1927 maranwa Chicago (Illinois, Estados Unidos) marka jakʼan nasta. Phesqa jila sullkäpjjayätwa: Jetha, Don, naya, ukjjarojj Karl ukat Joy. Taqeniw Jehová Diosar taqe chuym serviñ amtapjjayäta. Jetha kullakajajj 1943 maranwa payïr Escuela de Galaad ukar saräna. Don jilajarojj 1944 marana, Karl jilajarojj 1947 marana, Joy kullakajarojj 1951 maranwa Brooklyn (Nueva York) markankir Betelar invitapjjäna. Jupanakana, tataj mamajan wali yateqaskañäpjjatapajj walpun yanaptʼawayitu.

Tataj mamajarojj Biblia liyiñajj wal gustäna, Diosarus munasipjjarakïnwa, ukatwa wawanakaparojj Diosar munasiñ yatichapjjarakitäna. Ukampis Europa toqen Primera Guerra Mundialar soldadot saratapatjja, tatajajj janiw religionar respetjjänti. Tatajan utar kuttʼanjjatapat mamajajj Diosar wal yuspäräna, ukatwa tatajar akham säna: “Karl, nayrjam iglesiar sarañäni” sasa. Tatajajj akham sänwa: “Irpirismawa, ukampis janiw mantkäti” sasa. “¿Kunatsa jan mantkäta?” sasaw mamajajj jisktʼäna. Jupajj akham sänwa: “Guerranjja, pachpa religionankir pʼeqtʼirinakajj purapat nuwasir pä grupo soldadonakaruw bendisipjjäna. ¿¡Kunjamarak Diosajj uka pä grupo soldadonakar igualak yanaptʼaspänsti!?” sasa.

Mamajajj iglesiankaskäna ukhajj pä Testigonakaw utar jutapjjäna. Tatajarojj Luz sat pä libronak churañ munapjjäna, uka libronakajj Apocalipsis librot sum qhanañchtʼäna. Tatajajj uka pä libronak quedayasïnwa. Mamajajj uka libronak uñjäna ukhajj liytʼarakïnwa. Mä urojja, Luz sat libronakamp Bibliat yateqañ munirinakar jawsayatapwa periodicon liytʼäna, ukatwa sarañ amtäna. Ukar purïna ukhajja, mä jilïr warmiw jupar katoqtʼäna. Uka libronakat may uñachtʼayasajj akham sasaw jupar jisktʼäna: “Akant aka libronakat yatjjatapjjta?” sasa. “Jïsa, mantasinkakim” sasaw jupajj säna. Qhepa semanajja, mamitajajj jil kullakanakajampir nayampiruw jupan ukar irpapjjetäna. Ukhat uksarojj jan faltasisaw ukar sarjjapjjayäta.

Mä tantachäwinjja, uk sarayir mä jilataw Salmo 144:15 texto liytʼañatak mayitäna, ukanjja Jehová Diosar servirinakajj kusisitäpjjewa siwa. ¡Uka textojj wal gustitäna! Aka pä textonakampiw gustitäna: 1 Timoteo 1:11, ukan Jehová Diosajj kusisir Diosawa siwa, Efesios 5:1 textojj Diosat yateqasiñatakiw  chʼamañchistu. Ukatwa Luririj layku taqe kun lurkasas kusisitäñatak chʼamachasiyäta, jupar servitajats wal jupar yuspärarakiyäta. Uka pä amuyojj nayatak wali wakiskirïnwa.

Jakʼankir congregacionajj Chicago markankänwa, ukajj jakapkayäta ukhat 32 kilometronak jayankänwa. Ukhamäkchïnsa, tantachäwirojj sarapjjayätwa, ukhamatwa Bibliat jukʼamp yateqjjayäta. Mä kutejj Jetha kullakajaw comentäna. Uk istʼasajj akham sasaw amuytʼayäta: “Nayajj uk yatiraktwa. ¿Kunatsa ampar jan aytkpachäta?” sasa. Ukhat aksaruw tantachäwinakatak wakichtʼasjjayäta, comentjjarakiyätwa. Jukʼampis jil kullakanakaj-jamaw Diosar serviñan wal jiltayäta. 1941 maranwa bautisasirakta.

Cleveland (Ohio) markan 1942 maran apaskäna uka asambleatwa jukʼamp amtasta. Familiajasa yaqha familianakas asambleajj apaskäna uka jakʼankir carpanakanwa alojasipjjayäta. Estados Unidos markankir 50 markanakanwa jukʼamp jilat kullakanakajj teléfono toqe asamblea istʼapjjarakïna. Ukhajj Segunda Guerra Mundialänwa, Testigonak contra saytʼasiñanakajj jiljjattaskarakïnwa. Ukatwa arumanakajj autonakap campamento nayräjjar anqa toqer uñtat saytʼayapjjerïna. Sapa mayni auton arum paqar guardiat quedasiñatakiw taqeni amtapjjäna. Mä peligro amuyasajj ratukiw auton luzanakap qhantayapjjañapäna, bocina tuktʼapjjañaparakïna, ukhamat jan waltʼayañ munirinakar qhansuyañataki. Ukhamatwa mayninakajj yanaptʼir jankʼak jutapjjaspäna. Nayajj akham piensirïta: “Jehová Diosan markapajj taqe kunatak wakichtʼatawa” sasa. Janiw kuna jan walis paskänti, ukatwa seguro jikjjatasisajj sumak iktʼasiyäta.

Maranak qhepat uka asambleat amuytʼasajja, mamajan janipun ukat llaktʼasitapa, jan ajjsarayasitapwa amuyayäta. Jupajj Jehová Diosampiru markapampiruw taqe chuym confiyäna. Janipuniw wali yateqaskay sarnaqatapat armaskäti.

Uka asamblea nayrakiw mamajajj precursor regularat serviñ qalltäna. Ukatwa Diosar sapürunjam serviñ toqet parlkäna uka discursonak wali atencionamp istʼäna. Utar kuttʼasajj akham sapjjetänwa: “Precursorat serviñ munaskakiristwa. ¿Kunjamatsa utan lurañanakamp phoqkasajj ukham serviskakirista?” sasa. “¿Yanaptʼapjjetasmati?” sasaw jisktʼapjjetäna, nanakajj ukar “iyaw” sapjjayätwa. Ukatwa janïr desayunkasajj maya jan ukajj pä cuarto qʼomachañatak encargapjjetäna. Escuelar sarjjapjjayäta ukhajja, utajj suma ordentʼatati janicha ukwa revisäna, ukatsti predikiriw sarjjäna. Wali acupatäkchïnsa, janipuniw ukhamak wawanakapar jaytapkitänti. Manqʼasiñatak escuelat utar kuttʼapjjerïta ukhajja, jupajj nanak chikapunïriwa. Awisajj escuela tukuyarojj predikiriw compañapjjerïta, ukaw kunjamas precursorat serviñajj uk amuyañatak yanaptʼapjjetäna.

16 maraniw precursorat serviñ qalltta. Papitujajj janïras Testigökchïnjja, kunjamsa predikta ukwa yatiñ munäna. Mä arumajja, “wals chʼamachaskstjja, janiw maynir nayamp Bibliat yateqañapatak jikjjatkti” sasaw jupar sayäta. Mä ratojj janis kamsapkchiyätjja, akham sasaw jupar  jisktʼta: “¿Bibliat nayamp yateqañ munasmati?” sasa. Mä rat pienstʼasajj akham sitänwa: “‘Janiw’ sañatakejj janiw kuna razonas utjkituti” sasa. Tatajaw nayrïr estudiojänjja. Ukajj nayatak mä privilegiönwa.

“La verdad os hará libres” sat librot yatjjatapjjayäta. Yatjjatkasajja, Bibliat suma yatjjatirïñatakisa suma yatichirïñatakis papitujan nayar yatichaskatapwa amuyasiyäta. Mä arumajja, mä párrafo liytʼasajj akham sitänwa: “Librojj ukham siwa. Ukampis ¿kunjamatsa uka libron cheq satap yatta?” sasa. Uka jisktʼapar jaysañatakejj janiw wakichtʼatäkayätti, ukatwa akham sista: “Añchhitajj janiw kamskirismasa. Ukampis mayan yatjjatkañän ukhaw qhanañchäma” sasa. ¡Ukhampun lurayäta! Parlapkayäta uka toqet parlir mä qhawqha textonakwa katuyäta. Ukhat aksaruw jukʼamp yatjjatañ yateqawayta, ukhamatwa Bibliat yatichañatak suma wakichtʼatäjjayäta. Taqe ukanakaw papitujarus nayarus Diosar serviñan jiltañatak yanaptʼapjjetäna. Yateqkäna ukarjam sarnaqasajja, tatajajj 1952 maranwa bautisasjjäna.

17 maraniruw utat sarjjta. Uka tiemponakanjja, Jetha a kullakajajj misioneräjjänwa, Don jilajarojj Betelaruw invitapjjarakïna. Kuntï lurapkäna ukajj wal jupanakar gustäna, jupanakjamäñwa munarakiyäta. Ukatwa Betelarusa jan ukajj Galaad Escuelar sarañatakis solicitudanak phoqantayäta, ukat Jehová Diosan amparaparuw jaytjjayäta. ¿Kunas ukjjar pasäna? 1946 maran Betelaruw invitapjjetäna.

Aka maranakanjja, kunayman asignacionanakwa Betelan katoqawayta. Ukatwa waljanak yateqawayta. Ukanakat yaqhepajj libronak imprimiña, contabilidad, importación, exportación ukanaks yatichapjjarakitänwa. Ukampis 75 maranak Betelan servisajja, adoración matutina toqe yaqha discursonak toqe yatichatäñaw wal gustitu.

Karl sullka jilajats wal yateqawayta, jupajj 1947 maranwa Betelan sirvjjäna. Jupajj Bibliat sum yatjjatirïnwa, suma yatichirirakïnwa. Mä kutejj mä discurso arstʼañajäkäna ukat nayar yanaptʼañapatakiw mayiyäta. Wal investigayäta, ukampis janiw kunjamats discursoj apsuñ puedkayätti, ukwa jupar sarakiyäta. Akham sasin jisktʼasakiw yanaptʼitäna: “Joel, ¿kuna toqetsa discursomajj parli?” sasa. Ukhakiw kamsañs munaskäna uk amuytʼasiyäta: wakiski uka yanaptʼanakampikiw yanaptʼasiñajäna, yaqhanak maysaruw jaytañajäna. Janipuniw uk armkti.

Betelan kusisitäñatakejj jukʼamp sum predicañatak chʼamachasiñasawa. Ukhamtï lurañänejja,  wali chʼamañchtʼkir experiencianakaw utjistani. Ak nayajj amtasta, mä kutejj arumthapiruw Nueva York markan predicasipkayäta. Janïr predicañ qalltkasajj mä jilatampiw Yatiyañataki ukat ¡Sartapjjañäni! revistanak jaytapkayäta uka warmin ukar sarapjjayäta. Akham sasaw parlañ qalltapjjayäta: “Aka arumajj mä chʼamañchtʼkir yatiyäwit parlasipkta, ukajj Bibliankiwa” sasa. Jupajj akham sänwa: “Bibliatächi ukhajj mantanipjjam” sasa. Diosan Reinopampita, niy puriniñampïski uka machaq mundompit parlir walja textonakwa liytʼapjjayäta, yatjjatapjjarakiyäta. Ukanakan jupar gustatapwa amuyapjjayäta, kuna laykutejj jutïr semanajj walja amigonakaparuw invitatayna. Qhepat jupasa esposopas jan jitheqtasaw Jehová Diosar sirvjjapjjäna.

Casarasiñs munkchiyätjja, 10 maranak qhepatwa esposajar uñtʼayäta. ¿Kunas suma esposa jikjjatañatak yanaptʼitäna? Jehová Diosaruw yanaptʼa mayiyäta, “¿casarasjjasajj kunsa jakäwijamp lurañ munta?” sasaw jisktʼasirakiyäta.

1953 maran Estadio de los Yankees ukan asambleajj apaskäna uka qhepatjja, Mary Aniol sat mä kullakaruw uñtʼayäta. Kullakajamp chikaw Galaad Escuelankapjjatayna, panpachanejj mä pachpa lugaranakwa misionerot servipjjäna. Mary kullakajj kunja kusisitas Caribe lugaran servïna, Bibliats jaqenakar yaticharakïna uka toqenakatwa wali kusisit parltʼitäna. Jukʼamp uñtʼaskasajja, Diosar sapürunjam serviñ munapjjatajwa amuyasipjjayäta. Jukʼamp munasjjasajj abril de 1955 maranwa casarasipjjta. Mary esposajajj Jehová Diosan mä regalopänwa, nayatakejj wali yateqaskañarakïnwa. Kunayman toqetwa uk uñachtʼayäna. Kuna asignación katoqasas kusisitapunïrïnwa. Wali trabajtʼirïnwa, cheqpachapuniw mayninakat llakisirïna, Diosan Reinops nayrarupuniw uchirïna (Mat. 6:33). Kimsa maraw circuitot servipjjayäta, ukat 1958 maran Betelan serviñatakiw invitapjjetäna.

Waljanakwa esposajat yateqawayta. Ukhak casadösipkayäta ukhajja, juntuk Biblia liyiñwa amtapjjayäta, mä 15 versiculonakwa liytʼapjjayäta. Uka versiculonak liytʼasajj arstʼapjjayätwa, kunjamsa ukarjam lurapjjerista ukwa amuytʼapjjarakirïta. Walja kutiw kuntï Galaad Escuelansa jan ukajj misionerat servisas yateqkäna ukanak cuenttʼitäna. Kuntï jupat yateqkayäta ukajja, sum amuytʼasirïñataki, discursonak sum arstʼañataki, kullakanakar chʼamañchtʼañatakiw yanaptʼitäna (Prov. 25:11).

2013 maranwa esposajajj jiwjje. Machaq mundon ¡walpun jupar uñjañ munta! Ukan puriniñapkamajj yateqañ munaskaktwa, taqe chuymaw Jehová Diosar confiyañ munarakta (Prov. 3:5, 6). Machaq mundon kunsa Diosan markapajj lurani uk lupʼisajja, wali chʼamañchtʼatätwa, kusisitarakïtwa. Ukanjja, Jachʼa Yatichirisajj jan yatktan ukanakwa yatichistani, waljanakwa jupat yateqarakiñäni. Jehová Diosajj kunayman toqetwa yatichawayitu, kunja khuyapayasirisa ukwa uñachtʼayawayitu, wal yuspärkasas janiw taqe ukanakat phoqatpach yuspärañ puedkäti.