynachtʼañatakejj Diosaruw yanaptʼa mayiñasa, ukatsti kuntï jutïritak arsuwayki ukanakatsa lupʼiñasarakiwa. Ukhamatwa yantʼanakarojj saykatsna. Jutïr yatichäwinjja, iyawsäwinïñajj kamsañsa muni ukwa jukʼamp yatjjataskañäni.