¿2024 maran Yatiyañataki sat revistanakajj mistkäna ukanak liytʼawaytati? Ukhamächi ukhajj aka jisktʼanakar qhanañchtʼam:

¿Kunjamsa Jehová Diosajj warminakar uñji?

Janiw warminakat khitirus yaqhachkiti, janirakiw warminakat sipans chachanakas jilankapkaspa ukham uñjkiti. Warminakarojj istʼiwa, kunjamas chuymapan jikjjatasipjje kuna llakinakanïpjjesa uks amuyiwa, kuna lurañtï jupanakar churki uk sum phoqapjjani sasaw confiyaraki (w24.01, páginas 15 y 16).

¿Kunjamsa Efesios 5:7 texton “jan jupanakjam lurapjjamti” siski ukarjam lursna?

Apóstol Pablojj khitinakatï Jehová Diosan mandatonakapar phoqañat jarkʼkistaspa ukanakamp jan chikachasiñatakiw ewjjtʼistäna. Ukarjamajj khitinakampis chikachastan ukat amuyasiñasawa, redes sociales ukanakats amuyasiñasarakiwa (w24.03, páginas 22 y 23).

¿Kuna kʼari arunaks jan istʼañasäki?

Amigonakasajj mä suma amtampiw mä yatiyäwi apayanipjjestaspa, ukampis cheqati janicha ukajj jan yatiski ukhajj amuyasiñasawa, mä jan uñtʼatajj mä correo electrónico toq kuns apayanistu ukatsa, apóstata jaqenakajj cheqa yatichäwinak yatiñs munapkaspa ukham tukupki ukats amuyasiñasarakiwa (w24.04, página 12).

Kunjamsa Jehová Diosajj Salomón reyirusa, Sodoma ukat Gomorra markanakan jiwirinakarusa, Uma Juicion jiwirinakarus juzgani ukanakat ¿kunsa yattanjja, ukat kunsa jan yatkaraktanjja?

Jehová Diosajj wiñayatakit jupanakar tukjäna janicha uk janiw yatktanti, ukampis jupajj kunas pasäna uk sum yati, khuyaptʼayasirirakiwa (w24.05, páginas 3 y 4).

Jehová Diosajj “Qarqasawa”, ¿kunsa ukajj yatichistu? (Deut. 32:4).

Jehová Diosarojj imantassnawa. Niyakejjay promesanakap phoqerïchejja, jupajj confiykañawa. Jupajj janiw cambykiti, pachpakïskiwa, janipuniw amtanakaps cambykaspati (w24.06, páginas 26 al 28).

¿Kunas yaqha congregacionan yanaptʼistaspa?

Diosajj nayra servirinakaparjamaw yanaptʼarakitani sasin confiyañasawa. Janirakiw jichhajj sarktan uka congregacionas nayra congregacionasamp igualayañasäkiti, jichhajj sarktan uka congregacionamp chikäñatakisa yaqha amigonakanïñatakis chʼamachasiñasarakiwa (w24.07, páginas 26 al 28).

Mateo capítulo 25 ukan parlir kimsa uñachtʼäwinakat ¿kunsa yateqsna?

Ovejanakampit cabranakampit parlir uñachtʼäwirjamajj jan jitheqtiri jan jaytjasiri ukhamäñasawa. Tunka virgen tawaqonakat parlir uñachtʼäwirjamajj wakichtʼatäñasawa, amuyasiñasarakiwa. Talento qollqenakat parlir uñachtʼäwirjamajj wali trabajtʼirïñasawa (w24.09, páginas 20 al 24).

¿Salomonan templopan pórtico satäki ukajj altor qhawqchʼänsa?

Yaqhep nayra qellqatanakanjja, 2 Crónicas 3:4 textojj altorojj “120 codonakanïnwa” sasaw qhanañchi, ukajj mä torrer uñtasitas altorojj 53 metronakanïkaspa ukhamawa. Ukampis yaqha confiykañ qellqatanakanjja, “20 codonakanïnwa” sasaw qhanañchi, mä arunjja altorojj 9 metronakanïnwa. Templon perqanakaparjamajj qhep aytaski ukaw sum qhanañchi (w24.10, página 31).

“Siervo ministerialanakajj mä sapa warminikïpjjañapawa” siski ukajj ¿kamsañs muni? (1 Tim. 3:12).

Casadöki uka siervo ministerialajj mä sapa warminikïñapawa, janirakiw qʼañu juchan sarnaqañapäkiti, ni yaqha warminakarus jan wali amtanakamp uñchʼukiñapäkiti (w24.11, página 19).

Juan 6:53 textojj janiw Tatitun Cenapat parlkänti sasajj ¿kunatsa sissna?

Juan 6:53 textonjja, Jesusajj jañchip manqʼañampit wilap umañampit parläna. Uka arunakjja, 32 maranwa Galilea markan walja judionakar parläna, jupanakajj janïraw jupar confiyapkänti. Ukampis mä mara qhepat Jerusalén markan Tatitun Cenap uttʼaykäna ukhajja, khitinakatï jupamp chik alajjpachan apnaqapkani ukanakaruw parläna (w24.12, páginas 10 y 11).