NAYRÏR patak maranakanjja, cristianonakajj ‘Reinon suma yatiyäwinakap’ taqenir yatiyañatakiw chʼamachasipjjerïna (Mat. 24:14). Yaqhepajj yaqha markanakar kunaw yatiyañatakejj sarapjjerïna. Apóstol Pablojj misionerot * sirvkäna ukhajj ukhamwa yaqha markar viajïna, jichhajj uka markajj Turquía sasin uñtʼatawa. 2.000 maranak qhepat 2014 maranjja, uka markanjj mä campañaw utjäna. ¿Kunatsa uka campaña lurapjjäna? ¿Khitinakas ukan yanaptʼapjjäna?

Turquía markanjj 2.800 jilaw yatiyirinakajj utji, ukampis 79 millón jaqenakaw ukan utji. Sapa 28.000 jaqenakatjja, maynikiw Jehová Diosan Testigopajja, ukatwa jukʼaniruk yatiyasi. Uka campañajja, jukʼa tiemponak waljanir yatiyañ amtampiw lurasïna. Uka campañatakejj yaqha markanakatwa turco aru parlir 550 jilat kullakanakajj Turquía markar viajipjjäna, ukhamat ukankir jilat kullakanakampi yatiyañataki. ¿Kunjams ukajj yanaptʼawayi?

Waljaniruw yatiyasiwayi. Estambul markankir mä congregacionat akham sasaw qellqanipjje: “Walja Testigonakar taqe cheqan uñjasajja, ¿jachʼa tantachäwit utji? sasaw jaqenakajj jisktʼapjjetu” sasa. Izmir markankir mä congregacionat akham qellqanipjjaraki: “Taxinakajj sayapki ukan trabajir mä chachajja, ‘¿kunas akan pasaski? waljanëpjjaraktasa’ sasaw mä jilïr irpirir jisktʼatayna” sasa. Taqe jaqenakaw uka campañ utjatap amuyapjjäna.

Yaqha markanakat jutir jilat kullakanakajj wali kusisitaw yatiyapjjäna. Dinamarcat jutir Steffen jilatajj akham siwa: “Waljaniw Jehová Diosat janipun istʼapkataynati, sapüruw ukham jaqenakampejj parlta. Ukhapuniw Diosan Jehová sutip yatiyasajj wal kusisiyäta” sasa. Francia markat jutir Jean-David jilatajj akham qellqarakïna: “Mä callenakwa walja horanak yatiyapjjayäta. ¡Wali kusiskañänwa! Testigonakarojj jila parte jaqenakaw jan uñtʼapkataynati. Niya taqe utanakanwa sum istʼapjjetu, video uñtayasajj mä qellqatwa jaytapjjta” sasa.

Uka 550 Testigonakajj mä 60.000 qellqatanakwa pä semananaki jaytapjjatayna. Uka campañanjja, waljaniruw Diosan arunakapajj yatiyasiwayi.

 Yatiyañatakiw chʼamañchawayi. Uka campañajja, Turquía markankir jilat kullakanakarojj walpun chʼamañchtʼawayi. Waljaniw precursorat serviñ munapjje. Campaña pasatat 12 phajjsinakanjja, 82 precursor regularanakampiw jiljjattawayi.

Yaqha markanakat Turquía markar viajipkäna uka jilat kullakanakajja, kunjamsa uka campañajj yatiyañatak jupanakar yanaptʼawayi, markanakapar kuttʼjjasas yanaptʼaskaki ukwa qhanañchapjje. Alemaniat jutir Şirin sat kullakajj akham siwa: “Turquiankir jilat kullakanakatakejj kawkjan yatiyañas janiw chʼamäkiti. Nayatakejj ajjsarirïtaj laykojj wali chʼamawa. Uka campañaw wal yanaptʼawayitu, uka markankir jilat kullakanakar yatiyir uñjasa, Diosar wal mayisisajj jan ajjsarasaw yatiyawayta. ¡Trenanak saytʼapki ukansa yatiyawaytwa, walja tratadonak jaytawayta! Janiw jichhajj nayrjam sinti ajjsarirëjjtti” sasa.

Alemaniat jutir Johannes jilatajj akham siwa: “Jukʼamp sum yatiyañatakiw yanaptʼawayitu. Turquía markankir jilat kullakanakajj waljanir yatiyañatakiw chʼamachasipjje, kawkjansa yatiyapjjakiwa. Alemaniar kuttʼjjasajja, ukham yatiyañatakiw chʼamachasta. Jichhajj nayrat sipanjja, jukʼamp jaqenakaruw Diosan arunakap yatiyta” sasa.

Francia markat jutir Zeynep sat kullakajj akham sarakiwa: “Uka campañajj yatiyañatak wal yanaptʼawayitu. Jan ajjsarirïñataki, Jehová Diosar jukʼamp confiyañatakiw yanaptʼawayitu” sasa.

Jilat kullakanakarojj jukʼamp mayachtʼawayi. Kunayman markatäpkchïnsa, wali munasiñampiw jilat kullakanakajj uñjasipjjäna, ukajj jan armkañawa. Qalltan parlaniwayktan uka Jean-David jilatajj akham sarakiwa: “Jilat kullakanakajj wali munasiñampiw katoqtʼapjjetu. Suma amigoparjama, familiaparjamaw uñjapjjetu. Utanakaparus wali sum katoqtʼapjjetu. Jilat kullakanakajj oraqpachan mä familiakïtasjja, qellqatanakasan liytʼasakiw yatiyäta, jichhajj naya kikpaw uk uñjawayta. Jehová Diosan Testigopätajat jukʼampiw kusista. Uka suma bendicionatjja, walpun Diosar yuspärta” sasa.

 Franciat jutir Claire kullakajj akham siwa: “Alemania, Dinamarca, Francia, Turquía uka markanakatäpkchiyätsa, mä familiakïpjjayätwa. Jehová Diosas qorpanak chhaqtaykaspa ukhamänwa” sasa.

Franciat jutir Stéphanie kullakajj akham sarakïnwa: “Janiw pachpa markatäñasa, ni pachpa aru parlañas mayachtʼkistuti, jan ukasti Jehová Diosar wal munasitasaw mä wawak tukuyistu, ukwa uka campañan yateqawayta” sasa.

Uka campañan yanaptʼir jilat kullakanakatjja, waljaniw yatiyañ yanaptʼañatakejj Turquiar sarañ amtasipki. Yaqhepanakajj sarjjapjjewa, ukham sarapjjatapat walpun yuspärtanjja.

Amuytʼañataki, mä gruponjja 25 yatiyirinakakiw utjäna. Walja maranakaw mä jilïr irpiriki utjarakïna. Ukampis 2015 maranjja, Alemania, Países Bajos uka markanakat sojjtaniw yanaptʼañatakejj uka markar jakir sarapjje. Uk uñjasasti uka gruponkirinakajj walpun kusisipjje.

Turquía markan mä qhawqha tiempo sirvjjapjje uka jilat kullakanakajj ¿kunjamäsipkisa? Yaqha markan jakañajj chʼamakïpachawa, ukampis yaqha markar yatiyañ yanaptʼir sarasajja, walja bendicionanakwa katoqapjje. Jupanakat mä qhawqhanejj kamsapjjesa uk jichhajj uñjañäni.

Casarat Federico jilatajj Españatwa Turquía markar yanaptʼir sari, jupajj 41 maraniwa. Jilatajj akham siwa: “Jan walja utjirinïñajja, kunatï jukʼamp wakiskirïki ukanak nayrar uchañatakiw yanaptʼitu” sasa. ¿Diosar ukham serviñajj kunjamaw sis jilatajja? Jupajj siwa: “¡Wali kusiskañawa! Diosan sutip yatiyañ layku yaqha markar jakasir sartan ukhajja, Jehová Diosan amparaparus katuyasksna ukhamawa. Kunjamsa yanaptʼistu uksa jukʼamp sumwa amuyaraktanjja” sasa.

Países Bajos sat markat jutir Rudy jilatajj 57 maraniwa, casadorakiwa, jupajj akham siwa: “Yatiyirinakajj wal munaski ukan Diosar serviñajja, walpun kusisiyapjjetu, waljaniruw yatiyapjjta, jupanakajj  janiw Diosan arunakap istʼapkataynati. Diosar uñtʼasajj wal kusisipjje, ukajj wal kusisiyapjjetu” sasa.

Alemania markat jutir Sascha sat jilatajj 42 maraniwa, casadorakiwa. Jupajj akham siwa: “Yatiyir sarkta ukhajja, ‘jichhapuniw Diosan arunakap istʼta’ sasin waljaniw sapjjetu. Jehová Diosar uñtʼapjjañapatak yanaptʼasajj walpun kusista” sasa.

Japón markat jutir Atsuko sat kullakajj 36 maraniwa, casadarakiwa. Jupajj akham siwa: “Armagedonan jankʼak puriniñapwa nayrajj munirïta. Ukampis Turquiar jakasir sarjjasajj janiw ukham amuyjjtti, Jehová Diosarojj pacienciampi suytʼatapat walpun yuspärta. Kunjamsa Jehová Diosajj oraqpachan yatiyasiñapatak yanaptʼaski uk uñjasajja, jukʼampiw Jupar jakʼachasiñ munta” sasa.

Rusia markat jutir Alisa kullakajj 31 maraniwa, jupajj akham siwa: “Yaqha markan serviñajja, Jehová Diosajj kunja munasirisa uk amuyañatakiw yanaptʼitu” sasa (Sal. 34:8). Jupajj akham saskakiwa: “Jehová Diosajj janiw Awkijakïkiti, jan ukasti wali munat Amigojawa. Taqe kunansa Jupaw yanaptʼitu, jukʼampiw uñtʼarakta. Wali kusisitätwa, suma experiencianakaw utjitu, walja bendicionanakwa katoqarakta” sasa.

Turquía markan campañajj utjkäna ukajja, Diosan Reinopat jukʼamp jaqenakar yatiyasiñapatakiw yanaptʼawayi. Ukampis walja cheqanakanwa Diosan arunakap yatiyañajj uka markan faltaski. Turquía markar jakasir sarjjapjje uka jilat kullakanakajja, yatiyapki ukhajj ‘jichhapuniw Jehová Diosat parlir istʼta’ sasajj waljaniw sapjje. ¿Jumajj ukham cheqanakan yatiyir sarañ munasmati? Ukhamächejja, Juan 4:35 textotwa amtasiñama, ukan akham siwa: “Uñtapjjam, uñjapjjarakim, yapunakajj apthapiñatak poqoratäjjewa” sasa. ¿‘Yapunakajj apthapiñatak poqoratäjje’ ukan yanaptʼañ munasmati? Munsta ukhajja, jichhjatwa ukatakejj wal chʼamachasiñama. “Aka oraqpachana” Diosan arunakap yatiyasiñapataki jukʼamp yanaptʼäta ukhajja, walja bendicionanakwa katoqäta (Hech. 1:8).