1. ¿Bibliajj qellqaskäna uka tiempon tʼantʼajj kunja importantënsa?

 BIBLIAJJ qellqaskäna uka tiemponjja, tʼantʼajj taqenitak wali importantënwa (Gén. 14:18; Luc. 4:4). Ukatwa awisanakajj Biblian taqe manqʼanakat parlañatakejj tʼantʼat parli (Mat. 6:11; Hech. 20:7, español arut utjki uka Biblia de estudion notap liytʼäta). Jesusan wali uñtʼat pä milagronakapajj tʼantʼa toqetarakïnwa (Mat. 16:9, 10). Ukanakat may uñjañäni, Juan capítulo 6 ukankiwa. Uka milagrot kunanaksa yateqsna uk uñjarakiñäni.

2. ¿Kunapachas walja jaqenakajj manqʼa necesitapjjäna?

² Apostolonakajj walja cheqanakan predicañ tukuyjjapjjäna ukhajja, Jesusajj jupanakampiw Galilea qotnam botet paskatäna, Betsaida marka jakʼan mä chʼusa lugararuw samartʼapjjañapatak irpäna (Mar. 6:7, 30-32; Luc. 9:10). Ukampis walja jaqenakaw Jesusan ukar sarapjjäna. Jesusajj janiw jan yäqasir jaqjam tukkänti. Antisas munasiñamp Reinot parlañatakisa usutanakar qollañatakis tiempo apstʼasïnwa. Niyakejjay jaypʼöjjchïnjja, taqe uka jaqenakajj kunsa manqʼapjjani sasaw Jesusan discipulonakapajj jisktʼasipjjäna. Yaqhepajj inas mä jukʼa manqʼa apasipjjchïna, ukampis jilapartejj uka jakʼankir jiskʼa markanakar alasir sarapjjañapänwa (Mat. 14:15; Juan 6:4, 5). ¿Kunsa Jesusajj luräna?

MÄ MILAGRO TOQEW TʼANTʼA CHURÄNA

3. ¿Jesusajj jaqenakar jan manqʼan uñjasajj kamachänsa? (Dibujo uñjjattʼarakïta).

³ Jesusajj apostolonakapar akham sänwa: “Janiw sarapjjañapajj wakiskiti. Jumanak antisas manqʼa churapjjam” sasa  (Mat. 14:16). Ukajj janiw faciläkänti, kuna laykutejj 5.000 chachanakaw ukankapjjäna. Warminakampi wawanakampejj inas mä 15.000 ukhächïna (Mat. 14:21). Andrés apostolojj akham sänwa: “Phesqa cebada tʼantʼampi pä jiskʼa chawllampi aptʼasit mä waynituw akankaski, ukampis ¿kunjamarak ukhataq jaqenakatak ukajj alcanzaspasti?” sasa (Juan 6:9). Cebadat lurat tʼantʼajj baratokïnwa, wali uñtʼatarakïnwa. Chawllanakajj inas wañächïna, jayunirakïchïna. Ukampis taqe jaqenakar manqʼayañatakejj janiw ukajj alcanzkaspänti.

4. ¿Kunanaksa Juan 6:11-13 textot yateqsna? (Fotonak uñjjattʼarakïta).

⁴ Katoqtʼasirïtap uñachtʼayañatakejja, jaqenakar grup grupo pastor qontʼasipjjañapatakiw Jesusajj mayïna (Mar. 6:39, 40; Juan 6:11-13 liytʼäta). Jupajj tʼantʼampit chawllampit Awkiparuw yuspäräna sasaw Bibliajj qhanañchi. Ukham luratapajj wali wakiskirïnwa, kuna laykutejj Jehová Diosaw manqʼa churäna. Jiwasajj sapäskchiñänisa jan ukajj compañatäskchiñänisa, Jesusat yateqasisaw janïr manqtʼaskasajj Diosar oracionan yuspärañasa. Jesusajj taqenir manqʼa churasiñapatakiw mayïna, taqeniw sistʼasiñkam manqtʼasipjjarakïna. Ukhamäkchïnsa, manqʼajj jiltʼänwa. Jesusajj janirakiw uka manqʼa jiltʼanak wartasiñap munkänti. Ukatwa apthapipjjañapatak mayïna, ukhamat qhepat manqʼañataki. Ukham lurasajja, kunanakatï utjkistu ukanak jan ina chʼusar tukjañatakiw Jesusajj yatichistu. Awk taykanakajj wawanakapar orasiña, katoqtʼasirïña, wajjtʼasirïñ yatichañatakejj Jesusan uka milagropatwa yatjjatapjjaspa.

5. ¿Jesusan milagrop uñjasajj kunsa jaqenakajj jupamp lurañ munapjjäna, ukampis kunsa Jesusajj luräna?

 ⁵ Jaqenakajj kunjamsa Jesusajj yatichäna, milagronak luräna ukanak uñjasajj wal musparapjjäna. Diosajj mä jachʼa profeta churapjjätam sasin Moisesajj siskäna uk jupanakajj yatipjjänwa. Ukhamajj uka profetajj Jesusäpachawa sasin inas amuyapjjchïna (Deut. 18:15-18). Ukhamächïna ukhajja, Jesusajj mä jachʼa gobernantëniwa, taqpach markpacharuw manqʼa churani sasin inas amuyapjjchïna. Ukatwa ‘reyit uttʼayañatak munkir jan munkir katuntañ munapjjäna’ (Juan 6:14, 15). Jesusatï iyaw saspänjja, judionakan politicaparuw mitisiskaspäna, jupanakajj romanonakamp apnaqatäpjjänwa. Ukampis janiw ukar mitiskänti. Antisas jan payachasisaw ‘qollur sapak sarjjäna’ sasaw Bibliajj qhanañchi. Janirakiw mayninakan obligañ munatas politicar mitiskänti. Ukham luratapajj wali yateqaskañawa.

6. ¿Kunjamsa Jesusat yateqasitas uñachtʼaysna? (Dibujo uñjjattʼarakïta).

⁶ Jiwasarojj janiw khitis milagro toqe mä qhawqha tʼantʼa waljar tukuyañataki jan ukajj usutanakar qollañatak maykistaniti. Janirakiw reyit uttʼayatäñs mayipkistaniti. Ukampis khititï jaqenakan amuyuparjamajj jan walinak askichkaspa ukar apoyañasataki, jan ukajj jupatak votañasatakiw chʼamañchapjjestaspa. Jesusajj uka toqet wali yateqaskañawa. Janiw politicar mitisiñ munkänti. Qhepat akham sarakïnwa: “Reinojajj janiw aka mundonkirïkiti” sasa (Juan 17:14; 18:36). Cristianonakajj  Jesusat yateqasisajj jupjam amuyañataki, lurañatakiw chʼamachasiñasa. Diosan Reinopar taqe chuymaw apoytanjja, uka toqets predicaraktanwa, oracionans jutañapatakiw mayiraktanjja (Mat. 6:10). Jesusajj mä milagro toqe tʼantʼanak waljar tukuykäna ukanakat kunanakampsa yateqsna ukanakat yatjjataskakiñäni.

“TʼANTʼANAKAT MILAGRO LURKÄNA UKAJJ KUNSA UÑACHTʼAYI”

7. ¿Kuna yaqha milagrsa Jesusajj luräna, uk uñjasajj apostolonakajj kamsapjjänsa? (Juan 6:16-20).

⁷ Jesusajj walja jaqenakar manqʼayasajja, Capernaúm markar botet kuttʼapjjañapatakiw apostolonakapar mayïna. Jupasti reyit jan uttʼayatäñatakejj qolluruw sarjjäna (Juan 6:16-20 liytʼäta). Apostolonakajj botet sarapkäna ukhajja, jachʼa thayanakampi oladanakampiw sartäna, ukatjja Jesusajj jupanakan ukarojj uma patjjnamwa saräna, apóstol Pedrorojj uka pachp lurañapatakiw mayirakïna (Mat. 14:22-31). Jesusajj botenkjjäna ukhajja, thayajj tʼakurjjänwa. Wali musparat uk uñjasajja, discipulonakajj “jumajj Diosan Yoqapäskapuntawa” sapjjänwa (Mat. 14:33). a Uka ratojj paskäna uka milagrompi, uka nayrajj walja jaqenakar manqʼaykäna uka milagrompejj kunansa niya kikpäna uk janiw discipulonakapajj amuyapkänti. Marcosajj uka toqet akham sarakiwa: “[Apostolonakajj] walpun musparapjjäna. Tʼantʼanakat milagro lurkäna ukajj kunsa uñachtʼayi ukjja janiw amuyapkänti, chuymanakapansa janirakiw ukajj qhanäkänti” sasa (Mar. 6:50-52). Cheqansa Jesusajj milagronak lurañatakejj qhawqha chʼamsa Awkipat katoqäna uk janiw amuyapkänti. Qhepatjja tʼantʼanakat milagro lurkäna uka toqetwa Jesusajj wasitamp parläna, ukhamat jupat yateqasiñasataki.

8, 9. ¿Kuna laykukis walja jaqenakajj Jesusar thaqer sarapjjäna? (Juan 6:26, 27).

⁸ Jesusajj milagro toqe manqʼaykäna uka jaqenakajja, kunanaktï munapkäna ukak thaqapjjäna. Qhepürojj uka lugarat Jesusampi apostolonakapamp sarjjapjjatap yatipjjäna ukhajja, Tiberíades markat jutir botenakar sarjjatasajj Capernaúm markaruw Jesusar thaqer sarapjjäna (Juan 6:22-24). Ukampis ¿Diosan Reinopat parlir istʼañatakit thaqer sarapjjäna? Janiw ukhamäkänti. Jupanakajj manqʼa laykukiw Jesusar arkapjjäna. ¿Kunjamatsa uk yattanjja?

⁹ Uka walja jaqenakajj Capernaúm jakʼan Jesusamp jikisipjjäna ukhajj kunas pasäna uk uñjañäni. Jupanakajj manqʼatakwa llakisipjjäna, ukwa Jesusajj qhan säna. Uka jaqenakajj ‘sistʼasiñkamas tʼantʼa manqʼapkchïnjja’, ukajj ‘tukusir manqʼakïnwa’. Ukatwa Jesusajj “wiñay jakañ churki uka jan tukusir manqʼa layku trabajipjjam” sasin chʼamañchtʼäna (Juan 6:26, 27 liytʼäta). Awkijaw uka manqʼa churapjjätam sasaw sarakïna. Wiñay jakañar apir manqʼat istʼasajj jaqenakajj wal musparapjjpachäna. ¿Ukampis uka manqʼajj kunänsa, kunjamsa jikjjatapjjarakispäna?

10. ¿Wiñay jakañ katoqapjjañapatakejj ‘Diosan kuna mayitapsa’ phoqapjjañapäna?

¹⁰ Amuyatajj uka judionakajja, Jesusajj parlkäna uka manqʼa katoqañatakejj mä trabajsa lurapjjañapäkaspa ukhamwa amuyapjjäna. Inas jupanakajj Moisesan Leyip phoqañat amuyasipkchïna, ukampis Jesusajj akham sasaw jupanakar säna: “Diosan mayitapajj akawa: khitirutï Diosajj khitanki ukar confiyapjjañamawa” sasa (Juan 6:28, 29). Wiñay jakañ katoqapjjañapatakejj khitirutï Diosajj  khitankäna ukaruw confiyapjjañapäna. Cheqas Jesusajj uka toqet parljjänwa (Juan 3:16-18, 36). Jutïrin wasitatwa uka toqet parlarakïna (Juan 17:3).

11. ¿Kunjamsa judionakajj tʼantʼa manqʼañatak llakisisipkatap uñachtʼayapjjäna? (Salmo 78:24, 25).

¹¹ ‘Diosan mayitapat’ Jesusajj yatichkäna ukjja, judionakajj janiw creyiñ munapkänti. Ukatwa akham jisktʼapjjäna: “Ukhamajj ¿kuna milagrsa jumajj luräta, ukhamat nanakajj uñjapjjañajataki, jumarus creyipjjañajataki?” sasa (Juan 6:30). Moisés tiemponjja, nayra awkinakasajj tʼantʼar uñtasit maná manqʼa katoqapjjäna sasaw sapjjarakïna (Neh. 9:15; Salmo 78:24, 25 liytʼäta). Cheqas uka judionakajj tʼantʼa manqʼañatwa llakisisipkäna. Ukatwa kuna ratutï Jesusajj ‘alajjpachankir cheqpach tʼantʼat’ parlkäna ukhajj uka arunakajj kamsañs muni, qhanañchtʼapjjeta sasajj jan sapkänti. Ukampis ukajj maná tʼantʼat sipans wiñay jakañ churir tʼantʼänwa (Juan 6:32). Uka judionakajj jañchi toqetakwa llakisisipkäna, janiw kuntï Jesusajj Jehová Diosat yatichañ munkäna uk yateqañ munapkänti. ¿Kunsa jiwasajj ukat yateqsna?

¿KUNANAKAS JIWASATAKEJJ JUKʼAMP IMPORTANTËÑAPA?

12. ¿Kunjamsa Jesusajj kunatï jukʼamp importantëki uk uñachtʼayäna?

¹² Juan capítulo 6 ukarjamajja, akanakaw jukʼamp importantëñapa: Jehová Diosar istʼaña ukat jupamp sum apasiña. Jesusajj Supayan mä yantʼapar atipjkäna ukhaw uk qhan uñachtʼayäna (Mat. 4:3, 4). Ukat Jesusajj Qollun yatichkäna ukhajja, Diosamp sum apasiñajj kunja wakiskirisa uk qhanañcharakïnwa (Mat. 5:3). Ukatwa akham jisktʼasiñasa: “Jehová Diosamp sum apasiñat sipansa, ¿jañchi toqetak llakisitajti sarnaqatajamp uñachtʼaytjja?” sasa.

13. 1) Manqʼa toqet llakisiñajj janiw jan walïkiti sasajj ¿kunatsa sissna? 2) ¿Kuna ewjjtʼarus wali amuyump istʼañasa? (1 Corintios 10:6, 7, 11).

¹³ Cheqas kunanaktï necesitktan ukanak Diosar mayiñasa, ukat ukanakamp kusistʼañas janiw jan walïkiti (Luc. 11:3). Bibliarjamajja, wali chʼama tukusin trabajitasat manqtʼasiñasa umtʼasiñasa kusisiñwa churi, ukat ukanakajj ‘cheqpach Diosatwa jutaraki’ (Ecl. 2:24; 8:15; Sant. 1:17). Ukhamäkchisa, kunanaktï necesitktan ukanakat janiw sint llakisiñasäkiti. Apóstol Pablojj niya uka pachpwa cristianonakarojj qellqarakïna. Israel markan kunanakas pasäna ukwa qellqäna, ukanakat mayajj kunatï Sinaí qollu jakʼan paskäna ukawa. “Kunanakatejj jan walïki” ukanakjja, jan israelitanakjam munapjjamti sasaw qhan ewjjtʼarakïna (1 Corintios 10:6, 7, 11 liytʼäta). Jehová Diosajj mä milagro toqew israelitanakarojj manqʼa churäna, ukampis jupanakajj ‘kunatï jan walïki’ ukaruw uk tukuyapjjäna (Núm. 11:4-6, 31-34). Vaca qallur uñtasit mä estatuar adorapkäna ukhajja, ukhamarakiw uk uñachtʼayapjjäna, jupanakajj umañampita manqʼañampita kusistʼañampitakwa llakisipjjäna (Éx. 32:4-6). Maysa toqetjja, Jerusalenasa templopas niyaw 70 maran tʼunjatäñapäna, ukatwa apóstol Pablojj cristianonakan amuyasipjjañapatakejj uka toqet parlarakïna. Jiwasajj ukhamarakiw akapachan tukusiñap jakʼan jakasktanjja, ukatwa apóstol Pablon ewjjtʼapar wali amuyump istʼañasaraki.

14. Bibliarjamajj ¿kunjamänis manqʼañanakajj machaq mundonjja?

¹⁴ Jesusajj “jichhürutak tʼantʼa churapjjeta” sasin orasiñ yatichkäna ukhajja, “alajjpachana ukhamarak aka oraqen” Diosan munañap lurasiñap tiempotwa parlarakïna (Mat. 6:9-11). Ukajj ¿kunjamaw phoqasini sasmasa? Diosan munañapajj luraskani ukan suma manqʼanakaw oraqen utjani sasaw Bibliajj  qhanañchi. Isaías 25:6-8 textonjja, Jehová Diosan Reinopan walja suma manqʼañanakaw utjani sarakiwa. Ukat Salmo 72:16 textonjja, “oraqenjja grano yapunakajj waljapunïniwa qollu patjjanakansa jilarkir waljapunïniwa” sasaw qhanañchi. Uka granonakampejj kawkïr tʼantʼatï wal gustktam ukwa lurasïta ukat yaqha ukhamanaks lurasirakïtawa, uvas yapunaksa yapuchasirakïtawa, uka uvasanakampejj suma vinonakwa lurasirakïta (Is. 65:21, 22). Cheqas oraqpachanwa uka bendicionanakajj utjani.

15. ¿Kunsa jiwatat jaktanirinakajj yateqapjjañapäni? (Juan 6:35).

¹⁵ (Juan 6:35 liytʼäta). Jesusajj mä milagro toqe chawllampi tʼantʼampi walja jaqenakar manqʼaykäna ukanakajj ¿kuna suytʼäwinïpjjesa? Jiwatat jaktanipkani ukhajja, jupanakat inas mä qhawqhanir uñtʼchiñäni. Jupanakajj janis nayrajj Jesusar confiyapkchïnjja jaktanipjjaspawa (Juan 5:28, 29). Ukampis Jesusan aka arunakapar confiyañwa yateqapjjañapäni, jupajj akham sänwa: “Nayätwa wiñay jakañ churir tʼantʼajja. Khititejj nayan ukar jutki ukajj janipuniw kunäkipansa awtjayaskaniti” sasa. Jesusajj juchampit jiwañampit jaqenakar kutsuykistu ukaruw confiyapjjañapäni, mä arunjja jupanak layku jakäwip loqtasiwayki ukar confiyapjjañapäniwa. Uka tiempon jiwatat jaktanirinakarusa, nasipkani uka wawanakarus taqeniruw Jehová Diosampit amtapampit yatichasini. ¡Jupanakar yatichasajj walpun kusisiñäni! Cheqas tʼantʼa manqʼañat sipans ukaw jukʼamp kusisiñ churistani.

16. ¿Kunanaksa jutïr yatichäwin yatjjataskañäni?

¹⁶ Akhakamajj Juan capítulo 6 ukat mä qhawqhakwa yateqawaytanjja. Ukampis Jesusajj “wiñay jakañ” toqet jukʼamp yatichäwinakanïnwa. Judionakajj uka toqet wal yatiñ munapjjäna, jiwasajj ukhamarakiw wal yatiñ munañasa. Jutïr yatichäwinjja Juan capítulo 6 ukat jukʼampinakwa yatjjataskañäni.