1, 2. ¿Kunatakis Jehová Diosan servirinakapajj chʼamachasiñasa?

ABEL chachat qalltasin jichhürunakkamajja, Jehová Diosan servirinakapajj taqeniw Jupar taqe chuyma serviñatak chʼamachasiwayapjje. Diosamp askit uñjatäñataki Jupan bendicionap katoqañatak chʼamachasiri hebreo cristianonakarojja, apóstol Pablojj akham sänwa: ‘Llampʼu chuymampiw nuwasiñanakan tʼaqhesipjjayätajja’ sasa (Heb. 10:32-34). Kunjamtï Grecia markankirinakajj tʼijuñana, nuwasiñana atipjañatak wal chʼamachasipkejja, ukhamarakiw hebreo cristianonakajj Diosar serviñan wal chʼamachasipjje sasaw Pablojj amuytʼayäna (Heb. 12:1, 4). Jichhürunakanjja, wiñay jakañ katoqañatakiw taqenis chʼamachasisktanjja, ukampis uñisirinakasajj janiw Diosarojj kusisit chuymampi serviñas munapkiti, ni jutïrin bendicionanak katoqañassa munapkiti.

² Jukʼampejja, Supayampi ukhamarak akapachampiw ‘nuwastanjja’, mä arunjja, jupanak contra saytʼañatakiw chʼamachastanjja  (Efe. 6:12). Janipuniw akapachankir jaqenakan yatichäwinakapampisa, jan wali luräwinakapampis apayasiñasäkiti. Uka jan wali luräwinakat yaqhepajj akanakawa: wachoq jucha lurañanaka, cigarro fumañanaka, machjasiñanaka ukhamarak droganakampi qolljasiñanaka. Maysa toqetjja, llakimpi ukhamarak pantjasitanakasampi jan aynachtʼañatakiw chʼamachasiñasa (2 Cor. 10:3-6; Col. 3:5-9).

3. ¿Kunjamsa Jehová Diosajj uñisirinakas contra nuwasiñatakejj yanaptʼistu?

³ Wali chʼamani uñisirinakas contra saytʼasiñajj chʼamakïspawa. Pablojj mä nuwasirïkaspas ukhamwa jupa pachpat akham säna: “Janirakiw nuwasiñansa aleqa ina chʼusaru chʼakkiristsa ukham nuwaskti” sasa (1 Cor. 9:26). Kunjamtï mä nuwasirejj uñisiripampi nuwaskejja, ukhamarakiw jiwasajj uñisirinakasampi nuwasiñasa, mä arunjja, jupanak contraw saytʼañasa. Uñisirinakasar saykatañatakejja, Jehová Diosajj Biblia toqew yanaptʼistu. Bibliat apstʼat qellqatanak toqesa, tantachäwinak toqesa, jachʼa tantachäwinak toqesa yanaptʼarakistuwa. ¿Kuna yatichäwinaktï ukanakan katoqtan ukarjamati sarnaqasktanjja? Janitï uka yatichäwinakarjam sarnaqstan ukhajja, kunjamtï mä nuwasirejj ‘aleqa ina chʼusaru chʼakkejja’ ukhamäspawa.

4. ¿Kunjamsa jan walirojj askimpi atipjsna?

⁴ Taqe horasanwa amuyasiñasa. ¿Kunatsa? Uñisirinakasajj jan suyat horasaru, jan ukajj aynachtʼatäskañäni ukhaw jan waltʼayistaspa. Bibliajj akham ewjjtʼistu: “Jan ñanqhampejj atipjayasimti, ukatsipan ñanqharojj askimpi atipjam” sasa (Rom. 12:21). Uñisirinakas contra saytʼasiñäni ukhajja, atipjañäniwa. Ukampis jiwasatï jan amuyaskañäni, uñisirinakasar jan saykatkarakiñäni ukhajja, Supayasa akapachasa, pantjasir chuymasas aynachtʼayistaspawa. Ukhamasti janipun aynachtʼañäniti, nayrar sartañatak chʼamachasiskakiñäni (1 Ped. 5:9).

5. 1) Jehová Diosampi askit uñjatäñatakisa, bendicionap katoqañatakisa, ¿kunsa amtañasa? 2) ¿Khitinakatsa aka yatichäwin yatjjataskañäni?

⁵ Uñisirinakasar atipjañatakejja, kunatsa jupanak contra saytʼastan ukwa amtañasa. Cheqansa Jehová Diosampi askit uñjatäñ layku ukhamarak bendicionap katoqañ laykuw chʼamachastanjja. Hebreos 11:6 qellqatajj akham siwa: “Jupar jakʼachasiñatakejja maynejj iyawsañapawa Diosajj utjatapa, ukhamaraki jupar thaqerinakarojj bendecirïtapa” sasa. Jehová Diosamp askit uñjatäñatakejj chʼamachasiñasawa (Hech. 15:17). Ukham chʼamachasiri walja chachanakata ukhamarak warminakatwa Biblian parli. Amuytʼañataki Jacob, Raquel, José, Pablo jupanakajja, jañchi toqensa chuymanakapansa jan walins jikjjatasipkchïnjja, nayrar sartasipkakïnwa. Jiwasatï jupanakjam chʼamachasiñäni ukhajja, Jehová Diosajj bendicirakistaniwa. Kunjamsa Diosan bendicionap katoqsna uk jichhajj yatjjatañäni.

6. ¿Kunas Jacob chacharojj aguantañatak yanaptʼäna, ukat kunsa aguantatapat katoqäna? (8 janankir dibujo uñjjattʼam).

⁶ Jacob chachatakejja, Jehová Diosampi sum apasiñaw wali wakiskirïnjja, ukatwa Jupar wal munasitap laykojj bendicionap katoqañatak wal chʼamachasïna, ukatsti qhepakamaw aguantawayarakïna. Jehová Diosajj wawanakamar bendicïwa sasin arsuwaykäna ukarus taqe chuymaw confiyäna (Gén. 28:3, 4). Niya patak maranëjjäna ukhajja, Jacob chachajj Diosan bendicionap katoqañatakejj mä angelampiw nuwasïna (Génesis 32:24-28 liytʼañataki). Jacobojj uka angelampi nuwasiñatakejja, ¿wali chʼamanïpachänti? Janiwa.  Ukampis Jehová Diosan bendicionap katoqañatakejj kunanakatï wakiski uk lurañwa amtäna, ukatakisti wal chʼamachasïna. Ukham chʼamachasitapat Diosajj Jacobor bendicïnwa, Israel sasinwa sutiyäna, uka sutejj “Diosan bendicionap katoqañatak chʼamachasiri jan ukajj Diosamp nuwasiri” sañwa muni. Jacobojj Jehová Diosamp askit uñjatänwa, bendicionapsa katoqarakïnwa, jiwasajj ukham uñjatañwa munaraktanjja.

7. 1) ¿Kuna jan walinsa Raquelajj jikjjatasïna? 2) ¿Kunsa Raquelajj luräna, ukat kunjamsa Diosajj bendicïna?

⁷ Raquel warmejja, kuntï Diosajj Jacob esposopar arsuwaykäna uka arunak phoqasir wal uñjañ munäna. Ukampis Raquelajj janiw wawanïrjamäkänti, uka tiemponakanjja, mä warmejj jan wawanïsajj wali llakitaw jikjjatasirïna. Raquelajj ukhamsa jikjjataskchïnjja, ¿kunas nayrar sartañatakejj yanaptʼpachäna? Diosajj bendicitaniwa sasin taqe chuymaw confiyäna, ukatsti jan qheparasaw Diosar mayisiskakïna. Diosasti, Raquelan mayisïwip istʼasajj walja wawanakampiw bendicïna. Ukatwa Raquelajj akham säna: ‘Wali chʼamampiw nuwasta, ukatsti atipjaraktwa’ sasa (Gén. 30:8, NM; 30:20-24).

8. ¿Kuna jan walinakansa Joseyajj jikjjatasïna, ukat kunsa jupat yateqsna?

⁸ Jacob chachasa Raquel esposapasa Diosat janiw jitheqtapkänti, uk uñjañaw José yoqaparojj jan walinakan jikjjataskäna ukhajj yanaptʼpachäna. Joseyajj 17 maranïkäna ukhajja, jakäwipajj janiw pachpäjjänti. Jilanakapajj uñisiñatwa esclavot aljantapjjäna. Qhepatsti ina chʼusat juchañchatäsinwa Egipto markankir carcelan walja maranak llawintat uñjasïna (Gén. 37:23-28; 39:7-9, 20, 21). Ukhamäkchïnsa Joseyajj janiw aynachtʼkänti ni pachpat pachpsa kuttʼaykänti. ¿Kunatsa? José waynatakejj Jehová Diosampi sum apasiñaw wali wakiskirïnjja, ukatakiw wal chʼamachasïna (Lev. 19:18; Rom. 12:17-21). Joseyan sarnaqäwipajj yanaptʼarakistaspawa. Wawäkasin inas jan sum jakasiwaykstanti, jan ukajj jutïritak janis mä suytʼäwejj utjkistaspa ukham inas amuyasirakstan, ukhamäkchisa nayrar sartaskakiñatak chʼamachasiskakiñasawa, ukhamatakwa Jehová Diosajj bendicistani (Génesis 39:21-23 liytʼañataki).

9. ¿Kunsa Jacob chachatsa, Raquel esposapatsa, José waynatsa yateqsna?

⁹ Jichhürunakanjja, jan walinakanwa jikjjatasiraktanjja. Inas mayninakamp ina chʼusat tʼaqhesiyata, jiskʼachata, yaqhachata jikjjatasstan, jan ukajj maynin envidiasitapat tʼaqhesiyata jikjjatasirakstan. Aynachtʼañat sipansa kunas Jacoborusa, Raquelarusa, Joseyarus Diosar kusisit chuymampi serviskakiñatak yanaptʼäna ukwa amtañasa. Jupanakajj Diosamp sum apasiñatakiw chʼamachasipjjäna, ukatwa Diosajj jupanakar yanaptʼäna, bendicionaps churarakïna. Jupanakasti, Diosan bendicionap katoqañatakejj wal chʼamachasipjjäna, ukatjja mayisitanakaparjamaw sarnaqapjjarakïna. Niyakejjay qhep qhepa urunakan jakstanjja, kuntï Diosajj jutïritak arsuwayki uk janiw armañasäkiti. Jehová Diosamp sum uñjatäñatakejja, ¿jumajj chʼamachasïtati?

10, 11. 1) ¿Kunatsa Diosan bendicionap katoqañatak chʼamachasiñasa? 2) ¿Kunas suma amtanakar puriñatakejj yanaptʼistani?

¹⁰ ¿Kunatsa Diosan bendicionap katoqañatak chʼamachasiñasa? Taqeniw pantjasirïtanjja, ukatwa jan wali amuyunakampi jan apayasiñatakejj wal chʼamachasiñasa. Yaqhepanakajj kusisit chuymampi yatiyañatakiw chʼamachasipjje, yaqhepasti usuta, sapaki jikjjatasisajj jan aynachtʼañatakiw chʼamachasipjjaraki. Yaqhepajj jupanakar chuym ustʼayapki  ukanakar perdonañatakiw chʼamachasipjjaraki. Jichhakisa, jan ukajj walja maranakas Diosar serviskstanjja, kunanakatï Diosar serviñan jarkʼkistaspa ukanakamp jan aynachtʼañatakiw taqenis chʼamachasiñasa. Diosasti jupat jan jitheqtirinakarojj bendiciwa.

¹¹ Jan wali amuyunakamp jan apayasiñataki chʼamachasiskstan ukhajja, cristianjam sarnaqañasa, suma amtanakar puriñas chʼamakïspawa (Jer. 17:9). Jan wali amuyunakamp jan apayasiñataki chʼamachasiskstan ukhajja, Jehová Diosaruw qollan ajayup mayiñasa. Ukaw kunatï walïki uk lurañatak yanaptʼistani, ukhamatwa Diosan bendicionanakaps katoqarakiñäni. Ukhamasti mayisitasarjam sarnaqañatakisa, Biblia sapür liyiñatakisa, Bibliat sapak yatjjatañatakisa, familjam yatjjatañatakis chʼamachasipjjañäni (Salmo 119:32 liytʼañataki).

12, 13. Jan wali amuyunak apanukuñatakejja, ¿kunas pä cristianonakarojj yanaptʼäna?

¹² Bibliasa, qollan ajayusa, Bibliat apstʼat qellqatanakasa, walja jilat kullakanakaruw jan wali amuyunakap jaytañatakejj yanaptʼawayi. Amuytʼañataki, mä waynajj ¡Despertad! diciembre 8, 2003 qellqatanwa “¿Cómo puede usted resistirse a los malos deseos?” sat yatichäwi liytʼäna. Uk liytʼasajja, ¿kunjamas jikjjatasïna? Jupajj akham siwa: “Jan wali amuyunak apanukuñatakiw chʼamachasiskta. Uka yatichäwinjja, ‘kunjamsa waljanejj jan wali amuyunak apanukuñatak wal chʼamachasisipki’ ukwa liytʼayäta. Uk yatisajj  janiw sapak jikjjatasjjayätti” sasa. Ukatjja, uka pachpa waynajja ¡Despertad! octubre 8, 2003 qellqatanwa “¿Aprueba Dios los estilos de vida alternativos?” sat yatichäwi liytʼarakïna. Uka yatichäwi liytʼasasti, yaqhepatakejj jan wali amuyunak apanukuñajj ‘mä chʼaphir uñtasitätapwa’ amuyäna (2 Cor. 12:7). Jan wali amuyunak apanukuñatak wal chʼamachasipki ukanakajja, kusisitaw jutïr urunak suyapjje. Uka waynajj saskakiwa: “Diosat jan jitheqtañatakejj sapüruw chʼamachasta. Akapachampi jan apayasiñatakejj markap toqew Diosajj kunayman yanaptʼanak churistu, ukatwa Jupar walpun yuspärtjja” sasa.

¹³ Estados Unidos markankir mä kullakat parltʼarakiñäni, kullakajj akham siwa: “Horasaparu yanaptʼa katoqasajj walpun yuspärta. Uka yatichäwinakat jila partejj nayatak qellqanitäkaspas ukhamawa. Walja maranakaw kunatï Jehová Diosatak jan walïki uk jan lurañatak chʼamachasiskta, awisajj janis nayrar sartirjamäkirista ukhamwa amuyasta. Jehová Diosajj wali khuyapayasiriwa perdonañatakis jankʼakirakiwa, ukampis jan wali amuyunak jan jaytirjamätaj amuyasisajja, Diosan yanaptʼap katoqañatakejj janis askïkirista ukham amuyasta. Ukaw jakäwijan aynachtʼayitu. Ukampis Yatiyañataki marzo 15, 2013 qellqatan ‘¿Chuymasajj Diosar uñtʼañatak wakichtʼatati?’ sat yatichäwi liytʼasajja, Jehová Diosajj nayar wal yanaptʼañ munatapwa amuyta” sasa.

14. 1) Jan walinak apanukuñatak chʼamachaskasajja, ¿kunjamsa Pablojj jikjjatasïna? 2) Pantjasir chuymasampi jan apayasiñatakejja, ¿kunsa lurañasa?

¹⁴ (Romanos 7:21-25 liytʼañataki). Pantjasir chuymasampi jan apayasiñatakisa, jan wali amuyunak jaytañatakisa, qawqsa maynejj chʼamachasiñapa ukjja Pablojj sum yatïna. Ukampis taqe ukanakar atipañatakejj ¿kunas Pablor yanaptʼäna? Jehová Diosar mayisiña, Jupar confiyaña ukhamarak Jesusan jiwatapar iyawsaña. Ukhamajj pantjasir chuymasampi jan apayasiñatakejj Pablot yateqasipjjañäni, jiwas pachpar confiyasiñat sipansa, Jehová Diosar taqe chuyma confiyañäni, ukatsti Jesusan jiwataparus taqe chuyma iyawsarakiñäni.

15. ¿Kunjamsa Diosajj jupat jan jitheqtañatakisa, aguantaskakiñatakis yanaptʼistu?

¹⁵ Awisajj mä jan waltʼäwi utjipanjja, qawqsa ukajj llakisiyistu uk uñachtʼayañaswa Diosajj muni. Sañäni, familiasan maynejj wali usuntata jikjjatasispa, jan ukajj ina chʼusat tʼaqhesiyata uñjasispa ukhajja, ¿kunjamakis jikjjatassna? Jiwasatï Jehová Diosar taqe chuyma confiyañäni ukhajja, Jupat jan jitheqtañatakisa, kusisit chuymampi serviskakiñatakisa, Jupampi sum apasiskakiñatakis yanaptʼapwa mayiñäni (Fili. 4:13). Nayra tiempona ukhamarak jichha tiempona Diosar serviri cristianonakan sarnaqäwipajja, Diosar yanaptʼa mayisiñajj kunjamsa nayrar sartaskakiñatakisa, aguantaskakiñatakis yanaptʼistaspa ukwa uñachtʼayistu.

16, 17. ¿Kunatakis chʼamachasïta?

¹⁶ Jiwasatï aynachtʼsna ukhajja, Supayajj walpun kusisispa. Ukhamasti “kunatejj askïki” uk lurañatak chʼamachasiskakiñäni (1 Tes. 5:21). Supayarusa, akapacharusa, jan wali amuyunakarus atipjsnawa. Ukatakejj Jehová Diosaruw confiyañasa, Jupaw chʼamapampi yanaptʼaskistani (2 Cor. 4:7-9; Gál. 6:9).

¹⁷ Ukhamajj jan aynachtʼasa, nayrar sartaskakiñatak chʼamachasisipkakiñäni. Ukhamäni ukhajja, Diosajj “walja bendicionanak apayanipjjäma jilarkiriraki” sasin arsuwaykäna uk phoqasirwa uñjañäni (Mal. 3:10).