“BAUTISASKAYÄTA ukhajja, 15 maranïyätwa, sojjta phajjsitjja precursor auxiliarjamaw irnaqtʼjjayäta. Mä mara qhepatsti precursor regularjamaraki. Colegiot mistjjasajja, kawkhantï yatiyirinakajj munaski ukar sarañwa munayäta. Janiw nasïwij cheqan qheparañ munkayätti. Awichajampiw jakasiyäta. Jupajj janiw Testigökänti, ukatwa jupamp jan jakañ munjjayätti. Kunapachatï tamanak tumptʼiri jilatajj ‘markaman yatiyäta’ sasin sitäna ukhajja, wali llakitaw jikjjatasiyäta. Kunja llakitas jikjjatasiyäta uk janiw amuyañap munkayätti. Pʼeqes alintata ukhamaw jilatan arunakapat lupʼisa sarjjayäta. Khitimpitï yatiyir mistkayäta uka kullakarojj akham sasinwa sista: ‘Jonás chachjamaw jikjjatasta. Jupajj Nínive markar Diosan khitatäsin janis sarañ munkchïnjja, qhepat sarapunïnwa. Nayajj ukhamarakiw kawkinjjay yatiyam sapjjchitani ukan taqe chuyma irnaqtʼä’ sasa”.

“Niya pusi maranakaw markajan precursorjam irnaqtʼaskta. Jilatar istʼañajj kunja wakiskirïtaynasa ukwa jichhajj amuyta. Nayaw markajan jan qheparañ munasajj pantjasiskayäta. Jichhajj wali kusisitaw jikjjatasta. Mä phajjsinjja, pä tunka pusiniruw Bibliat yatichjjayäta. Janiw ukakïkiti, Bibliat jan yatiñ muniri awichajas nayampiw Bibliat yatjjatjje”.

Fiyi markankiri Bibliat yatjjatir mä warmejja, kimsa uru jachʼa tantachäwirut sarani jan ukajj mä familiarapan cumpleaño fiestaparuch esposopamp sarani ukwa amtañapäna. Tantachäwir sarañat janiw esposopajj jarkʼkänti. ‘Tantachäwejj tukuyjjani uka qhepatwa fiestar jutä’ sasinwa uka warmejj esposopar satayna. Ukampis jachʼa tantachäwit utar purjjasajja, janiw uka fiestar sarjjänti. ‘Ukar sarasajj Jehová Diosampi sum apasiñwa aptʼasirista’ sasaw jupajj amuyäna.

Esposopajj akham sasaw familiaranakapar satayna: “‘Testigonakan tantachäwipar’ sarasajja, akaruw jutani” sasa. Uk istʼasajj familiaranakapajj sapjjänwa: “¡Janiw jutkaniti; Jehová Diosan Testigonakapajj janiw cumpleaño amtapkiti” sasa. *

Concienciaparjama, ukhamarak kunarutï iyawski ukarjam cumpleañor jan sarañ amtatapatjja, esposopajj walpun kusisïna. Qhepatjja, uka warmejj esposopampiru, mayninakampiruw Bibliat parläna. Ukham luratapatjja, esposopajj Bibliat yatjjatañwa qalltäna, ukatsti esposapamp chikaw tantachäwinakarus sarjjarakïna.