1, 2. 1) ¿Kuna llakinakansa jichhürunakan waljanejj uñjasipjje, ukhamïpan kunjamsa jikjjatasipjje? 2) ¿Kamsasas Isaías 41:10, 13 qellqatajj chʼamañchtʼistu?

JILÏR irpir jilatampi casada mä precursorajj akham siwa: “Diosar serviñatakejj walsa chʼamachasipkstjja, walja maranakaw llakimpi aynachtʼata jikjjatasta. Janiw sum ikirjamäjjti, jañchi toqensa janiw sum jikjjatasjjti, mayninakarus janiw suma chuymampi uñj-jjti; awisajj jukʼampikiw aynachtʼta” sasa.

² ¿Kunjamas uka kullakajj jikjjatasi uk amuysnati? Ukajj wali llakkañawa, ukampis Supayan apnaqat akapachanjja, Diosar serviñan aynachtʼayirinakajj kunaymaninakaw utji. Amuytʼañataki, mä anclajja, boterojj janiw onjjtaykiti, uka anclar uñtasitaw llakinakajj aynachtʼayistaspa (Pro. 12:25). ¿Kunanakas llakisiyistaspa? Inas akanakächispa: munat familiarasan jiwatapa, wali usuta uñjasisina, jan ukajj arknaqatäsinwa llakita jikjjatassna. Qollqe toqet aynachtʼata uñjasisinwa kunjamsa familiar uñjañäni uka toqet llakissna. Qhepatjja, sinti llakisiñat Diosar serviñanwa aynachtʼjjsna, janirakiw kusisit chuymampis Diosar sirvjjsnati. Jan ukham jikjjatasiñatakejj Jehová Diosaw yanaptʼistaspa, janipun ukat pächasiñäniti (Isaías 41:10, 13 liytʼañataki).

3, 4. 1) Biblian ampara siski uka arunakajja, ¿kamsañsa muni? 2) ¿Kunanakas aynachtʼayistaspa?

³ Biblianjja, jaqejj kunsa luraspa jan ukajj kunjam chuymanisa  uk qhanstayañatakejja, awisajj amparanakata, chuymata, pʼeqeta ukat jukʼampinakatwa parli. Amuytʼañataki, Bibliajj kuna arunakantï qellqaskäna uka qellqatanakanjja, walja kutiw amparat parlasi. Maynin amparap katjjasiña siski ukajja, maynir chʼamañchtʼaña ukhamarak luräwip phoqañapatak yanaptʼaña sañwa munaspa (1 Sam. 23:16; Esd. 1:6, NM). Maysa toqetjja, nayrar sartañataki chʼamachasiña jutïritak mä suytʼäwinïña sañwa munarakispa.

⁴ Ukhamarusa Bibliajj ‘qarjata amparaninakatwa’ parlaraki, ukham sasinjja, aynachtʼata jan ukajj jutïritak janis suytʼäwinïpkaspa ukham amuyasiri jaqenakatwa parlaski (2 Cró. 15:7; Heb. 12:12). Diosar serviñan aynachtʼaskatas amuyasisasa, llakita, qarita jikjjatasisasa, janis nayrar sartirjamäjjsna ukhamwa amuyassna. ¿Kunas ukanakamp jan aynachtʼañatakejj yanaptʼistaspa? Aguantañatakisa, Diosar kusisit chuymampi serviskakiñatakisa, ¿kunas yanaptʼistaspa?

5. 1) Jan waltʼäwinakan uñjasisajja, ¿kunjamsa jikjjatassna, ukat kunsa amtañasa? 2) ¿Kunsa aka yatichäwin yatjjataskañäni?

⁵ (Sofonías 3:16, 17 liytʼañataki). Jan waltʼäwinakan uñjasisajja, janiw aynachtʼañasäkiti ni mayninakar yanaptʼañsa jaytañasäkiti. Bibliajj akham sistuwa: “Taqe llakisiñanakamsti Diosar jaytapjjarakim” sasa (1 Ped. 5:7). Jehová Diosajja, nayra Israel markarjamarakiw wali sum uñjistu. Diosajj jupanakar akham sänwa: ‘Chʼamajajj janiw tukuskiti, jan qhespiyañatakjamajja’ sasa. Cheqas ukhamawa, Jehová Diosajj Jupat jan jitheqtirinakar yanaptʼañatakejj jankʼakiwa (Isa. 59:1). Aka yatichäwinjja, Bibliankir kimsa chachanakatwa parlaskañäni. Kunjamsa Diosajj jan walinakan uñjasipkipan jupanakar chʼamañchtʼäna, kunjamsa amtap phoqasiñapatakis yanaptʼäna ukwa uñjañäni. Ukanak yatiñajj wal chʼamañchtʼistani.

6, 7. Israelitanakajj amalecitanakar atipapkäna ukatjja, ¿kunsa yateqsna?

⁶ Jehová Diosajj israelitanakar Egiptot qhespiykäna uka qhepatjja, israelitanakajj amalecitanakan jan waltʼayataw uñjasipjjäna. Ukatwa Moisesajj jan ajjsartʼiri Josué chachar akham säna: “Amalecitanakamp nuwasiri saram” sasa. Ukjjarusti Moisesajj qollu pataruw Aarón ukhamarak Hur chachanakamp saräna. Uka qollu patatwa kunjamsa israelitanakajj amalecitanakamp nuwasipjjäna uk uñjapjjäna. Uka chachanakajj ¿ajjsarañatti qollu patar sarjjappachäna? Janiwa.

⁷ Moisesajja, kunjamsa amalecitanakar atipapjjaspa ukwa amtäna. Diosan jachʼa thujrupa katusinsti altoruw aptäna. Kunapachatï Moisesajj amparap altor loqtäna ukhajja, israelitanakajj nuwasiñan atipapjjänwa. Ukampis amparap ayaqasjjäna ukhasti amalecitanakarakiw atipapjjäna. Amparanakap altoru loqtatajj Moisesajj qarjtjjänwa, ukatwa Aaronampi, Hur sat chachampejj mä qala aptanipjjäna, ukatsti uka patjjaru Moisesar qontʼayasinwa amparanakapat katjjasipjjäna, maynejja maysata maynisti maysataraki. Ukhamatwa Moisesan amparapajj inti jalantañapkamajj altor loqtatäskakïna. Kunjamtï uñjktanjja, Diosan yanaptʼapampiw israelitanakajj atipapjjäna (Éxo. 17:8-13).

8. 1) Etiopenakajj Judá markar jan waltʼayañ munapkäna ukhajja, ¿kunsa Asá reyejj luräna? 2) ¿Kunsa Asá reyit yateqsna?

⁸ Asá reyejj jakkäna uka tiemponjja, ukhamarakiw Jehová Diosajj markapar yanaptʼäna. Biblianjja, walja ejercitoni markanakatwa parli, ukampis taqe ukanakat sipansa, Zérah chachaw mä millón soldadonakanïna. Asá reyin  soldadonakapajj Zérah chachan soldadonakapat chikatakïnwa. Uk yatisajja, ¿Asá reyejj ajjsarayasisin aynachtʼpachänti? Janiwa. Jankʼakiw Jehová Diosar yanaptʼa mayïna. Walja soldadonakani ejercitorojj janiw atipaskaspati sasin amuyañjamäspänwa, ukampis ‘Diosatakejj janiw kunas chʼamäkiti’ (Mat. 19:26). Niyakejjay Asá reyejj uka tiempon Diosar taqe chuyma servchïnjja, ‘Diosajj Asá reyirusa, Judá markarusa etiopenakjjarojj atipjayänwa’ (2 Cró. 14:8-13; 1 Rey. 15:14).

9. 1) Jerusalenan perqanakap mayampi saytʼayañatakejja, ¿kunas Nehemiasar yanaptʼäna? 2) ¿Kunjamsa Diosajj Nehemiasan mayisitapar istʼäna?

⁹ Nehemiasajj Jerusalenar sarasajja, ¿kunsa uñjäna? Diosan markapar uñisiri yaqha markanakaw judionakar jan waltʼayasipkäna. Ukatwa Jerusalenan perqanakap jan lurjjapjjänti. Jan khiti arjjatirini, aynachtʼata ukhamaw judionakajj jikjjatasipjjäna. Uk uñjasajj ¿kunjamakis Nehemiasajj jikjjataspachäna? ¿Aynachtʼpachänti? Janiwa. Nehemiasajj Moisés, Asá ukhamarak Diosan mayni servirinakapjamaw Diosar taqe chuyma confiyäna. Nehemiasajj Diosaruw yanaptʼa mayïna, Diosasti mayisitapar istʼasajj judionakar chʼamañchtʼañapatakiw chʼam churäna (Nehemías 1:10; 2:17-20; 6:9 liytʼañataki). ¿Diosajj ukhamarakit jichhürunakan ‘jachʼa chʼamapampi, jachʼa luräwinakampi’ servirinakapar chʼamañchpacha?

10, 11. 1) ¿Kunanaksa jiwasar aynachtʼayañatakejj Supayajj luri? 2) ¿Kunjamsa Jehová Diosajj chʼamañchtʼistu? 3) ¿Kunjamsa Jehová Diosan yatichäwinakapajj yanaptʼawaytam?

¹⁰ Supayajja, Diosar serviñan wal aynachtʼayañ munistu. Ukatwa wal chʼamachasi. Jupajj gobiernonak toqe, religionanak toqe, ukhamarak Diosan markap contra saytʼirinak toqew kʼarinakamp aynachtʼayañ munistu. Jupajj Diosan Reinopat yatiyasiñap janiw munkiti. Ukampis Jehová Diosajj yanaptʼañwa munistu, jiwasar chʼamañchtʼañatakejj qollan ajayup churistu (1 Cró. 29:12). Supay contra ukhamarak akapach contra saytʼañatakejj Diosaruw qollan ajayupa mayiñasa (Sal. 18:39; 1 Cor. 10:13). Diosan yanaptʼapa Biblia toqe katoqasajj wali kusisitaw jikjjatastanjja. Bibliat apstʼat qellqatanak toqes walja yanaptʼanakwa sapa phajjsejj katoqtanjja. Zacarías 8:9, 13 (liytʼañataki) qellqatajja, kunapachatï Jerusalenan perqanakapajj wasitat saytʼayasiskäna ukhaw qellqasïna. Jichhürunakanjja, uka qellqatajj yanaptʼistaspawa.

¹¹ Jehová Diosajja, tantachäwinak toqe, jachʼa tantachäwinak toqe ukhamarak markapan utjki uka escuelanak toqew chʼamañchtʼistu. Kuna yatichäwinaktï ukanakan yateqktan ukanakajja, chuymatpach Diosar serviñatakiw yanaptʼistu. Jutïrin kunanaksa lurañäni uk amtañatakisa, kunanaktï cristianjamajj lurañasäki uk sum phoqañatakis yanaptʼarakistuwa (Sal. 119:32). Cheqas taqeniw Jehová Diosan yatichäwinakap katoqasajj chʼamañchtʼatäñ muntanjja.

12. ¿Kunsa jan aynachtʼañatakejj lurañasa?

¹² Jehová Diosajja, chʼam churasinwa markapar yanaptʼäna, ukhamatwa amalecitanakarusa etiopenakarus atipapjjäna. Jerusalenan perqanakap lurañ tukuyapjjañapatakisa, Nehemiasarusa judionakarus chʼam churarakïnwa. Ukhamarakiw Jehová Diosajj chʼam churasin yanaptʼistani. Yanaptʼapampejja, llakinakan uñjasisasa, uñisirinakasan jan waltʼayañ munatpachasa, jaqenakan jan istʼañ munatpachasa, suma yatiyäwinak yatiyaskakiñäniwa (1 Ped. 5:10). Ukampis Jehová Diosajj janiw mä milagro toqejj jan waltʼäwinakas chhaqtaykaniti, jan ukasti jiwasaw  chʼamachasiñasa. ¿kunjamsa uk lursna? Diosan Arup sapüruw liyiñasa, tantachäwinakan arstʼañatakisa, jan qheparas ukar sarañatakis chʼamachasiñasawa. Sapakisa, familjamasa Bibliat yatjjataskakiñasawa, ukatjja Diosar mayisiñsa janiw jaytañasäkiti. Jehová Diosaw taqe ukanak toqejj chʼamañchtʼistu, ukhamajj janipun ukanak jaytañäniti. Ukanakan aynachtʼaskatas amuyasstan ukhajja, Jehová Diosaruw yanaptʼa mayiñasa. Ukhamatwa kunjamsa Diosan qollan ajayupajj ‘suma amtäwinakanïñatakisa, ukanak phoqañatakis yanaptʼistu uk amuyañäni’ (Fili. 2:13). Maysa toqetjja, ¿kunjamsa mayninakar chʼamañchtʼaraksna?

13, 14. 1) Esposapan jiwatap qhepatjja, ¿kunas mä jilatarojj yanaptʼäna? 2) ¿Kunjamsa mayninakar chʼamañchtʼsna?

¹³ Jehová Diosan markapanjja, wali munasiri jilat kullakanakaw utji, jupanakaw chʼamañchtʼapjjestaspa. Apóstol Pablojj akham sänwa: “Machaq chʼamay churapjjamjja uka qarjata amparanakarojja, ukhamarak tʼukha qonqorinakamarusa. Cheqap thaki thaqapjjam” sasa (Heb. 12:12, 13). Nayrïr patak maranakan jakasir cristianonakat jilapartejja, jilat kullakanakan yanaptʼap katoqapjjänwa. Jichhürunakan ukhamarakiw yanaptʼa katoqaraktanjja, ¿kunjamsa? Mä jilatat parltʼañäni. Esposapan jiwatap qhepatjja, yaqha jan waltʼäwinakanwa uñjasïna. Jilatajj akham siwa: “Kuna yantʼanakansa uñjasiñäni, kuna horasas yantʼata uñjasiñäni, qawqha tiempotsa jan walinakan uñjasiñäni uk janiw jiwasajj amtksnati. Diosar oración mayisiñasa, sapaki Bibliat yatjjatañasa, kunjamtï salvavidajj uman tuyuskakiñatakejj yanaptʼaskejja, ukhamaw jan waltʼäwinakan yanaptʼawayitu. Jan waltʼäwinakan janïr uñjaskasajja, Jehová Diosampi sum apasiñajj wali wakiskiriwa” sasa.

¹⁴ Israelitanakajj amalecitanakamp nuwasipjjäna ukhajja, Aaronampi Hur chachampiw Moisesar yanaptʼapjjäna. Jichhürunakanjja, ukhamarakiw mayninakar kunayman toqet yanaptʼsna. Yaqhep jilat kullakanakasajj chuymankipstatäsin jan walinakanwa uñjasipjje, yaqhepanakajj usuta, familiaranakapan jarkʼata, sapaki, familiapan maynin jiwatapat llakita ukhamaw jikjjatasipjje. Wayn tawaqonakas chʼamañchtʼatäñ munapjjarakiwa, jupanakajj jan wali lurañanakaru jan ukajj akapachan nayrar sartañatak chʼamañchataw uñjasipjje (1 Tes. 3:1-3; 5:11, 14). Ukhamasti tantachäwinakansa, yatiyir sarktan ukhasa, mayninakampi manqtʼasktan ukhasa, jan ukajj teléfono toqe maynimp parlktan ukhasa, chʼamañchtʼapjjañäni, ukhamatwa mayninakat llakisitas uñachtʼayañäni.

15. Chʼamañchkir arunakasajja, ¿kunjamsa jilat kullakanakar yanaptʼaspa?

¹⁵ Asá reyejj etiopenakar atipjkäna uka qhepatjja, Azarías profetajj akham sasaw Asá reyirusa markaparusa chʼamañchtʼäna: “Jumanakajj jan ajjsarirïpjjamti, ukatsti janiraki mayjtʼasipjjamti, luratanakamatsti katoqapjjätawa” sasa (2 Cró. 15:7). Ukaw Asá reyirojj cheqa yupaychäwi wasitat saytʼayañatak chʼamañchäna. Chʼamañchkir arunakasajja, ukhamarakiw mayninakarojj Diosar servisipkakiñapatak yanaptʼaspa (Pro. 15:23). Ukhamarusa, tantachäwin arstʼatasajj jilat kullakanakar chʼamañchtʼarakispawa.

16. ¿Kunjamsa jilïr irpirinakajj Nehemiasat yateqasipjjaspa? Jilat kullakanakajj kunjamsa yanaptʼawayapjjtam uk qhanañchtʼam.

¹⁶ Jehová Diosaw Nehemiasarusa, judionakarus chʼamañchtʼäna, ukhamatwa Jerusalenan perqanakap 52 urunakanak saytʼayapjjäna (Neh. 2:18; 6:15, 16). Jerusalenan perqanakap  saytʼayapkäna ukhajja, Nehemiasajj janiw aleq ukhamak qheparkänti, jan ukasti jupas ukan yanaptʼarakïnwa (Neh. 5:16). Jichhürunakanjja, Nehemiasatwa jilïr irpirinakajj yateqasipjjaraki, jupanakajj taqe chuymaw Tantachasiñ Uta lurañansa, Tantachasiñ Uta askichañansa yanaptʼapjje, qʼomachañsa yanaptʼapjjarakiwa. Llakita jikjjatasipki uka jilat kullakanakarus utanakapar sarasina jan ukajj jupanakamp yatiyir sarasinwa chʼamañchtʼapjjaraki (Isaías 35:3, 4 liytʼañataki).

17, 18. Llakita, jan waltʼäwinakana jikjjatasisajja, ¿kunas yanaptʼistani?

¹⁷ Jilat kullakanakasamp chika kuns lurtan ukhajja, jukʼampiw mayachtʼastanjja. Maynit maynikamas jukʼamp sumaw apasiraktanjja. Ukhamarusa, ukaw kuna bendicionanaktï Diosan Reinopajj jutïrin apankani ukanak jan armañatakis yanaptʼistu. Kunapachatï mayninakar chʼamañchtʼtan ukhajja, jan walinakar saykatapjjañapataki, ukhamarak jutïr urunak jan pächasis suyapjjañapatakiw yanaptʼtanjja. Janiw ukakïkiti, jutïr urunak suyaskakiñatakis jiwas pachpaw chʼamañchasiraktanjja.

¹⁸ Kunjamsa Jehová Diosajj khä nayra tiempon servirinakapar yanaptʼäna uk yatisajja, jukʼampiw Jehová Diosar confiytanjja, iyawsäwisas jukʼampiw jiljjattaraki. Ukhamajj jan waltʼäwinakana jan ukajj llakita jikjjatasiñäni ukhajja, jan aynachtʼapjjañäniti. Jiwasatï Jehová Diosaru yanaptʼa mayiñänejja, Jupajj chʼamañchistaniwa, jutïrin walja bendicionanak katoqañatakis yanaptʼarakistaniwa (Sal. 73:23, 24).