Hebreos 4 jalja liytʼasajja, kuntï Diosajj jutïrit arskäna uka toqet Pablon parlatapwa amuytanjja. Diosan uka arsutanakapajj Biblianwa jikjjatasi.

Kunjamsa Bibliajj jaqenakar nayra sarnaqäwinakap jaytañatakejj yanaptʼi uk qhanañchañatakiw Hebreos 4:12 qellqata ayttanjja, ukasti walikïskiwa. Ukampis uka qellqatajj kuna toqets parlaskäna uk amuytʼañäni. Pablojja, Diosan amtaparjam sarnaqapjjañapatakiw hebreo cristianonakar chʼamañchtʼaskäna, Diosan uka amtanakapat jila partejj qollan qellqatanakanwa jikjjatasïna. Amuytʼañataki, israelitanakajj Egipto markat qhespisin “lechesa, miskʼisa umjam jalaski” uka oraqeru mantañatwa Pablojj parlaskäna, ukanwa samarata suman jakasipjjañapäna (Éxo. 3:8; Deu. 12:9, 10).

Jehová Diosajj ukham jakasipjjañapwa munäna. Ukampis israelitanakat jila partejj chuymanakap qalarayasipjjänwa, janirakiw Diosarus confiyjjapjjänti, ukatwa samaraña oraqer jan mantapkänti (Núm. 14:30; Jos. 14:6-10). Ukhamäkchïnsa, “Diosampi samarir mantañatak arsüwejj jiwasatak” utjaskiwa sasaw Pablojj säna (Heb. 3:16-19; 4:1). Uka arsüwejj cheqapuni utjaskatap uñachtʼayañatakejja, Pablojj Génesis 2:2 ukat Salmo 95:11 qellqatanakarjamaw arsüna. Pablojj ‘arsüwi’ sasin siskäna ukajja, kuntï Diosajj arskäna ukanak taypinkarakiwa. Jiwasajja, hebreo cristianonakjamarakiw Diosan arsutanakap liytʼasin ukarjam sarnaqañatak chʼamachasiñasa.

“Diosampi samarir mantañatak arsüwejj jiwasatak” utjaskatap yatisajja, ukarjam sarnaqañatakiw chʼamachasiñasa. Diosajj jutïrit arsuwayki ukajj Biblianwa jikjjatasi, uksti jiwasajj confiytanwa. Cheqas Diosan samarañaparu mantañatakejj kunanakatï wakiski uk lurañatakiw chʼamachasisktanjja. Jiwasajj janiw Moisesan Leyip jan chhaqtañapataki jan ukajj Diosamp askit uñjatäñatakik chʼamachasktanti. Jan ukasti, iyawsäwisaw Diosan amtap jukʼamp yatjjatañatakisa, ukarjam sarnaqañatakis yanaptʼistu. Maysa toqetjja, kunjamtï aka yatichäwi qalltan saniwayktanjja, Bibliatsa, Diosan amtanakapatsa waljaniw yatjjatasipki. Nayra jakäwinakap jaytañatakisa, Diosar confiyañatakisa, bautisasiñatakis chʼamachasisipkarakiwa. Taqe ukanak uñjasasti, ‘Diosan arupajj jakaskatapa, jachʼa chʼamanirakïtapwa’ amuytanjja. Diosan arsutanakapajj Biblian jikjjataski ukajja, jichhasa jutïrinsa jaqenakar yanaptʼaskakiniwa.