1, 2. Wawanakapajj Diosatsa Bibliats jisktʼapjjani ukhajj ¿kunjamsa awk taykanakajj uk uñjapjjañapa?

 WALJANIW “wawa uywañajj wali chʼamawa” sasin sapjje. Ukhamajj jumatï jiskʼa wawanakanïsta, Diosar jukʼamp confiyapjjañapatak chʼamachasiraksta ukhajja, wali ukham lurtajja (Deut. 6:6, 7). Inas jilskasajj kunarutï Bibliarjam creyktan ukanakat jisktʼapjjchistaspa, “¿kunatsa yaqhep luräwinakajj Bibliarjamajj jan walïki?” sasaw jisktʼapjjarakistaspa.

² Uk istʼasajj wawanakamajj janis Diosar confiyjjapjjaspa ukham jankʼakiw amuyapjjasma, llakisjjapjjarakismawa. Ukampis jisktʼasipjjañapapuniwa, ukhamat Diosar jukʼamp confiyañ yateqañataki (1 Cor. 13:11). Ukhamajj Diosatsa Bibliatsa jisktʼasipjjestani ukhajj janiw ajjsarayasiñasäkiti. Ukham jisktʼapjjestani ukhajj jukʼamp sum amuytʼasirïpjjatap yatichañatakiw aprovechtʼañasa.

3. ¿Kunanakatsa aka yatichäwin yatjjataskañäni?

³ Aka yatichäwinjja, kunjamsa awk taykanakajj wawanakapar Diosampir Bibliampir jukʼamp confiyapjjañapatak yanaptʼapjjaspa, Biblian mandatonakaparjam sarnaqañajj kunja wakiskirisa uk amuyañ yanaptʼapjjaspa, kunjamsa kunarutï creyipki uk qhanañchtʼañ yanaptʼapjjaspa ukwa yatjjataskañäni. Ukatjja kunatsa wawanakan jisktʼasipjjañapajj wakisi, kunarutï creyktan ukanakat parlañatakejj kunanaksa familjamajj lursna ukwa yatjjataskarakiñäni.

 DIOSAMPIR BIBLIAMPIR JUKʼAMP CONFIYAÑ YANAPTʼAPJJAM

4. ¿Kamsasas wawanakamajj jisktʼasipjjaspa, ukat kunatsa ukham jisktʼasipjjaspa?

⁴ Cristiano awk taykanakajj ak sum yatipjje: Diosar confiyañajj janiw mä herenciar uñtat katoqaskiti. Jumanakajj janiw Diosar confiyas nasipktati, wawanakamas janirakiwa. Ukatwa tiempompejj akham jisktʼasipjjaspa: “¿Diosajj cheqpachapunit utjpacha? ¿Kuntï Bibliajj siski ukar confiyiristti?” sasa. Biblia pachpaw cristianonakarojj suma amuytʼirïpjjañapataki, ‘taqe kunas ukhamapunïskiti janicha uk sum amuykiptʼapjjañapatak’ chʼamañchtʼi (Rom. 12:1; 1 Tes. 5:21). Ukhamajj ¿kunjamsa wawanakamar Diosar jukʼamp confiyapjjañapatak yanaptʼapjjasma?

5. ¿Kunjamsa Bibliar jukʼamp confiyapjjañapatak wawanakar yanaptʼasispa? (Romanos 12:2).

⁵ Kunarutï creyktan ukajj cheqäskapunitap amuytʼapjjañapatak chʼamañchtʼapjjam (Romanos 12:2 liytʼäta). Wawanakamajj jisktʼapjjätam ukhajja, kunjamsa jupanak pachpajj respuestanak jikjjatapjjaspa uk yatichapjjam. Ukatakejj Índice de las publicaciones Watch Tower ukat Jehová Diosan Testigonakapan Bibliat yatjjatapjjañapataki sat libronakampiw yanaptʼayasipjjasma. Aka qhepa libronjja, “Biblia” siski ukaruw wawanakamajj mantapjjaspa, ukat “Diosan amuytʼayatawa” siski uk thaqtapjjaspa. Ukaw Biblian jan aleq jaqenakan qellqatakïtapa, jan ukasti ‘Diosan arunakapäskapunitap’ amuyañatak yanaptʼani (1 Tes. 2:13). Nayra asiriankir Nínive markatwa yatjjatapjjasma. Nayrajja Biblia toqet yaqhep yatjjatirinakajj uka markajj janipunis utjkaspäna ukham parlapjjäna. Ukampis 1850 maranakanjja, uka markan laqayanakapwa katuwayapjje, ukajj kuntï Bibliajj siski ukajj cheqapunïskatapwa uñachtʼayäna (Sof. 2:13-15). Ukatjja kunjamsa Biblian profecianakaparjamajj Nínive markajj tukjat uñjasïna uk yatiñatakejja, “¿Yatiyätati?” sat yatichäwi liytʼapjjasma, ukajj Yatiyañataki noviembre de 2021 revistankiwa. Kuntï Bibliat apstʼat qellqatanakasajj yatichki, ukat respetat yaqha qellqatanakas yatichki uk igualtʼayasajja, kuntï Bibliajj yatichki ukarojj jukʼampiw wawanakamajj confiyapjjani.

6. Kunjamsa awk taykanakajj wawanakapar yanaptʼapjjaspa uk qhanañchtʼam. (Foto uñjjattʼarakïta).

⁶ Amuytʼasirïpjjañapatak yanaptʼapjjam. Wawanakamarojj kunayman horasanwa Bibliatsa Diosar confiyañats parltʼapjjasma. Mä museo visitkasasa, mä jardinansa, Jehová Diosan Testigonakapan mä museopar visitkasas wali sumwa parltʼasipjjasma. Mä museo visitkasajja, kunatï ukan utjki ukanakatwa  parltʼasipjjasma, jan ukajj nayra tiempon paskäna ukanakatwa parltʼasipjjasma, ukaw wawanakamarojj Biblian cheqäskapunitap amuyañatak yanaptʼaspa. Inas wawamarojj moabita qalat parltʼchisma, ukajj 3.000 maranakaniwa, Jehová Diosan sutipaw ukan uñstaraki. Uka qaljja, París (Francia) markanwa Museo del Louvre ukan uñjsna, jan ukajj internet toqew uñjaraksna. Uka qalan copiapajj Jehová Diosan Testigonakapan central mundialapan museopankiwa, “La Biblia y el nombre divino” siski uka cheqana, ukajj Warwick (Nueva York) markankiwa. Moabita qalajja, Moab markankir Mesá reyin Israel marka contra saytʼasitapwa qhanañchi. Ukajj Bibliarjamapunïskiwa (2 Rey. 3:4, 5). Kuntï Bibliajj siski ukan cheqätap pruebanakamp uñjasajja, wawanakamajj jukʼampiw Jehová Diosar confiyapjjani (2 Crónicas 9:6 liytʼarakïta).

7, 8. 1) Kunanakatï aka oraqen utjki ukanakan sumätapasa, wali suma diseñatätapas kunsa uñachtʼayistu uk qhanañchtʼam. (Fotonak uñjjattʼarakïta). 2) ¿Kuna jisktʼanakas mä Luririn utjatapar creyiñatak yanaptʼaspa?

⁷ Jehová Diosan luratanakapat amuytʼapjjañapatak yanaptʼapjjam. Campon paseykasasa jan ukajj yapun trabajkasasa, Diosan luratanakapajj kunja suma ordentʼat lurtʼatasa ukwa uñachtʼayasma. Khititï wali yatiñanïki ukaw ukanak lurtʼawaypacha sasaw amuytʼapjjarakisma. Aka oraqenjja, espiral satäki ukar uñtasit kunaymaninakaw utji, uk amuyañatakiw cientificonakajj wal yatjjatawayapjje. Nicola Fameli sat biofísico jaqejja, aka oraqen kunanakatï espiralar uñtasitäki uk uñjasajj numeronakarjam ordentʼat igualakïpjjatapwa qhanañchi, ukarojj sucesión de Fibonacci sasaw uñtʼasi. Espiralar uñtasitanakajj yaqhep galaxianakana, concha del nautilo ukana, yaqhep plantanakan hojanakapana, girasol panqaranakan pʼeqenakapana, ukat yaqha ukhamanakanwa uñjasi. a

⁸ Colegion kunanakatï aka oraqen utjki ukanakat yatjjatkasajja, wawanakamajj jukʼampinakatwa yatjjatapjjani. Khunut parltʼarakiñäni, igualakjamäpkchis kunayman uñtasitawa. Ukham lurtʼatätaparojja, fractales sasaw uñtʼasiraki. Aka oraqen ukhamanakajj waljaw uñjasi. Ukampis ¿khitis ukhamäñapatak wali sum lurtʼawayi? ¿Khitis suma ordentʼata wali suma diseñonak lurtʼawayi? Wawanakaman ukham jisktʼasipjjatapajja, Diosaw taqe kuns lurawayi sasin amuyañatakiw yanaptʼaspa (Heb. 3:4). Ukat akwa wawanakamar jisktʼapjjasma: “Diosatï lurawaychistu ukhajj ¿janit kusisit jakasiñasatakejj instruccionanaka jan ukajj mandatonak churkarakpachïstu?” sasa. Ukjjarojj “uka wakiskir instruccionanakajj Bibliankiwa” sasaw qhanañchtʼapjjarakisma.

 BIBLIAN MANDATONAKAPAJJ KUNJA WAKISKIRISA UK AMUYAÑ YANAPTʼAPJJAM

9. ¿Kunatsa wawanakamajj Bibliankir yaqhep mandatonakap phoqañjjat jisktʼasipjjaspa?

⁹ Wawanakamatï Bibliankir yaqhep mandatonakap phoqañjjat payachasipjjchi ukhajja, kunatsa ukham jisktʼasipjje uk amuyañatakiw chʼamachasipjjañama. ¿Janit Bibliankir uka mandatonakamp acuerdöpki? Jan ukajj mayninakan jisktʼatajj ¿janit kunarutï creyipki uk qhanañchañ puedipki? Kunatsa Diosan mandatonakaparjam sarnaqapjjañapajj wakisi uk amuyapjjañapatakejja, ¡Wiñayatakiw kusisit jakasisma! sat librot yatjjatañaw yanaptʼaspa. b

10. ¿Kunjamsa Jehová Diosamp jukʼamp sum apasipjjañapatak wawanakar yanaptʼasispa?

¹⁰ Jehová Diosamp sum apasipjjañapatak chʼamañchtʼapjjam. Wawanakamamp Bibliat yatjjatkasajja, ¡Wiñayatakiw kusisit jakasisma! sat libronkir jisktʼanakampi, uñachtʼäwinakamp yatjjatapjjam, ukhamat kunsa amuyapjje uk yatiñataki (Prov. 20:5). Uka libron 8 yatichäwiparjamajja, Jehová Diosajj mä suma amigomp sasiwa, jupaw jan walinakan jan uñjasiñasatakisa, taqe kunan sum sarañapatakis kunsa lursna uk amtayistu. 1 Juan 5:3 textot yatjjatasajj akham sasaw jisktʼapjjasma: “Niyakejjay Jehová Diosajj wali suma amigöchejja, ¿kun lurañastï maykistu uk kunjam chuymampis uñjañasäspa?” sasa. Ukajj aleq jisktʼakjamakïkchisa, Diosajj mandatonakap munasiñat churatap amuyañapatakiw wawanakamar yanaptʼaspa (Is. 48:17, 18).

11. ¿Kunsa wawanakaman Biblian ewjjtʼanakap jukʼamp valorapjjañapatakejj lurapjjasma? (Proverbios 2:10, 11).

¹¹ Biblian wiñay yatichäwinakaparjam sarnaqañajj kunjamsa yanaptʼistu uk parlapjjam. Juntuk Biblia liytʼasasa jan ukajj sapürutak Bibliat apstʼat texto liytʼasasa, kunjamsa Biblian yatichäwinakapajj familiamar yanaptʼawayi uk parlapjjam. ¿Trabajtʼirïñasa honradöñas kunja wakiskirisa uk wawanakamajj yatipjjeti? (Heb. 13:18). Biblian ewjjtʼanakapajj kunjamsa kʼumaräñatakisa kusisitäñatakis yanaptʼistu uks qhanañchtʼapjjarakismawa (Prov. 14:29, 30). Ukanakat parlañajja, Biblian ewjjtʼanakapar jukʼamp valorañatakiw wawanakamar yanaptʼaspa (Proverbios 2:10, 11 liytʼäta).

12. Yoqapan Biblian wiñay yatichäwinakap valorañapatakejj ¿kunsa Steve jilatampi esposapampejj lurapjje?

¹² Steve jilatampi esposapampejj 16 marani Ethan sat yoqanïpjjewa, “jiwasar munasitapatwa Jehová Diosajj leyinak churistu” sasin amuyañapatakejj ¿kunjamsa wawapar yanaptʼapjje? Jilatajj akham siwa: “Akanakwa wawajar jisktʼapjjta: ‘¿Kunatsa Jehová Diosajj aka mandator istʼañas muni? ¿Kunjamsa Biblian aka wiñay yatichäwipajj jiwasar munasitap uñachtʼayi? Ukarjam jan sarnaqkasma ukhajj ¿kunas pasaspa?’ sasa”. Uka toqenakat parltʼañajja, Jehová Diosan mandatonakap phoqañ munañatakiw Ethan waynitur yanaptʼawayi. Steve jilatajj akham sarakiwa: “Biblian ewjjtʼanakapaw jaqenakan ewjjtʼanakapat sipans jukʼamp sumajja, wawajan uk amuyañapwa munapjjta” sasa.

13. Kunjamsa wawanakarojj Biblian wiñay yatichäwinakaparjam sarnaqañ yatichasispa uk qhanañchtʼam.

¹³ Biblian wiñay yatichäwinakaparjam sarnaqañ yanaptʼapjjam. Ak amuytʼañäni, inas profesorapajj wawanakamar mä libro liyiñ maychini. Uka libron parlki uka jaqenakajj inas qʼañu juchanakan sarnaqapjjchi jan ukajj nuwasirïpjjchi. Uka jaqenakajj Biblian yatichäwinakaparjamat sarnaqapjje janicha uk amuyapjjañapatakejj jumanakaw wawanakamar chʼamañchtʼapjjasma (Prov. 22:24, 25; 1 Cor.  15:33; Filip. 4:8). Ukaw profesoranakaparusa compañer masinakaparus kuntï liytʼawayapki uka toqet parlañatak yanaptʼaspa.

KUNARUTÏ CREYIPKI UK QHANAÑCHAÑ YATICHAPJJAM

14. ¿Kuna toqet parlañas mä cristiano wayn tawaqor ajjsarayaspa, ukat kunatsa ukajj ajjsarayaspa?

¹⁴ Yaqhep cristiano wayn tawaqonakajja, awisajj kunarutï creyipki uk qhanañchañ ajjsarayasipjjaspawa. Kunatsa evolucionar jan creyipki uka toqet inas escuelan qhanañchtʼañ phenqʼasipjjchispa. Ukhamarus profesoranakajj evolucionajj cheqäskapuniwa sasaw yatichapjje. Ukhamajj kunarutï creyipki ukat jan payachasipjjañapatakejj ¿kunjamsa wawanakamar yanaptʼapjjasma?

15. ¿Kunas cristiano wayn tawaqonakarojj kunarutï creyipki ukat jan payachasiñatak yanaptʼaspa?

¹⁵ Kunarutï creyipki ukat jan payachasipjjañapatak yanaptʼapjjam. Janiw wawanakajj mä Luririn utjatapar creyipjjatapat phenqʼasipjjañapäkiti (2 Tim. 1:8). Cheqas walja cientificonakaw jakañ vidajj janiw aleq ukhamatak uñstawaykiti sasin creyipjje. Kunanakatï aka oraqen utjki ukanakan musparkañätap uñjasajja, cientificonakajj wali yatiñani mä Luririn utjatapwa amuyapjje. Ukatwa evolución yatichäwir jan creyipkiti, ukajj oraqpachankir walja escuelanakanwa yatichasi. Kuna razonanakatsa yaqha jilat kullakanakajj mä Luririn utjatapar creyipjje uka toqenakat amuytʼañaw wayn tawaqonakarojj Diosar confiyapjjañapatak yanaptʼaspa. c

16. Mä Luririn utjatapar creyipjjatap qhanañchañatakejj ¿kunjamsa wawanakar yanaptʼasispa? (1 Pedro 3:15; foto uñjjattʼarakïta).

¹⁶ Mä Luririn utjatapar creyipjjatap qhanañchtʼañ yanaptʼapjjam (1 Pedro 3:15 liytʼäta). Inas “¿Creación o evolución?” siski uka yatichäwinak jw.org cheqan yatjjatapjjchisma, ukajj “Los jóvenes preguntan” seccionankiwa. Ukat mä Luririn utjatap amuyañatakejj kunas yaqhanakar yanaptʼaspa uk wawanakamar jisktʼapjjam, ukjjarojj kunjamsa qhanañchtʼaspa uk practicapjjam. Ak amtayañamawa: janiw compañeronakapampejj jiskhisiñapäkiti. Ukampis maynitï jupar istʼañatakejj dispuestokïchi ukhajja, fácil amuykañwa jupar qhanañchtʼañapa. Inas mä compañeropajj akham sischispa: “Nayajj kuntï uñjkta ukarukiw creyta, ukampis  janiw Diosar uñjkti” sasa. Ukjjarojj akham sasaw qhanañchtʼaspa: “Mä bosquenkkasmas ukham amuytʼam. Ukankasajj qalanakamp lurtʼat mä phuju uñjtajja, uk uñjasajj ¿mayniw uk lurpacha sasajjay amuyasmajja? Ukhamajj alajjpachasa, aka oraqesa, ukan utjki ukanakas ¿janit maynin luratäkarakpacha?” sasa.

17. Kunjamsa mä compañero masipar Bibliat parlapjjañapatak wawanakar chʼamañchtʼasispa uk qhanañchtʼam.

¹⁷ Yaqhanakar Bibliat parltʼañapatak chʼamañchtʼapjjam (Rom. 10:10). Yaqhanakar Bibliat parltʼañajja, mä instrumento tukañ yateqañamp sasispawa. Qalltan chʼamakiwa, faciläki uka cancionanakakiw tuktʼasiraki, ukampis tiempompisa wal practicasas janiw chʼamäjjeti. Kunarutï creyktan uka toqet parlañajj ukamp sasirakiwa. Qalltan fácil amuykañäki uka toqetakwa parlañasa. Mä wayna jilatajj compañero masipar akham sasaw jisktʼaspa: “Kunanakatï aka oraqen utjki ukarjamaw walja ingenieronakajj kuns lurapjje, ¿uk yatiyätati? Aka videonwa ukajj uñjasi” sasa. Ukat “¿Khitin luratäpachasa?” sat seccionankir mä video uñtayaspa. Ukjjarojj akham jisktʼarakispa: “Kunanakatï aka oraqen utjki uk uñjasin mä kun luratapatjja, mä cientificorojj reconocimientow churasi, ukampis ¿janit uka reconocimientojj Diosar churasiñapäkaspa?” sasa. Inas ukhamat escuelankir compañeropajj Diosat jukʼamp yateqañ munchispa.

DIOSAR JUKʼAMP CONFIYASIPKAKIÑAPATAK YANAPTʼAPJJAM

18. ¿Kunjamsa wawanakamar Diosar jukʼamp confiyasipkakiñapatak yanaptʼapjjasma?

¹⁸ Walja jaqenakaw Jehová Diosar jan creyipkiti, uka taypinwa jaktanjja (2 Ped. 3:3). Ukhamajj awk taykanaka, wawanakamamp Bibliat yatjjatapkäta ukhajja, kunatï Diosan Arupampiru sum sarnaqañ toqet mandatonakampir jukʼamp respetañatak yanaptʼkaspa ukanak yatjjatapjjañapatak chʼamañchtʼapjjam. Jehová Diosan musparkañ luratanakapat amuytʼapjjañapatak yanaptʼapjjam. Kunjamsa Bibliankir profecianakajj phoqasiwayi uk amuyapjjañapatakis yanaptʼapjjarakim. Jukʼampis wawanakamamp chik orapjjam, jupanakatakis orarapipjjarakim. Jehová Diosar jukʼamp confiyapjjañapatak wawanakamar yanaptʼañatak chʼamachasitanakamarojj jupaw bendisipjjätam (2 Crón. 15:7).