“Jumanakatejj alajjpachankir Awkir kuns mayipjjäta ukhajja, jupajj nayan sutij-jjaruw uk churapjjätam” (Juan 16:23).

Jesusajj siskäna ukarjamajja, Jehová Diosajj jupar orasiñaswa muni, janiw idolonak toqe, santonak toqe, angelanak toqe, jan ukajj jiwat familiaranakas toqe jupar orasiñas munkiti. Antisas Jesucriston sutip toqe orasiñaswa muni. Kunapachatï Jehová Diosar orasktan ukhajj Jesusan sutipjjaruw mayisiñasa, ukham lurasajja, kuntï Jesusajj jaqenak layku lurawayki ukat jan armasitaswa uñachtʼaytanjja. Jesusajj akham sänwa: “Naya taypikiw Awkin ukar puriñajj utji” sasa (Juan 14:6).

“Chuymanakam jupar jistʼarapjjam” (Salmo 62:8).

Jehová Diosar mayisktan ukhajja, wali munasiri awkimpis parltʼasksna ukhamwa jupar orasiñasa. Oracionanak mä librot liyiñat sipansa, jan ukajj pʼeqer yatsut oracionanak arsuñat sipansa, respetompi ukat chuymatpachwa Jehová Diosar orasiñasa.

“Jiwasatï munañaparjam kunsa mayiñäni ukhajja, jupajj istʼistaniwa” (1 Juan 5:14).

Diosajj kunsa jiwasanak layku lurani, jupa layku kun lurañassa muni ukanakwa Bibliajj qhanañchistu. Oracionanakas istʼañapatakejja, kunjamtï munki ukarjamaw Diosar mayisiñasa. Ukatakejj Bibliat yatjjatañasawa, ukhamatwa jupar sum uñtʼañäni, oracionanakassa kusisitaw Jehová Diosajj istʼarakistani.

Kunanaktï necesitktan ukanakatwa mayisiñasa. Kunanakatï jakañatak munaski ukanakatwa oracionan Diosar mayissna, mä arunjja, manqʼasa, isisa, jakañatak mä lugaras jiwasar jan faltañapatakiw orassna. Suma amtar puriñatakisa, jan waltʼäwinakar saykatañatakis chʼam mayisiraksnawa. Juchanakas perdonañapataki, jupar jukʼamp confiyañataki, jan walinakat jiwasar jarkʼaqañapatakiw oracionan mayisiraksna (Lucas 11:3, 4, 13; Santiago 1:5, 17).

Mayninakatakiw mayirapiñasa. Wali munasiri awk taykanakajja, wawanakapajj jupanakpura munasipjje ukhajj wal kusisipjje. Jehová Diosajj munasir awkisawa, jupajj maynit maynikam munassna, cuidasiraksna ukwa muni. Espososataki jan ukajj esposasataki, wawanakasataki, familiasataki, amigonakasatak orañajj wali wakiskiriwa. Santiago discipulojj akham sänwa: “Maynit maynikam oración lurapjjarakim” sasa (Santiago 5:16).

Diosarojj yuspärañasawa. Jehová Diosaw Luririsajja, Bibliajj jupat akham siwa: ‘Alajjpachat jallunak apayani, suma cosecha tiemponak churi, manqʼañanakampi sistʼayi, chuymanakamsa kusisiñampi phoqtʼayaraki’ sasa (Hechos 14:17). Diosajj jiwasatak taqe kunanak lurawayki ukanakat lupʼiñäni ukhajj jupar yuspärañäniwa. Leyinakaparjam sarnaqasaw Diosar yuspäratas uñachtʼayaraktanjja (Colosenses 3:15).

Awisajja, taqe chuyma orasitasar Diosajj jan jankʼaki contestanitap uñjasajj llakimpiw aynachtʼsna. Ukhaman uñjasisajja, ¿Diosajj janiw nayat llakiskiti sissnati? ¡Janiwa! Awisajja pacienciampi suyasa orasiskakiñaw wakisi, ukwa mä qhawqha experiencianakan uñjaskañäni.

Nayrïr yatichäwin Steve chachatwa parlawaytanjja. Kunas jupar pasäna uka toqet jupajj akham saskakiwa: “Janitï oracionäkaspanjja, nayraw qʼal aynachtʼjjeriskayäta” sasa. ¿Kunas yanaptʼäna? Jupajj Bibliatwa yatjjatäna, ukanwa kutin kutin orasiñajj kunja wakiskirisa uk yateqäna. Jichhajj Steve chachajj akham siwa: “Amigonakajajj munasiñampi nayar yanaptʼapjjatapat Diosar wal yuspärta, kusisitaw jakasirakta” sasa.

Jenny warmejj Diosamp istʼatäñatakejj janis walïkaspa ukhamaw amuyasïna, ¿kunas jupamp pasarakïna? Jupajj akham siwa: “Sinti jan walin jikjjataskayäta ukhajja, ‘kunatsa wali llakita jikjjatasta uk entiendeñatak yanaptʼita’ sasaw oracionan Diosar mayisiyäta”. ¿Kunjamsa ukajj yanaptʼäna? Jenny warmejj akham saskakiwa: “Diosampi oracionan parlañajja, kunjamsa jupajj nayar uñjitu uk amuyañatakiw yanaptʼitu. Chuymajajj juchañchkitu ukhasa, Diosajj yanaptʼitänwa. Oracionaw chʼamachasiskakiñatak yanaptʼawayitu” sasa. ¿Kunjamsa oración lurañajj yanaptʼarakïna? Jupajj saskakiwa: “Oracionaw Jehová Diosarojj cheqa amigorjama, munasiri awkirjama, jan jaytjasiri Diosarjam uñjañatak yanaptʼawayitu. Diosajj nayampipunïskiwa, kunjamtï munki ukarjam sarnaqañatak chʼamachasï ukhajja jupajj yanaptʼapunitaniwa” sasa.

Isabel warmirojj kunatï paskäna uk jichhajj uñjañäni. Usurikäna ukhajja, ‘wawamajj discapacitadow nasini’ sasaw doctoranakajj yatiyapjjäna. Uk yatisajj wal llakisïna. Yaqhepajj abortjjañamawa sasaw sapjjäna. Isabelajj akham siwa: “Sinti llakitapuniw jikjjatasiyäta” sasa. ¿Kunsa luräna? Jupajj akham siwa: “Nayar yanaptʼañapatakejj kutin kutinwa Diosar mayisiyäta” sasa. Tiempompejja, Gerard sat wawaparuw ususïna, jupajj discapacitadopuniw nasïna. Ukhamajja, ¿Diosajj Isabelan oracionanakap istʼänti? ¡Jïsa! ¿Kunatsa ukham sistanjja? Isabelajj saskakiwa: “Gerard wawajajj jichhajj 14 maranëjjewa, discapacitadökchisa wali kusisitaw jakasi. Uk uñjasaw Diosajj oracionanakajar istʼatap amuyta. Wawajajj mä jachʼa bendicionapuniwa” sasa.

Isabelan arunakapajj kuntï salmonak qellqerejj siskäna ukwa amtayistu: “Tatay, jumaw jan yäqat jaqenakan mayisitap istʼasktajja, jumaw chuymachasktajja, chʼamañchaskaraktajja” (Salmo 10:17). Ukhamajj Jehová Diosar orasiskakiñatakejj walja razonanakaw utjistu.

Jesusan walja oracionanakapwa Biblian liytʼsna. Uka oracionanakatjja, discipulonakapar yatichkäna ukaw jukʼamp uñtʼatajja. ¿Kunsa uka oracionat yateqsna?