Apóstol Pablojj akham sasaw ancianökarakïna uka Timoteorojj qellqäna: “Nayajja aka arunak phoqañamatakiw Dios nayraqatansa, Cristo Jesús nayraqatansa, ajllit angelanak nayraqatansa ewjjtʼansma: janïr kuna amtar purkasajj taqe kunwa sum yatjjatañama, janirakiw khitirus arjjatañamäkiti ni yaqhachañamäkisa” sasa (1 Tim. 5:21). ¿Khitinakäpjjes uka ‘ajllit angelanakajja’?

Khitinakas jan uka taypinkapkaspa uk nayraqat amuytʼañäni. Apóstol Pablojj janiw 144.000 ajllitanakat parlkänti. Timoteor qellqkäna ukhajj janïraw ajllit cristianonakajj alajjpachar sarañatak jiwatat jaktapkänti. Apostolonakas mayni ajllitanakas janïraw espiritunakäpkänti. Ukhamajj janiw jupanakajj ‘ajllit angelanakäpkaspänti’ (1 Cor. 15:50-54; 1 Tes. 4:13-17; 1 Juan 3:2).

Janirakiw Uma Juicio tiemponkir kutkatasir angelanakäpkaspänti. Uka angelanakajj Supayaruw arkapjjäna, demonior tukusajj Jesusan enemigonakapäjjapjjänwa (Gén. 6:2; Luc. 8:30, 31; 2 Ped. 2:4). Jutïrin Jesusajj 1.000 maranakaw jupanakar mikʼayar jistʼantani, Supayamp chikaw tukjatäpjjarakini (Jud. 6; Apoc. 20:1-3, 10).

Niyakejjay uka ‘ajllit angelanakajj’ 1 Timoteo 5:21 texton Diosampi Cristo Jesusamp chik aytaschejja, Diosat jan jitheqtir angelanakäñapawa, Diosampir Jesusampir yanapirïpjjañaparakiwa.

Diosat jan jitheqtir waranq waranqa angelanakaw utji (Heb. 12:22, 23). Janiw Jehová Diosajj mä igualaks jupanakar lurañ churkaspa ukham amuyañasäkiti (Apoc. 14:17, 18). Amtañäni, mä angelakiw 185.000 soldado asirionakar jiwayañatak encargasïna (2 Rey. 19:35). Maysa toqetjja, Jesusan arunakaparjamajj mä grupo angelanakaw “Reinopan juchar puriyirinakarusa jan walinak luririnakarus apthapipjjani” (Mat. 13:39-41). Inas yaqha angelanakajj ‘jupan ajllitanakapar alajjpachar sarapjjañapatak tantachtʼapjjchini’ (Mat. 24:31). Ukat kunjamtï Salmo 91:11 texton siskejja, yaqha angelanakaruw jiwasar jarkʼaqapjjañapatak instruccionanakajj churasi (Mat. 18:10; Mateo 4:11 ukat Lucas 22:43 liytʼarakïta).

Ukhamajj 1 Timoteo 5:21 texton parlki uka ‘ajllit angelanakajja’, inas congregacionanak uñjañatak asignatäpki uka angelanakat parlaskchi. 1 Timoteo capítulo 5 ukarjamajja, Pablojj ancianonakatwa parlaskäna, jupanakar respetapjjañapatakiw jilat kullakanakar ewjjtʼaskarakïna. Maysa toqetjja, ancianonakajj ‘jan khitits arjjatasisa ni yaqhachasaw’ lurañanakap phoqapjjañaparakïna, janirakiw jankʼakejj mä amtar puripjjañapäkänti. ¿Kunatsa ukham lurapjjañapäna? Pablojj aka mä wakiskir razón qhanañchäna: ancianonakajj ‘Dios nayraqatana, Cristo Jesús nayraqatana, ajllit angelanak nayraqatanwa’ jilat kullakanakapar servisipki. Mä arunjja, Jehová Diosasa, Jesusasa, ‘ajllit angelanakas’ kunjamsa ancianonakajj congregacionankirinakar cuidasipki uk uñjasipkiwa. Ukhamajj yaqhep angelanakajj congregacionan lurañanakanïpjjewa, ukanakat yaqhepajj akanakawa: Diosan servirinakaparuw jarkʼaqapjje, predicacionan yanaptʼapjje, ukat kunanaktï uñjapki ukwa Jehová Diosar yatiyapjjaraki (Mat. 18:10; Apoc. 14:6).