Alajjpachankir Diosan Reinopajj niyaw aka oraqjjar apnaqjjani. Jaqenakajj kusisita sumakiw jakasipjjani, kunanaktï lurapkani ukanakampis kusisitäpjjaniwa. Diosajj Jesucristoruw jaqenakar apnaqañapatak uttʼayi. Jichhürunakanjja aka oraqenkir apnaqerinakajj janiw jaqenakat llakisipkiti, ukampis Jesusajj janiw ukhamäkiti, jupajj jaqenakat llakisipuniwa. Jesusajj munasiñampipuniw apnaqani, jupajj wali munasiri, cheqapar kuns uñjiri, khuyapayasiri ukham reyïniwa (Isaías 11:4).

Paraisonjja, janiw yaqha markatätas laykusa ni yaqha kasta jañchinïtas laykus tʼaqa tʼaq sarnaqjjañäniti, jan ukasti mayachtʼataw taqenis jakasjjapjjañäni (Apocalipsis 7:9, 10). Aka oraqen jakasiri taqe jaqenakajj Diosar wal munasipjjani, jupanak puras wal munasipjjarakini. Taqeniw Diosan amtap phoqañatakejj mayachtʼat trabajipjjañäni, aka oraqsa sumwa cuidarakiñäni (Salmo 115:16).

Diosan Reinopajj apnaqjjani ukhajja, janiw thayanakasa ni lupisa aka oraqer jan waltʼayjjaniti, Diosaw taqe ukanak yäpar apnaqjjani (Salmo 24:1, 2). Jesusajj aka oraqenkkäna ukhajja, mä jachʼa thayaruw tʼakurayäna. Ukham lurasaw Diosan chʼamapampejj kunanaksa luraspa uk uñachtʼayäna (Marcos 4:39, 41). Jesucristojj apnaqjjestani ukhajja, janiw terremotonakasa ni jachʼa thayanakasa utjjaniti. Diosan Reinopanjja, jaqenakasa animalanakasa sumanwa jakasipjjani, janiw khitis aka oraq jan waltʼayjjaniti ni qʼañuchjjanisa (Oseas 2:18).

Taqeniw jan usuntas jakasiñäni. Janirakiw awkiptjjañänisa ni jiwjjañänisa (Isaías 35:5, 6). Kunjamtï qalltan Adanampi Evampejj jakapkäna ukhamarakiw jakasipjjañäni, mä suma qʼoma oraqena. Paraisonjja oraqejj wal achuni, taqenitakiw manqʼajj jilarkir utjani, kunjamtï Edén jardinan utjkäna ukhama (Génesis 2:9). Kuntï Diosajj Israel markar siskäna uka arunakaw Paraison phoqasini, Jupajj akham sänwa: ‘Jumanakajj sistʼasiñkamaw manqʼapjjäta’ (Levítico 26:4, 5).

Diosan Reinopanjja, oraqpachanwa sumankañajj utjani. Cheqaparuw taqe kunas uñjasirakini, jaqenakas munasiñampiw uñjasipjjani. Janiw guerranakajj utj-jjaniti, janirakiw khitis munañaparuki kuns lurjjaniti, kuntï necesitktan ukanakas janiw faltkistaniti. Bibliajj akham siwa: ‘Sapa mayniw uvas alipan chʼiwipar qontʼasipjjani ukhamarak higos qoqapan chʼiwipar qontʼasipjjani, jupanakarojj janiw khitis ajjsaraykaniti’ (Miqueas 4:3, 4).

Taqe familianakaw mä utanïpjjani, kuntï lurkañäni ukanakatsa kusisitäpjjañäniwa. Paraison jakasirinakajja, ‘janiw inamayakejj wali chʼam tukus trabajipkaniti’ sasaw Bibliajj qhanañchi (Isaías 65:21-23).

Bibliajj akham siwa: ‘Oraqejja Jehová Diosar uñtʼañampi phoqantatäniwa’ (Isaías 11:9). Jaqenakajja, taqe kun Luriri Jehová Diosan jan tukuskir yatiñapatwa yateqañäni, kunanaktï lurawayki ukanakatsa ukhamarakiw yateqañäni. Kuntï yateqkañäni ukampejj janiw maynit maynikam jan waltʼayaskañäniti, janirakiw armanaksa lurkañäniti. Jan ukasti kuntï yateqkañäni ukajj suman jakasiñataki, oraq cuidañatakiw yanaptʼistani (Salmo 37:11; Isaías 2:4).

Diosajj mä suma oraqe lurawayi, ukan wiñay jakassna sapürus wali kusisitässna ukwa muni (Salmo 37:29; Isaías 45:18). Ukatakejja, Diosajj ‘wiñayatakiw jiwañarojj chhaqtayjjani’ (Isaías 25:8). “Janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” sasaw Bibliajj sistu (Apocalipsis 21:4). Akapachan tʼunjatäñapat salvasipkani ukanakajja, wiñayatakiw aka oraqen jakasipjjani, walja millón jaqenakajj jaktanipkani jupanakas ukhamarakiw wiñayatak jakasipjjani (Juan 5:28, 29; Hechos 24:15).

 Jichhürunakanjja, Diosan Reinopajj apnaqjjani uka oraqen jakañatakejj walja millón jaqenakaw wakichasisipki. Pantjasiri jaqenakäpkchisa, kunjamtï Diosajj munki ukham jaqëñatakiw chʼamachasisipki. ¿Kunjamsa uk lurapjje? Jupanakajja Diosampiru jupajj khitanki uka Jesucristompir uñtʼañatakiw chʼamachasipjje (Juan 17:3).

Akapachan tukusiñapatakejj jukʼa tiempokiw faltjje. Akapachan tʼunjatäñapat salvasiñatakisa, paraison jakasiñatakisa kunsa lurañama uk yatiñ munsta ukhajja, Jehová Diosan Testigonakapampi Bibliat yatichayasim, jupanakajj ¡Wiñayatakiw kusisit jakasisma! sat librompiw gratisak yatichapjjeristam.